ꓴꓢꓮ ꓪ ꓔꓲꓸ ꓙꓳ-ꓐ-ꓓꓲ ꓡꓰ The National Defense Authorization Act for Fiscal Year 2022 (NDAA-2022) ꓔꓯ ꓠꓲꓹ ꓧꓳꓹ ꓡꓯꓼ ꓓꓴ ꓢꓽ ꓩꓴ ꓡ ꓟ ꓗꓪ ꓐꓰ ꓠꓴꓖ ꓗꓴꓷꓼ ꓙꓵꓽ ꓜꓴ ꓐꓱ ꓶ ꓥ ꓟꓲ ꓗꓸ ꓘꓳ ꓘꓳ ꓬꓰ ꓙ ꓚꓱꓹ ꓗꓺ ꓘꓶꓽ ꓒꓴ ꓙꓰꓳ꓿
ꓮ ꓡꓲꓳ ꓐꓯ ꓠꓬ ꓖꓳ ꓙꓵꓽ ꓗ ꓠꓓꓮꓮ 2022꓾ ꓠꓳꓸ 6510 ꓗꓪ ꓠꓴꓖ ꓔꓯ ꓢꓯꓼ ꓖꓶ ꓠꓹ ꓟˍ ꓟ ꓐꓰ꓾ ꓚꓓꓟ ꓔꓯ ꓢꓯꓼ ꓖꓶ ꓠꓹ ꓟ꓾ ꓟꓬ-ꓟ ꓗꓴꓷꓼ ꓗꓪ ꓓꓰ-ꓟꓳ-ꓗꓯ-ꓢꓰ ꓐꓰ꓾ ꓔꓱꓹ ꓜꓳ ꓟ ꓚꓱꓹ ꓔꓯ ꓫꓬꓹ ꓔꓶ ꓫꓬꓹ ꓡꓲꓸ ꓠꓹ ꓟ ꓙ ꓟꓳ ꓘꓶꓽ ꓖꓶ ꓔ ꓡꓳ꓿
ꓒꓴ ꓒꓴ ꓡꓯꓽ ꓡꓯꓽ ꓔꓳꓹ ꓙ ꓠꓹ ꓟ ꓔꓶ ꓙꓱꓽ ꓐꓳ ꓔꓸ
ꓟꓬ-ꓟ ꓔꓯ ꓓꓰꓳ-ꓗꓯ-ꓢꓰ ꓚꓱꓹ ꓗꓪ ꓛꓲ ꓬꓰ ꓠꓹ ꓟ ꓬꓰ ꓙ ꓔ ꓙ ꓢꓴ ꓐꓴ ꓗꓪ ꓐꓰ ꓟꓯꓼ-ꓚꓳ-ꓠꓯ ꓠꓬ ꓟꓽ ꓓ ꓕꓲ ꓣꓳ ꓥ ꓡꓳ꓿ ꓬꓲ ꓠꓬ ꓮꓳ-ꓢꓸ-ꓢꓴꓸ-ꓚꓰꓽ ꓛꓳ ꓒꓯꓹ ꓕꓲ ꓣꓳˍ ꓟꓲ ꓥꓳ꓿
ꓴꓢꓮ ꓪ ꓔꓲꓸ ꓙꓳ-ꓐ-ꓓꓲ ꓠꓬ ꓗꓴꓷꓼ ꓑ ꓫꓬ ꓝꓲ ꓓꓴ ꓐꓴ ꓡꓰꓽ ꓠꓲꓹ ꓧꓳꓹ ꓔꓸ ꓟ ꓠꓓꓮꓮ 2022 ꓔꓯ 2021 ꓘꓳꓼ 12 ꓦ 27 ꓠꓬꓲ ꓕꓯꓽ ꓠꓲꓹ ꓧꓳꓹ ꓡꓯꓼ ꓓꓴ ꓢꓽ ꓗꓷ ꓟ ꓥ ꓡꓳ꓿
ꓠꓓꓮꓮ 2022 ꓐꓱ ꓶ ꓣꓱꓽ ꓐ ꓡ ꓟ ꓒꓴ ꓠꓬ $7700000 ꓪꓹ ꓥ ꓢꓲ꓾ ꓖꓳ ꓗꓪ ꓐꓰ $136 ꓪꓹ ꓔꓯ ꓠꓬ ꓟꓬ-ꓟ ꓗꓴꓷꓼ ꓗꓪ ꓓꓰ-ꓟꓳ-ꓗꓯ-ꓢꓰ ꓚꓱꓹ ꓐꓱ ꓶ ꓣꓱꓽ ꓪ ꓓꓴ ꓟꓳꓸ ꓙ ꓔꓸ ꓟ ꓥ ꓡꓳ꓿
