ꓡꓳꓹ-ꓬꓲ ꓟꓸ ꓟ ꓠꓬ 2023 ꓘꓳꓼ 11 ꓦ 22 ꓠꓬꓲ ꓕꓯꓽ ꓟꓲ ꓠꓯ ꓙ ꓖꓴ ꓫꓱꓽ ꓡꓳꓹ ꓬꓰ ꓢꓲ꓾ ꓢꓲꓺ ꓒ ꓠꓯꓸꓼ ꓬꓲꓼ ꓟꓶ ꓡꓰꓳ꓿
ꓬꓲꓸ ꓠꓬ ꓮ-ꓢꓲ-ꓬ ꓟꓵꓽ ꓗꓪ ꓙꓲ-ꓢꓴ ꓘꓴ ꓜꓲꓼ ꓞꓳ ꓢ-ꓢꓲ-ꓠ ꓟꓬꓱꓽ ꓬꓰ ꓗꓷ ꓢꓴ ꓟꓳꓽ ꓟꓸ ꓒ ꓬꓳ-ꓢꓷ ꓫꓴ (2016 ꓘꓳꓼ ꓕꓯꓽ ꓢꓲꓺ ꓒ ꓠꓯꓸꓼ ꓬꓲꓼ ꓟꓶ ꓡꓰꓳ) ꓬꓲꓸ ꓦꓲ ꓢꓲꓺ ꓟ ꓥ ꓡꓳ꓿ ꓬꓲꓸ ꓠꓬ ꓟꓳꓽ ꓟꓸ ꓒꓽ ꓬꓳ-ꓢꓷ ꓔꓯ ꓢꓲꓽ ꓫꓬ ꓕꓳ ꓶ ꓢꓳ ꓦꓲ Cincinnati Bible College ꓗꓪ ꓜꓲ ꓡꓯ ꓘꓳ ꓢꓲꓸ 1953 ꓘꓳꓼ ꓕꓯꓽ ꓡꓯ ꓒꓯꓹ ꓝꓸ ꓟꓶ ꓡꓳ꓿
ꓡꓳꓹ-ꓬꓲ ꓟꓸ ꓟ ꓬꓲꓸ ꓐꓹ ꓐ ꓠꓬ ꓟꓬꓱꓺ ꓓꓳꓽ ꓙꓳˍ ꓟ ꓟꓸ ꓒꓽ ꓓꓽ George Mark Elliott ꓥ ꓡꓳ꓿
ꓡꓳꓹ-ꓬꓲ ꓟꓸ ꓟ ꓠꓬ ꓟꓳꓽ ꓟꓸ ꓒ ꓬꓳ-ꓢꓷ ꓐꓰ ꓕꓲ ꓛꓳ 1955 ꓘꓳꓼ ꓕꓯꓽ ꓟꓬ-ꓟ ꓗꓴꓷꓼ ꓗꓪ ꓓꓵꓽ ꓡ ꓢꓲ꓾ ꓑꓴ-ꓔ-ꓳ ꓗꓪ 10 ꓘꓳꓼ ꓪꓴ-ꓢ ꓟꓬꓱꓽ ꓬꓰ ꓗꓷꓳ꓿
ꓑꓴ-ꓔ-ꓳ ꓗꓪ ꓔꓬ ꓕꓯꓽ
ꓬꓲꓸ ꓪ ꓕꓲꓽ ꓦꓲ ꓑꓴ-ꓔ-ꓳ ꓗꓪ ꓪꓴ-ꓢ ꓟꓬꓱꓽ ꓬꓰ ꓔꓬ ꓟ ꓦꓬꓼ ꓠꓬꓲ ꓗꓪ ꓬꓲꓸ ꓠꓬ ꓟꓶ-ꓡ-ꓓꓰ ꓗꓪ ꓢꓷꓸ ꓠꓲꓹ ꓢꓳ ꓦꓲ ꓒꓴ ꓪꓴꓸ ꓔꓴ ꓟ꓾ ꓝꓮꓲ ꓐꓸ-ꓙꓬ. (ꓮ ꓟꓶ ꓠꓬ ꓓꓴ-ꓓ) ꓗꓪ ꓑꓴ-ꓔ-ꓳ ꓙꓲ-ꓢꓴ ꓢꓲ ꓤ ꓢꓳ ꓦꓲ ꓒꓴˍ ꓟ꓾ ꓟꓴ ꓖꓪ ꓖꓪ ꓢꓷꓸ ꓠꓲꓹ ꓟꓸ ꓖꓶˍ ꓟ꓾ ꓝꓮꓲ ꓬꓰ-ꓢꓴ ꓖꓳ ꓓꓱꓽ ꓟꓸ ꓟꓲ ꓐꓬꓱꓽ ꓕꓳ ꓶ ꓔꓯ ꓡꓲ-ꓢꓴ꓾ ꓣ-ꓪ ꓐꓰ ꓠꓱꓸ ꓐꓯꓼ ꓥꓳꓽ ꓗꓪ ꓡꓶꓸ ꓐꓳ ꓠꓬꓲꓸ ꓑꓶ ꓖꓶˍ ꓟ ꓟꓬꓱꓽ ꓔꓯ ꓠꓲꓹ ꓡꓱ ꓡꓱ ꓢꓯꓼ ꓕꓵꓼ ꓗꓷ ꓢꓴ ꓥ ꓡꓳ꓿
ꓡꓳꓹ-ꓬꓲ ꓟꓸ ꓟ ꓠꓬ ꓟꓴ ꓖꓪ ꓢꓷꓸ ꓠꓲꓹ ꓟꓸ ꓟ ꓥ ꓢꓲ꓾ ꓑꓴ-ꓔ-ꓳ ꓡꓲ-ꓢꓴ ꓙꓲ-ꓢꓴ ꓘꓴ ꓜꓲꓼ ꓞꓳ ꓠꓯꓸꓼ ꓗꓪ ꓬꓲꓸ ꓡꓰ ꓟꓸ ꓖꓶ ꓔꓸ ꓟ ꓧ-ꓡꓲ-ꓡꓴ-ꓬ ꓟꓴ ꓖꓪ ꓓꓽ ꓟ ꓠꓬ ꓮ ꓘꓶꓸ ꓟꓬꓱꓺ ꓓꓳ ꓙꓳˍ ꓟ ꓕꓲꓽ ꓚꓱꓹ ꓥ ꓡꓳ꓿
ꓝꓮꓲ ꓡꓳꓹ-ꓬꓲ ꓟꓸ ꓟ ꓠꓬ ꓴꓢꓮ ꓗꓪ ꓡꓽ ꓙꓰ ꓗꓸ ꓠꓯꓸ ꓥ ꓟꓲ ꓙꓲ-ꓢꓴ ꓢꓲ ꓤ ꓐꓴ ꓔꓯ ꓢꓯꓼ ꓖꓶ ꓪ ꓖꓶ ꓚꓱꓹ ꓕꓳ ꓶ ꓮ ꓟꓬꓹ ꓐꓳ ꓗꓷ ꓢꓴ ꓥ ꓡꓳ꓿
ꓡꓳꓹ ꓬꓰ ꓟꓸ ꓟ ꓔꓯ 1933 ꓘꓳꓼ ꓕꓯ ꓦꓵꓻ ꓗꓷ ꓡꓳ꓿ ꓬꓲꓸ ꓠꓬ ꓟꓲ ꓠꓯ ꓗꓪ (90) ꓘꓳꓼ ꓢꓯꓸ ꓔꓬ ꓢꓲꓸ ꓤ ꓠꓱ 5 ꓣꓳ ꓟꓹ ꓟ꓾ ꓝꓮꓲ ꓪꓴ-ꓢ ꓟꓬꓱꓽ ꓗꓪ ꓕꓲꓽ ꓞꓲꓼ ꓠꓲꓹ ꓡꓱ ꓡꓱ ꓢꓯꓼ ꓕꓵꓼ ꓗꓷ ꓗꓸ ꓠꓯꓸ ꓢꓲꓺ ꓒ ꓠꓯꓸꓼ ꓬꓲꓼ ꓟꓶ ꓡꓰꓳ꓿
