ꓡꓲ-ꓢꓴ ꓤꓶꓻ (the Lisu Times) ꓡꓰ ꓧꓳꓽ ꓪꓴꓸ ꓟꓴ ꓢꓲꓸ ꓓꓳꓽ ꓵꓺ ꓢꓲꓸ ꓙꓲˍ ꓟ ꓟꓬꓱꓽ ꓬꓰ ꓡꓯ ꓐꓯˍ ꓟ ꓟꓬꓱꓽ ꓚꓱꓹ ꓬꓲꓸ ꓪꓴꓸ ꓕꓲ ꓧꓪꓹ ꓬꓰ ꓪ ꓡꓰꓳ꓿
2022 ꓘꓳꓼ 5 ꓦ 26 -28 ꓠꓬꓲ ꓟ ꓘꓴꓽ ꓗꓪ ꓑꓴ-ꓔ-ꓳ ꓟꓵꓽ ꓗꓪ ꓔꓬ ꓟ ꓫꓸ ꓢꓴ ꓟꓶ ꓛꓵꓽ ꓟꓶ ꓬꓲꓻ ꓞꓳ ꓟꓳꓽ (10) ꓣꓳ ꓔꓯ ꓕꓲ ꓣꓳ 50,000 ꓒꓯꓼ ꓬꓲꓸ ꓪ ꓡꓯ ꓒꓯꓹ ꓗꓪ ꓒ ꓛꓲ ꓖꓶꓽ ꓪ ꓡꓰ ꓟ ꓥ ꓡꓳ꓿
(ꓐꓬꓱꓽ ꓔꓯ ꓠꓱꓸ ꓐꓯꓼ ꓗꓪ ꓣ3ꓽ ꓟꓽ ꓓ꓿ @all rights reserved)
“ꓕꓱ ꓟ ꓠꓽ ꓠꓰ ꓡꓲ-ꓢꓴ ꓤꓶ ꓗꓪ ꓐꓰ ꓬꓲꓸ ꓪꓴꓸ ꓕꓲ ꓧꓪꓹ ꓙꓲˍ ꓟ ꓟꓬꓱꓽ꓾ ꓫꓱꓸ ꓤ ꓟꓬꓱꓽ ꓬꓰ ꓩꓴ ꓡ ꓟ ꓥꓳ꓿ the Lisu Times ꓗꓪ ꓟꓬꓱꓽ ꓬꓰ ꓢꓴ ꓐꓴ ꓮ ꓘꓶꓸ ꓢꓯꓼ ꓕꓵꓼ ꓢꓲꓸ ꓬꓰ ꓒꓬꓱꓼ ꓡ ꓟ ꓥꓳ ꓐꓰ ꓕꓲ ꓔꓱꓹ ꓗꓪ ꓐꓯ ꓓ ꓡꓳ꓿ ꓝꓮꓲ ꓕꓲꓽ ꓔꓱꓹ ꓗꓪ ꓠꓬ the Lisu Times ꓗꓪ ꓐꓰ ꓬꓰ ꓓꓳ ꓩꓴ ꓡ ꓟ ꓓꓳꓽ ꓕꓳ ꓶ ꓵꓺ꓾ ꓐꓬꓱꓽ ꓢꓯꓸ ꓡꓳꓸ ꓙ ꓢꓴ ꓮ ꓙꓵꓽ ꓡꓰ Advertisements ꓥꓰꓸ ꓙ ꓩꓴ ꓡ ꓟ ꓗꓪ ꓐꓰ ꓥ ꓡꓳ꓿ ꓖꓳ ꓟ ꓑꓶꓸ ꓓꓴ the Lisu Times ꓗꓪ ꓐꓰ ꓫꓱꓸ ꓤꓼ ꓟꓬꓱꓽ ꓬꓰ ꓙ ꓪ ꓬꓰˍ ꓟ ꓠꓬ ꓣꓳꓽ ꓮ ꓙꓵꓽ ꓢꓴ ꓠꓰ ꓬꓰ ꓙ ꓪ ꓬꓰˍ ꓟ ꓥ ꓡꓳ꓿ ꓮ ꓙꓵꓽ ꓢꓴ ꓪꓽ ꓡꓯ ꓘꓳ ꓢꓲꓸ ꓢꓯꓼ ꓕꓵꓼ ꓠꓬ ꓫꓱꓸ ꓤꓼ ꓟꓬꓱꓽ ꓐꓰ ꓝꓮꓲꓹ ꓡ ꓠꓹ ꓟ ꓗꓪ ꓫꓵꓽ ꓪꓴꓽ ꓟꓴ ꓡ ꓟꓬꓱꓽ ꓥ ꓟꓲ ꓬꓰ ꓐ ꓡ ꓓꓴ ꓥꓳ ꓐꓰ ꓥꓳ ꓡꓳꓸ ꓔꓬ ꓥꓳ” ꓐꓰ ꓡꓲ-ꓢꓴ ꓤꓶ ꓔꓶꓺ ꓧꓳꓽ ꓢꓴ ꓮ-ꓓꓶꓸ-ꓙꓬꓽ ꓡꓰ ꓐꓯˍ ꓡꓳ꓿
