ꓴꓢꓮ ꓗꓴꓷꓼ 250 ꓘꓳꓼ ꓐꓲ ꓡꓰ_ ꓟ ꓚꓲ. ꓟꓶ ꓓꓴ ꓪꓴ‐ꓢ ꓢꓲ ꓫꓬ ꓕꓳ ꓶ ꓵ., ꓑꓮꓲꓽ ꓔꓯ ꓴꓢꓮ ꓗꓴꓷꓼ ꓦꓲ., ꓒꓴ ꓒꓴ ꓗꓪ ꓣꓱꓽ ꓬꓰ ꓔꓬ ꓡꓳ꓿ ꓴꓢꓮ ꓗꓴꓷꓼ ꓪꓴ. ꓓꓵ ꓙꓵꓽ ꓧꓳꓽ ꓢꓴ ꓓꓳ‐ꓠꓯ ꓕ‐ꓣ ꓥ ꓟꓲ 2 ꓚ ꓟꓲꓽ ꓕꓳ ꓶ 7ꓽ11‐22 ꓝꓲ. ꓗꓪ ꓛꓲ ꓵ., ꓔꓬ ꓟ ꓔꓯ ꓦꓲ., ꓒꓴ ꓒꓴ ꓢꓯꓼ ꓐꓬꓱ ꓗꓪ ꓟꓳ. ꓖꓶ ꓩꓴ ꓡ ꓡꓳ꓿ ꓢꓲ ꓫꓬ ꓕꓳ ꓶ ꓵ., ꓢꓴ ꓠꓬ ꓗꓴꓷꓽ ꓙꓵꓽ ꓢꓴ 500 ꓣꓳ ꓛꓲ ꓵ., ꓔꓬ ꓡꓳ ꓐꓰ ꓢꓷ. ꓪ ꓡꓳ꓿
2 ꓚꓸꓸ ꓟꓲꓽ ꓕꓳꓽ ꓶ 7:11-22
- ꓖꓳ ꓡꓱ ꓠꓬꓲ ꓢꓳ-ꓡꓳ-ꓟꓳ ꓠꓬ ꓬꓰ-ꓧꓳ-ꓧꓪ ꓢꓲ ꓫꓬ ꓦꓲˍ ꓐꓰ ꓪ ꓔꓲ ꓦꓲꓻ ꓔꓯ ꓫꓬ ꓓꓳ ꓡꓰˍ ꓡꓳ꓿ ꓢꓳ-ꓡꓳ-ꓟꓳ ꓠꓬ ꓬꓰ-ꓧꓳ-ꓧꓪ ꓦꓲ ꓠꓯꓸꓼ ꓗꓪˍ ꓐꓰ ꓬꓲ ꓚꓲ ꓛꓬ ꓦꓲ ꓗꓪ ꓬꓰ ꓠꓲꓹ ꓫꓵˍ ꓟ ꓮ ꓙꓵ꓾ ꓮ ꓫꓵ ꓟꓽ ꓘꓳ ꓟꓽ ꓟꓳ ꓧꓪꓸ ꓧꓪꓸꓼ ꓐꓰ ꓬꓰ ꓓꓳ ꓡꓰꓳ꓿
- ꓖꓳ ꓕꓯ ꓬꓰ-ꓧꓳ-ꓧꓪ ꓠꓬ ꓢ ꓘꓪ ꓕꓯ ꓢꓳ-ꓡꓳ-ꓟꓳ ꓔꓯ ꓟꓳꓸ ꓖꓶ ꓡ ꓢꓲ꓾ ꓬꓲ ꓔꓯ꓾ ꓠꓴ ꓪ ꓘꓴ ꓘꓶꓽ ꓥꓪ ꓑ ꓙ ꓗꓷꓳ꓿ ꓦꓲꓻ ꓕꓱ ꓟ ꓠꓬ ꓢꓰꓼ ꓔꓲ ꓖꓴ ꓦꓲ ꓬꓰ ꓠꓹ ꓟ ꓥꓪ ꓚꓲ ꓛꓬ ꓐꓱ ꓶ ꓢꓲꓺ ꓔˍ ꓡꓳ꓿
