ꓟꓸ ꓒ ꓠꓴ ꓟꓬꓱꓺ꓾ ꓮ ꓗꓪ ꓔꓬ ꓢꓴ ꓥ ꓟ꓾ ꓮ ꓟꓶ ꓮ ꓫꓵꓽ ꓟꓬꓱꓽ ꓬꓰ ꓔꓬ ꓟ ꓐꓰ꓾ ꓠꓴ ꓪ ꓕꓲ ꓦꓲ ꓟꓸ ꓟꓲꓽ ꓮ ꓔꓲꓸ ꓤꓼ ꓠꓶꓽ ꓝꓸ ꓖꓶ ꓗꓹ ꓡꓯ=
ꓥꓪ ꓔꓯ ꓮ-ꓐꓲ-ꓬ ꓥꓪ ꓤꓽ (Avia Ngwazah) ꓘꓴ_ ꓡꓳ= ꓲ-ꓓꓲ-ꓬ ꓗꓴꓷꓼ꓾ ꓟ-ꓡꓴꓸ-ꓫꓵꓸ-ꓓꓰ ꓘꓹ ꓗꓪ ꓦꓵ ꓔ ꓢꓴ ꓥ ꓡꓳ= ꓮ ꓟꓶ ꓦꓲ ꓢꓲ ꓟ_ ꓐꓰ ꓤ ꓠꓱ ꓐꓴ ꓐꓰ ꓕꓲ ꓪꓺꓼ Arunachal Pradesh ꓟꓵꓽ ꓫꓴ ꓗꓪ ꓔꓬ ꓡꓳ= ꓮ ꓟꓶ ꓥꓪ ꓠꓬ ꓘꓴ ꓜꓲꓼ ꓞꓳꓼ ꓟꓬꓱꓽ ꓗꓪ꓾ ꓝꓮꓲ ꓣꓳ ꓡꓲ-ꓢꓴ ꓫꓵꓽ ꓪꓳꓼ ꓙꓵꓽ ꓪ ꓚꓱꓹ ꓗꓪ ꓪꓴ-ꓢ ꓡꓰ ꓢꓯꓼ ꓖꓶ ꓡ ꓟ ꓡꓳ ꓚ ꓟꓬꓱꓽ ꓬꓰ ꓔꓬ ꓢꓴ ꓕꓲ ꓣꓳ ꓥꓳ=
ꓠꓴ ꓞꓲꓼ ꓣꓳ ꓦꓬꓼ ꓠꓬꓲ ꓟ-ꓡꓴꓸ-ꓫꓵ-ꓓꓰ-ꓘꓹ ꓗꓪ ꓪꓴꓽ ꓡ ꓟ꓾ ꓢꓷ ꓠꓲꓹ ꓕꓳ ꓶ ꓮ ꓡꓲ ꓢꓳ ꓗꓷ ꓟ ꓓꓵꓽ ꓙ ꓛꓲ ꓡ ꓟ ꓐꓯ ꓟꓳꓸ ꓖꓶ ꓗꓹ ꓡꓯ!
ꓥꓪ ꓠꓬ ꓫꓵ-ꓓꓰ-ꓘꓹ ꓢꓳ ꓦꓲ ꓗꓪ 8 ꓘꓳꓼ ꓢꓳ ꓗꓷꓳ= ꓥꓪ ꓕꓳ ꓶ ꓢꓳ_ ꓟ ꓙ ꓖꓴ ꓗꓪ ꓮ ꓟꓬꓹ ꓫꓵꓽ ꓔꓳ ꓜꓳ ꓗꓷ ꓟ ꓗꓪ ꓐꓰ 2 ꓫꓵꓽ ꓛꓲ ꓕꓱ ꓗꓪ ꓐꓯ ꓟꓸ ꓖꓶ ꓠꓲꓹ ꓫꓵ ꓡꓳ= ꓢꓷ ꓠꓲꓹ ꓕꓳ ꓶ ꓔꓯ ꓥꓪ ꓞꓲꓼ ꓮ ꓟꓬꓹ ꓘꓳꓼ ꓡꓳꓼ ꓕꓯ ꓢꓲꓸ ꓢꓳ ꓪꓴꓸ ꓔꓴ ꓪ ꓡꓰ ꓢꓴ ꓕꓲ ꓣꓳ ꓥꓳ= “ꓠꓴ ꓤ ꓔꓯ ꓖꓶ ꓢꓳ ꓦꓲ ꓗꓪ ꓕꓳ ꓶ ꓢꓳ ꓙꓰ ꓝꓲ” ꓐꓰ ꓮꓽ ꓐ ꓔꓯ ꓢꓯꓼ ꓖꓶ ꓡ ꓢꓴ ꓙꓳ ꓗꓷꓳ= ꓖꓳ ꓕꓲ ꓦꓬꓼ ꓠꓬꓲ꓾ ꓢꓷ ꓠꓲꓹ ꓢꓳ ꓦꓲ ꓟꓬꓱꓽ ꓢꓲꓺ (School Secretary) ꓔꓯ ꓜ ꓕꓲ ꓜꓽ ꓘꓴ ꓜꓽ ꓢꓲ ꓮꓽ ꓐ ꓡꓰ ꓬꓲꓸ ꓔꓯ ꓕꓱ ꓡꓱ ꓐꓯ_ ꓡꓳ꓾ “ꓥꓪ ꓤꓽ ꓔꓯ ꓟꓲ ꓮ ꓟꓶ ꓖꓳ ꓑꓳꓸ ꓢꓷꓸ ꓠꓲꓹ ꓢꓳ ꓦꓲ ꓗꓪ ꓢꓳ ꓙꓰ ꓝꓲ ꓓꓴ ꓥꓳ= ꓖꓳ ꓟ ꓑꓶꓸ ꓓꓴ ꓮ ꓡꓲ ꓐꓰ ꓙ ꓖꓶ ꓠꓯ_ ꓟ꓾ ꓮ ꓡꓲ ꓐꓰ ꓢꓯꓼ ꓕꓵꓼ ꓠꓯ_ ꓟ ꓬꓲꓸ ꓚꓱꓹ ꓖꓴ ꓟꓸ ꓖꓶ ꓙ ꓡꓯ” ꓓꓰꓽ ꓗꓷꓳ꓿ ꓖꓳ ꓕꓲ ꓣꓳ ꓡꓰ ꓥꓪ ꓔꓯ ꓬꓲꓸ ꓚꓱꓹ ꓖꓴ ꓟꓸ ꓖꓶ ꓡ꓾ ꓢꓯꓼ ꓖꓶ ꓡ ꓡꓳ= ꓥꓪ ꓐꓱ ꓶ ꓪꓴ-ꓢ ꓡꓰ ꓚꓱꓹ ꓧꓳꓽ ꓬꓰ ꓙ ꓡ ꓠꓹ ꓟ ꓪꓽ ꓥ ꓟꓲ ꓘꓴ ꓖꓶ ꓡ ꓡꓳ= ꓕꓱ ꓡꓱ ꓪꓴꓸ ꓔꓴ ꓪ ꓟ ꓠꓬ ꓶꓼ ꓙꓳ_ ꓟ ꓕꓲ ꓫꓵꓽ ꓔꓲꓸ ꓥꓳ꓾ ꓐꓰ ꓮ ꓟꓶ ꓥꓪ ꓓꓵꓽ ꓙ ꓛꓲ ꓡ꓾ ꓦ ꓡꓱ ꓐꓳ ꓔꓬ ꓡꓳ= 2 ꓘꓶꓽ ꓕꓲ ꓘꓶꓽ ꓠꓬ꓾ ꓢꓳ ꓦꓲ ꓗꓪ ꓠꓲꓹ ꓡꓱ ꓡꓱ ꓢꓳ ꓪ ꓡꓰꓳ= ꓰ-ꓖ-ꓡꓲꓼ ꓝꓳꓹ ꓬꓲꓸ ꓟꓸ ꓟꓲꓽ꓾ ꓬꓲꓸ ꓒꓶꓻ ꓘꓶꓽ ꓟꓽ ꓢꓷꓸ ꓥ ꓟꓲ꓾ ꓕꓳ ꓶ ꓕꓲ ꓑꓷꓠ ꓔꓱꓹ ꓫꓵꓺ ꓗꓪ ꓛꓲ ꓟꓽ ꓠꓹ ꓠꓹ (ꓟꓽ ꓡꓳꓸ ꓠꓬꓲ ꓠꓬꓲ) ꓐꓳ ꓐ ꓡ ꓗꓪ ꓛꓲ ꓢꓳ ꓗꓷꓳ= ꓠꓲꓹ ꓟ ꓗꓪ ꓕꓳ ꓶ ꓬꓲꓸ ꓒꓳꓹ꓾ ꓬꓲꓸ ꓝꓳꓹ ꓮ ꓙꓵꓽ ꓟꓯꓻ ꓪ ꓡꓰ ꓟ ꓥ ꓡꓳ= ꓚꓲ ꓛꓬ ꓘꓹ ꓗꓪ ꓙꓳ_ ꓟ 8 ꓔꓸ ꓔꓯ ꓢꓳꓻ ꓓꓳ ꓡꓰ ꓗꓸ ꓠꓯꓸ ꓠꓱꓸ ꓐꓯꓼ ꓕꓲ ꓟꓵꓽ State ꓗꓪ ꓢꓳ ꓝꓸ ꓙꓰ ꓠꓹ ꓟ ꓪꓴ-ꓢ ꓟꓬꓱꓽ ꓗꓪ ꓧꓳꓽ ꓪꓴꓸ ꓟꓴ ꓢꓴ ꓐꓴ ꓡꓰ ꓝꓲꓺ ꓩꓴ ꓡ ꓡꓳ= ꓬꓲꓸ ꓪ ꓡꓰ ꓬꓲꓸ ꓚꓱꓹ ꓧꓪ ꓙ꓾ ꓔꓳꓹ ꓙ ꓡ ꓟ ꓠꓬ ꓥꓪ ꓞꓲꓼ ꓗꓪ ꓮ ꓘꓶꓸ ꓙꓲ ꓖꓴ ꓙꓳ ꓟ ꓒꓬꓱꓼ ꓡꓻꓳ ꓐꓰ ꓥꓪ ꓘꓳ ꓣꓴ ꓔꓬ ꓥꓳ= ꓬꓰ ꓙ ꓚꓱꓹ ꓟꓳꓸ ꓖꓶ ꓡ ꓢꓴ ꓮ ꓙꓵꓽ ꓢꓴ ꓔꓯ ꓥ ꓟꓲ ꓫꓸ ꓟꓳ ꓐꓰ ꓐꓯ ꓠꓲꓹ ꓫꓵ ꓡꓳ=
2007 ꓘꓳꓼ ꓕꓯ ꓫꓬꓹ ꓓꓳ ꓡ ꓟ ꓰꓠꓖꓡꓲꓢꓧ – ꓡꓲꓢꓴ ꓓꓲꓚꓔꓲꓳꓠꓮꓣꓬ 
2020 ꓘꓳꓼ ꓕꓯ ꓫꓬꓹ ꓓꓳ ꓡ ꓟ ꓡꓲ-ꓢꓴ – ꓰꓠꓖꓡꓲꓢꓧ ꓓꓲꓚꓔꓲꓳꓠꓮꓣꓬ
ꓠꓴ ꓐꓰ ꓠꓴ ꓦꓲ ꓢꓲ ꓟ ꓐꓴ ꓠꓬꓲꓽ ꓫꓵꓸ ꓡꓰ ꓰ-ꓖ-ꓡꓲꓼ – ꓡꓲ-ꓢꓴ ꓘꓶꓽ ꓒꓶꓻ ꓕꓳ ꓶ ꓔꓯ 2007 ꓘꓳꓼ ꓕꓯ ꓕꓲ ꓑꓷꓠ꓾ 2020 ꓘꓳꓼ ꓕꓯ ꓕꓲ ꓑꓷꓠ ꓫꓬꓹ ꓓꓳ ꓡ ꓟ ꓡꓳꓸ ꓟꓳ_ ꓡꓳ= ꓕꓱ ꓟ ꓔꓯ ꓮ ꓫꓵꓽ ꓑꓶꓸ ꓓꓴ꓾ ꓮ ꓡꓲ ꓓꓵꓽ ꓙ ꓢꓲꓸ ꓫꓬꓹ ꓓꓳ ꓡ ꓟ ꓥ ꓡ?
ꓰ-ꓖ-ꓡꓲꓼ ꓥꓳꓽ ꓕꓱ ꓟ ꓣꓱꓽ ꓬꓯꓼ ꓖꓴ ꓮ ꓟꓬꓹ ꓙꓳ ꓡꓳ= ꓢꓳ ꓦꓲ ꓗꓪ꓾ ꓢꓷ ꓠꓲꓹ ꓬꓲ ꓫꓵꓽ ꓬꓲ ꓙꓰ ꓢꓳ ꓣꓴ ꓟ ꓗꓪ꓾ ꓶ ꓡꓯꓼ ꓬꓰ ꓚꓱꓹ ꓗꓪ꓾ ꓓꓵꓽ ꓓꓳ ꓟꓵꓽ ꓚꓳ ꓙꓰ_ ꓟ ꓗꓪ꓾ ꓓꓳꓽ ꓵꓺ ꓢꓷꓸ ꓡꓰ ꓠꓹ ꓟ ꓗꓪ꓾ ꓕꓱ ꓡꓱꓳ ꓫꓵꓽ ꓬꓲꓸ ꓚꓱꓹ ꓮ ꓙꓵꓽ ꓗꓪ ꓕꓲ ꓟꓲ ꓠꓯ ꓡꓱꓸꓼ ꓣꓱꓽ ꓔꓬ_ ꓡꓳ= ꓟꓬꓽ ꓠꓬꓲ ꓠꓬ ꓕꓳ ꓶ ꓢꓳ ꓢꓴ ꓐꓴ ꓐꓱ ꓶ ꓮ ꓓꓲꓽ ꓬꓳꓹ ꓚꓵ_ ꓟ ꓥꓳꓽ ꓫꓵꓽ ꓥ ꓡꓳ= ꓖꓳ ꓡꓱ ꓠꓬꓲ꓾ ꓟꓴ ꓕꓲꓸ ꓗꓪ ꓙꓰ ꓗꓸ ꓘꓳꓽ ꓡꓰ ꓠꓹ ꓟ ꓘꓳꓽ ꓜꓱ ꓕꓲ ꓐꓲꓼ ꓗꓳꓻ ꓔꓸ ꓟ ꓥ ꓡꓳ= English- Lisu Dictionary ꓠꓬ ꓰ-ꓖ-ꓡꓲꓼ ꓥꓳꓽ ꓔꓯ ꓣꓳ ꓡꓲ-ꓢꓴ ꓥꓳꓽ ꓗꓪ ꓐꓰ ꓐꓯ ꓘꓶꓽ ꓒꓶꓻ ꓖꓶ ꓠꓹ ꓟ ꓥ ꓢꓲ꓾ ꓕꓱ ꓕꓲ ꓑꓷꓠ ꓠꓬ ꓢꓷ ꓠꓲꓹ ꓕꓳ ꓶ ꓢꓳ ꓢꓴ ꓐꓴ ꓐꓱ ꓶ ꓟꓳꓸ ꓙ ꓔꓸ ꓟ ꓥ ꓡꓳ= ꓝꓮꓲ Lisu – English Dictionary ꓕꓳ ꓶ ꓠꓬ ꓡꓲ-ꓢꓴ ꓥꓳꓽ ꓣꓱꓽ ꓢꓲ ꓰ-ꓖ-ꓡꓲꓼ ꓥꓳꓽ ꓢꓳ ꓪ ꓡꓰ ꓝꓲ ꓠꓹ ꓟ ꓢꓯꓼ ꓕꓵꓼ ꓔꓸ ꓟ ꓥ ꓡꓳ= ꓢꓳ_ ꓟ ꓗꓪ꓾ ꓙ ꓡꓯ ꓘꓳ ꓟ ꓗꓪ꓾ ꓪꓴꓽ ꓡ ꓟꓴ ꓡ ꓚꓱꓹ ꓢꓯꓼ ꓕꓵꓼ ꓟ ꓗꓪ꓾ ꓶ ꓡꓯꓼ ꓚꓱꓹ ꓗꓪ꓾ ꓬꓲ ꓫꓵ ꓬꓲ ꓙꓰ ꓗꓪ ꓙꓲ ꓖꓴ ꓙꓳ ꓡꓰ ꓠꓹ ꓟ ꓓꓵꓽ ꓙ ꓢꓲꓸ ꓢꓯꓼ ꓕꓵꓼ ꓔꓸ ꓟ ꓥ ꓡꓳ=
ꓡꓲ-ꓢꓴ ꓐꓯ ꓘꓶꓽ ꓝꓳꓹ ꓧꓪ ꓜꓲꓼ ꓟ ꓗꓪ ꓫꓸ ꓓꓴ ꓮ ꓫꓵꓽ ꓙꓳ ꓡ? ꓐꓯ ꓘꓶꓽ ꓝꓳꓹ ꓟꓶꓽ ꓡꓰ ꓔꓬ_ ꓟ ꓙꓳ ꓡ? ꓟꓬꓱꓽ ꓬꓰ ꓟ ꓗꓪ ꓐꓰ ꓮ ꓡꓲꓳ ꓫꓵꓽ ꓢꓳ ꓟꓶ ꓡ?
