ꓧꓶꓸ ꓕꓯ ꓲ-ꓓꓲ-ꓬ ꓟꓵꓽ ꓗꓪ ꓡꓲ-ꓢꓴ/ꓬꓳ-ꓐꓰ ꓐꓴ ꓔꓯ ꓢꓚꓧꓰꓓꓴꓡꓰꓓ ꓔꓣꓲꓐꓰ (ꓢꓔ) ꓢꓪꓼ ꓖꓶ ꓔꓸ ꓟ ꓗꓪ ꓐꓰ ꓒꓬꓹ ꓩꓴ ꓡ ꓢꓲ꓾ ꓮ ꓟꓶ ꓝꓮꓲ ꓕꓲ ꓧꓪꓹ ꓚꓲꓸ ꓚ ꓟꓬꓱꓽ ꓬꓰ ꓔꓬ ꓟ ꓥ ꓡꓳ꓿
2018 ꓘꓳꓼ ꓕꓯ ꓟꓴ ꓕꓲꓸ ꓙꓵꓽ ꓪ ꓙꓳ ꓢꓴ ꓐꓴ ꓗꓪ ꓐꓰ ꓕꓱ ꓡꓱ ꓢꓪꓼ ꓖꓶ ꓠꓹ ꓟ ꓕꓳ ꓶ ꓓꓳ ꓔꓸ ꓥ ꓟꓲ꓾ ꓮ ꓟꓶ ꓗꓪ ꓛꓲ ꓟꓬꓱꓽ ꓟꓽ ꓬꓰ ꓑꓲ ꓡ ꓠꓬꓲ ꓡꓯ ꓫꓵ ꓚꓲꓸ ꓚ ꓟꓬꓱꓽ ꓬꓰ ꓔꓬ ꓢꓰꓽ ꓟ ꓥ ꓡꓳ꓿ ꓢꓔ ꓟꓶ ꓡꓰ ꓠꓬ ꓞꓳ ꓡꓱ ꓐꓴ ꓕꓳ ꓶ ꓢꓳ ꓚꓱꓹ ꓗꓪ ꓬꓰ ꓙ ꓔ ꓙ ꓚꓱꓹ ꓧꓪ ꓢ ꓡꓳ ꓐꓯ ꓡꓳ꓿ ꓟꓽ ꓥ ꓠꓬ ꓚꓲ ꓛꓬ ꓔꓱꓹ ꓚꓲ ꓛꓬ ꓒꓴ ꓐꓶ ꓢꓲ ꓢꓳ ꓠ ꓗꓹ ꓠꓬꓲ ꓫꓸ ꓢꓴ ꓡꓲ-ꓢꓴ ꓐꓴ ꓠꓽ ꓟ ꓕꓳ ꓶ ꓢꓷꓸ ꓠꓲꓹ ꓢꓳ ꓪ ꓫꓸ ꓟ ꓥꓳ꓿ ꓢꓔ ꓠꓬ꓾ ꓡ ꓞꓳ ꓠꓱꓸ ꓠꓱꓸ ꓤꓼ ꓟ ꓔꓯ ꓗꓴꓷꓼ ꓙꓵꓽ ꓜꓴ ꓐꓴ ꓡꓰ ꓬꓲꓸ ꓔꓱꓹ ꓬꓲ ꓔꓳꓹ ꓙ ꓚꓱꓹ ꓕꓲ ꓩꓴꓸ ꓟꓶ ꓟ ꓚꓱꓹ ꓥ ꓡꓳ꓿
ꓐꓬꓱꓽ ꓠꓬ꓾ Ahphu A Fisher ꓗꓪ ꓐꓰ ꓣꓴ ꓔꓸ ꓡꓳ꓿
