EBI ꓢꓲꓽ ꓫꓬ ꓕꓳ ꓶ ꓢꓳ ꓦꓲ (30) ꓘꓳꓼ ꓐꓲ ꓡꓰ ꓟ ꓑꓮꓲ ꓔꓯ 2023 ꓘꓳꓼ 11 ꓦ 18 ꓠꓬꓲ ꓕꓯꓽ ꓰꓐꓲ ꓢꓳ ꓦꓲ꓾ ꓟꓳ-ꓐꓲ ꓡꓳ ꓒꓱ꓾ ꓬꓥ-ꓖꓳꓥ ꓟꓵꓽ ꓫꓴ ꓗꓪ ꓬꓰ ꓡꓳ꓿
ꓰꓐꓲ ꓔꓯ 1993 ꓘꓳꓼ ꓕꓯꓽ ꓲ-ꓢꓰ ꓘꓴ ꓜꓲꓼ ꓞꓳ ꓗꓪ ꓪꓴꓸ ꓔꓴ ꓗꓷ ꓟ ꓥ ꓡꓳ꓿ ꓢꓳ ꓒꓽ/ꓟ ꓐꓴ ꓠꓬ ꓟꓸ ꓒ ꓓ ꓟ ꓡꓯ-ꓟꓯ ꓬꓳ-ꓫꓴ ꓦꓲ ꓗꓪ ꓕꓲ ꓐꓱ ꓔꓬ ꓢꓲꓸ ꓪꓴꓸ ꓔꓴ ꓗꓷ ꓡꓳ꓿
1994 ꓘꓳꓼ ꓗꓪ ꓛꓲ ꓡ ꓠꓬ ꓮ ꓟꓶ ꓙꓳˍ ꓟ ꓟꓵꓽ ꓔꓯ ꓡꓳ ꓑ ꓒꓽ Jim Willoughby ꓡꓰ ꓪꓴꓻ ꓙ ꓡ ꓢꓲ꓾ ꓖꓳ ꓗꓪ ꓢꓳ ꓦꓲ꓾ ꓔꓬ ꓦꓲ ꓫꓬꓹ ꓪꓴꓸ ꓔꓴ ꓢꓲꓸ ꓚꓲꓸ ꓛꓲ ꓡ ꓡꓳ꓿
“ꓢꓳ ꓦꓲ ꓒꓴ ꓗꓷ ꓟ (30) ꓘꓳꓼ ꓟ ꓗꓪ ꓫꓸ ꓓꓴ꓾ ꓙ ꓫꓸ ꓓꓴ ꓥ ꓟꓲ ꓮ ꓟꓬꓹ ꓔꓳꓹ ꓜꓳꓽ ꓗꓳꓸ ꓡ ꓟ ꓡꓰ ꓐꓰ꓾ ꓗꓹ ꓛꓲ ꓓꓴ꓾ ꓪꓴ-ꓢ ꓔꓯ ꓫꓱꓸ ꓖꓶ ꓓꓴ ꓥ ꓟꓲ ꓙꓳ ꓡꓳ꓿” ꓐꓰ ꓢꓳ ꓦꓲ ꓚꓺ ꓟꓲꓽ ꓢꓳ ꓦꓲ ꓪꓴꓸ ꓔꓴ ꓢꓴ ꓟꓸ ꓒ ꓓꓽ ꓟ ꓬꓳ-ꓫꓴ ꓡꓯ-ꓟꓯ ꓡꓰ ꓚꓺ ꓟꓸ ꓖꓶ ꓡꓳ꓿
ꓢꓲꓽ ꓫꓬ ꓕꓳ ꓶ ꓢꓳ ꓦꓲ ꓒꓴ ꓠꓹ ꓟ ꓟꓸ ꓟꓲꓽ ꓢꓷꓸ ꓠꓲꓹ ꓙꓳ ꓢꓴ ꓣꓱꓽ ꓬꓯꓼ ꓠꓬꓲ ꓮ ꓘꓶꓸ ꓢꓯꓼ ꓕꓵꓼ ꓗꓷ ꓢꓲ꓾ ꓮ ꓟꓶ ꓠꓬ ꓢꓷꓸ ꓠꓲꓹ ꓙꓳ ꓢꓴ (20) ꓣꓳ ꓛꓲ ꓙꓳ ꓡꓰꓳ꓾ ꓐꓰ ꓟꓸ ꓒ ꓓꓽ ꓟ ꓬꓳ-ꓫꓴ ꓡꓯꓯ ꓡꓰ ꓐꓯ ꓡꓳ꓿
ꓙꓲ-ꓢꓴ ꓘꓴ ꓜꓲꓼ ꓞꓳ ꓗꓪ ꓐꓰ ꓴꓢꓮ ꓗꓪ ꓢꓲꓽ ꓫꓬ ꓕꓳ ꓶ ꓬꓲꓸ ꓪꓴꓸ ꓢꓳ ꓙꓰ ꓢꓴ ꓠꓬ ꓴꓢꓮ ꓗꓪ ꓔꓬ ꓒꓰꓹ ꓬꓰ ꓠꓬꓲ ꓔꓳꓹ ꓙ ꓢꓴ ꓐꓴ ꓠꓲꓹ ꓟ ꓙꓬ ꓡꓰ ꓟ ꓙꓳ ꓡꓰꓳ꓿
ꓖꓳ ꓟ ꓑꓶꓸ ꓓꓴ “ꓥꓪ ꓔꓯ ꓝꓲ ꓤꓹ ꓠꓬꓲ ꓡꓯ꓿ ꓴꓢꓮ ꓗꓪ ꓥꓪ ꓟꓽ ꓔꓬ ꓒꓰꓹ꓿ ꓡꓽ ꓡ ꓢꓲꓸ ꓪꓴ-ꓢ ꓟꓬꓱꓽ ꓬꓰ ꓓꓴ ꓥꓳ” ꓐꓰ ꓐꓯ ꓡꓯ ꓘꓳ ꓢꓲꓸ ꓢꓳ ꓒꓬꓱꓼ ꓡ ꓟ꓾ ꓝꓮꓲ ꓴꓢꓮ ꓗꓪ ꓕꓳ ꓶ ꓢꓳ ꓓꓳ ꓡꓰ ꓠꓬ ꓦ ꓡꓱ ꓐꓳ ꓐꓳ ꓡꓽ ꓡ ꓢꓲꓸ ꓟꓬꓱꓽ ꓬꓰ ꓟ ꓗꓪ ꓐꓰ ꓠꓱꓸ ꓐꓯꓼ ꓢꓴ ꓐꓴ ꓥ ꓟꓲ ꓴꓢꓮ ꓗꓪ ꓕꓳ ꓶ ꓢꓳ ꓚꓱꓹ ꓝꓰꓸ ꓒꓴ ꓙꓰ ꓟ ꓥ ꓡꓳ” ꓐꓰ ꓐꓯ ꓩꓴ ꓡ ꓡꓳ꓿
ꓢꓳ ꓦꓲ ꓐꓱ ꓶ ꓮ ꓟꓶ ꓗꓪ ꓛꓲ Wayne Ford ꓐꓰ ꓴꓢꓮ ꓗꓪ ꓟ ꓘꓴ ꓜꓲꓼ ꓞꓳ ꓐꓴ ꓡꓰ ꓝꓸ ꓢꓲꓸ ꓬꓰ ꓙ ꓔꓬ ꓡꓳ꓿
(30) ꓘꓳꓼ ꓟ ꓘꓴꓽ ꓗꓪ ꓰꓐꓲ ꓢꓳ ꓦꓲ ꓗꓪ ꓐꓰ 1000 ꓣꓳ ꓟꓽ ꓞꓲ ꓢꓳ ꓓꓳ ꓡꓰ ꓢꓲꓸ ꓟꓬ-ꓟ ꓗꓴꓷꓼ꓾ ꓕꓮꓲ꓾ ꓟꓶ-ꓡꓯ-ꓫ꓾ ꓳ-ꓢꓲ-ꓔꓯ-ꓡꓲ-ꓬ꓾ ꓴꓢꓮ ꓐꓰ ꓠꓱꓸ ꓐꓯꓼ ꓗꓴꓷꓼ ꓮ ꓟꓬꓹ ꓗꓪ ꓧꓳꓽ ꓢꓴ ꓟꓴ ꓢꓴ ꓬꓰ ꓔꓬ ꓡꓳ꓿
ꓖꓪ ꓜꓴ ꓟꓴꓽ ꓖꓪ ꓠ ꓠꓹ ꓓꓴ