ꓘꓶꓽ ꓒꓶꓻ ꓕꓳ ꓶ (Dictionary) ꓫꓬꓹ ꓟꓬꓱꓽ ꓕꓱ ꓟ ꓠꓬ ꓐꓯ ꓘꓶꓽ ꓖꓳꓻ ꓜꓲꓼ_ ꓟ ꓟꓬꓱꓽ ꓥ ꓟ ꓪꓴꓸ ꓠꓬꓲ꓾ ꓬꓲꓸ ꓙꓵꓹ ꓮ ꓟꓬꓹ ꓖꓶ ꓠ ꓗ ꓟ ꓟꓬꓱꓽ ꓥ ꓡꓳ= ꓐꓯ ꓘꓶꓽ ꓠꓬ ꓕꓲ ꓖ ꓕꓲ ꓘꓶꓽ ꓒꓰꓼ ꓬꓰ ꓔꓬ ꓟ꓾ ꓣꓱꓽ ꓠꓽ ꓡꓰ ꓔꓬ ꓟ ꓥ ꓟꓲ ꓙꓳ_ ꓡꓳ= ꓕꓳ ꓶ ꓗꓪ ꓟꓽ ꓐꓳ ꓪ ꓡꓰ ꓠꓬ ꓬꓲꓸ ꓝꓳꓹ ꓒꓰꓼ ꓬꓰ ꓟ ꓐꓯ ꓖꓴ ꓟꓽ ꓓ= ꓝꓮꓲ ꓬꓲꓸ ꓫꓵꓼ ꓕꓱ ꓓꓳ ꓡ꓾ ꓚꓰꓼ ꓓꓳ ꓡ ꓔꓬ ꓟ ꓥ ꓟꓲ ꓬꓲ ꓖꓳ ꓡꓱ ꓙꓳ ꓔꓬ ꓡꓳ= ꓡꓲ-ꓢꓴ ꓥꓳꓽ ꓟꓽ ꓒꓲꓼ ꓡꓰ ꓝꓲ ꓠꓹ ꓟ ꓐꓱ ꓶ ꓠꓬ ꓣꓳ ꓕꓳ ꓶ ꓙꓳ ꓠ ꓗ ꓡꓳ= ꓬꓲꓸ ꓓ ꓟ ꓕꓲ ꓫꓵꓽ ꓠꓬ ꓣꓳ ꓡꓲ-ꓢꓴ ꓥꓳꓽ ꓐꓯ ꓘꓶꓽ ꓠꓬ ꓕꓲ ꓖ ꓖ ꓗꓪ ꓐꓯ ꓘꓶꓽ ꓝꓳꓹ ꓮ ꓟꓬꓹ ꓟ ꓡꓳꓼ ꓟ ꓪꓴꓸ ꓠꓬꓲ꓾ “ꓫꓸ_ ꓟ ꓥꓳꓽ” ꓐꓯ ꓓ ꓡꓳ= ꓕꓲ ꓘꓶꓽ ꓔꓯ ꓮ ꓟꓬꓹ ꓖꓻ꓾ ꓮ ꓟꓬꓹ ꓫꓵꓽ ꓗꓪ ꓣꓱꓽ ꓠ ꓗꓹ꓾ ꓝꓮꓲ ꓕꓳꓹ ꓕꓳꓹ ꓠꓶꓼ ꓠꓶꓼ ꓐꓯ ꓕꓰ ꓡꓰ꓾ ꓐꓯ ꓬꓯꓼ ꓐꓯ ꓔꓶꓼ ꓡꓰ ꓟꓽ ꓓ_ ꓟ ꓥ ꓟꓲ ꓙꓳ ꓠꓬꓲ꓾ ꓕꓲ ꓟꓵꓽ ꓕꓲ ꓟꓵꓽ ꓜꓲꓼ ꓡꓯ ꓘꓳ ꓢꓲꓸ ꓐꓯ ꓘꓶꓽ ꓝꓳꓹ ꓮ ꓟꓬꓹ ꓧꓪ ꓟꓶ ꓠꓹ ꓟ ꓐꓱ ꓶ꓾ ꓐꓯ ꓘꓶꓽ ꓬꓲꓸ ꓫꓵꓼ ꓚꓰꓼ ꓓꓳ ꓡ ꓢꓲ꓾ ꓡꓲ-ꓢꓴ ꓮ ꓙꓵꓽ ꓢꓷꓸ ꓪꓽ ꓡꓰ ꓠꓹ ꓟ ꓐꓱ ꓶ꓾ ꓟꓵꓽ ꓗꓳꓹ ꓓꓵ ꓓꓵ ꓗꓪ ꓟ ꓣꓳ-ꓡꓲ-ꓢꓴ ꓕꓳ ꓶ ꓪꓴꓽ ꓟꓴ ꓡ ꓜꓴꓻ ꓔꓶꓻ ꓢꓲ꓾ ꓫꓬꓹ ꓜꓶꓻ ꓠꓯ_ ꓡꓳ꓾ ꓐꓰ ꓓꓵꓽ ꓙ ꓛꓲ ꓡ ꓡꓳ=
ꓢꓲꓽ ꓫꓬ ꓕꓳ ꓶ ꓡꓲ-ꓢꓴ ꓥꓳꓽ (central ꓔꓱꓹ-ꓫꓵꓺ ꓡꓲ-ꓢꓴ ꓥꓳꓽ) ꓐꓰ꓾ ꓡꓳ ꓪꓴꓸ ꓡꓲ-ꓢꓴ ꓥꓳꓽ ꓔꓯ ꓔꓯꓺ ꓠꓬꓲ ꓕꓯꓽ ꓟꓽ ꓫꓱꓸ ꓡꓯ ꓘꓳ ꓟ ꓙꓳ ꓡ? ꓮ ꓡꓲ ꓓꓵꓽ ꓙ ꓣꓱꓽ ꓬꓰ ꓠ ꓗ ꓡ? ꓠꓴ ꓟꓳ_ ꓟ ꓐꓯ ꓖꓶ ꓡꓯ=
ꓡꓳ ꓪꓴꓸ ꓡꓳ ꓟꓶꓸ ꓐꓰ꓾ ꓔꓱꓹ ꓫꓵ ꓗꓪ ꓔꓬ ꓢꓴ꓾ ꓝꓮꓲ ꓕꓲ ꓗꓴꓷꓼ ꓗꓷꓼ ꓗꓪ ꓔꓬ ꓟ ꓣꓳ ꓡꓲ-ꓢꓴ ꓥꓳꓽ ꓬꓲ ꓢꓯꓼ_ ꓐꓰ ꓬꓲꓸ ꓝꓳꓹ ꓟꓽ ꓫꓱꓸ_ ꓟ ꓠꓬ ꓙꓳ ꓚꓰꓼ ꓓꓴ ꓟ ꓥꓳ= ꓟꓽ ꓫꓱꓸ_ ꓟ ꓔꓯ ꓕꓯꓽ ꓡꓰ ꓝꓲ꓾ ꓡꓳꓻ ꓡꓰ ꓝꓲ ꓠꓹ ꓟ ꓐꓱ ꓶ꓾ ꓣꓳ ꓡꓯ ꓫꓵ ꓬꓲ ꓚꓱꓹ ꓖꓪ ꓙꓱ ꓢꓲ ꓟꓬꓱꓽ ꓬꓰ ꓙꓲꓽ ꓙꓳ ꓡꓳ= ꓝꓮꓲ ꓢꓲꓽ ꓫꓬ ꓕꓳ ꓶ ꓥꓳꓽ ꓕꓱ ꓟ ꓠꓬ ꓮ ꓡꓲ ꓗꓪ ꓥ ꓟꓲ ꓮ ꓟꓬꓹ ꓣꓱꓽ ꓚꓽ ꓡꓰ ꓟ ꓥ ꓢꓲ꓾ ꓣꓱꓽ ꓙꓲ ꓡꓳ= ꓢꓲ ꓫꓬ ꓕꓳ ꓶ ꓠꓬ ꓮ ꓓꓲꓽ ꓓꓻ ꓢꓴ ꓐꓴ ꓡꓰ ꓡꓶꓸ ꓔꓸ ꓟ ꓥ ꓠꓬꓲ꓾ ꓖꓳ ꓗꓪ ꓙꓳ ꓟ ꓐꓯ ꓘꓶꓽ ꓠꓬ ꓮ ꓓꓲꓽ ꓫꓬꓺ_ ꓡꓳ= ꓕꓱ ꓟ ꓔꓯ ꓣꓳ ꓮ ꓙꓵꓽ ꓪꓽ ꓓ_ ꓟ ꓡꓲ-ꓢꓴ ꓥꓳꓽ ꓝꓳꓹ ꓐꓰ ꓢꓪꓼ ꓪ ꓓ ꓡꓳ꓾ ꓐꓰ ꓙꓵ ꓡꓳ= ꓝꓮꓲ ꓣꓳ ꓫꓸ ꓕꓱ ꓥ ꓟꓲ꓾ ꓕꓳ ꓶ ꓐꓳ ꓥ ꓟꓲ ꓮ ꓡꓲ ꓕꓲ ꓜꓴ ꓟ ꓐꓱ ꓶ ꓥ ꓟ (Targeted Audience) ꓢꓪꓼ ꓢꓲꓸ ꓐꓯ ꓘꓶꓽ ꓢꓲꓻ ꓣꓴ ꓣꓱꓽ ꓠꓯˍ ꓡꓳ= ꓕꓱ ꓡꓱ ꓬꓰ ꓠꓬ ꓠꓴ ꓕꓱ ꓟ ꓐꓰ꓾ ꓕꓳ ꓶ ꓐꓳˍ ꓟ ꓔꓯ ꓘꓳ ꓣꓴ ꓑ ꓙ ꓢꓴ ꓐꓴ ꓢ ꓢꓹ ꓙ ꓜꓲꓼ ꓡꓰˍ ꓥꓳ=
ꓠꓴ ꓘꓶꓽ ꓒꓶꓻ ꓕꓳ ꓶ ꓫꓬꓹ ꓟ ꓗꓪ ꓢꓯꓼ ꓖꓶ ꓢꓴ꓾ ꓒꓴ ꓫꓵꓺ ꓔꓳꓹ ꓙ ꓢꓴ ꓧꓪ ꓟꓶ ꓡ? ꓮ ꓡꓲ ꓐꓰ ꓬꓲꓸ ꓑꓷꓠ ꓥꓰꓸ ꓓꓳ ꓡ ꓟ ꓙ ꓖꓴ ꓐꓯ ꓟꓸ ꓖꓶ ꓡꓯ=
ꓥꓪ ꓡꓰ ꓐꓳ ꓓꓳ ꓡ ꓟ ꓘꓶꓽ ꓒꓶꓻ ꓕꓳ ꓶ ꓔꓯ ꓲ-ꓓꓲ-ꓬ ꓗꓪ ꓠꓬꓲꓽ ꓧꓪꓸ ꓠꓬꓲꓸ (ꓥꓰꓸ) ꓪ ꓡꓰ ꓟ ꓥ ꓡꓳ= 2007 ꓗꓪ ꓠꓬ Chennai ꓗꓪ ꓠꓬꓲꓸ ꓢꓲ꓾ Arunachal ꓗꓪ ꓚꓰꓹ ꓛꓲ ꓡ ꓟ ꓥ ꓡꓳ= ꓖꓳ ꓕꓲ ꓧꓪꓹ ꓠꓬ ꓘꓴ ꓜꓲꓼ ꓞꓳ ꓕꓲ ꓟ ꓗꓪ ꓐꓰ ꓮ ꓟꓬꓹ ꓔꓳꓹ ꓙ ꓡ ꓡꓳ= ꓝꓮꓲ 2 ꓑꓷꓠ ꓕꓲ ꓑꓷꓠ ꓠꓬ Kolkata ꓗꓪ ꓠꓬꓲꓸ (ꓥꓰꓸ) ꓪ ꓡꓰꓳ= ꓕꓱ ꓕꓲ ꓧꓪꓹ ꓬꓰ ꓙ ꓡ ꓢꓴ_ ꓟꓲ ꓙꓳ ꓡꓳ= ꓖꓳ ꓡꓱ ꓥ ꓟꓲ ꓕꓳ ꓶ ꓑꓷꓠ quality ꓙꓲ ꓙꓲ ꓫꓬꓹ ꓔꓸ ꓠꓬꓲ ꓬꓲꓸ ꓒꓵꓽ ꓮ ꓘꓶꓸ ꓠꓯꓸ ꓡꓰ ꓢꓲ꓾ ꓮ ꓟꓶ ꓗꓪ ꓛꓲ ꓬꓲꓸ ꓒꓵꓽ ꓐꓶ ꓔꓬ ꓢꓰ ꓡꓳ= ꓟꓽ ꓝꓱꓹ ꓓꓳ ꓡꓰ ꓢꓰ= ꓡꓲ-ꓢꓴ ꓥꓳꓽ ꓗꓪ ꓕꓳ ꓶ ꓫꓬꓹ ꓟ ꓠꓬ ꓐꓵꓽ ꓡ ꓓꓴ ꓐꓱ ꓶ ꓠꓬ ꓟꓽ ꓥ= ꓣꓳ ꓡꓲ-ꓢꓴ ꓠꓬ ꓕꓳ ꓶ ꓔꓯ ꓵꓺ ꓠꓲꓹ ꓫꓵ ꓢꓴ꓾ ꓕꓳ ꓶ ꓧꓪ ꓢꓴ ꓥ ꓟꓲ ꓠꓱꓸ_ ꓡꓳ= ꓖꓳ ꓡꓱ ꓥ ꓟꓲ ꓕꓳ ꓶ ꓫꓬꓹ ꓟꓬꓱꓽ ꓕꓱ ꓟ ꓠꓬ꓾ ꓫꓵꓽ ꓪꓳꓼ ꓐꓱ ꓶ ꓔꓲꓺ ꓖꓶ ꓟ ꓟꓬꓱꓽ ꓕꓲ ꓟ ꓥ ꓢꓲ꓾ ꓪꓴꓽ ꓧꓶ ꓟ ꓐꓰ꓾ ꓫꓸ ꓓꓴ ꓔꓳꓹ ꓜꓳ ꓟ ꓮ ꓙꓵꓽ ꓔꓯ ꓜꓲꓽ ꓓ ꓡꓰ꓾ ꓠꓲꓹ ꓘꓪ ꓫꓵ ꓔꓬ ꓡꓳ=
ꓕꓳ ꓶ ꓕꓱ ꓟ ꓬꓲꓸ ꓑꓷꓠ ꓫꓬꓹ ꓓꓳ ꓡ ꓕꓯꓽ ꓠꓴ ꓠꓲꓹ ꓟ ꓗꓪ ꓮ ꓡꓲ ꓓꓵ ꓙ ꓓꓳ ꓡ ꓡ? 2007 ꓘꓳꓼ ꓐꓰ꓾ 2020 ꓘꓳꓼ ꓗꓪ ꓓꓵꓽ ꓙ ꓚꓱꓹ ꓮ ꓡꓲ ꓡꓶꓸ ꓙꓰ ꓡ? ꓮ ꓟꓶ ꓝꓸ ꓢꓲꓸ ꓕꓳ ꓶ ꓕꓱ ꓟ ꓔꓯ ꓮ ꓡꓲ ꓒꓬꓱꓼ ꓡ ꓝꓲ ꓠꓲꓹ ꓫꓵ ꓢꓰꓽ ꓡ?