(ꓲ-ꓓꓲ-ꓬ ꓟꓵꓽ ꓗꓪ ꓟ ꓡꓲ-ꓢꓴ ꓐꓴ ꓔꓯ ꓬꓳ-ꓐꓰ ꓐꓰ ꓗꓴꓷꓼ ꓢꓲꓽ ꓒ ꓐꓴ ꓡꓰ ꓮ ꓫꓵ ꓑꓶꓸ ꓓꓴ ꓘꓴ ꓡ ꓐꓯ ꓠꓬ꓾ ꓧꓶꓸ ꓕꓯ 1960 ꓘꓳꓼ ꓖꓼ ꓡꓯꓼ ꓖꓼ ꓙꓲ ꓟꓵꓽ ꓘꓶꓽ ꓟꓵꓽ ꓡꓯꓼ ꓗꓪ ꓲ-ꓓꓲ-ꓬ ꓟꓯꓼ ꓐꓴ ꓚꓳ ꓛꓲ ꓡ ꓕꓯ “ꓬꓳꓬꓲꓠ” ꓐꓰ ꓧꓪꓽ ꓒꓴ ꓥꓳꓽ ꓗꓪ ꓐꓰ ꓐꓳ ꓕꓯ “ꓬꓳꓐꓲꓠ” ꓐꓰ ꓡꓶꓸ ꓐꓳ ꓪ ꓡꓰ ꓟ ꓥ ꓡꓳ ꓐꓰ꓾ ꓢꓳ ꓟꓶ ꓡꓳ꓿
ꓟꓵꓽ ꓚꓳ ꓲ-ꓓꓲ-ꓬ ꓟꓯꓼ ꓐꓴ
ꓖꓳ ꓕꓯ ꓟ ꓥꓳꓽ ꓝꓸ ꓢꓴ ꓠꓬ ꓡꓲ-ꓢꓴ ꓔꓯ ꓬꓳꓬꓲꓠ (ꓬꓮꓪꓬꓲꓠ) ꓡꓰꓽ ꓢꓷꓸ ꓢꓴ ꓮ ꓒꓴꓸ ꓒꓽ (ꓙꓲꓠꓖꓑꓧꓮꓪ/ ꓢꓲꓠꓖꓑꓧꓳ) ꓕꓲ ꓣꓳ ꓥ ꓡꓳ꓿
ꓞꓳ ꓫꓵꓽ ꓟꓬꓱꓺ ꓔꓯ ꓟꓳꓸ ꓮ ꓔꓲꓸ ꓤꓼ ꓐꓯ ꓗ ꓠꓬ꓾ ꓟꓬ-ꓟ ꓗꓴꓷꓼ ꓗꓪ ꓠꓬ ꓬꓲ ꓪ ꓔꓯ ꓮ-ꓒꓴ꓾ ꓗ-ꓛꓰꓺ꓾ ꓔꓲꓸ-ꓒꓳꓸ꓾ ꓘꓴ ꓢꓲ꓾ ꓲ-ꓓꓲ-ꓬ ꓟꓵꓽ ꓗꓪ ꓠꓬ꓾ ꓢꓲꓸ-ꓒꓳꓸ (Singpho) ꓐꓰ ꓘꓴ ꓟ ꓥ ꓡꓳ꓿ ꓕꓱ ꓟ ꓠꓬ ꓬꓲꓸ ꓢꓯꓼ ꓮ ꓡꓲ ꓑ ꓙ ꓖꓳ ꓡꓱ ꓘꓴ ꓟ ꓐꓰ꓾ ꓥꓳ ꓫꓵꓽ ꓕꓲ ꓫꓵ ꓐꓰ ꓝꓮꓲ ꓕꓲ ꓫꓵ ꓗꓪ ꓮ ꓡꓲ ꓚꓽ ꓖꓳ ꓡꓱ ꓘꓴ ꓡꓯ ꓘꓳ ꓟ ꓑꓶꓸ ꓓꓴ ꓮ ꓔꓲꓸ ꓔꓲꓸ ꓟꓽ ꓪꓽ ꓡꓰ ꓟ ꓥ ꓡꓳ꓿
