2020 ꓘꓳꓼ ꓠꓬ ꓗꓳꓸ ꓡ ꓟ 40 ꓘꓳꓼ ꓟ ꓘꓴꓽ ꓗꓪ ꓤ ꓠꓱ ꓦꓵ ꓙꓶ ꓮ ꓘꓶꓸ ꓞꓰ ꓡꓰ ꓟ ꓕꓲ ꓘꓳꓼ ꓥ ꓡꓳ ꓐꓰ ꓧꓶꓽ ꓗꓴꓷꓼ ꓙꓵꓽ ꓢꓴ ꓐꓴ ꓡꓰ ꓢꓷ ꓙ ꓟꓴ ꓙ ꓔ ꓡꓳ꓿
2019 ꓘꓳꓼ ꓗꓪ ꓞꓳ ꓤ ꓵꓺ ꓟꓬꓱꓺ 1000 ꓣꓳ ꓗꓪ 10.41 ꓣꓳ ꓞꓳ ꓫꓵꓼ ꓤ ꓦꓵ ꓡ ꓔꓬ ꓥ ꓟꓲ꓾ 2020 ꓘꓳꓼ ꓗꓪ ꓠꓬ 1000 ꓣꓳ ꓗꓪ 8.52 ꓣꓳˍ ꓡꓰꓽ ꓦꓵ ꓡ ꓔꓬ ꓡꓳ ꓐꓰ Caixin ꓓꓳꓽ ꓕꓳ ꓶ ꓗꓪ ꓐꓳ ꓩꓴ ꓡ ꓡꓳ꓿
ꓤ ꓡꓯꓸ ꓟꓶꓼ ꓡꓯꓸ ꓐꓴ ꓠꓬ ꓒꓴ ꓧꓪ ꓟꓽ ꓖꓰꓼ ꓠꓰ ꓦꓲ ꓕꓴ ꓗꓪ ꓔꓲꓺ ꓟꓽ ꓑꓶ꓾ ꓤ ꓠꓱ ꓣꓴ ꓟꓽ ꓑꓶꓸ ꓗꓷ ꓡꓰ ꓔꓬ ꓟ ꓥ ꓡꓳ꓿
Weibo ꓣꓱꓽ ꓔꓬ ꓢꓴ 57000 ꓳ ꓔꓯ Sina Finance ꓡꓰ ꓠꓻ ꓠꓬꓲ ꓧꓪ ꓟꓰꓹ ꓗꓷ ꓠꓬ꓾ 4 ꓩꓴꓸ 3 ꓩꓴꓸ ꓢꓴ ꓐꓯ ꓟ ꓠꓬ꓾ ꓤ ꓠꓱ ꓟꓽ ꓦꓵ ꓟ ꓬꓲꓸ ꓑꓶꓸ ꓠꓬ ꓔꓬ ꓒꓵꓽ꓾ ꓜꓽ ꓒꓵꓽ ꓓ ꓓꓳ ꓒꓵꓽ ꓔꓳꓹ ꓟꓽ ꓘꓴ ꓠꓬꓲ ꓥ ꓡꓳ ꓐꓰ ꓐꓯ ꓔ ꓡꓳ꓿
ꓦꓲ ꓘꓴ ꓕꓲ ꓦꓲ ꓤ ꓠꓱ ꓕꓲ ꓣꓳ ꓙꓵꓽ ꓗ ꓔꓯ ꓔꓶ-ꓫ-ꓒꓲ ꓦꓬꓼ ꓠꓬꓲ ꓗꓪ ꓔꓶ ꓪꓴꓸ ꓔꓴ ꓗꓷ ꓢꓲ꓾ ꓗꓸ ꓠꓯꓸ ꓠꓬ ꓟꓵꓽ ꓘꓶ ꓟꓵꓽ ꓡꓯꓼ ꓗꓪ ꓔꓬ ꓢꓴ ꓠꓬ ꓬꓲꓸ ꓪꓴꓸ ꓦꓵ ꓡ ꓟ ꓤ ꓠꓱ ꓠꓬ ꓮꓸ ꓟꓲꓽ ꓥ ꓕꓽ ꓠꓽ ꓝꓮꓲ ꓕꓲ ꓣꓳ ꓦꓵ ꓔ ꓓˍ ꓡꓳ ꓐꓰ ꓡꓶꓸ ꓩꓴ ꓡꓳ꓿
2015 ꓘꓳꓼ ꓗꓪ ꓛꓲ ꓡ ꓕꓯꓽ ꓡ ꓞꓳ ꓕꓲ ꓦ ꓗꓪ ꓤ ꓠꓱ 2 ꓣꓳ ꓕꓯ ꓢꓲ ꓦꓵ ꓟꓽ ꓓ ꓐꓰ ꓕꓵꓼ ꓪ ꓡꓶꓸ ꓩꓴ ꓡ ꓡꓳ꓿ 2021 ꓘꓳꓼ ꓗꓪ ꓠꓬ ꓕꓱ ꓟ ꓔꓯ ꓒꓬꓹ ꓩꓴꓳ꓿ ꓖꓳ ꓡꓱ ꓥ ꓟꓲ ꓔꓬ ꓒꓵꓽ꓾ ꓜꓽ ꓒꓴ ꓓꓳ ꓒꓴ ꓠꓯꓸ ꓡ ꓟ ꓑꓶꓸ ꓓꓴ ꓧꓶꓽ ꓑ ꓫꓬ ꓮ ꓟꓬꓹ ꓠꓬ ꓤ ꓫꓳ ꓠꓱ ꓫꓳ ꓬꓰ ꓟꓽ ꓑꓶꓸ ꓑꓶꓸ ꓗꓷ ꓡꓰ ꓔꓬ ꓟ ꓦꓬꓼ ꓠꓬꓲ ꓥ ꓡꓳ꓿