English- Lisu Dictionary ꓐꓰ꓾Lisu – English Dictionary ꓕꓱ ꓠꓬꓲꓽ ꓑꓷꓠ ꓔꓯ ꓮ ꓟꓶ Dictionary Application ꓗꓪ ꓗꓶꓻ ꓧꓳꓽ ꓢꓲꓸ ꓡꓲ-ꓢꓴ ꓐꓴ ꓮ ꓘꓶꓸ ꓣꓱꓽ ꓗꓸ ꓘꓳꓽ ꓡꓰ ꓝꓲ ꓠꓲꓹ ꓫꓵ ꓡꓳ= ꓖꓳ ꓡꓱ ꓥ ꓟꓲ Application ꓒꓬꓱꓼ ꓡ ꓠꓹ ꓟ ꓥꓪ ꓠꓬ ꓬꓰ ꓟꓽ ꓗꓴꓸ= ꓕꓱ ꓡꓱ ꓬꓰ ꓔꓺ ꓡ ꓢꓴ ꓔꓯ ꓟꓲ ꓣꓱꓽ ꓬꓯꓼ ꓔꓬ ꓡꓳ= ꓕꓱ ꓡꓱꓳ ꓫꓵꓽ ꓕꓳ ꓶ ꓠꓬ ꓡꓲ-ꓢꓴ ꓐꓴ ꓗꓳ ꓡꓳ ꓗꓪ꓾ ꓡꓲ-ꓢꓴ ꓒꓽ ꓐꓴ ꓡꓰ ꓬꓲꓸ ꓪꓴꓸ ꓫꓬꓹ ꓒꓬꓱꓼ ꓡ ꓟ ꓥꓳ ꓐꓰ ꓥꓪ ꓔꓯ ꓐꓯ ꓖꓶ ꓡ ꓢꓴ ꓙꓳ ꓡꓳ= ꓕꓱ ꓟ ꓮ ꓙꓵꓽ ꓠꓬ ꓪꓴ-ꓢ ꓡꓰ ꓥꓪ ꓔꓯ ꓢꓯꓼ ꓧꓳꓽ ꓖꓶ ꓢꓲꓸ ꓬꓰ ꓐ ꓡ ꓝꓲ ꓟ ꓗꓪ ꓐꓰ ꓥ ꓠꓬꓲ꓾ ꓬꓲꓸ ꓔꓯ ꓫꓸ ꓟꓳ ꓐꓯ ꓔꓬ ꓥꓳ= Lisu Dictionary Application ꓓꓳ ꓡ ꓠꓹ ꓟ ꓕꓲ ꓟꓲ ꓠꓯ ꓗꓪ ꓐꓰ ꓡꓲ-ꓢꓴ ꓒꓽ ꓡꓲ-ꓢꓴ ꓟ ꓢꓷꓸ ꓢꓴ ꓗꓴꓸ ꓢꓴ ꓐꓴ ꓐꓰ ꓟꓬꓱꓽ ꓬꓰ ꓔꓺ ꓠꓲꓹ ꓫꓵ ꓡꓳ= ꓕꓲ ꓣꓳ ꓣꓳ ꓠꓬ ꓬꓰ ꓙ ꓐ ꓡ ꓥꓳ ꓐꓰ ꓓꓵꓽ ꓙ ꓢꓲꓸ꓾ ꓪꓽ ꓘꓴ ꓥꓳ ꓡꓳꓸ ꓔꓬ ꓡꓳ=
ꓥꓻꓳ꓾ ꓮ ꓟꓶ ꓠꓬ ꓠꓱꓸ ꓐꓯꓼ ꓕꓲ ꓚꓱꓹ ꓮ ꓔꓲꓸ ꓢꓷꓸ ꓠꓲꓹ ꓫꓵ ꓟ ꓠꓻ ꓠꓬꓲ ꓢꓰꓽ ꓓꓴ ꓥꓳ= ꓲ-ꓓꓲ-ꓬ ꓟꓵꓽ ꓗꓪ ꓟ ꓡꓲ-ꓢꓴ ꓐꓴ ꓔꓯ “ꓡꓲ-ꓢꓴ” ꓟꓽ ꓐꓯ ꓐꓯ “ꓬꓳ-ꓐꓲ” ꓘꓴ ꓩꓴ ꓡ ꓟ ꓚ ꓟꓲꓽ ꓔꓯ ꓬꓲꓸ ꓕꓳꓼ ꓕꓲ ꓙꓳ ꓙꓳ ꓓꓴꓸ ꓓꓴꓸ ꓤꓼ ꓐꓯ ꓟꓸ ꓖꓶ ꓗꓹ ꓡꓯ?
ꓣꓳ ꓟ-ꓡꓴ-ꓫꓵ-ꓓꓰ ꓟꓵꓽ ꓗꓪ ꓡꓲ-ꓢꓴ ꓐꓴ ꓐꓰ ꓬꓲꓸ ꓪꓴꓸ ꓜꓲ ꓡꓯ ꓘꓳ ꓡ ꓟ ꓢꓲꓽ ꓒ ꓐꓴ ꓔꓯ ꓥꓳꓽ ꓝꓸ ꓖꓶꓽ ꓢꓴ ꓠꓬ (ꓫꓸ ꓪ ꓝꓸ ꓢꓴ) ꓠꓬ ꓑꓲ-ꓢꓲ-ꓡ (Pisila) ꓟꓬꓱꓺ ꓔꓸ ꓢꓴ ꓮ-ꓒꓴꓸ ꓒꓽ (Singpho) ꓕꓲ ꓣꓳ ꓥ ꓡꓳ= ꓬꓲꓸ ꓡꓰ ꓣꓳ ꓡꓲ-ꓢꓴ ꓔꓯ “Yawyin” ꓞꓳ ꓫꓵꓽ ꓥꓳ꓾ ꓐꓰ ꓖꓳ ꓗꓪ ꓚꓳ ꓛꓲ ꓡ ꓟ ꓟꓯꓼ ꓢꓲꓽ ꓒ ꓐꓴ ꓔꓯ ꓫꓸ ꓪ ꓝꓸ ꓖꓶꓽ ꓗꓷ ꓠꓬ꓾ ꓕꓳ ꓶ ꓐꓳ ꓒꓽ ꓡꓰ “Yawyin” ꓐꓰ ꓐꓳ ꓟꓽ ꓕꓯꓹ ꓡꓰ ꓠꓬꓲ꓾ “Yobin” ꓐꓯ ꓢꓲꓸ ꓐꓳ ꓚꓲꓸ ꓔꓸ ꓬꓰ ꓡꓳ= ꓖꓳ ꓕꓲ ꓠꓬꓲ ꓗꓪ ꓐꓰ ꓣꓳ ꓔꓯ “Yobin” ꓐꓯ ꓓꓳ ꓡ ꓟ ꓥ ꓡꓳ= ꓖꓳ ꓡꓱ ꓥ ꓟꓲ ꓲ-ꓓꓲ-ꓬ ꓗꓴꓷꓼ ꓙꓵꓽ ꓢꓲꓽ ꓒ ꓐꓴ ꓚꓲꓸ ꓟꓶ ꓓꓴ ꓚ ꓟꓲꓽ ꓕꓳ ꓶ ꓗꓪ ꓠꓬ꓾ “Yobin” ꓔꓯ ”Lisu” ꓥ ꓟꓲ ꓘꓴ_ ꓢꓰꓽ ꓡꓳ꓾ ꓐꓳ ꓧꓳꓽ ꓔꓸ ꓡꓳ= ꓝꓮꓲ ꓠꓱꓸ ꓐꓯꓼ ꓞꓳ ꓫꓵꓽ ꓐꓴ ꓡꓰ “Yobin” ꓔꓯ ”Lisu” ꓘꓴ ꓔꓬ ꓟ ꓬꓲꓸ ꓪ ꓥ ꓟꓲ ꓢꓷꓸ ꓡꓳ=
ꓢꓲꓽ ꓒ ꓕꓳ ꓶ ꓗꓪ “Yobin” ꓐꓳ ꓔꓸ ꓡꓳ ꓐꓯ ꓥ ꓟꓲ꓾ ꓲ-ꓓꓲ-ꓬ- ꓟꓵꓽ ꓗꓪ ꓟ ꓡꓲ-ꓢꓴ ꓐꓴ ꓮ ꓙꓵꓽ ꓠꓬ ꓚꓲ ꓛꓬ ꓔꓱꓹ ꓚꓲ ꓛꓬ “ꓡꓲ-ꓢꓴ” ꓥ ꓡꓳ ꓐꓰ ꓣꓷꓠꓸ ꓔꓬ ꓡꓳ= ꓗꓴꓷꓼ ꓙꓵꓽ ꓢꓲꓽ ꓒ ꓖꓼ ꓙꓬ ꓗꓪ ꓥ ꓟꓲ ꓫꓬꓹ ꓔꓱꓹ ꓢꓲꓸ “ꓡꓲ-ꓢꓴ” ꓐꓰ ꓘꓴ ꓪ ꓡꓰ ꓠꓬ ꓟꓬꓽ ꓠꓬꓲ ꓙꓲ ꓥꓳ ꓐꓰ ꓓꓵꓽ ꓙ ꓓꓴ ꓙꓳ ꓡꓳ= ꓕꓱ ꓟ ꓠꓬ꓾ ꓟꓲꓸ ꓕꓯ ꓟ ꓦꓬꓼ ꓠꓬꓲ ꓗꓪ ꓬꓰ ꓙꓲꓽ ꓙꓳ ꓟ ꓟꓬꓱꓽ ꓕꓲ ꓟ ꓥ ꓡꓳ=
ꓲ-ꓓꓲ-ꓬ ꓗꓴꓷꓼ ꓡꓲ-ꓢꓴ ꓔꓬ ꓟꓵꓽ ꓗꓪ ꓢꓴ ꓓꓴ ꓙꓴꓽ ꓓꓴ ꓮ ꓫꓵꓽ ꓑꓶꓸ ꓓꓴ ꓙꓳ ꓔꓬ ꓡ? 2020-21 ꓘꓳꓼ ꓟ ꓘꓴꓽ ꓗꓪ ꓘꓴ ꓔꓴ ꓠꓬꓲ꓾ ꓦꓲ ꓛꓴ ꓠꓬꓲ꓾ ꓐꓱ ꓓꓴꓽ ꓗꓪ ꓡꓴꓽ ꓠꓬꓲ ꓕꓱ ꓡꓱ ꓮ ꓟꓬꓹ ꓫꓵꓽ ꓒꓬꓱꓼ ꓔꓬ ꓟ ꓓꓳꓽ ꓗꓪ ꓡꓳꓸ ꓟꓳ ꓡꓳ= ꓮ ꓡꓲꓳ ꓫꓵꓽ ꓠꓬ ꓗꓽ ꓔꓸ ꓓꓴ ꓓꓽ ꓟ ꓥ ꓡ?