ꓡꓲ-ꓢꓴ ꓔꓯ ꓟꓳꓸ ꓠꓬ ꓟꓬ-ꓟ ꓗꓴꓷꓼ ꓗꓪ ꓮ ꓒꓴꓸ ꓒꓽ ꓐꓴ ꓡꓰ ꓬꓳ-ꓬꓲ (Yawyin, Yoyin) ꓐꓰ ꓘꓴ ꓡꓳ꓿ ꓕꓱ ꓟ ꓥ ꓟꓲ ꓧꓶꓸ ꓕꓯ ꓧꓶꓽ ꓒꓽ ꓐꓴ ꓗꓰ ꓮ-ꓒꓴꓸ ꓙꓲ-ꓒꓳꓼ ꓒꓽ ꓐꓴ ꓔꓯ ꓘꓴˍ ꓟ ꓝꓳꓹ ꓥ ꓡꓳ꓿ ꓮ ꓖ ꓞꓳ ꓤ꓾ ꓮ ꓖ ꓞꓳ ꓗꓳꓸ ꓐꓯ ꓟ ꓫꓸ ꓪ ꓘꓶꓽ ꓥ ꓡꓳ ꓐꓰ ꓢꓳ ꓟꓶ ꓡꓳ꓿
MY-ꓟ ꓗꓴꓷꓼ ꓙꓪ 1956 ꓘꓳꓼ ꓗ-ꓛꓰ ꓞꓳ ꓫꓵꓽ 6 ꓫꓵꓽ ꓟꓬꓱꓺ ꓗꓪ ꓡꓲ-ꓢꓴ ꓐꓴ ꓔꓯ ꓬꓮꓪꓬꓲꓠ (ယောရင်) ꓕꓱ ꓡꓱ ꓐꓳ ꓔꓸ ꓡꓳ꓿ ꓝꓮꓲ ꓮ ꓢ ꓟꓵꓽ ꓗꓪ ꓠꓬ ꓡꓲ-ꓫꓳꓸ ꓐꓰ ꓘꓴ ꓡꓳ꓿ ꓖꓳ ꓡꓱ ꓥ ꓟꓲ ꓡꓲ-ꓢꓴ ꓐꓴ ꓮ ꓙꓵꓽ ꓠꓬ ꓚꓲ ꓛꓬ ꓔꓱꓹ ꓚꓲ ꓛꓬ ꓡꓲ-ꓢꓴ ꓐꓰ ꓘꓴ ꓔꓬ ꓡꓳ꓿ ꓕꓱ ꓟ ꓠꓬ ꓡꓲ-ꓢꓴ ꓐꓴ ꓔꓬ ꓟꓵꓽ ꓔꓯ ꓛꓳ ꓢꓲ ꓘꓴ ꓔꓬ ꓟ ꓟꓬꓱꓺ ꓚ ꓟꓲꓽ ꓕꓲ ꓕꓳꓼ ꓢꓷꓸ ꓡꓰ ꓠꓹ ꓟ ꓥ ꓡꓳ꓿ ꓗꓴꓷꓼ ꓐꓴ ꓟꓵꓽ ꓟꓽ ꓘꓶꓽ ꓕꓯ ꓡꓰ ꓡꓲ-ꓢꓴ ꓐꓴ ꓠꓬ ꓧꓶ ꓗꓴꓷꓼ꓾ ꓲ-ꓓꓲ-ꓬ ꓗꓴꓷꓼ꓾ ꓕꓮꓲ ꓗꓴꓷꓼ ꓐꓰ꓾ ꓟꓬ-ꓟ ꓗꓴꓷꓼ ꓗꓪ ꓡꓲ-ꓢꓴ ꓐꓴ ꓠꓬ ꓟꓵꓽ ꓚꓰꓺ ꓡ ꓞꓳ ꓥ ꓡꓳ꓿)
