2022 ꓘꓳꓼ ꓫꓵꓼ ꓪꓴꓸ ꓔꓴˍ ꓟ ꓗꓪ ꓐꓰ ꓮ ꓤ ꓮ ꓤ ꓔꓳꓹ ꓜꓳꓽ ꓡˍ ꓟ ꓗꓴꓷꓼ ꓶ ꓡꓯꓼ ꓚꓱꓹ ꓐꓬ ꓡꓰˍ ꓟ ꓗꓪ ꓐꓰ ꓠꓬꓲꓸ ꓠꓬꓲ 2022 ꓘꓳꓼ 7 ꓦ 13 ꓠꓬꓲ ꓗꓪ ꓠꓬ ꓢꓲ-ꓣꓲ-ꓡꓲ-ꓖ ꓗꓴꓷꓼ ꓙꓵꓽ ꓜꓴ ꓧꓳꓽ ꓢꓴ ꓖꓴ-ꓔ-ꓐ-ꓬ ꓣ-ꓙ-ꓑꓼ-ꓘꓶꓽ (Gotabaya Rajapaksa) ꓠꓬ ꓗꓴꓷꓼ ꓗꓪ ꓐꓰ ꓟꓯꓼ ꓙꓱ ꓦꓲ ꓜꓶꓽ ꓢꓲꓸ ꓛꓰꓹ ꓑꓬ ꓧꓰ ꓠ ꓗꓷ ꓬꓰꓳ꓿
ꓕꓱ ꓡꓱ ꓗꓷ ꓡꓰˍ ꓟ ꓬꓲꓸ ꓚꓰꓺ ꓧꓪ ꓟꓰꓹ ꓠꓬꓲ ꓠꓬ꓾ ꓓ ꓒꓽ ꓢꓷꓸ ꓒ ꓔꓯ ꓙꓵꓽ ꓪ ꓖꓶꓽ ꓟꓽ ꓫꓳ꓾ ꓕꓲ ꓫꓵꓽ ꓕꓲ ꓪꓳꓼ ꓜꓳꓽ ꓢꓴ ꓔꓯˍ ꓡꓰ ꓙꓵꓽ ꓪ ꓖꓶ ꓢꓲꓸ ꓘꓶꓽ ꓕꓴꓸ ꓜꓽ ꓥꓳꓽ ꓟꓽ ꓜꓯꓼ꓾ ꓶ ꓡꓯꓼ ꓟꓬꓱꓽ ꓬꓰ ꓞꓳꓸ ꓡꓰ꓾ ꓗꓴꓷꓼ ꓫꓸ ꓓꓰꓼ ꓡꓰˍ ꓟ ꓑꓶꓸ ꓓꓴ ꓥ ꓡꓳ꓾ ꓐꓰ ꓗꓴꓷꓼ ꓟꓸ ꓟꓲꓽ ꓚꓲꓸ ꓚ ꓢꓴ ꓐꓴ ꓡꓰꓽ ꓢꓪꓼ ꓓꓳ ꓡ ꓡꓳ꓿
ꓣ-ꓙ-ꓑꓼ-ꓘꓶꓽ ꓕꓲꓽ ꓫꓵꓽ ꓕꓲ ꓪꓳꓼ ꓗꓪ ꓐꓰ ꓟꓬꓱꓽ ꓢꓲꓽ ꓒꓽ ꓙꓵꓽ ꓪ ꓣꓴ ꓔꓸ ꓢꓴ ꓢꓲ-ꓣꓲ-ꓡꓲ-ꓖ ꓕꓲ ꓗꓴꓷꓼ ꓡꓱꓸꓼ ꓗꓪ 40 ꓣꓳ ꓟꓽ ꓞꓲ ꓙꓳˍ ꓡꓳ꓾ ꓐꓰ India Express ꓡꓰ ꓐꓳˍ ꓡꓳ꓿ ꓕꓱ ꓟ ꓠꓬ ꓢꓲꓽ ꓒꓽ ꓓꓽ ꓟ (minister) ꓕꓲꓽ ꓙꓶ ꓗꓪ ꓟꓬꓱꓽ ꓬꓰ ꓢꓴ ꓐꓴˍ ꓡꓰꓽ ꓥ ꓢꓰꓽ ꓡꓳ꓿