- ꓥꓪ ꓡꓰ ꓟꓴ ꓗꓪ ꓔꓯ ꓚꓵꓸ ꓔ ꓢꓲ ꓟꓶ ꓦ ꓟꓽ ꓦ ꓡ ꓝꓲ ꓐꓭ ꓠꓬ꓾ ꓥ ꓠꓬ ꓟꓵꓽ ꓗꓪ ꓟ ꓜ ꓪꓳ ꓡꓳ ꓪꓳ ꓔꓯ ꓜꓽ ꓖꓴ ꓡꓰ ꓝꓲ ꓠꓹ ꓟ ꓚ ꓑꓴ ꓔꓯ ꓕꓵꓼ ꓪ ꓖꓶˍ ꓐꓭ ꓠꓬ꓾ ꓥ ꓠꓬ ꓥꓪ ꓑ ꓫꓬ ꓐꓴ ꓗꓳ ꓡꓳ ꓗꓪ ꓠꓻ ꓓꓱꓽ ꓓꓳ ꓡ ꓝꓲˍ ꓠꓬ꓾
- ꓥꓪ ꓟꓬꓱꓺ ꓗꓪ ꓐꓰ ꓟꓬꓱ ꓔˍ ꓟ ꓥꓪ ꓑ ꓫꓬ ꓐꓴ ꓠꓬ ꓙ ꓣꓳ ꓢꓲ꓾ ꓪ ꓘꓴ ꓢꓲ ꓠꓬꓲ꓾ ꓥꓪ ꓒꓬꓱꓽ ꓔꓯ ꓧꓪ ꓢꓲ ꓬꓲ ꓪ ꓥꓶˍ ꓟ ꓚꓱꓹ ꓗꓪ ꓐꓰ ꓒꓳꓹ ꓬꓲꓼ ꓡˍ ꓐꓭ ꓠꓬ꓾ ꓥꓪ ꓠꓬ ꓟꓴ ꓗꓪ ꓕꓯ ꓢꓲ ꓗꓪ ꓐꓰ ꓠ ꓠꓹ ꓢꓲ꓾ ꓬꓲ ꓪ ꓝꓴꓲ ꓖꓽ ꓖꓶ ꓢꓲ ꓠꓬꓲ꓾ ꓬꓲ ꓪ ꓟꓵꓽ ꓔꓯ ꓓꓻ ꓡꓰ ꓝꓲˍ ꓥꓳ꓿
- ꓮ ꓟꓶ ꓕꓱ ꓡꓱ ꓖꓳ ꓑꓳ ꓦꓲꓻ ꓕꓱ ꓟ ꓗꓪ ꓪ ꓘꓴˍ ꓟ ꓔꓯ ꓠ ꓠꓹ ꓠꓹ ꓟ꓾ ꓥꓪ ꓟꓬ ꓢꓶ ꓒꓴ ꓔ ꓢꓲ꓾ ꓥꓪ ꓠ ꓑꓳˍ ꓟꓲ ꓒꓳꓹ ꓞˍ ꓥꓳ꓿
- ꓮ ꓡꓲꓳ ꓐꓯ ꓠꓬ ꓕꓱ ꓕꓲ ꓦꓲ ꓗꓪ ꓥꓪ ꓟꓬꓱꓺ ꓕꓲ ꓞꓲ ꓕꓲ ꓑ ꓓꓹ ꓝꓲ ꓠꓹ ꓟ꓾ ꓥꓪ ꓡꓰ ꓦꓲꓻ ꓕꓱ ꓟ ꓔꓯ ꓢꓲꓺ ꓔ ꓢꓲ꓾ ꓢꓲ ꓫꓬ ꓡꓰ ꓝꓲˍ ꓡꓳ꓿ ꓥꓪ ꓟꓬ ꓢꓶˍ ꓐꓰ ꓥꓪ ꓠꓲꓹ ꓟ ꓠꓬ ꓕꓲ ꓞꓲ ꓕꓲ ꓑ ꓖꓳ ꓗꓪ ꓥꓳꓺ ꓔꓬˍ ꓥꓳ꓿
