2025 ꓘꓳꓼ 1 ꓦ 26 ꓠꓬꓲ ꓕꓯ ꓔꓰꓫꓮꓢ ꓗꓪ ꓔꓬ ꓟ ꓡꓲ-ꓢꓴ ꓐꓴ ꓕꓲ ꓠꓲꓹ ꓕꓲ ꓪ.ꓼ ꓡꓳꓥ ꓡꓯ ꓘꓳ ꓢꓴ ꓢꓴ. ꓪꓴ. ꓕꓲ ꓧꓪꓹ ꓡꓲ-ꓢꓴ ꓘꓳꓼ ꓫꓵꓼ ꓑꓮꓲ: ꓔꓯ ꓣꓱ: ꓬꓰ ꓠꓹ ꓟ ꓙꓳ ꓡꓳ ꓐꓰ ꓢꓷ. ꓪ ꓡꓳ= ꓑꓮꓲ: ꓕꓱ ꓟ ꓔꓯ ꓔꓰꓫꓮꓢ ꓡꓲ-ꓢꓴ ꓜꓴ(Lisu Community of Texas-LCOT) ꓗꓪ ꓐꓰ ꓧꓳ: ꓣꓱ: ꓬꓰ ꓔꓬ ꓟ ꓥ ꓡꓳ ꓐꓰ ꓑꓮꓲ ꓔꓯ ꓙ ꓖꓶ ꓢꓴ ꓑꓮꓲ: ꓣꓱ: ꓬꓰ ꓗꓳ-ꓟꓲ-ꓔꓲ ꓧꓳ: ꓞꓳ ꓪꓴ: ꓮ-ꓓꓶ ꓙꓬ ꓗꓪ ꓐꓰ ꓐꓯ ꓟ. ꓖꓶ ꓡ ꓡꓳ=
ꓑꓮꓲ: ꓔꓯ ꓠꓬ ꓠꓯ., ꓠꓯ., 10:30 ꓮꓟ ꓗꓪ ꓐꓰ ꓟꓶ ꓘꓶ. 10:00 ꓙꓵꓹ ꓗꓪ ꓛꓲ ꓥ ꓡꓳ = ꓬꓲ. ꓪꓴ. ꓗꓪ ꓠꓬ ꓪ ꓘꓴ ꓜꓲꓼ ꓓꓴ ꓣꓱ: ꓬꓰ ꓓꓴ ꓥꓳ = ꓜꓲꓼ ꓓꓴ ꓗꓪ ꓪꓴ-ꓢ ꓐꓯ ꓘꓶ ꓢꓯꓼ ꓖꓶ ꓢꓴ ꓠꓬ ꓣꓰꓦ.ꓓꓣ ꓰꓓꓰꓠ ꓚꓧꓮꓣ(ꓔꓡꓚꓚ) ꓥ ꓢꓲ꓾ ꓫꓵ: ꓐꓰ ꓗꓳ. ꓙꓰ ꓙꓳ ꓢꓲ. ꓢꓯꓼ ꓖꓶ ꓢꓴ ꓠꓬ ꓣꓰꓦ.ꓥꓪ. ꓢ-ꓟꓴ-ꓬꓰ(ꓡꓚꓚꓔꓫ) ꓗꓪ ꓐꓰ ꓥ ꓡꓳ=
ꓜꓲꓼ ꓓꓴ ꓧꓳ: ꓖꓶ ꓢꓴ ꓠꓬ ꓟ. ꓟ ꓥꓪ. ꓟ-ꓡꓲ ꓥ ꓡꓳ=
ꓑꓮꓲ: ꓗꓪ ꓠꓬ ꓔꓰꓫꓮꓢ ꓗꓪ ꓔꓬ ꓟ ꓡꓲ-ꓢꓴ ꓐꓴ ꓔꓲ. ꓟ: ꓞꓲ ꓳ-ꓗ-ꓧꓳꓼ-ꓟ ꓗꓪ ꓔꓬ ꓟ ꓢꓴ ꓐꓴ ꓐꓰ ꓚꓳꓡꓳꓣꓮꓓꓳ ꓗꓪ ꓔꓬ ꓟ ꓡꓲ-ꓢꓴ ꓐꓴ ꓥ ꓟꓲ ꓔ ꓡ ꓓꓴ ꓙꓳˍ ꓡꓳ= ꓑꓮꓲ: ꓗꓪ ꓡꓲ-ꓢꓴ ꓮ ꓡ 200 ꓣꓳ ꓛꓲ ꓜꓲꓼ ꓛꓲ ꓡ ꓥꓳ ꓐꓰ ꓢꓪꓼ ꓔꓬ ꓡꓳ=
ꓝꓮꓲ ꓠꓬ ꓗꓹ ꓠꓬ ꓗꓹ ꓓꓴ (ꓖꓮꓟꓰ) ꓛꓬ ꓐꓶ., ꓔꓯ ꓡꓯ ꓘꓳˍ ꓟ ꓾ ꓡꓲ-ꓢꓴ ꓠ. ꓒꓴ.(ꓑ ꓑ) ꓔꓲ., ꓜˍ ꓟ ꓐꓰ ꓡꓲ-ꓢꓴ ꓣꓱ: ꓫꓵ: ꓣꓱꓹ ꓙꓰ ꓔꓯ. ꓥ ꓟꓲ ꓟꓳ. ꓖꓶ ꓔ ꓟ ꓥ ꓟꓲ ꓙꓳˍ ꓡꓳ=
ꓟꓶ ꓘꓶ. ꓗꓪ ꓠꓬ ꓡꓲ-ꓢꓴ ꓓꓯ ꓜꓳ (ꓢꓔꓮꓖꓰ ꓢꓧꓳꓪ) ꓥˍ ꓟꓲ ꓙꓳˍ ꓡꓳ= ꓟꓶ ꓘꓶ. ꓗꓪ ꓢꓔꓮꓖꓰ ꓢꓧꓳꓪ ꓐꓰ ꓡꓲ-ꓢꓴ ꓖꓪ ꓛꓰ(ꓛꓬꓼ ꓥꓳ:) ꓐꓰ ꓠꓱ. ꓐꓯ ꓮ ꓟꓬ ꓬꓰ ꓓꓴ ꓙ ꓖꓶ ꓔꓬ ꓡꓳ= ꓕꓱ ꓟ ꓔꓯ. ꓧꓳ: ꓣꓱ: ꓙ ꓢꓴ ꓠꓬ ꓟ. ꓒ ꓤ-ꓗꓳ ꓥ ꓡꓳ= ꓝꓮꓲ ꓠꓬ ꓡꓲ-ꓢꓴ ꓘꓳꓼ ꓫꓵꓼ ꓦꓬꓼ ꓠꓬꓲ ꓙ ꓖꓴ ꓔꓯ. ꓮ-ꓓꓶ ꓙꓬ ꓗꓪ ꓐꓰ ꓐꓯ ꓟ. ꓖꓶ ꓠꓹ ꓟ ꓙ ꓖꓶ ꓔꓬ ꓡꓳ ꓐꓰ ꓢꓷ. ꓪ ꓡꓳ=