ꓡꓲ-ꓢꓴ ꓤꓶꓻ (the Lisu Times) Website ꓗꓪ ꓓꓳꓽ ꓵꓺ_ ꓕꓯꓽ Advertisements (Ads) ꓡꓳꓸ ꓟꓳ ꓡ ꓥꓳ꓿ ꓖ ꓑꓳꓸ ꓙꓳ ꓑꓳꓸ ꓫꓴꓹ ꓢꓲꓸ Advertisements ꓔꓯ ꓡꓳꓸ ꓙ꓾ ꓥꓰꓸ ꓙ ꓠꓬ꓾ ꓖꓳ ꓗꓪ ꓐꓰ ꓒꓴ ꓓꓵꓽ ꓡ ꓠꓹ ꓟ ꓬꓲꓸ ꓚꓱꓹ ꓝꓰꓸ ꓔꓸ ꓟ ꓥ ꓡꓳ꓿
“ꓫꓸ ꓟꓳ ꓐꓯ ꓖꓴ ꓟꓽ ꓓꓻꓳ ꓟ꓿ ꓥ ꓬꓲꓸ ꓜꓻ ꓡꓲꓸ ꓟꓽ ꓚꓸ ꓦꓹ ꓢꓴ ꓠꓰ ꓢꓲꓸ ꓢꓲꓽ ꓢꓲꓽ ꓬꓰ ꓙ ꓡ ꓠꓰ ꓡꓯꓼ ꓫꓴ ꓟꓶ ꓝꓲ ꓟꓽ꓿ ꓮ ꓫꓵꓽ ꓧꓪˍ ꓟꓲ ꓶꓼ ꓛꓳ ꓝꓲ” ꓐꓰ ꓟ-ꓕꓹ (82 ꓘꓳꓼ) ꓡꓰ ꓐꓯˍ ꓡꓳ꓿
“ꓬꓰ ꓙ ꓠꓲꓹ ꓟ ꓙꓳˍ ꓡꓲꓸ ꓚꓲꓸ ꓛꓬ ꓐꓱ ꓶˍ ꓡꓰꓽ ꓢꓯꓼ ꓕꓵꓼ ꓠ ꓗꓷ ꓡꓰ ꓠꓬꓲ ꓫꓸ ꓢꓴ ꓞꓳ ꓟꓳꓽ ꓐꓴ ꓔꓯ ꓮ ꓫꓵꓽ ꓬꓰ ꓙ ꓟꓽ ꓐ ꓡ ꓔꓬ ꓗꓳꓸ ꓡ ꓟ 40 ꓘꓳꓼ ꓡꓳꓼ ꓡ ꓪ꓿ ꓮ ꓟꓶ ꓡꓲ-ꓢꓴ ꓤꓶꓻ ꓗꓪ ꓐꓰ ꓒꓴ ꓓꓵꓽ ꓡ ꓚꓱꓹ ꓝꓰꓸ ꓢꓲꓸ ꓬꓲꓸ ꓪꓴꓸ ꓧꓪ ꓟꓶˍ ꓟ ꓒꓴ ꓔꓯ ꓫꓸ ꓢꓴ ꓟꓶꓽ ꓛꓵꓽ ꓟꓶ ꓬꓲꓻ ꓟꓳꓽ (10) ꓣꓳ ꓡꓯ ꓒꓯꓹ ꓗꓪ ꓡꓯꓽ ꓙꓱ ꓪ ꓬꓰ ꓠꓬꓲ ꓮ ꓘꓶꓸ ꓠꓲꓹ ꓟ ꓢ ꓬꓰꓳ꓿ ꓕꓱ ꓟ ꓠꓬ ꓪꓴꓸ ꓔꓴˍ ꓟ ꓥꓳ꓿ ꓡꓯ ꓫꓵ ꓢꓯꓼ ꓕꓵꓼ ꓓꓴ ꓥꓳ꓿ ꓣꓳ ꓠꓬꓹ ꓣꓳ ꓕꓲ ꓞꓲꓼ ꓟ ꓗꓪ ꓓꓳꓽ ꓵꓺ ꓢꓲꓸ ꓙꓲˍ ꓟ ꓟꓬꓱꓽ ꓬꓰ ꓐ ꓡ ꓪ꓿ ꓡꓲ-ꓢꓴ ꓐꓴ ꓢꓯꓼ ꓕꓵꓼ ꓵꓺ ꓙ ꓡꓯ꓿ ꓪꓴꓽ ꓟꓴˍ ꓟ ꓗꓴꓷꓼ ꓗꓪ ꓔꓬ ꓢꓴ ꓐꓴ ꓚꓲꓸ ꓛꓬ ꓤ ꓠꓱ ꓐꓴ ꓔꓯ the Lisu Times ꓗꓪ ꓡꓲ-ꓢꓴ ꓥꓳꓽ ꓵꓺ ꓢꓳ ꓝꓲ ꓡꓯ꓿ ꓵꓺ ꓔꓯꓺ ꓡꓯ ꓘꓳ ꓡꓯ꓿ VPN ꓣꓱꓽˍ ꓠꓬ ꓴꓢꓮ ꓗꓪ ꓛꓹ ꓓꓴ ꓬꓰ ꓡꓯ꓿”” ꓐꓰ ꓡꓲ-ꓢꓴ ꓤꓶꓻ ꓗꓪ ꓟꓬꓱꓽ ꓬꓰ ꓢꓴ ꓕꓲ ꓣꓳ ꓡꓰ ꓐꓯ ꓡꓳ꓿
ꓡꓲ-ꓢꓴ ꓤꓶ ꓠꓬ ꓡꓲ-ꓢꓴ ꓐꓴ ꓐꓱ ꓶ ꓟꓬ ꓢꓶꓽ ?꓾ ꓠꓸ ꓑꓳ ? ꓐꓰ ꓟꓷ ꓠꓷꓹ ? ꓒꓬꓱꓼ ꓡ ꓠꓹ ꓟ꓾ ꓡꓲ-ꓢꓴ ꓥꓳꓽ ꓫꓸ ꓪ ꓝꓳꓹ ꓔꓯ ꓫꓺ ꓒꓵꓽ ꓟ ꓐꓰ꓾ ꓪꓴꓽ ꓟꓴ ꓡ ꓠꓹ ꓟ ꓠꓲꓹ ꓡꓱ ꓢꓴ ꓐꓴ ꓡꓰꓽ ꓒꓴ ꓫꓵꓺ꓾ ꓢꓷꓸ ꓠꓲꓹ ꓐꓰ ꓬꓲꓸ ꓙꓵꓹ ꓮ ꓟꓬꓹ ꓖꓶꓽ ꓢꓲꓸ ꓢꓯꓼ ꓕꓵꓼ ꓔꓬ ꓟ꓾ ꓴꓢꓮ ꓗꓪ ꓬꓲꓸ ꓡꓲꓽ ꓡꓳ ꓚ ꓬꓲꓸ ꓚꓰꓺ ꓔꓶ ꓔꓸ ꓟ ꓓꓳꓽ ꓐꓯ ꓒꓬꓱ ꓜꓴ ꓕꓲꓽ ꓟ ꓥ ꓡꓳ꓿
?|ꓪꓴꓸ ꓡꓯ ꓘꓳ ꓩꓴ ꓡ ꓟ ꓘꓶꓽ꓾||ꓗꓳ ꓟꓵꓽ ꓗꓪ ꓒꓴ ꓢꓯꓼ ꓗꓸ ꓟꓽ ꓘꓳꓽ ꓮ ꓘꓶꓸ ꓫꓸ ꓔꓬ ꓟ ꓞꓳ ꓟꓳꓽ ꓟꓶꓽ ꓛꓵꓽ ꓟꓶ ꓬꓲꓻ ꓐꓴ ꓡ ꓚꓸ ꓕꓲ ꓕꓱꓹ꓾ ꓞꓼ ꓐꓳ ꓕꓲ ꓕꓴꓽ ꓪꓴꓻ ꓪ ꓡꓲꓸ ꓪꓴꓻ ꓪ ꓝꓲ꓾ ꓡꓲ-ꓢꓴ ꓤꓶꓻ ꓠꓰ ꓕꓲ ꓞꓲꓼ ꓗꓪ ꓕꓲ ꓧꓪꓹ ꓬꓰ ꓙ ꓪ ꓠꓹ ꓟ ꓢꓯꓼ ꓕꓵꓼ ꓔꓬ ꓡꓳ꓿ ꓕꓱ ꓟ ꓠꓬ ꓬꓲꓸ ꓪꓴꓸ ꓛꓲ ꓕꓳꓼ ꓕꓲꓽ ꓕꓳꓼ ꓥ ꓡꓳ꓿ ꓙꓲˍ ꓟ ꓟꓬꓱꓽ ꓕꓱ ꓟ ꓗꓪ Ads ꓥꓰꓸ ꓙˍ ꓟ ꓡꓰꓽ ꓟꓽ ꓞꓲ꓾ ꓒꓴ ꓔꓳꓹ ꓙ ꓔꓲꓺ ꓖꓶ ꓠꓲꓹ ꓫꓵ ꓢꓴ ꓥ ꓟꓲ ꓙ ꓡꓯ ꓘꓳ ꓡꓯ꓿ ꓫꓸ ꓟꓳ ꓪ꓿ (ꓕꓱ ꓗꓪ ꓟ ꓐꓬꓱꓽ ꓔꓯ ꓠꓬ ꓠꓱꓸ ꓐꓯꓼ ꓗꓪ ꓣꓱꓽ ꓟꓽ ꓓ꓿)||?
