2023 ꓘꓳꓼ 10 ꓦ 7 ꓠꓬꓲ ꓕꓯ ꓬꓥ-ꓖꓳꓥ ꓕꓲ ꓚꓳ ꓡꓳ ꓗꓪ ꓔꓬ ꓟ ꓡꓲ-ꓢꓴ ꓢꓳ ꓒ/ꓟ ꓐꓴ ꓙ ꓡꓯ ꓘꓳ ꓜꓲꓼ ꓓꓴ ꓬꓲꓸ ꓪꓴꓸ ꓕꓲ ꓧꓪꓸ ꓔꓯ ꓟꓳ-ꓐꓲ ꓡꓳ ꓒꓱ꓾ ꓓꓴꓠꓠ ꓙꓲ ꓔꓲꓺ ꓐꓰ ꓬꓲ ꓙꓬ ꓢꓸ ꓖꓴ ꓒ ꓕꓲ ꓗꓪ ꓙꓳˍ ꓟ ꓝꓴꓔꓢꓮꓡ ꓡꓳ ꓖꓪ ꓔꓶꓸ ꓗꓪ ꓬꓰ ꓡꓳ=
![](https://lisutimes.com/wp-content/uploads/2023/10/20231007_095957-1024x576.jpg)
ꓙ ꓡꓯ ꓘꓳ ꓜꓲꓼ ꓓꓴ ꓗꓪ ꓟꓲꓔꓹ ꓰꓐꓲꓹ ꓰꓚꓐꓢꓹ ꓟꓰꓖꓢꓔ, ꓬꓚꓚꓢꓹ ꓟꓬꓔꓢ, ꓟꓔꓮ-ꓟꓴꓢꓲꓚ ꓢꓳ ꓦꓲ ꓗꓪ ꓢꓳ ꓔꓬ ꓟ ꓡꓲ-ꓢꓴ ꓐꓴ 100 ꓟꓽ ꓞꓲ ꓜꓲꓼ ꓡ ꓡꓳ= ꓡꓲ-ꓢꓴ ꓟꓴ ꓖꓪ ꓐꓰ ꓛꓬꓸ ꓥꓳꓽ ꓛꓬꓸ ꓟ꓾ ꓡꓳ ꓖꓪ ꓓꓴ ꓬꓲꓸ ꓫꓵꓽ ꓬꓲꓸ ꓙꓰ ꓬꓰ ꓟ꓾ ꓝꓮꓲ ꓝꓴꓔꓢꓮꓡ ꓑꓲꓹ ꓡꓴꓸ ꓑꓲꓹ ꓔꓯꓺ ꓡꓯ ꓘꓳ ꓟ ꓔꓯ ꓠꓯꓼ 10 ꓙꓵꓹ ꓗꓪ ꓐꓰ ꓟꓶ ꓘꓶꓼ 3 ꓙꓵꓹ ꓗꓪ ꓛꓲ ꓬꓰ ꓓꓴ ꓙ ꓖꓶꓽ ꓔꓸ ꓟ ꓥ ꓡꓳ=
![](https://lisutimes.com/wp-content/uploads/2023/10/20231007_100125-1024x576.jpg)
“ꓗꓳ-ꓪꓰꓼ ꓠꓻ ꓓꓱꓽ ꓦꓬꓼ ꓠꓬꓲ ꓕ ꓑꓳꓸ ꓬꓥ-ꓖꓳꓥ ꓗꓪ ꓛꓲ ꓡ ꓢꓴ ꓡꓲ-ꓢꓴ ꓞꓳ ꓡꓯꓸ ꓐꓴ ꓟꓽ ꓜꓲ ꓟꓽ ꓟꓳꓻ ꓡꓯ ꓘꓳ ꓟ ꓟꓶ ꓫꓵꓻ ꓡꓰꓳ= ꓕꓲ ꓣꓳ ꓛꓳ ꓕꓲ ꓣꓳ ꓢꓷꓸ ꓡꓯ ꓘꓳ꓾ ꓪꓽ ꓡꓯ ꓘꓳ ꓓꓴ꓾ ꓪꓴꓽ ꓟꓴ ꓡ ꓚꓱꓹ ꓓꓳꓽ ꓬꓲꓸ ꓫꓵ ꓬꓲ ꓙꓰ ꓒꓬꓱꓽ ꓔꓳꓹ ꓜꓲ ꓢꓲꓸ ꓢꓷꓸ ꓡꓯ ꓘꓳ ꓠꓹ ꓟ ꓐꓱ ꓶ ꓡꓳ ꓖꓪ ꓑꓮꓲꓽ ꓕꓱ ꓟ ꓬꓰ ꓓꓳ ꓡ ꓟ ꓥꓳ= ꓕꓲꓽ ꓘꓳꓼ ꓗꓪ 2 ꓧꓪꓹ ꓬꓰ ꓠꓹ ꓟ ꓓꓵꓽ ꓙ ꓔꓸ ꓟ ꓙꓳ ꓡꓳ= ꓧꓳꓽ ꓪꓴꓸ ꓟꓴ ꓢꓴ ꓐꓴ ꓡꓯ ꓫꓵꓺ ꓖꓪ ꓙꓱ ꓢꓲꓸ ꓬꓰ ꓙꓰ ꓓꓴ ꓥꓳ” ꓐꓰ ꓜꓲꓼ ꓓꓴ ꓕꓱ ꓕꓲ ꓚꓱꓹ ꓔꓯ ꓟꓳꓸ ꓧꓳꓽ ꓪꓴꓸ ꓟꓴ ꓢꓴ ꓟꓸ ꓒ ꓢ-ꓢꓯꓸ ꓡꓰ ꓐꓯ ꓡꓳ=
![](https://lisutimes.com/wp-content/uploads/2023/10/20231007_095738-1024x576.jpg)
ꓟꓸ ꓒ ꓢ-ꓢꓯꓸ
ꓜꓲꓼ ꓓꓴ ꓪꓴꓸ ꓔꓴ ꓟ ꓗꓪ ꓢꓯꓼ ꓖꓶ ꓠꓹ ꓟ ꓟꓸ ꓒ ꓙꓬ-ꓢ-ꓬꓯꓼ ꓔꓯ ꓥ ꓟꓲ ꓘꓴ ꓔꓸ ꓢꓲ ꓫꓸ ꓕꓱ ꓢꓯꓼ ꓖꓶ ꓡꓳ= “ꓕꓱ ꓟ ꓠꓬ ꓞꓳ ꓡꓯꓸ ꓐꓴ ꓗꓪ ꓐꓰ ꓓꓵꓽ ꓙ ꓬꓰ ꓓꓳ ꓡ ꓟ ꓚꓺ ꓟꓲꓽ ꓙꓳ ꓟ ꓜꓲꓼ ꓓꓴ ꓬꓲꓸ ꓪꓴꓸ ꓕꓲ ꓧꓪꓸ (historic event) ꓥꓳ= ꓧꓳꓽ ꓢꓴ/ꓛꓳ ꓢꓴ ꓐꓴ ꓔꓯ ꓟꓬꓱꓺ ꓓꓳꓽ ꓖꓶ ꓥꓳ= ꓟꓴ ꓖꓪ ꓛꓬꓸ ꓥꓳꓽ꓾ ꓡꓳ ꓖꓪ ꓚꓱꓹ ꓐꓰ ꓝꓴꓔꓢꓮꓡ ꓡꓰꓽ ꓟꓽ ꓥ ꓥ꓾ ꓕꓱ ꓟ ꓗꓪ ꓐꓰ ꓕꓲꓽ ꓝꓸ ꓟꓬꓽ ꓠꓬꓲ ꓙꓲ ꓖꓴ ꓙꓳˍ ꓟ ꓬꓰ ꓓꓳ ꓡ ꓠꓹ ꓟ ꓢꓯꓼ ꓕꓵꓼ ꓡꓯ= ꓝꓴꓔꓢꓮꓡ ꓔꓯ ꓕꓲꓽ ꓒꓰꓸ ꓫꓵꓽ ꓢꓲꓸ ꓝꓴꓔꓢꓮꓡ ꓛꓳ ꓒꓯꓹ꓾ ꓝꓴꓔꓢꓮꓡ ꓠꓲꓹ ꓙꓽ ꓥ ꓟꓲ ꓓꓳ ꓡ ꓐ ꓡ ꓡꓳ= ꓕꓱ ꓗꓪ ꓐꓰ ꓕꓲ ꓣꓳ ꓛꓳ ꓕꓲ ꓣꓳ ꓢꓷꓸ ꓡꓰ ꓠꓬ꓾ ꓢꓷꓸ ꓠꓲꓹ ꓚꓱꓹ꓾ ꓶ ꓡꓯꓼ ꓚꓱꓹ꓾ ꓟꓬꓱꓽ ꓬꓰ ꓚꓱꓹ ꓗꓪ ꓙꓲ ꓖꓴ ꓙꓳ ꓡꓳ= ꓡꓲ-ꓢꓴ ꓐꓴ ꓠꓬ ꓢꓳ ꓢꓷꓸ ꓢꓻ ꓢꓴ ꓥ ꓡꓳ= ꓖꓳ ꓡꓱ ꓥ ꓟꓲ ꓟꓬꓱꓽ ꓕꓲꓽ ꓫꓵꓽ ꓫꓵꓽ ꓔꓯ ꓕꓶꓻ ꓕꓶꓻ 3-5 ꓘꓳꓼ ꓬꓰ ꓠꓹ ꓟ꓾ ꓜꓽ ꓪ ꓗꓪ ꓛꓲ ꓔꓳꓼ ꓢꓯꓼ ꓕꓵꓼ ꓙꓲꓽ ꓙꓳ ꓡꓳ= ꓔꓬ ꓫꓸ ꓙꓳ ꓫꓸ ꓟ ꓦꓬꓼ ꓠꓬꓲ ꓙꓵꓹ ꓗꓪ꓾ “ꓤ ꓖꓴ ꓠꓲꓹ ꓟ ꓗꓳ ꓡꓳ ꓐꓳ꓾ ꓡꓽ ꓙꓲ ꓖꓯꓼ ꓡꓯꓼ ꓕꓯꓽ ꓢꓲ ꓐꓳ” ꓢꓲꓸ ꓔꓬ ꓓꓴ ꓬꓰ ꓡꓯ꓿ ꓪꓴ-ꓢ ꓡꓰ ꓠꓴ ꓪ ꓔꓯ ꓚꓱꓹ ꓧꓳꓽ ꓟꓸ ꓖꓶ ꓝꓲ=” ꓐꓰ ꓢꓯꓼ ꓖꓶ ꓡꓳ=
![](https://lisutimes.com/wp-content/uploads/2023/10/20231007_101101-1024x576.jpg)
![](https://lisutimes.com/wp-content/uploads/2023/10/20231007_095443-1024x576.jpg)
![](https://lisutimes.com/wp-content/uploads/2023/10/image_editor_output_image993060656-1696657130129-1024x521.jpg)
“ꓡ ꓠꓹ ꓟ 2023 ꓘꓳꓼ 12 ꓦ 9 ꓠꓬꓲ ꓗꓪ ꓥ ꓟꓲ ꓲ-ꓢꓰ ꓡꓳ ꓒꓱ ꓗꓪ ꓕꓲꓽ ꓧꓪꓸ ꓜꓲꓼ ꓡꓯ ꓘꓳ ꓠꓹ ꓟ ꓖꓪ ꓙꓱ ꓪꓽ ꓡꓰꓳ” ꓐꓰ ꓟꓲꓸ ꓟꓲ ꓜꓲꓼ ꓬꓰ ꓢꓴ ꓐꓴ ꓡꓰ ꓐꓯ ꓡꓳ꓿
ꓬꓥ-ꓖꓳꓥ ꓗꓪ ꓡꓲ-ꓢꓴ ꓐꓴ ꓐꓱ ꓶ ꓒꓴ ꓔꓸ ꓟ ꓠꓬ꓾ “ꓬꓥ-ꓖꓳꓥ ꓡꓲ-ꓢꓴ ꓙ ꓡꓯ ꓘꓳ ꓜꓴ (ꓬꓡꓙ)” ꓐꓰ꓾ “ꓬꓥ-ꓖꓳꓥ ꓡꓲ-ꓢꓴ ꓕꓳ ꓶ ꓐꓰ ꓗ ꓟꓲꓽ ꓡꓲ ꓒꓰꓼ ꓜꓴ (ꓬꓡꓕꓗꓜ)” 2 ꓜꓴ ꓙꓳˍ ꓡꓳ= ꓮ ꓟꓶ ꓕꓱ ꓟ ꓠꓬ ꓢꓳ ꓒ ꓢꓳ ꓟ ꓐꓴ ꓗꓪ ꓐꓰ ꓓꓵꓽ ꓙ ꓓꓳ ꓡ ꓢꓲꓸ ꓬꓰ ꓒꓬꓱꓼ ꓡ ꓟ ꓡꓲ-ꓢꓴ ꓢꓳ ꓒ/ꓟ ꓙ ꓡꓯ ꓘꓳ ꓚꓱꓹ ꓜꓲꓼ ꓓꓴ ꓬꓲꓸ ꓫꓵꓼ ꓕꓲꓽ ꓟ ꓥ ꓡꓳ=