ꓫꓴꓹ ꓣꓴ ꓚꓬꓴꓹ ꓣꓴ ꓟ ꓢꓳ ꓦꓲꓺ -

ꓡꓲ-ꓢꓴ ꓤꓶ (The Lisu Times) ꓗꓪ ꓐꓰ ꓫꓴꓹ ꓣꓴ ꓚꓬꓴꓹ ꓣꓴ ꓟ ꓢꓳ ꓦꓲꓺ (လွတ်မြောက်ကယ်တင်သောကျောင်း) ꓧꓳ ꓪꓴꓸ ꓟꓴ ꓢꓴ ꓟꓸ ꓒ ꓡꓯ-ꓟꓯ-ꓒꓴ ꓔꓯ ꓫꓸ ꓕꓱ ꓙ ꓡꓯ ꓘꓳ ꓟ ꓬꓰ ꓪ ꓡꓰ ꓟ ꓔꓯ ꓟꓳꓸ ꓖꓶ ꓩꓴ ꓡ ꓥꓳ=

ꓢꓳ ꓦꓲ ꓬꓲꓸ ꓟꓬꓱꓺ ꓠꓬ ꓮ ꓡꓲ ꓟꓬꓱꓺ ꓔ ꓡ?
ꓫꓴꓹ ꓣꓴ ꓚꓬꓴ, ꓣꓴ ꓟ ꓢꓳ ꓦꓲ/ လွတ်မြောက်ကယ်တင်သောကျောင်း/ Redemptive Bible School ꓕꓱ ꓡꓱ ꓥꓳꓽ ꓫꓵꓽ 3 ꓫꓵꓽ ꓗꓪ ꓐꓰ ꓬꓲꓸ ꓟꓬꓱꓺ ꓖꓶ ꓔ ꓡꓳ=

ꓮ ꓕꓯ ꓪꓴꓸ ꓔꓴ ꓗꓷ ꓟ ꓥ ꓡ?
6.7.2015 ꓗꓪ ꓪꓴ. ꓔꓴ ꓔ ꓟ ꓢꓳ ꓦꓲ ꓥꓳ꓿

ꓢꓳ ꓦꓲ ꓒꓴ ꓟ ꓔꓶ ꓙꓱ; ꓮ ꓫꓵꓽ ꓥ ꓡ?
ꓣꓳ: ꓡꓲ-ꓢꓴ ꓫꓵ: ꓗꓳ ꓡꓳ ꓗꓪ꓾ ꓦ ꓡꓱ ꓚꓱꓹ ꓗꓪ ꓟ. ꓒ:/ꓟ ꓐꓰ ꓧꓳꓽ ꓢꓴ ꓟꓴ ꓢꓴ ꓒꓬꓱ; ꓡ ꓓꓴ (Theology) ꓟꓴ ꓕꓲ. ꓢꓳ ꓦꓲ ꓮ: ꓟꓬ, ꓙꓳ ꓡꓳ꓿ ꓞꓳ ꓙꓲ ꓞꓳ ꓔꓱ, ꓢꓳ ꓦꓲ ꓮ ꓟꓬ, ꓙꓳ ꓡꓳ꓿ ꓖꓳ ꓡꓱ ꓥ ꓟꓲ ꓣꓳ.. ꓓꓰ ꓟ ꓞꓳ ꓤ:꓾
(1) ꓬ-ꓒꓲ. ꓜ: ꓢꓴ ꓢꓳ ꓖꓴ ꓟ: ꓙꓳ꓿
(2) ꓞꓳ ꓗ ꓡ ꓮ ꓐ:/ꓟ ꓟ. ꓟ: ꓓ ꓢꓴ ꓢꓳ ꓖꓴ ꓟ: ꓙꓳ꓿
(3) ꓖꓳ., ꓪꓴ: ꓒ: ꓖꓳ ꓪꓴ: ꓟ ꓢꓳ ꓔꓶ. ꓟ: ꓙꓳ꓿
(4) ꓤ: ꓛꓵ: ꓟꓶ: ꓙꓬ ꓢꓳ ꓔꓶ. ꓟ: ꓙꓳ꓿
(5) ꓫ ꓢꓴ ꓟꓷ; ꓢꓴ ꓢꓳ ꓔꓶ. ꓟ: ꓙꓳ꓿
(6) ꓢꓷ. ꓠꓲ, ꓟ: ꓡꓳ; ꓢꓴ ꓢꓳ ꓖꓴ ꓒꓲ; ꓬꓰ ꓔꓬ ꓡꓳ꓿
ꓟꓽ ꓓ ꓠꓬ꓾ ꓡꓲ-ꓢꓴ ꓫꓵ: ꓜ: ꓬꓲ; ꓓꓳ ꓬꓲ; ꓢꓴ ꓔꓯ. ꓣꓳ: ꓫꓵ: ꓘꓜꓞ ꓐꓴ ꓟ: ꓚꓬꓴ, ꓙ ꓐ ꓡ ꓢꓰ: ꓠꓬꓲ ꓪꓴ-ꓢ ꓦ ꓐꓬꓱ: ꓖꓶ: ꓡ ꓢꓲ. ꓪꓴ-ꓢ ꓟꓬꓱ: ꓕꓱ ꓟ ꓬꓰ ꓪꓴ. ꓔꓴ ꓟ ꓥ ꓡꓳ꓿

