2022 ꓘꓳꓼ 3 ꓦ 21 ꓠꓬꓲ ꓕꓯꓽ 132 ꓣꓳ ꓞꓰ ꓫꓵꓻ ꓟ Boeing 737-800 ꓧꓶꓽ ꓙꓱ ꓦꓲ ꓠꓬ ꓗꓽ ꓟꓶꓽ ꓫꓵꓸ ꓫꓵꓸ ꓞꓰ ꓩꓴꓳ ꓫꓵꓽ ꓥ ꓐꓶ ꓐꓰ ꓴꓢꓮ ꓚꓬꓹ ꓠꓬꓲ ꓢꓴ ꓐꓴ ꓡꓰ ꓚꓬꓹ ꓓꓳ ꓩꓴ ꓡ ꓡꓳ꓾ ꓐꓰ ABC News ꓗꓪ ꓐꓳˍ ꓡꓳ꓿
ꓙꓱ ꓦꓲ ꓖꓳ ꓟ ꓠꓬ꓾ Kunming ꓗꓪ ꓐꓰ Guangzhou ꓗꓪ ꓙꓱ ꓔꓴ ꓡ ꓟ ꓥ ꓢꓲ꓾ ꓡꓲꓺ ꓛꓲ ꓟꓵꓽ ꓕꓲ ꓖ ꓗꓪ ꓞꓰ ꓬꓰ ꓢꓲ꓾ ꓓꓵꓽ ꓓꓳ ꓢꓴ ꓪꓰ ꓤ 123 ꓣꓳ ꓐꓰ꓾ ꓙꓱ ꓦꓲ ꓗꓪ ꓟꓬꓱꓽ ꓬꓰ ꓓꓴ 9 ꓣꓳ꓾ ꓮ ꓙꓵꓽ ꓠꓬ132 ꓣꓳ ꓫꓵꓻˍ ꓟ ꓥ ꓡꓳ꓿
China Eastern ꓙꓱ ꓦꓲ ꓚꓱꓹ ꓙꓱ ꓦꓲ ꓫꓵꓸ ꓢꓴ ꓔꓬ ꓖꓴ ꓗꓪ ꓕꓲ ꓫꓵꓽ ꓫꓵꓽ ꓗꓷ ꓡꓰˍ ꓟ꓾ ꓕꓲ ꓣꓳ ꓣꓳ ꓠꓰ ꓗꓽ ꓟꓶ ꓫꓵꓸ ꓫꓵꓸ ꓞꓰ ꓩꓴˍ ꓟ ꓗꓸ ꓚꓵꓺ ꓔꓯ Black Box ꓗꓪ ꓧꓪ ꓟꓳ ꓔꓸ ꓡꓳ꓾ ꓐꓰ Wall Street Journal ꓗꓪ ꓥ ꓟꓲ ꓬꓲꓸ ꓪꓴꓸ ꓐꓳ ꓩꓴ ꓡ ꓡꓳ꓿
ꓙꓱ ꓦꓲ ꓔꓯ ꓟꓲ ꓠꓯ ꓗꓪ ꓡꓴ ꓡꓴꓹ ꓫꓵꓸ ꓕꓯꓼ ꓠꓹ ꓟ ꓠꓬ ꓗꓽ ꓟꓶ ꓫꓵꓸ ꓫꓵꓸ ꓟꓽ ꓬꓰ ꓠꓬ ꓟꓽ ꓒꓬꓱꓼ ꓡ꓾ ꓐꓯ ꓔꓸ ꓡꓳ꓿
ꓙꓱ ꓦꓲ ꓫꓵꓸ ꓕꓯꓼ ꓬꓰˍ ꓟ ꓟꓲ ꓠꓯ ꓠꓬ 66 ꓑꓯꓸ ꓠꓯꓸ ꓗꓪ ꓛꓲ ꓡꓴꓽ ꓓꓳ ꓘꓵꓻ ꓒꓬꓱꓼ ꓬꓰˍ ꓡꓳ꓿
ꓚꓲꓸ ꓚ ꓠꓹ ꓟ ꓬꓲꓸ ꓗꓸ ꓚꓵꓺ ꓔꓯ Civil Aviation Administration of China (CAAC) ꓗꓪ ꓟꓬꓱꓽ ꓬꓰ ꓔꓬ ꓟ ꓛꓳ ꓒꓯꓹ ꓐꓴ ꓗꓪ ꓐꓰ ꓕꓲ ꓝꓸ National Transportation Safety Board (NTSB) ꓡꓰꓽ ꓘꓳ ꓣꓴ ꓟꓶˍ ꓟ ꓥ ꓡꓳ꓾ ꓐꓯ ꓔꓸ ꓡꓳ꓿
ꓓꓳꓽ ꓕꓱ ꓟ ꓔꓯ ꓧꓶꓽ ꓒꓽ ꓟꓵꓽ ꓗꓪ ꓗꓴꓷꓼ ꓙꓵꓽ ꓢꓴ ꓐꓴ ꓡꓰ ꓑ ꓫꓬ ꓔꓯ ꓢꓷꓸ ꓡꓰ ꓝꓲ ꓠꓲꓹ ꓟꓽ ꓫꓵ ꓠꓬꓲ꓾ We Chat ꓗꓪ ꓖꓳ ꓑꓳꓸ ꓕ ꓑꓳꓸ ꓐꓯꓸ ꓟꓽ ꓙꓲ ꓠ ꓬꓰ ꓔꓸ ꓡꓳ꓾ ꓐꓯ ꓡꓳ꓿
Source: ABC News, Reuters
Photo: Lu Boan/AP, FILE, REUTERS/Carlos Garcia Rawlins/File Photo
