2021 ꓘꓳꓼ 10 ꓦ 30 ꓠꓬꓲ ꓗꓪ ꓛꓲ ꓑꓴ-ꓔ-ꓳ ꓟꓵꓽ ꓗꓪ ꓗꓳ-ꓪꓰꓼ ꓠꓻ ꓫꓵꓽ ꓧꓪ ꓟꓶ ꓢꓴ 562 ꓣꓳ꓾ ꓠꓻ ꓫꓬꓹ ꓓ ꓡꓰ ꓢꓴ 497 ꓣꓳ꓾ ꓠꓯ ꓞꓲꓼ ꓦꓲ ꓗꓪ ꓠꓻ ꓫꓬꓹ ꓔꓬ ꓢꓰꓽ ꓢꓴ 57 ꓣꓳ꓾ ꓫꓵꓻ ꓢꓴ 8 ꓣꓳ ꓙꓳ ꓡꓰꓳ ꓐꓰ ꓠꓯ ꓞꓲꓼ ꓟꓬꓱꓽ ꓬꓰ ꓢꓴ ꓐꓴ ꓗꓪ ꓐꓰ ꓢꓷꓸ ꓡ ꓡꓳ=
ꓕꓱ ꓟ ꓠꓬ ꓠꓯ ꓞꓲꓼ ꓦꓲ ꓗꓪ ꓐꓰ ꓠꓯ ꓞꓲꓼ ꓟꓬꓱꓽ ꓬꓰ ꓢꓴ ꓐꓴ ꓡꓰ ꓚꓲꓸ ꓚ ꓟꓶ ꓟ ꓥ ꓢꓲ꓾ ꓠꓯ ꓞꓲꓼ ꓦꓲ ꓗꓪ ꓟꓽ ꓡ ꓛꓲ ꓡ ꓟ꓾ ꓕꓲ ꓘꓹ ꓡꓲꓸ ꓕꓲ ꓘꓹ ꓗꓪ ꓠꓻ ꓔꓬ ꓢꓴ ꓐꓯ ꓖꓴ ꓟꓽ ꓓ ꓙꓳ ꓡꓳ ꓐꓰ ꓢꓷꓸ ꓡ ꓡꓳ=
“ꓑꓴ-ꓔ-ꓳ ꓟꓵꓽ ꓢꓴ ꓠꓽ ꓠꓯ ꓞꓲꓼ ꓦꓲ ꓗꓪ ꓙꓰ ꓟꓽ ꓫꓳ= ꓠꓻ ꓫꓵꓻ ꓡ ꓘꓶꓽ ꓗꓪ ꓢꓲꓸ ꓙꓰ ꓫꓳꓹ_ ꓓꓴ ꓟ= ꓳꓸ ꓟ ꓠꓽ ꓠꓴ ꓪ ꓖꓶ ꓢꓷꓸ ꓔꓸ ꓠꓯꓸ ” ꓐꓰ ꓗꓳ-ꓪꓰꓼ ꓠꓻ ꓢꓴ ꓔꓯ ꓬꓰ ꓙ ꓜꓴ ꓗꓪ ꓟ ꓕꓲ ꓣꓳ ꓡꓰ ꓑꓴ-ꓔ-ꓳ ꓟꓵꓽ ꓗꓪ ꓟ ꓡ ꓞꓳ ꓐꓴ ꓫꓱꓹ ꓔꓯ ꓐꓯ ꓖꓶ ꓡ ꓡꓳ=
2021 ꓘꓳꓼ 11 ꓦ 1 ꓠꓬꓲ ꓗꓪ ꓐꓰ ꓢꓷꓸ ꓠꓲꓹ ꓢꓳ ꓦꓲ ꓒꓴ ꓠꓹ ꓟ ꓟꓯꓼ ꓡꓰ ꓕꓵꓼ ꓪ ꓓꓳ ꓡ ꓥ ꓟꓲ꓾ ꓗꓳ-ꓪꓰꓼ ꓡꓯ ꓫꓵ ꓠꓻ ꓔꓬ ꓢꓰꓽ ꓟ ꓡꓳ ꓒꓱ 46 ꓟ ꓗꓪ ꓠꓬ ꓢꓷ ꓠꓲꓹ ꓢꓳ ꓦꓲ ꓑꓲꓸ ꓔꓸ ꓢꓰꓽ ꓥꓳ ꓐꓰ ꓐꓯ ꓔ ꓟ ꓗꓪ ꓑꓴ-ꓔ-ꓳ ꓥ ꓟꓲ ꓐꓻ_ ꓡꓳ=
ꓫꓱꓸ ꓤꓼ ꓟꓬꓱꓽ ꓬꓰ ꓙ ꓜꓴ ꓮ ꓟꓬꓹ ꓠꓬ ꓗꓳ-ꓪꓰꓼ ꓠꓻ ꓫꓵꓽ ꓗꓽ ꓠꓹ ꓟ꓾ ꓠꓻ ꓡ ꓢꓴ ꓔꓯ ꓬꓰ ꓙ ꓔꓳꓹ ꓙ ꓟ ꓟꓬꓱꓽ ꓬꓰ ꓔꓬ ꓡꓳ=
Photo: Myaw Lint Yar (HOPE) Local LNG