ꓢꓳ ꓦꓲ ꓮ ꓡꓰ ꓐꓰ ꓪꓴ. ꓔꓴ ꓡ ꓟ ꓙ ꓖꓴ=
ꓣꓳ: ꓫꓵ: ꓔꓯ. ꓠꓲ, ꓠꓵ ꓟ ꓗꓪ ꓐꓰ꓾ ꓦ.,꓾ ꓧꓪ:꓾ ꓞꓳ ꓫꓵ: ꓒꓲ; ꓬꓰ ꓔꓬ ꓟ ꓔꓯ. ꓡꓳ. ꓟꓳ ꓠꓬꓲ ꓠꓲꓹ ꓥꓴ ꓢꓲ꓾ ꓟꓬꓱꓽ ꓕꓱ ꓟ ꓬꓰ ꓠꓹ ꓟ ꓐꓱ ꓶ ꓐꓵ-ꓜ ꓘꓜꓞ ꓞꓳ ꓗꓪ ꓖꓪ.. ꓙꓱ ꓠꓲ, ꓧꓳ, ꓡꓰ ꓢꓲꓸ ꓪꓴꓸ ꓔꓴ ꓟ ꓥ ꓡꓳ= ꓣꓱ: ꓬꓯ; ꓟ ꓒꓴ ꓠꓬ꓾ ꓚꓲ. ꓛꓬ: ꓦꓲ ꓘꓴ: ꓗꓪ ꓐꓰ ꓢꓯ; ꓕꓵ; ꓢꓲ. ꓪꓴ-ꓢ ꓔꓯ. ꓪ: ꓘꓴ ꓢꓲ. ꓣꓱ: ꓔꓬ꓾ ꓜ: ꓔꓬ ꓡꓳ꓿

