💕Vision Driven People- ꓦ ꓐꓬꓱꓽ ꓡꓰ ꓧꓳꓽ ꓔꓬ ꓟ ꓞꓳ ꓫꓵꓽ ꓒꓬꓱꓼ ꓡ ꓠꓹ ꓟ ꓥ ꓡꓳ꓿
ꓡꓲ-ꓢꓴ ꓐꓯˍ ꓟ ꓞꓳ ꓫꓵꓽ ꓐꓴ ꓕꓲ ꓟ ꓕꓲ ꓖ ꓔꓬ ꓠ ꓗꓷ ꓡꓰ ꓥ ꓟꓲ ꓦ ꓐꓬꓱꓽ ꓗꓪ ꓜꓲ ꓡꓯ ꓘꓳ꓾ ꓪꓽ ꓡꓯ ꓘꓳ ꓐ ꓡ ꓡꓳ꓿
ꓡꓲ-ꓢꓴ ꓐꓴ ꓐꓱ ꓶ ꓒꓴ ꓙꓳ ꓢꓴ꓾ ꓙꓵꓽ ꓪ ꓙꓳ ꓢꓴ ꓡꓰ ꓧꓳꓽ ꓖꓶ ꓡ ꓠꓬ ꓙꓲˍ ꓡꓳ꓿ ꓖꓳ ꓡꓱ ꓥ ꓟꓲ ꓬꓲꓸ ꓪ ꓒꓴ ꓟꓽ ꓙꓳ ꓡꓰ꓾ ꓙꓵꓽ ꓪ ꓟꓽ ꓙꓳ ꓡꓰ꓾ ꓥ ꓠꓬ ꓒꓴ ꓐꓰ ꓙꓵꓽ ꓪ ꓑꓶꓸ ꓓꓴ ꓠꓬꓲꓸ ꓤꓲ ꓧꓪꓸ ꓜꓽ ꓡꓯ ꓘꓳ ꓡ ꓕꓯꓽ ꓮ ꓡꓲ ꓗꓪ ꓔꓺ ꓓꓴ ꓟꓽ ꓥ꓾ ꓬꓰ ꓫꓸ ꓡ ꓥꓳ꓿
ꓦ ꓐꓬꓱꓽ ꓗꓪ ꓐꓰ ꓧꓳꓽ ꓙꓰˍ ꓠꓬ ꓮ ꓘꓶꓸ ꓗꓸ ꓘꓳˍ ꓡꓳ꓿ ꓡꓲ-ꓢꓴ ꓡꓲꓽ ꓒꓰꓼ ꓡꓲꓽ ꓚꓱꓹ꓾ ꓞꓳ ꓙꓳ ꓓꓵꓽ ꓙ ꓚꓱꓹ ꓔꓯ ꓜꓯꓻ ꓜꓳˍ ꓡꓳ꓿
ꓡꓲ-ꓢꓴ ꓥ ꓕ ꓑꓳꓸ ꓔꓯ ꓦ ꓐꓬꓱꓽ ꓕꓱ ꓟ ꓙꓳ ꓡꓰ ꓝꓲ ꓢꓲ꓾ ꓖꓳ ꓟ ꓗꓪ ꓐꓰ ꓧꓳꓽ ꓔꓬ ꓝꓲ ꓠꓹ ꓟ ꓓꓵꓽ ꓙ ꓙꓰ ꓡꓯ꓿
ꓡꓲ-ꓢꓴ ꓐꓴ ꓐꓱ ꓶ ꓦ ꓐꓬꓱꓽ (the vision for Lisu people): 💕
“ꓡꓲꓽ ꓒꓰꓼ ꓢꓯꓸ ꓔꓬ ꓟ꓾ ꓠꓲꓹ ꓥꓳꓻ ꓬꓰ ꓙ ꓡꓯ ꓘꓳ ꓔꓬ ꓟ ꓐꓰ ꓪꓴꓽ ꓟꓴ ꓡ ꓚꓱꓹ ꓗꓪ ꓢꓯꓼ ꓖꓶ ꓡꓯ ꓘꓳ ꓔꓬ ꓟ ꓡꓲ-ꓢꓴ (Lisu with Identity, Solidarity, and Empowerment)”
💕
ꓪꓵꓼ ꓘꓶꓽ (3) ꓘꓶꓽ ꓠꓬ꓾ (Three Pledges)
