ꓲ-ꓓꓲ-ꓬ~ꓟꓬ-ꓟ~ ꓧꓶꓽ ꓗꓴꓷꓼ 3 ꓗꓴꓷꓼ ꓔꓯ ꓝꓸ ꓖꓶˍ ꓟ ꓡꓲ-ꓓꓳ ꓙ ꓖꓴ (ꓢꓲ-ꓔꓲꓸ-ꓪꓼ ꓙ ꓖꓴ) ꓔꓯ ꓫꓬꓹ ꓡꓲꓸ ꓫꓬꓹ ꓜꓶ ꓢꓲꓸ ꓶ ꓡꓯꓼ ꓙ ꓖꓴ ꓒꓴ ꓓꓴ ꓥꓳ꓾ ꓐꓰ ꓧꓶꓽ ꓗꓴꓷꓼ ꓪꓴꓸ ꓓꓵ ꓫꓲ-ꓚꓰ-ꓒꓲ ꓡꓰ ꓢꓚꓳ ꓜꓲꓼ ꓓꓴ ꓗꓪ ꓐꓯ ꓓꓳ ꓡ ꓡꓳ=
ꓓꓳꓽ ꓕꓱ ꓟ ꓠꓬ 2025 ꓘꓳꓼ 8 ꓦ 31 ꓠꓬꓲ ꓗꓪ ꓐꓰ 9 ꓦ 1 ꓠꓬꓲ ꓗꓪ ꓛꓲ ꓧꓶꓽ ꓗꓴꓷꓼ ꓔꓲ-ꓬ-ꓙꓲ ꓡꓳ ꓒꓱ ꓗꓪ ꓬꓰˍ ꓟ the Shanghai Cooperation Organization (SCO) Summit ꓜꓲꓼ ꓓꓴ ꓗꓪ ꓐꓰ ꓓꓳ ꓡ ꓟ ꓓꓳꓽ ꓕꓲꓽ ꓟ ꓥ ꓡꓳ=
ꓙ ꓖꓴ ꓕꓱ ꓟ ꓫꓬꓹ ꓡꓲꓸ ꓠꓹ ꓟ ꓔꓯ ꓟꓳ ꓲ-ꓓꓲ-ꓬ ꓥ ꓟꓲ ꓫꓸ ꓕꓱ ꓔꓬ ꓟ ꓟꓶ ꓫꓵ ꓫꓵ ꓡꓳꓼ ꓬꓰꓳ= ꓮ ꓟꓶ ꓧꓶꓽ ꓥ ꓟꓲ ꓫꓸ ꓕꓱ ꓝꓸ ꓡ ꓟ ꓑꓶꓸ ꓓꓴ ꓕꓱ ꓟ ꓠꓬ ꓞꓽ ꓞꓽ ꓒꓬꓱꓼ ꓡ ꓥꓳ ꓐꓰ ꓥꓳ ꓡꓳꓸ ꓓꓴ ꓙꓳ ꓡ ꓡꓳ=
ꓙ ꓖꓴ ꓕꓱ ꓟ ꓫꓬꓹ ꓡꓲꓸ ꓟꓬꓱꓽ ꓐꓱ ꓶ ꓟꓬ-ꓟ ꓕꓲ ꓒꓳꓹ ꓗꓪ ꓐꓰ Transland Public ꓗꓳ-ꓑꓶ-ꓠꓰ ꓐꓰ꓾ ꓧꓶꓽ ꓗꓴꓷꓼ ꓕꓲ ꓒꓳꓹ ꓗꓪ ꓐꓰ Yunnan Baoshan Industrial Group ꓐꓴ ꓥ ꓡꓳ꓾ ꓐꓰ ꓓꓳꓽ ꓢꓷꓸ ꓪ ꓡꓳ꓿ ꓬꓲꓸ ꓪ ꓡꓰ ꓗ-ꓑ-ꓔꓲ ~ ꓟꓶ-ꓚꓲ-ꓠ ~ ꓑ-ꓢꓮꓳ ꓗꓪ ꓛꓲ ꓙ ꓖꓴ ꓫꓬꓹ ꓡꓲꓸ ꓓꓴ ꓕꓳ ꓶ ꓐꓳ ꓔꓲꓺ ꓓꓳ ꓡꓰꓳ꓿
