Android ꓩꓴꓸ ꓗꓪ ꓣꓱꓽ ꓙꓲ_ ꓟ ꓡꓲ-ꓢꓴ ꓰ-ꓖꓲ-ꓡꓲꓼ ꓐꓯ ꓘꓶꓽ ꓒꓶꓻ ꓢꓳ ꓓꓴ ꓕꓳ ꓶ (Lisu-English Dictionary App) ꓬꓲꓸ ꓪꓴꓸ ꓕꓲ ꓟ ꓔꓯ 2021 ꓘꓳꓼ 12 ꓦ 20 ꓠꓬꓲ ꓕꓯꓽ Google Playstore ꓗꓪ ꓗꓶ ꓩꓴ ꓡ ꓡꓳ=
ꓐꓯ ꓘꓶꓽ ꓒꓶꓻ ꓕꓳ ꓶ ꓐꓳ ꓢꓴ ꓠꓬ꓾ ꓲ-ꓓꓲ-ꓬ ꓗꓴꓷꓼ꓾ ꓡꓲ-ꓢꓴ ꓔꓬ ꓟꓵꓽ ꓟ-ꓡꓴꓸ ꓫꓵꓸ-ꓓꓰ ꓘꓹ ꓗꓪ ꓔꓬ ꓟ ꓟꓸ ꓒ ꓮ-ꓐꓲ-ꓬ ꓐꓰ ꓟꓸ ꓟ ꓜꓲ-ꓐꓲ-ꓬ ꓐꓴ ꓠꓬꓲꓽ ꓫꓵꓸ ꓢꓴ꓾ logo design ꓠꓬ꓾ Aaron Jay꓾ application ꓜꓯꓻ ꓗꓶ ꓢꓴ ꓠꓬ developer ꓡꓯ-ꓟꓯ-ꓢꓶꓸ꓾ ꓟꓬꓱꓽ ꓕꓱ ꓟ ꓐꓱ ꓶ ꓬꓲꓸ ꓪꓴꓸ ꓚꓴ ꓬꓲꓹ ꓓꓶꓽ ꓢꓴ ꓐꓰ ꓒꓴ ꓫꓵꓺ ꓧꓪ ꓓꓳ ꓢꓴ ꓠꓬ ꓮ-ꓟꓯ-ꓣꓲ-ꓗ ꓗꓪ ꓬꓲꓸ ꓚꓰꓺ ꓔꓶ ꓔꓸ ꓟ ꓓꓳꓽ ꓐꓯ ꓑꓶ ꓜꓴ ꓡꓲ-ꓢꓴ ꓤꓶ (The Lisu Times) ꓥ ꓡꓳ ꓐꓰ ꓐꓳ ꓟꓸ ꓖꓶ ꓔ ꓡꓳ=
ꓮꓑꓑ ꓕꓱ ꓟ ꓔꓯ Google Play Store ꓗꓪ ꓙꓰ꓾ ꓖꓳ ꓗꓪ “Lisu English Dictionary” ꓐꓰ ꓕꓳꓹ ꓢꓲꓸ ꓧꓪ ꓗꓷ ꓠꓬ꓾ ꓚꓲꓸ ꓛꓬ Android ꓩꓴꓸ ꓗꓪ ꓣꓴ ꓗꓶꓺ (install) ꓐ ꓡ ꓡꓳ=