ꓣꓳ ꓟꓵꓽ ꓣꓳ ꓡꓳ ꓗꓪ꓾ 2020 ꓘꓳꓼ ꓬꓲꓸ ꓟꓶꓽ ꓗꓪ ꓟ ꓢꓴꓻ ꓓꓴ ꓫꓸ ꓓꓴ ꓬꓲꓸ ꓕꓲ ꓟꓴꓽ ꓠꓬ ꓕꓱ ꓡꓱ ꓥꓳ= ꓟꓵꓽ ꓚꓰꓺ ꓢꓴ꓾ ꓠꓬꓹ ꓡꓵ ꓠꓬꓹ ꓔꓲꓻ ꓡ ꓞꓳ (Indigenous People) ꓐꓱ ꓶ_ ꓡꓰ ꓟꓶ ꓙꓲꓽ ꓙꓳ ꓟ ꓞꓳ ꓘꓹ ꓙꓶꓻ ꓗꓪ ꓟ ꓚꓲ ꓛꓬ ꓔꓱꓹ ꓚꓲ ꓛꓬ ꓙꓵꓽ_ ꓟ ꓙꓵꓽ ꓪ (Panchayat Raj/ Local Self Government) ꓔꓯ ꓠꓱꓸ ꓐꓯꓼ ꓟꓵꓽ ꓗꓪ ꓐꓰ ꓚꓵꓸ ꓓꓵꓽ ꓔꓸ ꓢꓴ ꓬꓯꓽ ꓐꓯ: (settlers from other areas) ꓐꓴ ꓔꓯ_ ꓟꓲ ꓐꓱꓻ ꓖꓶꓽ ꓔꓸ ꓟ ꓪꓴꓸ ꓠꓬꓲ ꓖꓳ ꓟ ꓔꓯ ꓒꓳꓹ ꓔꓳꓹ ꓟ ꓗꓪ ꓜꓲꓽ ꓟꓽ ꓘꓴ ꓠꓬꓲ꓾ ꓬꓰ ꓙꓲꓽ ꓙꓳ ꓟ ꓕꓯꓽ ꓢꓲ ꓬꓰ ꓘꓳꓻ ꓡꓰ ꓢꓲꓸ ꓙꓵꓽ ꓗ ꓡꓰ ꓝꓶꓸ ꓡ ꓟ ꓥ ꓡꓳ= ꓖꓳ ꓡꓱ ꓥ ꓟꓲ ꓮ ꓟꓶ ꓠꓬ ꓫꓵꓽ ꓪꓴ ꓡꓯ ꓫꓵ ꓫꓬꓺ ꓡ ꓔꓬ ꓡꓳ= ꓬꓲꓸ ꓑꓶꓸ ꓠꓬ ꓜꓳꓽ ꓥ ꓟꓲ꓾ ꓠꓲꓹ ꓟ ꓗꓪ ꓠꓻ ꓪꓴꓽ ꓔꓬ ꓟ ꓟꓶ ꓫꓵꓺ ꓫꓵꓺ ꓗꓷ ꓡꓰ ꓟ ꓑꓶꓸ ꓓꓴ ꓬꓰ ꓙꓲꓽ ꓙꓳ ꓟ ꓕꓯ ꓢꓲ ꓬꓰ ꓘꓳꓻ ꓡꓰ ꓟ_ ꓟꓲ ꓙꓳ ꓡꓳ=
ꓡꓳꓸ ꓐꓲ_ ꓟ ꓡꓲ-ꓢꓴ ꓒꓽ ꓡꓲ-ꓢꓴ ꓟ ꓐꓴ
ꓠꓴ ꓠꓬ ꓲ-ꓓꓲ-ꓬ ꓟꓵꓽ ꓡꓲ-ꓢꓴ ꓐꓴ ꓗꓳ ꓡꓳ ꓗꓪ ꓐꓰ ꓢꓷꓸ ꓢꓴ ꓟꓳꓻ ꓐ ꓡ ꓢꓴ (intellectual) ꓕꓲ ꓣꓳ ꓔꓲꓸ ꓥ ꓟ ꓥꓪ ꓠꓴ ꓢꓷꓸ ꓡꓳ= ꓡꓲ-ꓢꓴ ꓘꓹ ꓡꓲ-ꓢꓴ ꓟꓵꓽ ꓔꓯ ꓮ ꓫꓵꓽ ꓑꓶꓸ ꓓꓴ ꓠꓱꓸ ꓐꓯꓼ ꓟꓬꓱꓺ ꓒꓳꓹ ꓩꓴ ꓗꓷ ꓡ_ ꓡ? ꓕꓱ ꓟ ꓔꓯ ꓟꓳꓸ ꓠꓴ ꓓꓵꓽ ꓙ ꓟ ꓐꓯ ꓟꓳꓸ ꓖꓶ ꓡꓯ=
1960-70 ꓘꓳꓲꓼ ꓠꓯꓸꓼ ꓗꓪ ꓣꓳ ꓡꓲ-ꓢꓴ ꓞꓳ ꓘꓹ ꓮ ꓟꓬꓹ ꓟ ꓔꓯ ꓠꓱꓸ ꓐꓯꓼ ꓟꓬꓱꓺ ꓡꓶꓸ ꓑ ꓗꓷ ꓟ ꓙꓳˍ ꓡꓳ= ꓖꓳ ꓕꓯ ꓣꓳꓽ ꓡꓲ-ꓢꓴ ꓔꓬ ꓟꓵꓽ ꓗꓪ ꓑꓺ ꓡ ꓟ ꓟꓯꓼ ꓜꓲꓽ ꓐꓴ ꓡꓰ ꓬꓲꓸ ꓪ ꓠꓲꓹ ꓡꓶꓽ ꓔꓯ ꓛꓳ ꓢꓲꓸ ꓡꓶꓸ ꓑ ꓗꓷ ꓐꓶ= ꓖꓳ ꓗꓸ ꓠꓯꓸ ꓗꓪ ꓐꓰ ꓠꓬ ꓖꓳ ꓡꓱ ꓟꓵꓽ ꓟꓬꓱꓺ꓾ ꓞꓳ ꓘꓹ ꓟꓬꓱꓺ ꓐꓰ꓾ ꓬꓲ ꓙꓬ ꓡꓳ ꓟꓬꓱꓺ ꓡꓶꓸ ꓑ ꓟ ꓟꓽ ꓙꓳ= ꓕꓲ ꓐꓱ ꓔꓯ ꓕꓱ ꓡꓱ ꓡꓶꓸ ꓑ ꓗꓷ ꓡ ꓐꓯ ꓥ ꓟꓲ꓾ ꓡꓲ-ꓢꓴ ꓐꓴ ꓠꓬ ꓚꓲ ꓛꓬ ꓥꓳꓽ ꓗꓪ ꓐꓰ ꓟꓬꓱꓺ ꓔꓸ ꓟ ꓬꓲꓸ ꓚꓰꓺ ꓟꓬꓱꓺ ꓔꓯ ꓠꓬꓲꓸ ꓠꓬꓲ ꓗꓪ ꓛꓲ ꓣꓱꓽ ꓔꓬ ꓢꓰ ꓡꓳ= Vijoynagar ꓔꓯ ꓓ-ꓪꓳꓽ-ꓓꓰ꓾ ꓥ ꓠꓬ ꓙꓱ-ꓦꓲ-ꓠꓽ-ꓔꓶꓸ꓾ Gandhigram ꓔꓯ ꓫꓵ-ꓓꓰ-ꓘꓹ꓾ Phaparbari ꓔꓯ ꓖꓪꓽ-ꓟꓰ-ꓓꓰ꓾ Ramnagar ꓔꓯ ꓮ-ꓠꓬꓲꓽ-ꓚꓲꓸ-ꓓꓴꓽ-ꓓꓰ ꓘꓴ ꓔꓬ ꓢꓰꓽ ꓡꓳ= ꓖꓳ ꓟ ꓡꓰ ꓟꓽ ꓞꓲ꓾ ꓢꓲꓽ ꓒ ꓐꓴ ꓕꓳ ꓶ ꓗꓪ ꓥ ꓟꓲ ꓟꓵꓽ ꓖꓳ ꓟꓬ ꓟ ꓔꓯ ꓡꓲ-ꓢꓴ ꓐꓴ ꓚꓲ ꓛꓬ ꓥꓳꓽ ꓗꓪ ꓞꓳ ꓘꓹ ꓟꓬꓱꓺ ꓠꓬ ꓕꓱ ꓡꓱ ꓥꓳ꓾ ꓖꓳ ꓡꓱ ꓠꓬꓱ ꓡꓰ ꓥꓳ ꓐꓰ ꓣꓷꓠꓸ ꓔꓬ ꓢꓰꓽ ꓡꓳ= ꓖꓳ ꓡꓱ ꓠꓬꓲ ꓟꓽ ꓓ ꓟꓽ ꓢ ꓫꓸ ꓓꓴ ꓠꓬ ꓟꓽ ꓙꓳ ꓟ ꓡꓰ ꓐꓰ ꓡꓳꓸ ꓟꓳ ꓡꓳ=