ꓢꓳ ꓦꓲ ꓗꓪ ꓐꓰ ꓬꓲ. ꓢꓶ: ꓓꓱ; ꓡ ꓟ ꓮ ꓡꓲ ꓙꓳ ꓡ?
ꓬꓲ. ꓪꓴ. ꓠꓬ ꓟꓲ-ꓚꓲ.-ꓠ ꓐꓵ-ꓜ ꓗꓪ ꓡꓰ ꓢꓳ ꓦꓲ ꓙꓳ ꓡꓳ꓿ ꓮ ꓟꓶ ꓠ: ꓢꓳ ꓦꓲ ꓮ ꓙꓵ: ꓡꓳ-ꓟꓲ: ꓟꓵ: ꓕꓲ ꓗꓴꓷꓼ ꓡꓱꓸꓼ ꓗꓪ 10 ꓟ ꓙꓳ ꓥꓳ꓿ ꓖꓳ 10 ꓟ ꓠꓬ꓾ – ꓟꓲ-ꓚꓲ-ꓠ꓾ ꓪꓮꓲ-ꓟꓳ꓾ ꓟ-ꓓꓲ-ꓡꓲ꓾ ꓑ-ꓪ꓾ ꓒꓲ-ꓟꓳ꓾ ꓔꓶ-ꓠꓮꓲ:꓾ ꓑꓴ-ꓔ-ꓳ꓾ ꓟꓳ-ꓖꓳ;꓾ ꓬꓥ-ꓖꓳꓥ꓾ ꓓ-ꓓꓮ-ꓴ ꓗꓪ ꓥ ꓡꓳ=
ꓢꓳ ꓓꓳ ꓡ ꓢꓲ. ꓪꓴ-ꓢ ꓟꓬꓱ: ꓬꓰ ꓔꓬ ꓢꓴ 40 ꓣꓳ ꓖ; ꓡꓯ; ꓖ; ꓙꓲ ꓙꓳ ꓥꓳ꓿ ꓢꓳ ꓧꓪ. ꓡꓰ ꓢꓲ. ꓬ,-ꓒꓲ. ꓜ: ꓬꓲ; ꓓꓳ ꓬꓲ ꓟ ꓗꓪ ꓐꓰ ꓧꓪ. ꓡ ꓢꓴ ꓠꓬ꓾100 ꓖ; ꓡꓯ; ꓖ; ꓙꓲ ꓙꓳ ꓥꓳ= ꓪꓴ-ꓢ ꓔꓯ. ꓫ ꓟꓳ꓿

ꓪ: ꓘꓴ ꓙ ꓘꓶꓽ ꓓꓰꓽ ꓓꓴ ꓠꓬ ꓮ ꓫꓵꓽ ꓥ ꓡ?
(1) ꓢꓳ ꓦꓲ ꓕꓱ ꓟ ꓗꓪ ꓐꓰ ꓒꓲ; ꓬꓰ ꓟ ꓦ.,꓾ ꓖꓳ ꓓꓱ:꓾ ꓞꓳ ꓫꓵ: ꓮ ꓟꓬ ꓔꓯ. ꓚꓬꓴ, ꓐ ꓡ ꓠ, ꓟ ꓪ: ꓘꓴ ꓙ꓿
(2) ꓢꓳ ꓦꓲ 10 ꓖ ꓮ ꓙꓵ: ꓗꓪ ꓦꓲ ꓫꓬ, ꓓꓳ ꓡꓰ ꓠ, ꓟ ꓪ: ꓘꓴ ꓙ꓿
(3) ꓢꓳ ꓦꓲ ꓗꓪ ꓣꓱ: ꓬꓯ; ꓟ ꓜ: ꓓꓴ ꓓꓳ ꓓꓴ ꓙꓳ ꓠ, ꓟ ꓪ: ꓘꓴ ꓙ꓿
(4) ꓟꓬꓱꓽ ꓬꓰ ꓢꓴ ꓮ ꓙꓵꓽ ꓠꓲꓹ ꓟ ꓢꓲꓽ ꓢꓲꓽ ꓫꓬ ꓫꓬ ꓟꓬꓱ: ꓬꓰ ꓐ ꓡ ꓠꓹ ꓟ ꓪ: ꓘꓴ ꓙ꓿

