ꓑꓴꓔꓮꓳ ꓡꓲ-ꓢꓴ ꓐꓴ ꓢꓷꓸ ꓠꓲꓹ ꓕꓳ ꓶ ꓔꓯ ꓢꓳ ꓦꓲ ꓗꓪ ꓬꓲ ꓖ ꓙꓳ ꓙꓳ ꓢꓳˍ ꓟ (Formal Education) ꓬꓲꓸ ꓪꓴꓸ ꓔꓴˍ ꓟ ꓠꓬ꓾ 1951 ꓘꓳꓼ ꓗꓪ ꓥ ꓡꓳ= ꓬꓲꓸ ꓔꓶꓸ ꓠꓬ ꓟꓶ-ꓡ-ꓓꓰ ꓗꓪ ꓥꓳ꓿
ꓑꓴꓔꓮꓳ ꓟꓵꓽ꓾ ꓟꓶ-ꓡ-ꓓꓰ ꓘꓹ ꓗꓪ “ꓡꓲ-ꓢꓴ ꓙꓲ-ꓢꓴ ꓢꓲ ꓤ ꓟꓳꓼ ꓡꓳ ꓢꓳ ꓦꓲ” (Lisu Christian Day School) ꓒꓴ ꓪꓴꓸ ꓔꓴˍ ꓡꓳ= ꓬꓲꓸ ꓪꓴꓸ ꓕꓲ ꓘꓳꓼ ꓗꓪ ꓢꓳ ꓢꓴ 20 ꓣꓳ ꓙꓳ ꓢꓲ꓾ ꓟꓸ ꓒ ꓠꓬ ꓟꓶ-ꓚꓲ-ꓠ ꓗꓪ ꓕꓳ ꓶ ꓢꓳ ꓠꓬꓲ ꓢꓴ ꓡꓲ-ꓢꓴ ꓞꓳ ꓡꓯꓸ ꓕꓲ ꓣꓳ ꓥ ꓡꓳ= ꓠꓬꓲ ꓘꓳꓼ ꓕꓲ ꓘꓳꓼ ꓗꓪ ꓠꓬ ꓢꓳ ꓢꓴ 40 ꓣꓳ ꓙꓳ ꓡ ꓢꓲ꓾ ꓟꓸ ꓒ 2 ꓣꓳ ꓙꓳ ꓡꓳ=
ꓢꓳ ꓕꓲꓸ ꓠꓬ ꓔꓸ 6 ꓟ ꓗꓪ ꓛꓲ ꓙꓳ ꓢꓲ (Middle School)꓾ ꓢꓳ ꓚꓱꓹ ꓠꓬ꓾ ꓢꓲꓽ ꓫꓬ ꓕꓳ ꓶ꓾ ꓢꓪꓹ ꓢꓪꓸꓼ꓾ ꓚ ꓟꓲꓽ꓾ ꓟꓵꓽ ꓐꓬꓱꓽ꓾ ꓕꓳ ꓶ ꓐꓳ ꓡꓲꓽ ꓐꓳ ꓚꓱꓹ ꓬꓲ ꓫꓵ ꓬꓲ ꓙꓰ ꓐꓰ ꓥꓳꓽ ꓫꓵꓽ 5 ꓫꓵꓽ (Lisu, Rawang, Kachin, Burmese, and English) ꓥ ꓡꓳ=
ꓢꓳ ꓦꓲ ꓕꓱ ꓟ ꓠꓬ꓾ ꓟꓳꓽ ꓟꓸ ꓒ ꓕꓲ ꓦꓲ ꓐꓰ ꓡꓲ-ꓢꓴ ꓞꓳ ꓪꓴꓽ ꓞꓳ ꓟ ꓐꓴ ꓡꓰ ꓒꓴ ꓪꓴꓸ ꓔꓴ ꓗꓷ ꓟ ꓥ ꓢꓲ꓾ ꓑꓴꓔꓮꓳ ꓡꓲ-ꓢꓴ ꓐꓴ ꓐꓱ ꓶ ꓠꓬ ꓬꓲ ꓖ ꓙꓳ ꓙꓳ꓾ ꓬꓲꓸ ꓕꓲꓸ ꓙꓳ ꓙꓳ ꓕꓳ ꓶ ꓢꓳ ꓠꓬꓲ ꓟ ꓬꓲꓸ ꓪꓴꓸ ꓕꓲ ꓕꓳꓼ ꓥ ꓡꓳ=