ꓡꓲ-ꓓꓳ ꓙ ꓖꓴ (ꓗꓸ ꓠꓯꓸ ꓠꓬ ꓙ ꓖꓴ ꓫꓬꓹ ꓢꓴ ꓟꓯꓼ ꓜꓲꓽ ꓔꓯ ꓟꓬꓱꓺ ꓓꓳꓽ ꓖꓶ ꓢꓲꓸ ꓢ-ꓔꓲ-ꓪꓼ ꓙ ꓖꓴ ꓐꓰ ꓟꓬꓱꓺ ꓗꓷꓳ) ꓕꓱ ꓟ ꓠꓬ ꓲ-ꓓꓲ-ꓬ ꓕꓲ ꓒꓳꓹ ꓗꓪ ꓡꓲ-ꓓꓳ ꓡꓳ ꓒꓱ ꓗꓪ ꓐꓰ ꓪꓴꓸ ꓔꓴ ꓢꓲ꓾ ꓟꓬ-ꓟ ꓗꓴꓷꓼ ꓗꓪ ꓠꓬ ꓩꓴ-ꓖꓳ ꓔꓲ-ꓠ ꓟꓵꓽ꓾ ꓟꓶ-ꓚꓲ-ꓠ꓾ ꓐꓳ-ꓟꓳ ꓟꓵꓽ ꓗꓪ ꓙꓻ ꓙꓰ ꓢꓲ꓾ ꓧꓶꓽ ꓒ ꓗꓴꓷꓼ ꓘꓱꓲꓹ-ꓟꓲ ꓗꓪ ꓛꓲˍ ꓟ ꓙ ꓖꓴ ꓥ ꓡꓳ= ꓟꓲꓺ 717 ꓕꓷꓹ ꓙꓳˍ ꓡꓳ꓿
ꓟꓲ ꓠꓯ ꓟꓶꓽ ꓙ 2 ꓟ ꓕꓲꓽ ꓟ ꓦꓬꓼ ꓠꓬꓲ ꓗꓪ꓾ ꓙ-ꓑ ꓔꓯ ꓗꓽ ꓔꓳꓹ ꓡꓯ ꓘꓳ ꓟ ꓗꓪ ꓧꓶꓽ ꓒꓽ ꓔꓯ ꓬꓰ ꓙ ꓠꓹ ꓟ ꓮ-ꓟꓯ-ꓡꓲ-ꓖ ꓧꓳꓽ ꓪꓴꓸ ꓟꓴˍ ꓟ ꓗꓪ ꓛꓳꓽ ꓟꓯꓼ ꓜꓴ (Alliances) ꓐꓰ꓾ ꓟꓵꓽ ꓚꓰ ꓡ ꓞꓳ ꓐꓴ ꓮ ꓡꓻ 2 ꓢꓯꓹ ꓣꓳ ꓛꓲ ꓮ ꓘꓶꓸ ꓢꓯꓼ ꓕꓵꓼ ꓢꓲꓸ ꓫꓬꓹ ꓓꓳ ꓡ ꓟ ꓙ ꓖꓴ ꓕꓲꓽ ꓚꓱꓹ ꓥ ꓡꓳ=