- ꓠꓴ ꓔꓯ ꓐꓯ ꓠꓽ꓾ ꓠꓴ ꓠꓬ ꓠꓴ ꓐꓹ ꓐ ꓓ-ꓪꓵ ꓫꓱꓽˍ ꓟˍ ꓡꓰ ꓐꓰ ꓥꓪ ꓟꓲ ꓙꓬ ꓗꓪ ꓫꓱꓽ ꓢꓲ꓾ ꓥꓪ ꓡꓰ ꓠꓴ ꓔꓯ ꓖꓶ ꓗꓷ ꓟ ꓕꓵꓼ ꓪ ꓥ ꓕ ꓑꓳ ꓔꓯ ꓒꓵꓽ ꓛꓳ ꓢꓲ ꓠꓬꓲ꓾ ꓥꓪ ꓙꓵꓽ ꓗˍ ꓐꓰ ꓥꓪ ꓙꓵꓽ ꓚꓱꓹ ꓔꓯ ꓛꓳˍ ꓐꓭ ꓠꓬ꓾
- ꓥꓪ ꓠꓬ ꓠꓴ ꓐꓹ ꓐ ꓓ-ꓪꓵ ꓔꓯ ꓖꓶ ꓙ ꓟꓳˍ ꓟ ꓔꓯ ꓛꓳ ꓢꓲ꓾ ꓠꓴ ꓗꓴꓷ ꓙꓵꓽ ꓠꓬꓲ ꓕꓲ ꓔꓯ ꓕꓶꓻ ꓡꓰ ꓝꓲˍ ꓥꓳ꓿ ꓮ ꓡꓲꓳ ꓐꓯ ꓠꓬ ꓥꓪ ꓡꓰ ꓓ-ꓪꓵ ꓔꓯ꓾ ꓬꓲ-ꓢꓷ-ꓡꓰ ꓡ ꓞꓳ ꓔꓯ ꓙꓵꓽ ꓠꓹ ꓟ ꓠꓴ ꓞꓲ ꓤ ꓡꓯ ꓤ ꓕꓲ ꓣꓳ ꓟꓽ ꓙꓳ ꓐꓰ ꓟꓽ ꓗꓷ ꓡꓰ ꓝꓲ꓾ ꓐꓰ ꓬꓲˍ ꓐꓰ ꓘꓶ ꓫꓵ ꓬꓰ ꓗꓷꓳ꓿
- ꓖꓳ ꓡꓱ ꓥˍ ꓟꓲ ꓠꓴ ꓠꓬ ꓥꓪ ꓡꓰ ꓠꓴ ꓟꓲ ꓕꓯ ꓗꓪ ꓗꓶ ꓔˍ ꓟ ꓥꓪ ꓙꓵꓽ ꓚꓱꓹˍ ꓐꓰ ꓥꓪ ꓕꓵꓼ ꓪ ꓔꓯ ꓟꓽ ꓒꓵ ꓛꓳ ꓢꓲ꓾ ꓠꓱ ꓐꓯ ꓢꓲꓺ ꓔꓯ ꓣꓱꓽ ꓙ ꓙꓰ ꓢꓲ ꓠꓬꓲ꓾ ꓬꓲ ꓪ ꓔꓯ ꓪꓴ ꓓꓵ ꓕꓱꓼ ꓠꓹ ꓟ ꓒꓳꓹ ꓙꓰˍ ꓐꓭ ꓠꓬ꓾