ꓢꓳ ꓦꓲ ꓒꓴ ꓚꓱꓹ ꓗꓪ ꓬꓲꓸ ꓜꓴ ꓐꓰ ꓗꓴꓷꓼ ꓡꓲꓽ ꓡꓳ ꓚ ꓮ ꓡꓲ ꓬꓰ ꓔ ꓡ?
(1) ꓐꓵ-ꓜ ꓘꓜꓞ ꓗꓪ ꓐꓰ ꓔꓳ, ꓙ ꓒꓵ: ꓪ: ꓕꓳ: ꓶ: ꓙꓳ ꓡꓳ꓿
(2) ꓬ,-ꓒꓲ. ꓖ: ꓜꓴ ꓜꓴ ꓓꓵ: ꓥ ꓡꓳ꓿ (မြန်မာနိုင်ငံမူးယစ်ဆေးဝါး ဆန့်ကျင်ရေးအသင်း အဖွဲ့ဝင်
(3) ꓑꓬꓲ- ꓠꓯ ꓡꓲ-ꓢꓴ ꓡꓲ: ꓒꓲ; ꓗ ꓟꓲ: ꓜꓴ ꓔꓳ, ꓙ ꓕꓳ: ꓶ: ꓙꓳ ꓡꓳ꓿
(4) ꓡꓲ-ꓢꓴ ꓛꓬ, ꓑ-ꓔꓲ ꓔꓳ, ꓙ ꓕꓳ: ꓶ: ꓙꓳ ꓡꓳ꓿
(5) ꓑꓬꓲ-ꓕꓯ.-ꓬꓰ, ꓗꓪ ꓐꓰ ꓢꓳ ꓦꓲ ꓒꓴ ꓙꓵ: ꓪ: ꓙꓳ ꓡꓳ꓿(ပြည်ထဲရေး ခွင့်ပြုချက်)

ꓢꓳ ꓦꓲ ꓧꓳꓽ ꓪꓴꓸ ꓟꓴ ꓢꓴ ꓐꓴ ꓗꓪ ꓐꓰ ꓢꓷ. ꓙ ꓟꓳ ꓙ ꓘꓶ: ꓮ ꓫꓵꓽ ꓙꓳ ꓡ?
ꓪꓴ-ꓢ ꓬꓰ ꓙ ꓟ ꓗꓪ ꓐꓰ ꓥꓪ ꓠꓴ: ꓚꓲ ꓛꓬ ꓮ ꓘꓶꓸ ꓟ: ꓐ ꓡ ꓟꓲ ꓧꓪ. ꓡꓰ ꓟ ꓮ ꓟꓬ, ꓡꓳ. ꓟꓳ ꓡꓳ꓿ ꓬꓲꓸ ꓢꓶꓽ ꓮ ꓟꓬꓹ ꓓꓱꓼ ꓓꓳ ꓡ ꓡꓳ= ꓪꓴ-ꓢ ꓠꓬ ꓓꓵ: ꓙ: ꓟꓶ ꓟꓶ ꓡꓰ ꓢꓳ ꓦꓲ ꓔꓯ. ꓛꓵ: ꓔꓴ ꓔꓬ ꓡꓳ꓿ ꓬꓰ ꓙ ꓡ ꓔꓬ ꓡꓳ꓿ ꓣꓳ: ꓡꓲ-ꓢꓴ ꓤ: ꓐꓴ ꓮ ꓟꓬ, ꓔꓯ. ꓚꓬꓴ, ꓙ ꓐ ꓡ ꓔꓬ ꓡꓳ꓿ ꓢꓯ; ꓟꓬ ꓝ. ꓟꓶ ꓡꓰ ꓢꓴ ꓮ ꓟꓬ ꓙꓳ ꓡ ꓔꓬ ꓡꓳ꓿ ꓚꓲ ꓛꓬ ꓦꓲ ꓘꓴꓽ ꓐꓰ꓾ ꓘꓹ ꓤ ꓡꓳ ꓒꓱ ꓗꓪ ꓙꓲ ꓖꓴ ꓙꓳ ꓟ ꓡ ꓞꓳ ꓐꓴ ꓒꓬꓱꓼ ꓡ ꓔꓬ ꓡꓳ= ꓣꓳ: ꓫꓵ: ꓐꓬ ꓡꓰ ꓔꓬ ꓟ ꓔꓯ. ꓠꓲ, ꓟ ꓠ ꓢꓲ. ꓔꓲ.. ꓖꓶ: ꓣꓱ: ꓙ ꓠꓲ, ꓫꓵ ꓠꓬ꓿ Kpay- 09400007342 ꓗꓪ ꓔꓲꓺ ꓖꓶ ꓓꓴ ꓬꓰ ꓩꓴ ꓡ ꓛꓲ ꓡꓳ=