(1) ꓡꓲ-ꓢꓴ ꓥꓳꓽ ꓫꓵꓽ ꓐꓰ꓾ ꓣꓳ ꓙꓳ ꓣꓳ ꓡꓲꓽ ꓒꓰꓼ ꓔꓯ ꓠꓲꓹ ꓠꓵ ꓫꓺ ꓒꓵꓽ ꓓꓴ ꓥꓳ= (Identity)
(2) ꓡꓲ-ꓢꓴ ꓠꓬꓲꓽ ꓡꓲ-ꓢꓴ ꓟꓽ ꓙꓳ꓾ ꓠꓲꓹ ꓥꓳꓻ ꓬꓰ ꓙ ꓡꓯ ꓘꓳ ꓓꓴ ꓥꓳ= (Solidarity)
(3) ꓠꓵ ꓠꓲꓹ꓾ ꓙ ꓗꓴ ꓠꓲꓹ꓾ ꓪꓴꓽ ꓟꓴ ꓡ ꓚꓱꓹ ꓗꓪ ꓢꓯꓼ ꓕꓵꓼ ꓓꓴ ꓥꓳ= (Empowerment)
💕
Flag definition —
ꓒꓯꓽ ꓗꓪ ꓜꓸ ꓐꓬꓱꓽ ꓟꓲꓼ ꓪꓳꓼ ꓠꓲꓹ ꓛꓵꓼ ꓠꓬ ꓢꓲ ꓡꓲꓹ ꓟ꓾ ꓠꓲꓺ ꓠꓲꓺ ꓠꓬ ꓑꓶꓸˍ ꓟ꓾ ꓗꓴ
ꓟ ꓜꓰ ꓓꓽ ꓟ ꓠꓬ ꓡꓲ-ꓢꓴ ꓮ ꓙꓵꓽ ꓕꓲ ꓧꓶꓹ ꓕꓲ ꓚ ꓥ ꓟ꓾ ꓡꓲ-ꓢꓴ ꓛꓬꓹ ꓕꓲꓽ ꓗꓸ ꓠꓬ ꓡꓲ-ꓢꓴ ꓗꓺ ꓟꓲꓽ ꓡꓲꓽ ꓒꓰꓼ ꓮ ꓙꓵꓽ ꓟ ꓬꓲꓸ ꓛꓵ ꓔꓯꓺ ꓥꓳꓽ ꓥ ꓡꓳ꓿ “ꓡꓲ-ꓢꓴ ꓠꓬ ꓢꓲ ꓡꓲꓹ ꓟ ꓔꓯ ꓠꓵ ꓢꓴ꓾ ꓑꓶꓸ ꓢꓴ꓾ ꓕꓲ ꓧꓶꓹ ꓕꓲ ꓚ ꓙꓳ ꓢꓴ ꓐꓰ꓾ ꓡꓲꓽ ꓒꓰꓼ ꓗꓺ ꓟꓲꓽ ꓔꓯ ꓫꓺ ꓒꓵꓽ ꓢꓴ” ꓐꓯˍ ꓟ ꓬꓲꓸ ꓟꓸ ꓟꓲꓽ ꓥ ꓡꓳ꓿
💕ꓮ ꓫꓵꓽ ꓑꓶꓸ ꓓꓴ/ꓮ ꓕꓯꓽ ꓚꓲꓸ ꓟꓶ ꓓꓴ ꓬꓰ ꓓꓴ ꓥ ꓡ? (Why and when to celebrate)???
ꓕꓳ ꓶ ꓙꓳ ꓡ ꓟ ꓠꓬ ꓣꓳ ꓟꓬ ꓢꓶꓽ ꓒꓴ ꓡˍ ꓟ ꓛꓲ ꓕꓳꓼ ꓓꓽ ꓟ ꓥ ꓡꓳ꓿ ꓥꓳꓽ ꓫꓵꓽ ꓟꓶꓽ ꓬꓰ ꓫꓵꓽ ꓟꓶ ꓬꓰˍ ꓥꓳ꓾ ꓐꓯ ꓟ ꓡꓰ ꓐꓰ ꓥꓳꓽ ꓫꓵꓽ ꓔꓯ ꓬꓲꓸ ꓚꓰꓺ ꓣꓴ ꓔꓸ ꓟ ꓥ ꓡꓳ꓿ ꓗꓴꓷꓼ ꓓꓽ ꓟ 4 ꓗꓴꓷꓼ ꓗꓪ ꓔꓬ ꓟ ꓡꓲ-ꓢꓴ ꓐꓴ ꓐꓰ ꓟꓵ ꓗꓳ ꓓꓵ ꓓꓵ ꓗꓪ ꓛꓲ ꓬꓰ ꓢꓴ ꓐꓴ ꓔꓯ ꓕꓲ ꓠꓲꓹ ꓕꓲ ꓪ ꓧꓶꓹ ꓐ ꓡ ꓟ ꓚꓲꓺ ꓚ ꓠꓬ ꓕꓱ ꓟ ꓥ ꓡꓳ꓿ ꓖꓳ ꓟ ꓑꓶꓸ ꓓꓴ ꓡꓲ-ꓢꓴ ꓕꓳ ꓶ ꓚꓰꓼ ꓓꓳ ꓡ ꓟ ꓔꓯ ꓡꓲ-ꓢꓴ ꓦꓬꓼ ꓠꓬꓲ ꓘꓴ ꓠꓹ ꓟ ꓥ ꓡꓳ꓿
