ꓧꓶ. ꓕꓯ ꓟ ꓧꓪ: ꓒꓴ ꓟ. ꓒ: ꓐꓴ( ꓟꓲꓢꓢꓲꓳꓠꓮꓣꓬ) ꓐꓴ ꓡꓰ ꓖꓪ ꓔ ꓬꓰ ꓟ ꓾ ꓮ ꓡꓰ ꓗꓪ ꓛꓲ ꓟꓲ ꓟꓲ ꓡꓰ ꓟ: ꓓ ꓟ ꓟꓶ-ꓡ-ꓫꓵ-ꓓꓰ ꓾ ꓐꓰ ꓖꓪ ꓔ ꓬꓰ ꓟ ꓠꓬ ꓚꓵ ꓚꓵ ꓥ ꓐꓷ= ꓖ-ꓟꓶ-ꓓꓰ ꓟꓵ: ꓗꓪ ꓦꓵ., ꓪꓴ: ꓡ ꓢꓴ ꓐꓴ ꓠꓬ ꓮ ꓡꓰ ꓕꓲ: ꓟꓵ: ꓗꓪ ꓛꓲ ꓬꓰ ꓥ ꓟꓲ꓾ ꓮ ꓡꓰ ꓗꓪ ꓙꓰ ꓛꓲ ꓬꓰ ꓥ ꓟꓲ ꓟꓶ-ꓡ-ꓫꓵ-ꓓꓰ ꓔꓯ ꓢꓲ ꓙꓬ ꓡ ꓗꓴ ꓡꓳ= ꓖ-ꓟꓶ-ꓓꓰ ꓟꓵ: ꓗꓪ ꓚꓳ ꓡ ꓢꓴ ꓐꓴ ꓮ ꓙꓵ ꓥ ꓟꓲ ꓟꓶ-ꓡ-ꓫꓵ-ꓓꓰ ꓗꓪ ꓟ: ꓚꓳ ꓬꓰ ꓬꓰ ꓠꓬ ꓮ ꓟ ꓟꓲ ꓟ: ꓬꓰ ꓙꓰ= ꓮ ꓫꓵ. ꓑꓶ ꓓꓴ ꓥ ꓐꓯ ꓠꓬ ꓮ ꓘꓶ. ꓐꓲ ꓟ ꓟꓶ-ꓡ ꓧꓳ.. ꓚꓱ, ꓓ: ꓖꓴ (ꓖꓳ ꓙꓱ) ꓐꓰ ꓙꓬ ꓚꓵ; ꓚꓵ; ꓟ ꓟꓶ-ꓡ ꓬꓲ ꓙꓬ ꓑꓶ. ꓓꓴ ꓥ ꓡꓳ= ꓞ ꓝꓲ. ꓾ ꓙꓬ ꓝꓲ꓾ ꓮ ꓟꓬ ꓑꓶ ꓡꓰ ꓟꓲ ꓟꓶ-ꓡ ꓬꓲ ꓙꓬ ꓡꓳ ꓬꓲ ꓐꓲ ꓟ ꓟꓬꓱ.. ꓓꓳ ꓮ ꓕꓯ ꓟꓲ ꓟ: ꓑꓶ ꓡꓰ= ꓞ ꓝꓲ. ꓛꓲ ꓡ ꓕꓯ ꓟꓶ-ꓡ ꓬꓲ ꓙꓬ ꓡꓳ ꓘꓶ: ꓚ ꓚ ꓗꓪ ꓬꓲ ꓙꓬ ꓗ: ꓠꓯ, ꓡ ꓢꓴ ꓐꓲ ꓞ ꓢꓲ ꓾ ꓙꓬ ꓝꓲ ꓛꓲ ꓡ ꓕꓯ ꓟꓶ-ꓡ ꓬꓲ ꓙꓬ ꓡꓳ ꓗꓪ ꓞꓳ ꓐꓬꓱ: ꓔꓳ ꓡ ꓢꓴ ꓐꓲ ꓞ, ꓡꓳ= ꓮ ꓟꓶ ꓝ ꓢꓲ ꓠꓬꓲ ꓟꓶ-ꓡ-ꓫꓵ-ꓓꓰ ꓬꓲ ꓚ ꓟꓲ: ꓔꓯ ꓬꓲ. ꓟꓳ ꓡꓱ: ꓤ ꓐꓯ ꓟ. ꓖꓶ: ꓠꓲ, ꓫꓵ ꓡꓳ= ꓥꓪ ꓵ.. ꓟꓶ ꓡꓰ ꓟ ꓔꓯ ꓧꓪ ꓜꓲ; ꓔ ꓟ ꓡꓰ ꓥ ꓡꓳ꓾ ꓐꓲ ꓜꓲ; ꓟ ꓠꓬ ꓟ: ꓥ ꓡꓯ; ꓫꓵ; ꓐꓲ ꓜꓲ; ꓡꓰ ꓠ, ꓟ ꓠꓴ ꓪ ꓢꓷ. ꓟ ꓟꓲ ꓡꓯ; ꓫꓵ ꓐꓳ ꓖꓶ: ꓩꓴ ꓡ ꓛꓵ-ꓡꓳ=
1930 ꓖ ꓡꓯ ꓖ ꓙꓲ ꓗꓪ ꓐꓰ ꓟꓶ-ꓡ ꓡꓳ ꓡꓳ ꓪꓴ. ꓗꓪ ꓟꓶ-ꓡ-ꓘꓴ. ꓐꓯ ꓟ ꓡꓲ-ꓢꓴ ꓘ, ꓕꓲ ꓘ, ꓔꓶ ꓢꓲ ꓔꓬ ꓡꓳ ꓐꓰ ꓐꓯ ꓡꓳ= ꓣꓳ ꓡꓲ-ꓢꓴ ꓐꓴ ꓠꓬ ꓧꓪ ꓖ; ꓧꓪ: ꓧꓪ ꓾ ꓢꓲ, ꓚꓰ ꓧꓪ ꓠꓬꓲ ꓐꓰ ꓣꓱ: ꓜ: ꓣꓱ: ꓓꓳ ꓔꓬ ꓗꓳ. ꓡ ꓡꓳ= ꓬꓲ. ꓖꓳ ꓡꓰ ꓐꓰ ꓡꓲ-ꓢꓴ ꓐꓴ ꓔꓬ ꓟ ꓑꓶ ꓓꓴ ꓧꓶ: ꓒ: ꓐꓴ ꓥ ꓟꓲ ꓶ ꓡꓯ; ꓟꓴ ꓠ, ꓟ ꓖ-ꓟꓶ-ꓓꓰ ꓗꓪ ꓔꓬ ꓪꓴ. ꓔꓴ ꓡ-ꓡꓳ= 1950 ꓘꓳ; ꓕꓯ ꓟꓶ-ꓡ-ꓘꓴ. ꓘ, ꓗꓪ ꓟ ꓞꓳ ꓔꓲ ꓦꓯ-ꓮ-ꓓꓶ ꓡꓰ ꓧꓳ : ꓣꓱ: ꓢꓲ ꓟꓶ-ꓡ-ꓫꓵ-ꓓꓰ ꓘ, ꓔꓯ ꓧꓳ ꓔꓶ ꓡꓳ=
1952 ꓘꓳ; ꓕꓯ ꓧꓪ: ꓒꓴ ꓶ; ꓥꓳ: ꓫꓱ. ꓶ: ꓟ. ꓒ: ꓟꓳꓣꓢꓰ ꓐꓴ ꓕꓲ: ꓦꓲ ꓟꓶ-ꓡ-ꓫꓵ-ꓓꓰ ꓘ, ꓗꓪ ꓔꓬ ꓡ-ꓡꓳ= 1953 ꓛꓲ ꓡ ꓕꓯ ꓧꓪ: ꓒꓴ ꓟ. ꓒ: ꓐꓴ ꓡꓰ ꓧꓳ: ꓣꓱ: ꓢꓲ ꓢꓷ. ꓠꓲ, ꓢꓳ ꓦꓲ ꓐꓴ ꓥ ꓟꓲ ꓒꓴ ꓪꓴ. ꓔꓴ ꓐ ꓡ ꓡꓳ= ꓖꓳ ꓗꓪ ꓟ. ꓖꓶ ꓢꓴ ꓡꓲ-ꓢꓴ ꓟ. ꓒ: ꓟ. ꓟ ꓐꓴ ꓠꓬ ꓟ. ꓒ: ꓔꓳꓥ-ꓢꓲ꓾ ꓟ. ꓒ: ꓞꓲ-ꓮ-ꓔꓳ꓾ ꓟ. ꓟ ꓣꓱ-ꓛꓰ ꓐꓴ ꓥ ꓡꓳ= 1953 ꓘꓳ; ꓕꓯ ꓞꓳ-ꓔꓲ ꓤ-ꓡꓲ-ꓓꓶ ꓔꓯ ꓟ. ꓒ: ꓟꓳꓣꓢꓰ ꓤ ꓪꓴ: ꓟ. ꓒ: ꓬꓳ-ꓫꓴ ꓡꓰ ꓢꓲ, ꓗꓴ ꓟꓬꓱ: ꓔꓯ ꓟ. ꓖꓶ: ꓪꓴ. ꓔꓴ ꓡꓳ ꓙꓳ= ꓝꓮꓲ ꓣ-ꓪ ꓞꓳ ꓫꓵ: ꓞꓳ ꓔꓲ ꓠ-ꓢꓲ-ꓒꓳ-ꓙꓴ ꓔꓯ ꓟꓲ ꓭ ꓦꓲ ꓫꓬ, ꓟ ꓟꓬꓱ: ꓟ. ꓖꓶ: ꓡꓳ= ꓖꓳ ꓟ ꓗꓪ ꓐꓰ ꓞꓳ ꓔꓲ ꓤ-ꓡꓲ-ꓓꓶ ꓡꓰ ꓫꓬ, ꓔꓲ ꓬꓰ ꓟ ꓢꓷ. ꓠꓲ, ꓢꓳ ꓦꓲ꓾ ꓪ ꓘꓴ ꓦꓲ꓾ ꓞꓳ ꓤ ꓔꓬ ꓦꓲ ꓐꓴ ꓔꓯ ꓕꓲ: ꓘ, ꓡꓰ ꓕꓲ: ꓘ, ꓗꓪ ꓟꓳ ꓪ ꓓ ꓡꓳ=