ꓡꓲ-ꓢꓴ ꓒꓵꓽ ꓒ ꓡꓯꓼ ꓠꓬꓱꓽ ꓬꓲ ꓫꓵ ꓬꓲ ꓙꓰ
ꓕꓲ ꓗꓴꓷꓼ ꓕꓲ ꓗꓴꓷꓼ ꓗꓪ ꓙꓳ ꓟ ꓡꓲ-ꓢꓴ ꓕꓳ ꓶ ꓐꓰ ꓗ ꓟꓲꓽ ꓡꓲ ꓒꓰꓼ ꓜꓴ ꓐꓴ ꓮ ꓡꓲꓳ ꓫꓵꓽ ꓟꓬꓱꓽ ꓔꓯ ꓟꓽ ꓓ ꓟꓽ ꓢ ꓢꓯꓼ ꓕꓵꓼ ꓠꓯ ꓡꓳ꓾ ꓢꓯꓼ ꓖꓶ ꓠꓯ ꓡꓳ ꓐꓰ ꓓꓵꓽ ꓙ ꓡ?
ꓣꓳ ꓡꓲ-ꓢꓴ ꓐꓴ ꓚꓲ ꓛꓬ ꓥꓳꓽ ꓪꓴꓽ ꓡ ꓟꓴ ꓡ ꓢꓲꓸ ꓟꓬꓽ ꓠꓬꓲ ꓐꓲ ꓜꓲꓼ ꓡꓰ ꓠꓹ ꓟ ꓐꓱ ꓶ ꓣꓳ ꓮ ꓙꓵꓽ ꓢꓴ ꓢꓯꓼ ꓕꓵꓼ ꓙꓲꓽ ꓙꓳ ꓟ 4-5 ꓫꓵꓽ ꓛꓲ ꓙꓳ ꓡꓳ꓾ ꓐꓰ ꓓꓵꓽ ꓙ ꓡꓳ=
- ꓢꓴꓻ ꓥꓳ ꓗꓪ ꓙꓳ ꓟ ꓐꓯ ꓘꓶꓽ ꓕꓲ ꓫꓵꓽ ꓫꓵꓽ ꓣꓳ ꓡꓲ-ꓢꓴ ꓥꓳꓽ ꓗꓪ ꓟꓽ ꓙꓳ ꓢꓰꓽ ꓟ ꓐꓯ ꓘꓶꓽ ꓮ ꓟꓬꓹ ꓙꓳ ꓡꓳ= ꓕꓱ ꓡꓱꓳ ꓫꓵꓽ ꓐꓱ ꓶ ꓐꓯ ꓘꓶꓽ ꓫꓵꓼ ꓒꓳꓹ꓾ ꓥ ꓠꓬ ꓟꓯꓸ ꓤ꓾ ꓥꓪꓸ ꓤ ꓠ ꓗ ꓡꓳ=
- ꓣꓳ ꓥꓳꓽ ꓣꓱꓽ ꓢꓲꓸ ꓐꓳ ꓕꓲꓺ ꓡꓰ꓾ ꓔꓶꓼ ꓡꓰ ꓟꓽ ꓓ ꓟ ꓟꓵꓽ ꓟꓬꓱꓺ꓾ ꓡ ꓞꓳ ꓟꓬꓱꓺ ꓔꓯ ꓕꓲ ꓫꓵꓽ_ ꓡꓰ ꓐꓳ ꓐ ꓡ ꓠꓹ ꓟ ꓖꓪ ꓙꓱ ꓡꓯ ꓘꓳ ꓠꓯ ꓡꓳ= ꓔꓯꓺ ꓥꓳ꓾ “Rangoon, Brazil, Scotlandꓹ America” ꓕꓱ ꓡꓱꓳ ꓫꓵꓽ ꓔꓯ ꓐꓳ ꓕꓯꓹ ꓡꓰ ꓠꓹ ꓟ꓾ ꓮ ꓙꓵꓽ ꓢꓴ ꓢꓷꓸ ꓪ ꓡꓰ ꓠꓹ ꓟ ꓙ ꓖꓴ ꓣꓱꓽ ꓬꓯꓼ ꓡꓳ=
- ꓐꓯ ꓘꓶꓽ ꓝꓳꓹ ꓕꓲ ꓝꓳꓹ ꓗꓪ ꓐꓰ ꓬꓲꓸ ꓟꓸ ꓟꓲꓽ ꓮ ꓟꓬꓹ ꓫꓵꓽ ꓗꓪ ꓣꓱꓽ ꓔꓬ ꓟ ꓔꓯ ꓥ ꓟꓲ ꓬꓲꓸ ꓟꓸ ꓟꓲꓽ ꓒꓯꓽ ꓠ ꓗ ꓡꓳ= ꓮ ꓙꓵꓽ ꓢꓴ ꓢꓷꓸ ꓪ ꓡꓰ ꓝꓲ ꓠ ꓗ ꓡꓳ=
- ꓕꓱ ꓟꓬ ꓫꓵꓽ ꓮ ꓙꓵꓽ ꓔꓯ ꓬꓲ ꓖ ꓙꓳ ꓙꓳ ꓬꓰ ꓐ ꓡ ꓠꓹ ꓟ ꓐꓱ ꓶ꓾ ꓚꓲ ꓛꓬ ꓟꓵꓽ ꓗꓪ ꓡꓲ-ꓢꓴ ꓥꓳꓽ ꓗꓳ-ꓟꓲ-ꓔꓲ ꓕꓲꓟ ꓫꓬꓹ ꓜꓶ ꓢꓲ꓾ ꓟꓬꓱꓽ ꓬꓰ ꓠ ꓗ ꓡꓳ=
- ꓝꓮꓲ ꓟꓵꓽ ꓗꓳꓹ ꓓꓵ ꓓꓵ ꓗꓪ ꓬꓲꓸ ꓜꓴ ꓙꓳ ꓡ ꓠ ꓗ ꓡꓳ= International Lisu Language Development Forum ꓕꓲ ꓜꓴ ꓔꓯ ꓗ ꓟꓲꓽ ꓡꓲ ꓒꓰꓼ ꓜꓴ ꓗꓪ ꓐꓰ ꓒꓴ ꓢꓲꓸ ꓧꓳꓽ ꓣꓱꓽ ꓙ ꓠꓯ ꓡꓳ= ꓧꓳꓽ ꓪꓴꓸ ꓟꓴ ꓢꓴ ꓐꓴ ꓕꓱ ꓡꓱ ꓬꓰ ꓙ ꓖꓶꓽ ꓡꓯ ꓐꓰ ꓓꓰꓽ ꓠꓲꓹ ꓫꓵ ꓡꓳ=
ꓝꓮꓲ ꓡꓲ-ꓢꓴ ꓞꓳ ꓡꓱ ꓐꓴ ꓔꓯ ꓠꓴ ꓗꓪ ꓐꓰ ꓮ ꓫꓵꓽ ꓬꓲꓼ ꓠꓬꓲꓸ ꓖꓶ ꓓꓴ꓾ ꓓꓳꓽ ꓐꓯ ꓖꓶ ꓓꓴ ꓙꓳ ꓡ?