ꓘꓳꓼ ꓫꓵꓼ 15 ꓠꓬꓲ ꓠꓬ ꓘꓳꓼ ꓪꓴꓸ ꓔꓴˍ ꓟ꓾ ꓤꓶ ꓬꓲꓸ ꓫꓵꓼ ꓗꓪ ꓓꓵꓽ ꓡ ꓟ ꓢꓷꓸ ꓡꓰ ꓓꓴ꓾ ꓑꓮꓲ ꓬꓰ ꓙꓰ ꓚꓳ ꓥ ꓟꓲ ꓗꓹ ꓛꓲ ꓗꓹ ꓓ ꓟ ꓦꓬꓼ ꓠꓬꓲ ꓥ ꓠꓬꓲ꓾ ꓕꓱ ꓟ ꓔꓯ ꓢꓲꓺ ꓣꓴ ꓔꓸ ꓡꓳ꓿
ꓒꓴ ꓟꓶ ꓖꓴ ꓟꓶꓸ ꓖꓴ ꓑꓮꓲꓽ ꓓ ꓟ ꓬꓰ ꓓꓴ ꓟꓽ ꓐꓯ ꓔꓬ꓿ ꓟꓲ ꓦꓲ ꓟꓲ ꓗꓪ꓾ ꓟꓲ ꓤ ꓠꓱ ꓟꓲ ꓔꓯ ꓦ ꓐꓬꓱꓽ ꓟꓸ ꓖꓶ꓾ ꓪꓵꓼ ꓘꓶꓽ ꓐꓯ ꓝꓲ ꓢꓲꓸ ꓣꓳ ꓮ ꓫꓵꓽ ꓬꓰˍ ꓥ ꓟꓲ ꓕꓱ ꓟ ꓔꓯ ꓜꓯꓻ ꓜꓳꓽ ꓡꓰ ꓝꓲ ꓓꓴ ꓐꓯˍ ꓟ ꓥ ꓡꓳ꓿
🎈🎈🎈2027 ꓡꓲ-ꓢꓴ ꓫꓵꓽ ꓦꓬꓼ ꓠꓬꓲ ꓑꓮꓲ ꓔꓶ ꓙꓱꓼ ꓓꓽ ꓟ ꓠꓬ꓾ “ꓣꓳ ꓠꓲꓹ ꓥꓳꓻ ꓬꓰ ꓙ ꓡꓯ ꓘꓳ” ꓕꓲꓽ ꓦ 15 ꓠꓬꓲ꓾ 2027 ꓘꓳꓼ ꓐꓱ ꓶ)
ꓑꓮꓲ ꓬꓲꓸ ꓕꓲꓽ ꓟꓴꓽ – “ꓪꓽ ꓡꓯ ꓘꓳ ꓟ ꓣꓳ ꓢꓯꓼ ꓪ”
ꓟꓳꓸ ꓙ ꓢꓲꓸ ꓑꓮꓲ ꓬꓰ ꓙꓰ ꓓꓴ ~ ꓔꓬ ꓟꓵꓽ ꓟꓽ ꓐꓱ ꓡꓲ-ꓢꓴ ꓠꓬꓲꓽ ꓡꓲ-ꓢꓴ ꓟꓽ ꓙꓳ ꓐꓯˍ ꓟ ꓔꓯ ꓟꓳꓸ ꓖꓶ ꓠꓹ ꓟ꓾ ꓣꓳ ꓢꓴ ꓣꓳ ꓕꓽ ꓚꓵꓹ ꓞꓰ ꓡꓯ ꓘꓳ ꓠꓹ ꓟ ꓢꓷꓸ ꓠꓲꓹ ꓖꓶꓽ꓾ ꓢꓯꓼ ꓖꓶ ꓡꓯ ꓘꓳ꓿
ꓡꓲ-ꓢꓴ ꓠꓬꓲꓽ ꓡꓲ-ꓢꓴ ꓟꓽ ꓙꓳ
💕
Hashtags for LND
#LisuNationalDay
#LisuIdentity, Solidarity& Empowerment
#NoTwoLisus