1954 ꓘꓳ; ꓗꓪ ꓟꓬ ꓧꓪ: ꓒꓴ ꓟ. ꓒ: ꓐꓴ ꓡꓰ ꓧꓪ: ꓒꓴ ꓟꓵ: ꓗꓪ ꓟ ꓢꓶ, ꓢꓶ: ꓫꓵ. ꓐꓴ ꓔꓯ ꓔꓯ, ꓡ ꓢꓲ ꓔꓶ ꓪꓴ. ꓔꓴ ꓡꓳ=ꓛꓬ, ꓓꓴ: ꓧꓪ: ꓗꓳ꓾ ꓪ-ꓔꓲ ꓢꓶ, ꓢꓶ꓾ ꓞꓳ ꓠ ꓧꓪ: ꓗꓳ ꓐꓴ ꓮ ꓙꓵ: ꓠꓬ (36) ꓫꓵ: ꓛꓲ ꓣꓴ ꓔꓯ, ꓡ ꓢꓲ ꓟꓶ-ꓡ-ꓫꓵ ꓓꓰ ꓗꓪ ꓔꓶ ꓪꓴ. ꓔꓴ ꓗꓷ ꓡꓳ= ꓝꓮꓲ ꓠꓬ ꓧꓪ: ꓒꓴ ꓟ. ꓒ: ꓐꓴ ꓡꓰ ꓦ ꓟꓲ ꓟ: ꓙ ꓠꓬꓲ ꓟ ꓕꓯ, ꓡ ꓢꓲ ꓫꓵ. ꓗꓪ ꓧꓪ ꓟꓲ ꓟ: ꓙ ꓡꓰ ꓦ ꓟꓲ ꓫꓬ. ꓪꓴ. ꓔꓴ ꓢꓲ ꓞꓳ ꓘ, ꓢꓴ ꓔꓯ ꓔꓶ ꓜ ꓔꓶ ꓓꓳ ꓝꓲ ꓡꓳ= ꓟꓶ-ꓡ-ꓫꓵ-ꓓꓰ ꓗꓪ ꓔꓶ ꓪꓴ. ꓔꓴ ꓗꓷ ꓟ ꓢꓶ, ꓢꓶ: ꓐꓴ Graet fruit ꓢꓶ, ꓢꓶ, ꓐꓰ ꓪ-ꓔꓲ ꓢꓶ, ꓢꓶ, ꓐꓴ ꓠꓬ ꓠꓬꓲ. ꓠꓬꓲ ꓟ ꓦꓬ; ꓠꓬꓲ ꓗꓪ ꓮ ꓘꓶ. ꓟꓬꓱ.. ꓓꓳ ꓙꓳ ꓟ ꓢꓶ, ꓢꓶ ꓐꓴ ꓥꓳ= ꓖꓳ ꓗꓪ ꓐꓰ ꓕꓲ ꓝ ꓠꓬ ꓢꓶ, ꓢꓶ ꓫꓵ. ꓐꓴ ꓔꓯ ꓟꓲ-ꓚꓲ-ꓠ ꓾ ꓐꓰ ꓔꓲ-ꓠꓮꓲ ꓟꓵ: ꓗꓪ ꓥ ꓟꓲ ꓔꓶ ꓠ ꓐꓱ ꓶ ꓣꓴ ꓔꓯ, ꓙꓰ ꓡꓳ=
ꓟꓶ-ꓡ-ꓫꓵ-ꓓꓰ ꓐꓯ ꓟ ꓠꓬ ꓕꓱ ꓡꓱ ꓫꓵ: ꓚ ꓟꓲ ꓐꓲ ꓞ ꓟ ꓑꓶ ꓓꓴ ꓟꓲ. ꓟꓲ ꓗꓪ ꓛꓲ ꓟꓬꓱ.. ꓓꓳ ꓙꓳ ꓟ ꓠꓬꓲ ꓖꓴ ꓕꓲ: ꓟ ꓥ ꓡꓳ= ꓧꓪ: ꓒꓴ ꓟ. ꓒ: ꓐꓴ ꓔꓬ ꓗꓳ. ꓬꓰ ꓟ ꓦꓲ ꓥ ꓟꓲ꓾ ꓔꓶ ꓔꓲ ꓬꓰ ꓟ ꓢꓶ, ꓢꓶ ꓟꓲ ꓐꓴ ꓥ ꓟꓲ ꓠꓬꓲ ꓠꓬꓲ ꓗꓪ ꓛꓲ ꓡꓳ.ꓟꓳ ꓪ ꓓ ꓡꓳ=
