ꓟꓬ-ꓟ ꓟꓯꓼ ꓔꓯ ꓑ ꓫꓬ ꓟꓯꓼ (ꓑꓓꓝ) ꓡꓰꓽ ꓒꓳꓹ ꓔꓳꓹ ꓟ ꓟꓯꓼ ꓘꓶꓽ 1 ꓘꓳꓼ ꓟ ꓘꓴ ꓗꓪ ꓑꓓꓝ 1500 ꓣꓳ ꓢꓯꓼ ꓟꓬ ꓖꓶ ꓗꓷꓳ ꓐꓰ ꓠꓴꓖ ꓗꓴꓷꓼ ꓙꓵꓽ ꓜꓴ ꓪꓴꓸ ꓓꓵ ꓓꓴ-ꓪ ꓡ-ꓫꓲꓸ-ꓡꓼ ꓡꓰ ꓢꓷꓸ ꓙ ꓟꓴ ꓙ ꓩꓴ ꓡ ꓡꓳ꓿
“ꓬꓲꓸ ꓪ ꓔꓯ ꓮ ꓟꓬꓹ ꓐꓱ ꓶ ꓢꓯꓼ ꓟꓬ ꓖꓶꓽ ꓗꓷ ꓢꓴ ꓥꓳ ꓐꓰ ꓢꓪꓼ ꓥꓳ” ꓐꓯ ꓡꓳ꓿
ꓠꓬꓲꓸ ꓠꓬꓲ 2022 ꓘꓳꓼ 9 ꓦ 7 ꓠꓬꓲ ꓠꓬ꓾ ꓑ ꓫꓬ ꓟꓯꓼ ꓐꓴ ꓙꓵꓽ ꓪ ꓦꓴ ꓢꓴ ꓟꓬ-ꓟ ꓟꓯꓼ ꓔꓯ ꓔꓳꓹ ꓡꓯ ꓘꓳ ꓡ ꓟ 1 ꓘꓳꓼ ꓐꓲ ꓜꓶꓸ ꓐꓲ ꓡꓰˍ ꓟ ꓦꓬꓼ ꓠꓬꓲ ꓥ ꓡꓳ꓿
ꓮ ꓫꓵꓽ ꓟꓽ ꓙꓳˍ ꓟ ꓗꓪ ꓐꓰ ꓪꓴꓸ ꓔꓴ ꓩꓴ ꓡ ꓟ ꓗꓪ ꓐꓰ ꓮ ꓟꓶ ꓠꓬ ꓡꓳ ꓒꓱ 250 ꓛꓲ ꓗꓪ ꓑꓓꓝ ꓟꓯꓼ ꓜꓴ 300 ꓜꓴ ꓒꓳꓻ ꓓꓳ ꓡꓰ ꓢꓲ꓾ ꓡꓳ ꓒꓱ 24 ꓟ ꓗꓪ ꓠꓬ ꓗꓴꓷꓼ ꓙꓵꓽ ꓜꓴ ꓕꓲ ꓟ ꓟꓬꓱꓽ ꓬꓰ ꓙꓲꓽ ꓙꓳˍ ꓟ ꓟꓬꓱꓽ ꓬꓰ ꓔꓬꓳ ꓐꓰ ꓐꓯ ꓔꓸ ꓡꓳ꓿
ꓮ ꓟꓶ ꓗꓪ ꓐꓰ 1 ꓘꓳꓼ ꓘꓴꓽ ꓗꓪ ꓧꓪꓸ ꓧꓪꓸ ꓟꓽ ꓧꓪꓸ ꓧꓪꓸ ꓬꓲꓸ ꓧꓶꓽ ꓔꓳꓼ ꓡꓯ ꓘꓳ ꓝꓲꓸ ꓠꓶꓽ ꓡꓻꓳ ꓐꓰ ꓠꓴꓖ ꓟꓯꓼ ꓔꓯ ꓟꓳꓸ ꓟꓬꓱꓽ ꓢꓲꓽ ꓒꓽ ꓓꓽ ꓟ ꓬꓲ-ꓟꓳ ꓡꓰ ꓐꓯ ꓡꓳ꓿
ꓑꓓꓝ 1500 ꓣꓳ ꓫꓵꓻ ꓟ ꓡꓰ ꓐꓰ꓾ ꓟꓬ-ꓟ ꓟꓯꓼ ꓕꓲꓽ ꓒꓳꓹ ꓗꓪ 20150 ꓣꓳ ꓫꓵꓻ꓾ 7000 ꓣꓳ ꓖ ꓡꓯꓼ ꓖ ꓙꓲ ꓠꓻ ꓓꓴ ꓡꓰꓳ꓾ ꓐꓰ ꓠꓴꓖ ꓗꓴꓷꓼ ꓙꓵꓽ ꓜꓴ ꓪꓴꓸ ꓓꓵ ꓓꓴ-ꓪ ꓡ-ꓫꓲꓸ-ꓡꓼ ꓡꓰ ꓢꓷꓸ ꓙ ꓟꓴ ꓙ ꓩꓴ ꓡ ꓡꓳ꓿
ꓡ ꓠꓹ ꓟ ꓟꓶꓽ ꓞꓴ ꓖꓳ ꓑꓳꓸ ꓠꓬ ꓟꓬ-ꓟ ꓗꓴꓷꓼ ꓗꓪ ꓫꓸ ꓓꓴ ꓬꓲꓸ ꓫꓵ ꓬꓲ ꓙꓰꓽ ꓐꓰ꓾ ꓟꓯꓼ ꓢꓰꓼ ꓡꓯ ꓘꓳ ꓟ ꓡꓲꓽ ꓡ ꓓꓴ ꓥꓳ ꓐꓰ ꓕꓮꓲꓹ ꓗꓴꓷꓼ ꓛꓳ-ꓡ-ꓖꓳ ꓟꓴ ꓕꓲꓸ ꓢꓳ ꓦꓲ ꓗꓪ ꓬꓰˍ ꓟ ꓖꓪ ꓙꓱ ꓜꓲꓼ ꓓꓴ ꓕꓲꓽ ꓟ ꓗꓪ ꓐꓰ ꓢꓪꓼ ꓔꓸ ꓡꓳ꓿