ꓠꓲꓽ ꓩꓴ ꓡꓰ ꓖꓳꓼ ꓡꓳꓼ ꓖꓳꓼ ꓡꓳꓼ (24) ꓖꓳꓼ ꓙꓳˍ ꓟ ꓪ ꓚꓲ ꓕꓯ ꓢꓲ ꓫꓬꓹ ꓔꓸ ꓟ ꓑꓶꓸ ꓓꓴ ꓮ ꓘꓶꓸ ꓙꓲ ꓣꓴ ꓓꓴ ꓙꓳˍ ꓙ ꓖꓴ ꓥ ꓡꓳ꓾ ꓐꓯ ꓢꓲꓸ ꓟꓲ ꓠꓯ ꓗꓪ ꓟꓬꓱ ꓓꓳꓽ ꓙꓳˍ ꓢꓰꓽ ꓡꓳ꓿ ꓟꓬ-ꓟ ꓙꓲꓼ ꓟꓳ-ꓓꓳ (Burma Jeep) ꓐꓯ ꓢꓲꓸ ꓬꓲꓸ ꓫꓳꓽ ꓕꓲ ꓩꓴꓸ ꓫꓬꓹ ꓢꓲ ꓙ ꓖꓴ ꓕꓱ ꓟ ꓗꓪ ꓐꓰ ꓲ-ꓓꓲ-ꓬ ꓕꓲ ꓒꓳꓹ ꓗꓪ ꓚꓳꓸ ꓧꓶꓽ ꓒ ꓐꓱ ꓶ ꓟꓯꓼ ꓶ ꓤ ꓶ ꓟꓲ ꓦ ꓖꓶ (24) ꓧꓪꓸ ꓬꓰ ꓗꓷꓳ ꓐꓰ ꓚꓺ ꓟꓲ ꓗꓪ ꓐꓳ ꓔꓸ ꓡꓳ꓿
ꓮ ꓟꓶ ꓕꓱ ꓟ ꓔꓯ ꓫꓬꓹ ꓔꓱꓹ ꓩꓴ ꓡ ꓠꓬ꓾ ꓲ-ꓓꓲ-ꓬ ꓟꓵꓽ ꓐꓶꓽ ꓓꓳ ꓐꓰ ꓡꓳ ꓪꓴꓸ ꓟꓵꓽ꓾ ꓟꓬ-ꓟ ꓗꓴꓷꓼ ꓡꓳ ꓪꓴꓸ ꓟꓵꓽ꓾ ꓐꓰ ꓧꓶꓽ ꓗꓴꓷꓼ ꓐꓶꓽ ꓓꓵꓽ ꓟꓵꓽ ꓮ ꓙꓵꓽ ꓗꓪ ꓙ ꓡꓯ ꓘꓳ ꓚꓱꓹ꓾ ꓶ ꓡꓯꓼ ꓚꓱꓹ꓾ ꓢꓷꓸ ꓠꓲꓹ ꓚꓱꓹ ꓮ ꓒꓳ ꓒꓳ ꓗꓪ ꓪꓴꓽ ꓟꓴ ꓡ ꓓꓴ ꓙꓳˍ ꓥꓳ ꓐꓰ ꓢꓪꓼ ꓔꓬ ꓡꓳ= ꓡ ꓞꓳ ꓢꓯꓹ ꓢꓯꓹ ꓪꓹ ꓪꓹ ꓐꓱ ꓶ ꓶ ꓡꓯꓼ ꓚꓱꓹ ꓬꓲꓸ ꓫꓵꓼ ꓓꓳ ꓡ ꓓꓴ ꓥ ꓡꓳ=
ꓧꓶꓽ ꓒꓽ ꓥ ꓟꓲ ꓬꓲꓸ ꓗꓴꓷꓼ ꓗꓪ ꓫꓬꓹ ꓚꓰꓼ ꓓꓳ ꓔꓸ ꓟ ꓶ ꓤ ꓶ ꓟꓲ ꓪꓴꓽ ꓠꓲꓹ ꓫꓵ ꓟ ꓡꓰ ꓐꓰ꓾ ꓲ-ꓓꓲ-ꓬ ꓒꓽ ꓐꓴ ꓥ ꓟꓲ ꓕꓱ ꓡꓱ ꓶ ꓡꓯꓼ ꓬꓰ ꓠꓲꓹ ꓫꓵ ꓡꓳ= ꓖꓳ ꓟ ꓑꓶꓸ ꓓꓴ ꓕꓱ ꓟ ꓫꓬꓹ ꓡꓲꓸ ꓫꓬꓹ ꓜꓶ ꓩꓴ ꓡ ꓠꓬ꓾ ꓟꓬ-ꓟ ꓗꓴꓷꓼ ꓕꓲ ꓕꓳꓸ ꓗꓪ ꓥ ꓟꓲ ꓙꓰ ꓙꓰ ꓡꓽ ꓡꓽ ꓢꓻ ꓡ ꓓꓴ ꓥꓳ꓾ ꓐꓰ ꓥꓳ ꓡꓳꓸ ꓔꓬ ꓡꓳ= ꓟꓯꓼ ꓗꓽ ꓢꓴ ꓠꓬ ꓙ ꓖꓴ ꓗꓪ ꓫꓴꓸ ꓗꓽ ꓢꓲꓸ ꓐꓳ ꓬꓲꓼ ꓡꓰ ꓓ ꓥꓳ= ꓶ ꓡꓯꓼ ꓬꓰ ꓢꓴ ꓥ ꓟꓲ ꓖꓳ ꓡꓱ ꓒꓬꓱꓼ ꓡ ꓥꓳ= ꓘꓹ ꓔꓶ꓾ ꓡꓳ ꓒꓱ ꓔꓶ ꓟˍ ꓟꓲ ꓙꓳ ꓡ ꓥꓳ= ꓗꓹ ꓡ ꓢꓴ꓾ ꓓꓵꓽ ꓓꓳ ꓢꓴ ꓐꓱ ꓶ ꓜꓽ ꓓꓴ ꓓꓳ ꓓꓴ ꓥ ꓟꓲ ꓮ ꓟꓬꓹ ꓣꓱꓽ ꓬꓯꓼ ꓡ ꓟ ꓑꓶꓸ ꓓꓴ꓾ ꓔꓶ ꓜꓽ ꓔꓶ ꓓꓳ ꓢꓴ ꓥ ꓟꓲ ꓙꓲ ꓖꓴ ꓙꓳ ꓡ ꓥꓳ=
ꓡꓲ-ꓢꓴ ꓐꓴ ꓮ ꓡꓲ ꓙꓽ ꓖꓶ ꓠ ꓔꓸ ꓥꓻꓰ?
ꓡꓲ-ꓢꓴ ꓐꓴꓳ꓾ ꓡꓲ-ꓓꓳ ꓙ ꓖꓴ ꓗꓪ ꓪ ꓚꓲ ꓡꓳ ꓘꓳꓽ ꓮ ꓗꓪ ꓥ ꓟꓲ ꓠꓽ ꓔꓶꓸ ꓙꓲˍ ꓟ꓾ ꓚꓺ ꓟꓲꓽ ꓙꓳˍ ꓟ ꓟꓵꓽ꓾ ꓬꓲ ꓙꓬ ꓙꓲˍ ꓟ ꓟꓵꓽ ꓧꓪ ꓢꓲꓸ ꓟꓵꓽ ꓢꓽ꓾ ꓔꓶ ꓜꓽ ꓔꓶ ꓓꓳ ꓚꓱꓹ ꓐꓱ ꓶ ꓙꓽ ꓖꓶ ꓠꓹ ꓟ ꓬꓲꓸ ꓙꓵꓹ ꓙꓳ ꓡ ꓥꓳ= ꓪꓰꓻ ꓤ ꓮ ꓟꓬꓹ ꓓꓵꓽ ꓙ ꓟ ꓦꓬꓼ ꓠꓬꓲ ꓐꓱ ꓶ ꓙꓽ ꓖꓶ ꓓꓴ ꓬꓲꓸ ꓙꓵꓹ ꓥ ꓡꓳ= ꓮ ꓟꓶ ꓠꓬ ꓟꓯꓼ ꓢꓰꓼ ꓡꓯ ꓘꓳ ꓔꓬ ꓟ ꓦꓬꓼ ꓠꓬꓲ ꓥ ꓡꓳ꓾ ꓐꓯ ꓥ ꓟꓲ ꓕꓲ ꓠꓬꓲ ꓢꓲ ꓡꓲꓹ ꓟ ꓙꓳ ꓡ ꓢꓲ꓾ ꓡꓲ-ꓓꓳ ꓙ ꓖꓴ ꓗꓪ ꓡꓳ ꓒꓱ ꓬꓲꓸ ꓫꓵꓼ꓾ ꓔꓶ ꓜ ꓔꓶ ꓓꓳ ꓚꓱꓹ ꓬꓲꓸ ꓫꓵꓼ ꓟꓽ ꓙꓳ ꓡ ꓐꓰ ꓐꓯ ꓟꓽ ꓗꓴꓸ= ꓟꓲ ꓠꓯ ꓗꓴꓷꓼ ꓓꓽ ꓟ ꓔꓯ ꓙꓵꓽ ꓢꓴ ꓪꓴꓸ ꓓꓴ ꓣꓱꓽ ꓢꓴ ꓐꓴ ꓡꓰ “ꓬꓰ ꓓꓴ ꓥꓳ” ꓐꓯ ꓩꓴ ꓡ ꓟ ꓑꓶꓸ ꓓꓴ ꓧꓶꓸ ꓕꓯ ꓬꓰ ꓗꓸ ꓟꓽ ꓘꓳ ꓟ ꓥ ꓟꓲ ꓗꓸ ꓘꓳ ꓡ ꓥꓳ꓾ ꓐꓰ ꓥ ꓡꓳꓸ ꓓꓴ ꓙꓳ ꓡꓳ= “ꓧꓳꓺ ꓬꓲꓻ ꓡꓯꓼ ꓚꓳꓸ ꓓꓽ ꓟꓽ ꓓ꓾ ꓢꓲꓽ ꓒꓽ ꓘꓶꓽ ꓔꓯ ꓡꓳꓹ ꓟꓽ ꓓ” ꓐꓯˍ ꓟ ꓔꓯ ꓠꓲꓹ ꓟ ꓗꓪ ꓗꓶ ꓔꓸ ꓙꓲꓽ ꓙꓳˍ ꓡꓳ= ꓡꓲ-ꓢꓴ ꓙ ꓖꓴ ꓒꓴ ꓡ ꓟ ꓡꓰ ꓐꓰ ꓡꓲ-ꓢꓴ ꓐꓴ ꓡꓳ ꓒꓱ ꓘꓹ ꓒꓱ ꓔꓶ ꓢꓲ꓾ ꓶ ꓡꓯꓼ ꓚꓱꓹ꓾ ꓟꓵꓽ ꓗꓽ ꓚꓱꓹ꓾ ꓔꓶ ꓜ ꓔꓶ ꓓꓳ ꓚꓱꓹ ꓐꓱ ꓶ ꓟꓬ ꓢꓶꓽ ꓒꓴ ꓢꓲ꓾ ꓕꓵꓼ ꓡꓵꓸ ꓙꓽ ꓖꓶ ꓖꓴ ꓡꓰ ꓝꓲ ꓡꓯ ꓐꓰ ꓪꓴꓸ ꓠꓲꓹ ꓫꓵ ꓡꓳ= ꓡꓲ-ꓓꓳ ꓙ ꓖꓴ ꓡꓲ-ꓢꓴ ꓐꓱ ꓶ ꓒꓬꓱꓼ ꓡ ꓠꓹ ꓟ ꓪꓴꓸ ꓠꓷꓸ ꓓꓶꓽ ꓙꓵꓹ ꓛꓲꓳ ꓐꓰ ꓪꓴꓸ ꓩꓴ ꓡ ꓥꓳ= ꓡꓲ-ꓢꓴ ꓐꓴ ꓕꓳꓹ ꓕꓳꓹ ꓠꓷꓼ ꓠꓷꓼ ꓬꓲꓸ ꓗꓴ ꓬꓲꓸ ꓡꓯꓼ ꓟꓽ ꓙꓳ ꓙꓰ ꓠꓬꓲ ꓔꓸ ꓟ ꓡꓲ-ꓢꓴ ꓟꓵꓽ꓾ ꓡꓲ-ꓢꓴ ꓙ ꓖꓴ ꓥ ꓠꓬꓲ ꓙꓽ ꓖꓶ ꓝꓲꓸ ꓛꓲꓳ꓿ ꓡꓲ-ꓓꓳ ꓙ ꓖꓴ ꓗꓪ ꓣꓳ ꓝꓯꓸ ꓡꓯ꓾ ꓙꓲˍ ꓟ ꓟꓵꓽ ꓟ ꓣꓳ ꓧꓪ ꓡꓯ꓿ “ꓤ ꓖꓴ ꓠꓲꓹ ꓟ ꓗꓳ ꓡꓳ ꓐꓳ꓾ ꓡꓽ ꓙꓲ ꓖꓯꓼ ꓡꓯꓼ ꓕꓯꓽ ꓢꓲ ꓐꓳ!”