ꓣꓳ ꓞꓳ ꓡꓱ ꓐꓴ ꓔꓯ ꓐꓯ ꓗꓹ ꓠꓹ ꓫꓵ ꓟ ꓠꓬ꓾
- ꓢꓷꓸ ꓠꓲꓹ ꓧꓪ ꓢꓲ ꓢꓷ ꓠꓲꓹ ꓣꓱꓽ ꓪ ꓡꓰ ꓝꓲ ꓓꓴ ꓬꓰ ꓡꓯ= (ꓣꓳ ꓢꓳ ꓟꓶ_ ꓟ ꓮ ꓔꓳ ꓕꓽ ꓗꓷ ꓡꓰ ꓝꓲ)
- ꓚꓲ ꓛꓬ ꓐꓱꓻ/ ꓟꓵꓽ ꓔꓯ ꓬꓲ ꓖ ꓙꓳ ꓙꓳ ꓫꓬꓹ ꓦꓵ ꓢꓲ꓾ ꓜꓽ ꓓꓴ ꓓꓳ ꓓꓴ꓾ ꓣꓱꓽ ꓓꓴ ꓟꓴ ꓓꓳ ꓙꓳ ꓡ ꓝꓲ ꓡꓯ= (ꓣꓳ ꓮ ꓗꓪ ꓔꓬ ꓟꓲ ꓕꓲ ꓫꓵ ꓫꓵ ꓬꓰ)
- ꓪꓴ-ꓢ ꓔꓯ ꓥꓳ ꓡꓳꓸ ꓢꓲꓸ ꓤꓶ ꓦꓬꓼ ꓠꓬꓲ ꓗꓪ ꓧꓪꓸ ꓡꓰ ꓢꓴ ꓬꓰ ꓙꓰ ꓡꓯ= (ꓠꓲꓹ ꓟ ꓕꓽ ꓐꓬ ꓡꓰ꓾ ꓪꓴ-ꓢ ꓡꓰ ꓣꓳ ꓔꓯ ꓧꓳꓽ ꓔꓬ ꓡꓳ)
ꓮ ꓟꓶ ꓖꓳ ꓑꓳꓸ ꓠꓴ ꓟꓽ ꓓ ꓟꓽ ꓢ ꓬꓰ ꓠꓲꓹ ꓫꓵ ꓢꓰꓽ ꓟ ꓟꓬꓱꓽ ꓕꓲ ꓫꓵꓽ ꓫꓵꓽ ꓙꓳ_ ꓡ? ꓙꓳ ꓠꓬ ꓮ ꓔꓲꓸ ꓤꓼ ꓐꓯ ꓟꓸ ꓖꓶ ꓗꓹ ꓡꓯ=
ꓣꓳ ꓡꓲ-ꓢꓴ ꓔꓯ ꓗꓴꓸ ꓙꓲꓽ ꓙꓳ ꓟ ꓕꓲ ꓒꓳꓹ ꓗꓪ ꓮ ꓟꓶ ꓬꓰ ꓠꓲꓹ ꓫꓵ ꓟ ꓙꓳ ꓢꓰꓽ ꓡꓳ= ꓟꓽ ꓟꓶ ꓫꓵ ꓕꓯ ꓬꓰ ꓠꓯ ꓟ ꓠꓬ꓾ (1) ꓲ-ꓓꓲ-ꓬ ꓗꓪ ꓟ ꓡꓲ-ꓢꓴ ꓚ ꓟꓲꓽ ꓑꓷꓠ ꓐꓳ ꓠꓯ ꓡꓳ= (ꓮ ꓟꓶ ꓥꓪ ꓚꓲꓸ ꓛꓬ ꓡꓰ ꓐꓳ ꓪꓴꓸ ꓔꓴ ꓔꓬ ꓡꓳ) (2) ꓟꓸ ꓟꓲꓽ ꓕꓳ ꓶ ꓐꓳ ꓢꓲꓸ ꓠꓬꓲꓸ ꓑꓶ ꓖꓶꓽ ꓠꓲꓹ ꓫꓵ ꓡꓳ= (3) ꓣꓳ ꓡꓲ-ꓢꓴ ꓐꓴ ꓔꓯ ꓧꓪ ꓒꓴ ꓥꓳꓽ ꓟꓸ ꓖꓶ ꓡꓯ ꓘꓳ ꓢꓲ꓾ Social Media ꓗꓪ ꓗꓶ ꓖꓶꓽ ꓠꓲꓹ ꓫꓵ ꓡꓳ= ꓕꓱ ꓟꓬ ꓟ ꓬꓰ ꓒꓬꓱꓼ ꓡ ꓠꓹ ꓟ ꓐꓱ ꓶ ꓪꓽ ꓘꓴ ꓙ ꓡꓯ= ꓫꓸ ꓟꓳ ꓪ=
ꓡꓲ-ꓢꓴ ꓥꓳꓽ ꓡꓲ-ꓢꓴ ꓢꓯꓼ ꓗꓪ ꓐꓰ ꓓꓳꓽ ꓐꓰ ꓬꓲꓸ ꓫꓵ ꓬꓲ ꓙꓰ ꓐꓯ ꓟꓸ ꓖꓶ ꓠꓹ ꓟ ꓡꓲ-ꓢꓴ ꓤꓶ (Lisu Times) ꓠꓬ Media ꓔꓯ ꓟꓳꓸ ꓠꓲꓹ ꓡꓱ ꓢꓴ ꓐꓴ ꓡꓰ ꓪꓴꓸ ꓔꓴ ꓔꓬ ꓟ ꓥ ꓡꓳ= ꓠꓴ ꓮ ꓡꓲ ꓟꓳꓻ ꓟ ꓐꓰ꓾ ꓚꓴ ꓬꓲꓹ ꓮ ꓡꓲ ꓖꓶ ꓠꓲꓹ ꓫꓵ ꓡ?
ꓡꓲ-ꓢꓴ ꓤꓶ (the Lisu Times) ꓗꓪ ꓠꓲꓹ ꓡꓱ ꓡꓱ ꓢꓯꓼ ꓕꓵꓼ ꓔꓬ ꓢꓴ ꓮ ꓙꓵꓽ ꓢꓴ ꓔꓯ ꓮ ꓓꓲꓽ ꓫꓸ ꓟꓳ ꓓꓴ ꓙꓳ ꓡꓳ= ꓔꓶ ꓐꓬꓱꓽ ꓔꓯ ꓖꓼ ꓢꓲꓸ ꓣꓳ ꓫꓵꓽ ꓐꓱ ꓶ ꓕꓲ ꓣꓳ ꓕꓲ ꓗꓴ ꓣꓱ ꓙ ꓪ ꓡꓰ ꓝꓲ ꓡꓯ= ꓫꓸ ꓟꓳ ꓪ=
Photo courtesy of Avia Ngwazah, interviewed by KJ, produced by ADJ
=======
(ꓡꓲ-ꓢꓴ ꓤꓶ (the Lisu Times) ꓠꓬ ꓡꓲ-ꓢꓴ ꓕꓳ ꓶ ꓐꓰ ꓡꓲꓽ ꓒꓰꓼ ꓔꓯ ꓫꓺ ꓒꓵꓽ ꓟ_ ꓐꓰ ꓤꓶ ꓟꓴ ꓡ ꓠꓹ ꓟ꓾ ꓡꓲ-ꓢꓴ ꓐꓴ ꓢꓷꓸ ꓙꓲꓽ ꓙꓳ ꓟ ꓓꓳꓽ ꓐꓯ ꓖꓶ ꓠꓹ ꓟ ꓐꓰ꓾ ꓡꓲ-ꓢꓴ ꓐꓴ ꓕꓲ ꓣꓳ ꓛꓳꓽ ꓕꓲ ꓣꓳ ꓙ ꓡꓯ ꓘꓳ ꓪ ꓠꓹ ꓟ ꓢꓯꓼ ꓕꓵꓼ ꓔꓬ ꓟ꓾ ꓴꓢꓮ ꓗꓪ ꓬꓲ ꓚꓰꓺ ꓔꓶ ꓔꓸ ꓟ ꓓꓳꓽ ꓐꓯ ꓑꓶ ꓖꓴ news channel ꓕꓲ ꓟ ꓥ ꓡꓳ=)