ꓕꓳ ꓶ ꓢꓳ ꓦꓲ ꓫꓬꓹ ꓟ ꓐꓰ ꓢꓳ ꓦꓲ ꓗꓪ ꓟ ꓟꓸ ꓒ ꓐꓴ ꓔꓯ ꓞꓳ ꓘꓹ ꓢꓴ ꓡꓰ ꓔꓳꓹ ꓙ ꓬꓰ ꓙ ꓟ ꓡꓰꓽ ꓟꓽ ꓞꓲ꓾ North Burma Christian Mission ꓗꓪ ꓐꓰ ꓥ ꓟꓲ ꓔꓳꓹ ꓙ ꓗꓷꓳ= ꓗꓴꓷꓼ ꓢꓲꓽ ꓒ ꓐꓴ ꓗꓪ ꓐꓰ ꓮ ꓫꓵꓽ ꓔꓳꓹ ꓙ ꓓꓴ ꓟꓽ ꓣꓴ= ꓣꓱꓽ ꓬꓯꓼ ꓟ ꓕꓳ ꓶ ꓮ ꓙꓵꓽ ꓧꓪ ꓣꓴ ꓖꓶ ꓢꓴ ꓠꓬ ꓟꓳꓽ ꓟꓸ ꓒ ꓬꓳ-ꓢꓷ (LaVern Morse) ꓥ ꓡꓳ=
ꓚ ꓟꓲꓽ ꓕꓱ ꓟ ꓔꓯ ꓟꓳꓸ ꓟꓸ ꓟ ꓓꓽ ꓟ ꓖ-ꓕꓴꓼ ꓡꓰ ꓐꓳ ꓢꓲ꓾ ꓟꓸ ꓟ ꓧꓯ-ꓡꓲ ꓡꓰ ꓫꓬꓹ ꓔꓱꓹ ꓔꓸ ꓟ ꓕꓳ ꓶ ꓗꓪ꓾
“It was in 1951 that the first Lisu Christian Day School was opened in Muladi, under the supervision of the Church elders, with a board of directors drawn from parents of attending children. That first year there were about 20 studetns and just one teacher, a local Christian young man who had studied in Myitkyina. …. LaVern worked hard to help the day schools get their proper books.” (Gertrude Morseꓹ 1998, pꓸ 376, 378)
ꓑꓴꓔꓮꓳ ꓡꓲ-ꓢꓴ ꓐꓴ ꓣꓳ ꓘꓹ ꓣꓳ ꓟꓵꓽ ꓗꓪ ꓢꓷꓸ ꓠꓲꓹ ꓢꓳ ꓦꓲ ꓒꓴ ꓢꓲ꓾ ꓢꓳ ꓪꓴꓸ ꓔꓴ ꓗꓷ ꓟ ꓖꓳ ꓕꓲ ꓘꓳꓼ ꓗꓪ ꓐꓰ ꓞꓲ ꓠꓲꓹ 2021 ꓘꓳꓼ ꓗꓪ ꓛꓲ ꓠꓬ 70 ꓘꓳꓼ ꓐꓲ ꓡ ꓟ ꓥꓳ=