“ꓰ-ꓖꓲ-ꓡꓲ ꓥꓳ ꓬꓲ ꓣꓱ ꓬꓯ ꓙꓲ ꓖꓴ ꓮ ꓟꓬꓹ ꓙꓳ ꓡꓳ= ꓡꓲ-ꓢꓴ ꓐꓰ ꓰ-ꓖꓲ-ꓡꓲ ꓐꓯ ꓘꓶꓽ ꓒꓶꓻ ꓓꓴ ꓕꓱ ꓟ ꓮ ꓟꓶ ꓮꓑꓑ ꓫꓬ ꓔ ꓟ ꓔꓯ ꓣꓱ ꓢꓲ ꓢꓷ. ꓠꓲꓹ ꓟꓴ.. ꓕꓰ. ꓗꓪ ꓥ ꓟꓲ ꓛꓲ ꓖ ꓖ ꓙꓰ ꓡꓯ= ꓮꓑꓑ ꓜꓯꓻ ꓢꓷ. ꓠꓲ, ꓓꓺ ꓢꓴ ꓡꓯ-ꓟꓯ-ꓢꓶ. ꓐꓰ ꓫꓬ, ꓒꓬꓱꓼ ꓡ ꓠꓹ ꓟ ꓖꓪ ꓙꓱ ꓧꓳ ꓪꓴ. ꓟꓴ ꓢꓴ ꓡꓲ-ꓢꓴ ꓤꓶꓺ ( ꓔꓧꓰ ꓡꓲꓢꓴ ꓔꓲꓟꓰꓢ) ꓜꓴꓺ ꓔꓯ_ ꓟꓲ ꓮ ꓘꓶ. ꓫ ꓟꓳ ꓡꓳ= ” ꓐꓰ ꓕꓳ ꓶ ꓐꓳ ꓢꓴ ꓟꓸ ꓒ ꓮ-ꓐꓲ-ꓬ (ꓮꓦꓲꓮ ꓠꓖꓪꓮꓜꓮꓧ) ꓡꓰ ꓐꓯ ꓡꓳ=
ꓕꓱ ꓟ ꓠꓬ ꓞꓳ ꓫꓵꓽ ꓥꓳ ꓐꓱ ꓶ ꓟꓽ ꓙꓳ ꓟꓽ ꓓ ꓟ ꓐꓰ꓾ ꓥꓳꓽ ꓡꓶꓸ ꓗꓪ ꓥ ꓟꓲ ꓣꓱꓽ ꓬꓯꓼ ꓟ ꓥꓳ ꓐꓰ ꓥꓳꓽ ꓫꓵꓽ ꓢꓷꓸ ꓠꓲꓹ ꓢꓳ ꓔꓬ ꓢꓴ ꓕꓲ ꓣꓳ ꓡꓰ ꓐꓯ ꓡꓳ=
“technology ꓦꓬꓼ ꓠꓬꓲ ꓗꓪ ꓡꓲ-ꓢꓴ ꓕꓳ ꓶ ꓐꓰ ꓥꓳꓽ ꓚꓱꓹ ꓔꓯ ꓫꓺ ꓒꓵꓽ ꓠꓹ ꓟ ꓐꓰ꓾ ꓜꓶ ꓟꓴ ꓡ ꓝꓲ ꓠꓹ ꓟ ꓐꓱ ꓶ ꓥꓪ ꓠꓴ ꓢꓯꓼ ꓕꓵꓼ ꓔꓸ ꓟ ꓥ ꓡꓳ= ꓠꓲꓹ ꓡꓱ ꓡꓱ ꓔꓲꓺ ꓖꓶ ꓡ ꓢꓴ ꓐꓴ ꓔꓯ ꓟꓲ ꓫꓸ ꓟꓳ ꓪ= ꓕꓱ ꓟ ꓠꓬ ꓐꓲ ꓜꓲꓼ ꓡꓳ ꓟꓽ ꓐꓯ version 1 ꓥꓳ= ꓖꓳ ꓡꓱ ꓥ ꓟꓲ ꓕꓱ ꓕꓲ ꓫꓵꓽ ꓟ ꓗꓪ ꓬꓲꓸ ꓪꓴꓸ ꓫꓬꓹ ꓓꓳ ꓡ ꓟ ꓕꓲ ꓟ ꓥ ꓡꓳ= ꓚ ꓟꓲꓽ ꓕꓲ ꓟ ꓥꓳ= ꓡ ꓠꓹ ꓟ ꓗꓪ ꓕꓲ ꓝꓸ ꓕꓲ ꓝꓸ ꓮ ꓘꓶꓸ ꓙꓲ ꓡ ꓗꓪ ꓛꓲ ꓫꓬꓹ ꓔꓱꓹ ꓙꓰ ꓓꓴ ꓥꓳ=” ꓐꓰ ꓡꓲ-ꓢꓴ ꓤꓶ ꓜꓴ ꓧꓳꓽ ꓢꓴ ꓮ-ꓓꓶꓸ-ꓙꓬ ꓡꓰ ꓐꓯ ꓡꓳ=
“ꓕꓳꓽ ꓶ ꓝꓳꓹ ꓧꓪ ꓓꓴ (Dictionary) ꓕꓱ ꓡꓱꓳ ꓫꓵꓽ ꓠꓬ꓾ ꓥꓳꓽ ꓫꓵꓽ ꓕꓲ ꓫꓵꓽ ꓐꓱ ꓶ ꓟꓽ ꓙꓳ ꓟꓽ ꓓ ꓧꓪ ꓜꓲꓼ ꓠ ꓗꓹ ꓟ ꓕꓲ ꓫꓵꓽ ꓥꓳ= ꓟꓸ ꓒꓽ ꓮ˗ꓐꓲ˗ꓬ ꓡꓰ ꓧꓪ ꓜꓲꓼ ꓐꓳ ꓔ ꓟ Lisu-English Dictionary ꓕꓱ ꓕꓲꓽ ꓑꓷ ꓟ ꓠꓬ˗ꓸ ꓧꓪ˗ꓒꓴ ꓥꓳꓽ ꓢꓳ ꓠꓲꓹ ꓫꓵꓽ ꓢꓴˍ ꓐꓰ ꓧꓪꓽ ꓒꓴ ꓥꓳꓽ ꓗꓪ ꓐꓰ ꓐꓳ ꓔꓸ ꓟ ꓕꓳ ꓶꓽ ꓔꓯꓸ ꓡꓲ˗ꓢꓴ ꓥꓳꓽ ꓗꓪ ꓥꓳꓽ ꓡꓶꓸ ꓐꓳ ꓠꓲꓹ ꓫꓵ ꓢꓴ ꓐꓴ ꓖꓳ ꓑꓳꓸ ꓕ ꓑꓳꓸ ꓮ ꓘꓶꓸ ꓣꓱꓽ ꓬꓯꓼˍꓟ ꓒꓬꓱꓼ ꓡ ꓥꓳ ꓐꓰ ꓥꓳ ꓡꓳꓸ ꓡꓳ= ꓣꓳ ꓫꓵꓽ ꓥꓳꓽ ꓚꓱꓹ ꓐꓱ ꓶ ꓬꓰ ꓙꓲꓽ ꓙꓳ ꓟ ꓕꓲ ꓟ ꓬꓰ ꓓꓳ ꓩꓴ ꓡ ꓠꓬꓲ ꓕꓳ ꓶ ꓐꓳ ꓢꓴˍ ꓐꓰ app ꓫꓬꓹ ꓢꓴ ꓮ ꓙꓵꓽ ꓢꓴ ꓔꓯꓸ ꓮ ꓘꓶꓸ ꓫ ꓟꓳ꓿” ꓐꓰ ꓢꓲꓡ- Summer Institute of Language ꓜꓴ ꓗꓪ ꓟꓬꓱꓽ ꓬꓰ ꓔꓬ ꓟ ꓙꓬ-ꓡꓲ-ꓪꓴꓽ ꓡꓰ ꓐꓯ ꓩꓴ ꓡ ꓡꓳ=
ꓫꓬꓹ ꓒꓬꓱꓼ ꓡ ꓟ ꓙ ꓖꓴ ꓔꓯ ꓚꓴ ꓬꓲꓹ ꓓꓶꓽ ꓖꓪ ꓙꓱ ꓢꓴ ꓗꓙ ꓡꓰ ꓐꓯ ꓕꓱ ꓟ ꓠꓬ ꓚ ꓟꓲꓽ ꓕꓲ ꓟ ꓔꓲꓸ ꓥꓳ ꓐꓯ ꓡꓳ꓿
“ꓕꓱ ꓟ ꓠꓬ ꓲ-ꓓꓲ-ꓬ꓾ ꓟꓬ-ꓟ꓾ ꓴꓢꓮ ꓗꓴꓷꓼ 3 ꓟ ꓗꓪ ꓟ ꓠꓲꓹ ꓡꓱ ꓢꓴ ꓡꓲ-ꓢꓴ ꓐꓴ ꓪꓽ ꓡꓯ ꓘꓳ ꓢꓲꓸ ꓬꓰ ꓒꓬꓱꓼ ꓡ ꓟ ꓟꓬꓱꓽ ꓕꓲ ꓟ ꓥꓳ= ꓐꓳ ꓓꓳ ꓡ ꓟ ꓓꓲꓚꓔꓲꓳꓠꓮꓣꓬ ꓮ ꓟꓬꓹ ꓗꓪ ꓐꓰ ꓮꓑꓑ ꓫꓬꓹ ꓓꓳ ꓡ ꓟ ꓠꓬ ꓕꓱ ꓟ ꓬꓲꓸ ꓪꓴꓸ ꓕꓲ ꓧꓪꓹ ꓟ ꓥ ꓡꓳ= ꓟꓬ ꓠꓬꓲ ꓙꓲ ꓡ ꓠꓹ ꓟ ꓚꓴ ꓬꓲꓹ ꓠꓬ ꓟꓽ ꓖꓴ ꓡꓰ= ꓡꓯ ꓫꓵ ꓢꓯꓼ ꓕꓵꓼ ꓟꓳꓸ ꓖꓶ ꓩꓴ ꓡ ꓟ ꓗꓪ ꓙꓲ_ ꓥ ꓐꓰ ꓓꓵꓽ ꓙ ꓛꓲ ꓡ ꓠꓬ ꓮ ꓙꓵꓽ ꓢꓴ ꓢꓯꓼ ꓖꓶ ꓔꓺ ꓙ ꓗꓹ ꓡꓯ= ꓣꓳ ꓡꓲ-ꓢꓴ ꓖꓶ ꓓ ꓒꓽ ꓥ ꓟꓲ ꓕꓲ ꓖ ꓕꓲ ꓣꓳ ꓙꓳ_ ꓥ= ꓕꓲ ꓖ ꓕꓲ ꓣꓳ ꓔꓬ ꓥ ꓟꓲ꓾ ꓕꓲ ꓣꓳ ꓓꓵꓽ ꓙ ꓟ ꓚꓴ ꓬꓲꓹ꓾ ꓢꓷꓸ ꓠꓲꓹ ꓐꓰ ꓒꓴ ꓫꓵꓺ ꓔꓯꓹ ꓜꓲꓼ ꓡ ꓢꓲ꓾ ꓡꓲ-ꓢꓴ ꓐꓴ ꓐꓱ ꓶ ꓙꓲ_ ꓟ ꓕꓲ ꓫꓵꓽ ꓬꓰ ꓒꓬꓱꓼ ꓡ ꓠꓰ ꓠꓲꓹ ꓘꓪ ꓫꓵ ꓓꓴ ꓐꓰ꓾ ꓚ ꓟꓲꓽ ꓕꓲ ꓟ ꓔꓲꓸ ꓥꓳ=” ꓐꓰ App ꓕꓱ ꓟ ꓫꓬꓹ ꓒꓬꓱꓼ ꓡ ꓠꓹ ꓟ ꓚꓴ ꓬꓲꓹ ꓓꓶꓽ ꓢꓲꓸ ꓖꓪ ꓙꓱ ꓟꓬꓱꓽ ꓬꓰ ꓢꓴ ꓗꓙ ꓡꓰ ꓐꓯ ꓡꓳ=
ꓮꓑꓑ ꓩꓴꓺ ꓗꓷ ꓟ ꓢꓷ ꓙ ꓟꓴ ꓙ ꓪ ꓘꓴ ꓜꓲꓼ ꓓꓴ ꓔꓯ ꓴꓢꓮ ꓐꓰ ꓲ-ꓓꓲ-ꓬ ꓗꓴꓷꓼ ꓗꓪ ꓞꓽ ꓞꓽ ꓬꓰ ꓓꓴ ꓥꓳ ꓐꓯˍ ꓡꓳ꓿
To get Free Download: https://play.google.com/store/apps/details?id=com.thelisutime.dictionary.lisu_english_dictionary&fbclid=IwAR061xUPgIZ57SLUJeFXHDGkmPqTLRQy3nHSw3RJqC85nLvDBqmboP-YbV0