ꓮ ꓧꓪꓹ ꓴꓢꓮ ꓡꓰ ꓠꓴꓖ ꓔꓯ ꓘꓳ ꓣꓴ ꓗꓷ ꓡˍ ꓠꓬ꓾ ꓴꓢꓮ ꓐꓰ ꓶ ꓡꓯꓼ ꓬꓰ ꓔꓬ ꓟ ꓛꓳ ꓒꓯꓹ ꓗꓴꓷꓼ ꓐꓴ ꓥ ꓟꓲ ꓔꓳꓹ ꓑꓶꓸ ꓓꓴ ꓟꓽ ꓥ ꓐꓰ ꓢꓪꓼ ꓔꓬ ꓡꓳ꓿
ꓠꓴꓖ ꓠꓬ ꓟꓬ-ꓟ ꓗꓴꓷꓼ ꓙꓵꓽ ꓜꓴ ꓥ ꓡꓳ ꓐꓰ ꓘꓳ ꓣꓴ ꓗꓷ ꓡ ꓚꓰꓼ ꓠꓬ꓾ ꓒꓴ ꓫꓵꓺ ꓬꓰ ꓙ ꓡ ꓟ ꓕꓯꓽ ꓢꓲ ꓙꓲ ꓖꓴ ꓙꓳ ꓡꓰ ꓥꓳ꓿ ꓗꓴꓷꓼ ꓙꓵꓽ ꓜꓴ ꓕꓲ ꓟ ꓥ ꓟ ꓡꓰ ꓐꓰ ꓐꓶꓽ ꓗꓴꓷꓼ ꓗꓪ ꓐꓰ ꓬꓲꓸ ꓒꓵꓽ ꓕꓯꓽ ꓕꓯꓽ ꓡꓰ ꓟꓯꓼ ꓶ ꓤ ꓶ ꓟꓲ ꓪꓴꓻ ꓪ ꓓ ꓡꓰ ꓟ ꓡꓰ ꓐꓰ꓾ ꓠꓱꓸ ꓐꓯꓼ ꓙ ꓡꓯ ꓘꓳ ꓚꓱꓹ꓾ ꓶ ꓡꓯꓼ ꓚꓱꓹ ꓮ ꓙꓵꓽ ꓥ ꓟꓲ ꓬꓲ ꓚꓱꓹ ꓒꓴ ꓡ ꓓꓴ ꓥ ꓡꓳ꓿
ꓮ ꓟꓶ ꓑ ꓫꓬ ꓔꓯ ꓢꓰꓼ ꓢꓴ ꓟꓬ-ꓟ ꓟꓯꓼ ꓐꓴ ꓐꓰ꓾ ꓬꓲ ꓪ ꓔꓯ ꓔꓳꓹ ꓙ ꓔꓬ ꓢꓴ ꓐꓴ ꓔꓯ ꓦ ꓟꓲ ꓠꓴꓖ ꓡꓰ ꓟꓬꓱꓻ ꓖꓳꓻ ꓔꓬ ꓡꓳ ꓐꓰ ꓬꓲꓸ ꓓꓳꓽ ꓑ ꓙ ꓡꓳ꓿ ꓕꓱ ꓟ ꓠꓬ ꓟꓯꓼ ꓘꓶꓽ ꓦꓬꓼ꓿ ꓬꓲ ꓐꓱ ꓶ ꓐꓰ꓾ ꓔꓱꓹ ꓜꓳ ꓟ ꓐꓯ ꓟꓴ ꓕꓲꓺ ꓗꓪ ꓕꓱꓻ ꓡꓯ ꓘꓳ ꓠꓹ ꓟ ꓙꓲ ꓖꓴ ꓒꓬꓱꓼ ꓡ ꓥꓳ ꓐꓰ ꓢꓪꓼ ꓔꓬ ꓡꓳ꓿
ꓮ ꓡꓲ ꓐꓯ ꓡꓲꓸ ꓐꓯ ꓦ ꓐ 2 ꓦ (60 ꓠꓬꓲ ) ꓟ ꓘꓴꓽ ꓗꓪ ꓠꓴꓖ ꓐꓰ ꓚꓓꓟ ꓬꓰ ꓔꓬ ꓟ ꓟꓬ-ꓟ ꓡ ꓞꓳ ꓐꓴ ꓔꓯ ꓮ ꓡꓲ ꓬꓰ ꓙ ꓔꓺ ꓙ ꓠꓹ ꓟ ꓙ ꓖꓴ ꓔꓯ ꓴꓢꓮ ꓑ ꓫꓬ ꓝꓲ ꓓꓴ ꓐꓴ ꓟꓲꓸ ꓕꓯꓽ ꓗꓪ ꓙꓵꓽ ꓪ ꓙꓳ ꓢꓴ ꓐꓴ ꓫꓸ ꓕꓱ ꓚ ꓟꓸ ꓖꓶ ꓓꓴ ꓙꓳˍ ꓡꓳ꓿
ꓟꓶ ꓤ ꓟꓽ ꓥ ꓠꓬ꓾ ꓓꓰ-ꓟꓳ-ꓗꓯ-ꓢꓰ ꓚꓱꓹ ꓐꓱ ꓶ ꓢꓯꓼ ꓕꓵꓼ ꓔꓬ ꓟ ꓟꓬ-ꓟ ꓑ ꓫꓬ ꓐꓴ ꓐꓱ ꓶ ꓥꓳ ꓡꓳꓸ ꓓꓴ ꓙꓳ ꓡ ꓥꓳ ꓐꓰ ꓢꓪꓼ ꓟꓶˍ ꓡꓳ꓿