ꓖꓳ ꓡꓱ ꓥ ꓟꓲ ꓡꓲ-ꓢꓴ ꓐꓴ ꓢꓷ ꓠꓲꓹ ꓚꓱꓹ ꓗꓪ ꓬꓲꓸ ꓝꓸ ꓟꓶ ꓠꓬꓲ ꓕꓳ ꓶ ꓢꓳ ꓦꓲ ꓠꓬ ꓟꓽ ꓙꓳ ꓡꓰꓳ= ꓮ ꓟꓶ ꓠꓬ ꓢꓲꓽ ꓒ ꓕꓳ ꓶ ꓢꓳ ꓦꓲ ꓗꓪ ꓢꓳ ꓔꓬ ꓟˍ ꓡꓰꓽ ꓙꓳ ꓡꓰꓳ= ꓮ ꓟꓶ ꓟꓵꓽ ꓗꓳ ꓓꓵ ꓓꓵ ꓗꓪ ꓟ ꓢꓷꓸ ꓠꓲꓹ ꓢꓳ ꓚꓱꓹ ꓬꓲꓸ ꓕꓲꓸ ꓔꓯ ꓖꓼ ꓙꓰ ꓐ ꓡˍ ꓟ ꓢꓳ ꓦꓲ ꓡꓲ-ꓢꓴ ꓐꓴ ꓔꓬ ꓟ ꓘꓹ ꓗꓳ ꓡꓳ ꓗꓪ ꓓꓳ ꓡ ꓠꓹ ꓟ ꓚꓴ ꓬꓲꓹ ꓓꓶꓽ ꓝꓲꓸ ꓛꓲ ꓪ=
ꓣꓳ ꓞꓳ ꓤ ꓔꓯ ꓟꓸ ꓖꓶ ꓠꓹ ꓟ ꓢꓳ ꓚꓱꓹ ꓔꓯ ꓣꓳ ꓚꓲ ꓛꓬ ꓡꓰ ꓙ ꓖꓶ ꓙꓲꓽ ꓙꓳ ꓡꓳ= ꓢꓴ ꓡꓰ ꓙ ꓖꓶꓽ ꓔꓸ ꓟ ꓢꓳ ꓚꓱꓹ (Curriculum) ꓗꓪ ꓐꓰ ꓣꓳ ꓠꓬ ꓢꓴ ꓓꓵꓽ ꓙ ꓟ ꓟꓬ ꓛꓲ ꓡꓯꓼ ꓛꓲ ꓬꓰ ꓟꓽ ꓐ ꓡ= ꓢꓴ ꓢꓷꓸ ꓟꓬ ꓛꓲ ꓖꓼ ꓛꓲ ꓬꓰ ꓟꓽ ꓐ ꓡ ꓟ ꓐꓰ꓾ ꓙꓲ ꓖꓴ ꓟꓽ ꓙꓳ ꓟ ꓮ ꓟꓶ ꓣꓳ ꓟꓳ ꓡꓻꓳ= ꓣꓳ ꓡ ꓞꓳ ꓐꓱ ꓶ ꓙꓲ ꓖꓴ ꓙꓳˍ ꓟ ꓢꓳ ꓚꓱꓹ (ꓚꓴꓣꓣꓲꓚꓴꓡꓴꓟ) ꓣꓱꓽ ꓬꓯꓼ ꓔꓬ ꓡꓳ=
ꓡꓲ-ꓢꓴ ꓥꓳꓽ ꓐꓰ ꓡꓲ ꓒꓰꓼ꓾ ꓛꓳ ꓫꓱꓽ ꓦ ꓡꓱ ꓚꓱꓹ꓾ ꓥꓳꓽ ꓫꓵꓽ ꓥꓳ ꓙꓰ꓾ ꓮ ꓟꓶ ꓕꓲ ꓤꓶ ꓗꓪ ꓣꓱꓽ ꓬꓯꓼ ꓟ ꓢꓷꓸ ꓠꓲꓹ ꓬꓲ ꓫꓵ ꓬꓲ ꓙꓰ ꓔꓯ ꓬꓲ ꓙꓵꓹ ꓓꓴꓸ ꓓꓴꓸ ꓤꓼ ꓗꓪ ꓮ ꓟꓬꓹ ꓢꓷꓸ ꓡꓰ ꓠꓹ ꓟ ꓟꓸ ꓚꓱꓹ ꓐꓳ ꓙ ꓖꓶꓽ ꓢꓲꓸ ꓞꓳ ꓡꓯꓸ ꓐꓴ ꓔꓯ ꓫꓬꓹ ꓦꓵ ꓖꓶˍ ꓟ ꓟꓬꓱꓽ ꓮ ꓟ ꓬꓰˍ ꓥꓳ ꓪ?
ꓡꓲ-ꓢꓴ ꓢꓷꓸ ꓠꓲꓹ ꓟꓸ ꓒ ꓐꓴ (Lisu Educators)꓾ ꓒꓴ ꓙꓳ ꓢꓴ ꓐꓴ ꓐꓰ꓾ ꓡꓲ-ꓢꓴ ꓮ ꓙꓵꓽ ꓦꓰꓼ ꓔꓴ ꓡ ꓠꓬ ꓒꓬꓱꓼ ꓡ ꓥꓳ= ꓡꓲꓢꓴ ꓴꓠꓲꓦꓰꓣꓢꓲꓔꓬ ꓙꓳ ꓡ ꓗꓪ ꓛꓲ ꓥ ꓟꓲ ꓦ ꓐꓬꓱꓽ ꓙꓳ ꓠ ꓗ ꓟ ꓬꓲꓸ ꓝꓲꓸ ꓛꓲꓳ꓿