- ꓥꓪ ꓡꓰ ꓬꓲ-ꓢꓷ-ꓡꓰ ꓐꓴ ꓔꓯ ꓖꓶ ꓗꓷ ꓟ ꓟꓵꓽ ꓗꓪ ꓐꓰ ꓬꓲ ꓪ ꓔꓯ ꓚꓵꓹ ꓩꓴ ꓗꓷ ꓢꓲ꓾ ꓥꓪ ꓟꓬꓱꓺ ꓐꓱ ꓶ ꓥꓪ ꓡꓰ ꓢꓲ ꓫꓬ ꓡꓰ ꓝꓲˍ ꓟ ꓦꓲꓻ ꓕꓱ ꓟ ꓔꓯˍ ꓟꓲ ꓥꓪ ꓒꓬꓱꓽ ꓕꓯ ꓗꓪ ꓐꓰ ꓡꓳ ꓩꓴ ꓗꓷˍ ꓥꓳ꓿ ꓞꓳ ꓫꓵ ꓐꓴ ꓗꓳ ꓡꓳ ꓗꓪ ꓟ ꓥꓳꓽ ꓙꓱˍ ꓐꓰ ꓤꓲꓺ ꓓꓴ ꓒꓬꓱꓼ ꓡ ꓝꓲˍ ꓥꓳ꓿
- ꓦꓲꓻ ꓕꓱ ꓟ ꓠꓬ ꓓꓳꓹ ꓟꓴ ꓔˍ ꓟ ꓥˍ ꓟꓲ꓾ ꓗꓳꓸ ꓙꓰ ꓢꓴ ꓥ ꓕ ꓑꓳ ꓠꓬ ꓓꓵ ꓙ ꓟꓶ ꓡꓰ ꓢꓲ꓾ ꓬꓰ-ꓧꓳ-ꓧꓪ ꓠꓬ ꓮ ꓫꓵ ꓑꓶ ꓓꓴ ꓟꓵꓽ ꓕꓱ ꓟˍ ꓐꓰ ꓦꓲꓻ ꓕꓱ ꓟ ꓔꓯ ꓕꓱ ꓡꓱ ꓬꓰˍ ꓡꓺꓽ꓾ ꓐꓰ ꓐꓯ ꓡꓯ ꓘꓳˍ ꓥꓳ꓿
- ꓬꓲ ꓪ ꓡꓰ ꓒꓳꓹ ꓖꓶ ꓢꓲ꓾ ꓬꓲ ꓪ ꓒꓵꓽ ꓒ ꓐꓴ ꓔꓯ ꓬꓲ-ꓙꓲ ꓟꓵ ꓗꓪ ꓐꓰ ꓧꓳꓽ ꓓꓳ ꓡ ꓢꓴ ꓬꓰ-ꓧꓳ-ꓧꓪ ꓬꓲ ꓪ ꓪꓴ-ꓢ ꓔꓯ ꓬꓲ ꓪ ꓡꓳꓺ ꓗꓷ ꓢꓲ꓾ ꓠꓱ ꓐꓯ ꓢꓲꓺ ꓔꓯ ꓘꓳ ꓣꓴ ꓢꓲ ꓠꓬꓲ꓾ ꓖꓳ ꓟ ꓔꓯ ꓪꓴ ꓓꓵ ꓕꓱꓼ ꓢꓲ ꓣꓱ ꓙ ꓙꓰˍ ꓡꓳ꓿ ꓖꓳ ꓡꓱ ꓠꓬꓲ ꓪꓴ-ꓢ ꓡꓰ ꓥꓶˍ ꓟ ꓕꓱ ꓟꓬ ꓫꓵꓽ ꓮ ꓙꓵ ꓬꓲ ꓪ ꓕꓯ ꓢꓲ ꓗꓪ ꓬꓯꓼ ꓡ ꓝꓲˍ ꓡꓳ꓾ ꓐꓰ ꓐꓯˍ ꓥꓳ꓿