ꓬꓲꓸ ꓕꓲꓽ ꓦꓲ ꓕꓲ ꓫꓵꓽ ꓕꓲ ꓪꓳꓼ ꓜꓽ ꓪ ꓓꓳ ꓪ꓾ ꓔꓬ ꓢ ꓚꓱꓹ ꓑꓶꓸ ꓓꓴ ꓗꓴꓷꓼ ꓐꓬ ꓡꓰ ꓞꓳꓸ ꓡꓰˍ ꓟ ꓔꓯꓺ ꓐꓬꓱꓽ ꓕꓲꓽ ꓟ ꓒꓬꓱꓼ ꓡ ꓟ ꓥ ꓡꓳ꓿
2022 ꓘꓳꓼ 7 ꓦ 9 ꓠꓬꓲ ꓗꓪ ꓖꓴ-ꓔ-ꓐ-ꓬ ꓣ-ꓙ-ꓑꓼ-ꓘꓶꓽ ꓦꓲ ꓗꓪ ꓛꓲ ꓠꓲꓹ ꓟ ꓩꓴ ꓔꓬ ꓟ ꓢꓲ-ꓣꓲ-ꓡꓲ-ꓖ ꓑ ꓫꓬꓽ ꓐꓴ ꓓꓵꓽ ꓡ ꓢꓲꓸ ꓠꓬꓲꓸ ꓠꓬꓲ ꓗꓪ ꓛꓲ ꓦꓲ ꓗꓪ ꓬꓲꓼ ꓔꓸ ꓢꓲꓸ ꓗꓪꓼ ꓔꓬ ꓡꓳ꓿
2022 ꓘꓳꓼ 7 ꓦ 13 ꓠꓬꓲ ꓗꓪ ꓠꓬ ꓟꓯꓼ ꓙꓱ ꓦꓲ ꓗꓪ ꓐꓰ ꓗꓴꓷꓼ ꓗꓪ ꓐꓰ ꓛꓰꓹ ꓓꓳ ꓠ ꓗꓷ ꓡꓰˍ ꓟ ꓥ ꓡꓳ꓿ ꓬꓲꓸ ꓠꓬ ꓟꓳ-ꓓꓮꓲꓼ ꓗꓴꓷꓼ ꓗꓪ ꓛꓰꓹ ꓓꓵꓽ ꓙꓰˍ ꓟ ꓥ ꓡꓳ꓿
ꓟꓲ ꓠꓯ ꓗꓪ ꓙꓵꓽ ꓪ ꓙꓳ ꓢꓴ ꓕꓲꓽ ꓐꓱ ꓠꓬ ꓗꓴꓷꓼ ꓐꓱ ꓶ ꓟꓽ ꓓꓵꓽ ꓙ ꓙ꓾ ꓑ ꓫꓬ ꓔꓯ ꓟꓽ ꓫꓱꓸ ꓤꓼ ꓤꓼ ꓙꓵꓽ ꓗꓪꓼ ꓔꓬ ꓥ ꓟꓲ꓾ ꓦꓬꓼ ꓠꓬꓲ ꓬꓲꓸ ꓙꓵꓹ ꓐꓲ ꓡ ꓠꓬ꓾ ꓑ ꓫꓬ ꓐꓴ ꓠꓲꓹ ꓢꓲꓼ ꓔꓴ ꓡ ꓕꓯꓽ ꓢꓯꓼ ꓟꓬ ꓐꓱ ꓶ ꓔꓶꓹ ꓘꓰꓹ ꓙꓰ ꓠ ꓗꓷ ꓡꓰˍ ꓥꓳ ꓐꓯ ꓟ ꓟꓳꓸ ꓖꓶ ꓔꓬ ꓡꓳ꓿
