ꓰꓐꓲ ꓢꓳ ꓦꓲ ꓧꓳꓽ ꓢꓴ Dr. ꓥꓪ-ꓬꓯ-ꓓꓲ ꓠꓬ 2024 ꓘꓳꓼ 2 ꓦ 14 ꓠꓬꓲ꓾ ꓠꓯꓼ 11 ꓙꓵꓹ ꓕꓯꓽ ꓢꓲꓺ ꓒ ꓠꓯꓸꓼ ꓗꓪ ꓬꓲꓼ ꓟꓶ ꓡꓰꓳ꓿
Dr. ꓥꓪ-ꓬꓯ-ꓓꓲ ꓠꓬ ꓶꓸ ꓕꓯ ꓡꓲ-ꓢꓴ ꓢꓲꓽ ꓫꓬ ꓕꓳ ꓶ ꓫꓬꓹ ꓔꓱꓹ ꓜꓴ ꓗꓪ ꓟꓬꓱꓽ ꓬꓰ ꓗꓷ ꓢꓴ ꓟꓸ ꓒ ꓒꓲ-ꓡꓲ ꓐꓰ ꓟꓸ ꓟ ꓮ-ꓥꓰ-ꓙ ꓡꓰ 1970 ꓘꓳꓼ 7 ꓦ 16 ꓠꓬꓲ ꓕꓯꓽ ꓑꓴ-ꓔ-ꓳ ꓡꓳ ꓒꓱ꓾ ꓠꓟ-ꓕꓶ-ꓘꓴ ꓘꓹ ꓗꓪ ꓦꓵ ꓔꓸ ꓢꓴ ꓥ ꓡꓳ꓿
ꓬꓲꓸ ꓠꓬ ꓢꓷꓸ ꓠꓲꓹ ꓕꓳ ꓶ ꓐꓰ ꓢꓲꓽ ꓫꓬ ꓕꓳ ꓶ ꓢꓳ ꓢꓲꓸ 2002 ꓘꓳꓼ ꓗꓪ ꓐꓰ ꓕ ꓑꓳꓸ ꓰꓐꓲ ꓢꓲꓽ ꓫꓬ ꓕꓳ ꓶ ꓢꓳ ꓦꓲ ꓗꓪ ꓟꓸ ꓪꓴꓸ ꓔꓴ ꓡ ꓢꓴ ꓥ ꓡꓳ꓿ ꓝꓮꓲ ꓰꓚꓐꓢ ꓗꓪ꓾ ꓡꓲ-ꓢꓴ ꓢꓲꓽ ꓫꓬ ꓕꓳ ꓶ ꓜꓴ꓾ ꓣꓮꓑꓧꓮ ꓧꓳꓴꓢꓰ ꓟꓬꓮꓠꓟꓮꓣ ꓗꓪ ꓟꓬꓱꓽ ꓬꓰ ꓗꓷ ꓢꓴ꓾ ꓞꓳ ꓤ ꓮ ꓟꓬꓹ ꓢꓷꓸ ꓢꓴ ꓐꓰ ꓛꓳ ꓒꓯꓹ ꓮ ꓘꓶꓸ ꓟꓬꓽ ꓢꓴ ꓕꓲꓽ ꓣꓳ ꓥ ꓡꓳ꓿
ꓬꓲꓸ ꓠꓬ ꓟꓴ ꓖꓪ ꓐꓳ ꓒꓽ꓾ ꓝꓮꓲ ꓡꓲ-ꓢꓴ ꓐꓴ ꓗꓪ ꓐꓰ ꓡꓯ ꓒꓯꓹ ꓕꓲꓽ ꓐ ꓟꓽ ꓐꓲˍ ꓟ ꓕꓳ ꓶ ꓐꓳ ꓒꓽ ꓐꓴ ꓗꓪ ꓐꓰ ꓕꓲꓽ ꓣꓳ ꓥ ꓡꓳ꓿ 2018 ꓘꓳꓼ ꓗꓪ ꓐꓰ ꓕ ꓑꓳꓸ ꓰꓐꓲ ꓧꓳꓽ ꓪꓴꓸ ꓟꓴ ꓢꓴ ꓬꓰ ꓔꓬ ꓟ ꓬꓲꓸ ꓢꓯꓼ ꓟꓬ ꓡꓳꓹ ꓬꓰ ꓕꓲꓽ ꓠꓬꓲ ꓗꓪ ꓛꓲ ꓥ ꓡꓳ꓿
Dr. ꓥꓪ-ꓬꓯ-ꓓꓲ ꓟꓲ ꓠꓯ ꓦꓬꓼ ꓠꓬꓲ ꓫꓱꓽ ꓡꓳꓹ ꓬꓰ ꓕꓯꓽ ꓬꓲꓸ ꓞꓲꓼ (54) ꓘꓳꓼ ꓙꓳ ꓡꓳ꓿
ꓬꓲꓸ ꓧꓪ ꓖꓳ ꓓꓱꓽ ꓔꓯ 2024 ꓘꓳꓼ 2 ꓦ 15 ꓠꓬꓲ ꓟꓳꓼ ꓡꓳ ꓒꓳꓹ (2) ꓙꓵꓹ ꓕꓯꓽ ꓪ ꓘꓴ ꓜꓲꓼ ꓓꓴ ꓬꓰ ꓢꓲ꓾ ꓟꓳ-ꓐꓲ꓾ ꓢ-ꓒꓴ-ꓢꓴꓼ ꓡꓱ ꓜꓳ ꓓꓰꓺ ꓗꓪ ꓫꓺ ꓔꓵꓸ ꓓꓴ ꓥ ꓡꓳ꓿
