ꓠꓬꓲꓸ ꓠꓬꓲ 2021 ꓘꓳꓼ 10 ꓦ 25 ꓠꓬꓲ ꓗꓪ ꓠꓯ-ꓑꓲ-ꓓꓳ ꓡꓳ ꓒꓱ ꓐꓰ꓾ ꓠꓱꓸ ꓐꓯꓼ ꓟꓯꓼ ꓙ ꓢꓯꓼ ꓙꓳ_ ꓟ ꓡꓳ ꓒꓱ ꓮ ꓟꓬꓹ ꓗꓪ ꓙꓵꓽ ꓪ ꓣꓴ ꓔꓸ ꓟ ꓟꓬ-ꓟ ꓟꓯꓼ ꓔꓯ ꓢꓯꓼ ꓖꓶ ꓔꓳꓹ ꓙ ꓟ ꓞꓳ ꓜꓴ ꓞꓳ ꓟꓯꓼ ꓜꓲꓼ ꓓꓴ ꓬꓰ ꓔꓬ ꓡꓳ=
ꓟꓳ-ꓡꓲ-ꓟꓲ ꓗꓪ ꓬꓰ ꓟ ꓜꓲꓼ ꓓꓴ ꓕꓳ ꓶ ꓗꓪ ꓠꓬ꓾ ꓦꓲ ꓡꓳꓸ ꓙ ꓗꓴꓷꓼ ꓙꓵꓽ ꓜꓴ ꓔꓯ ꓢꓯꓼ ꓖꓶ ꓔꓳꓹ ꓙ ꓥꓳ꓾ ꓟꓯꓼ ꓔꓯ ꓢꓯꓼ ꓖꓶ ꓔꓳꓹ ꓙ ꓑꓮꓲ ꓐꓰ ꓐꓳ ꓔꓸ ꓡꓳ= ꓟꓯꓼ ꓐꓰ ꓦꓲ ꓡꓳꓸ ꓙ ꓗꓴꓷꓼ ꓙꓵꓽ ꓜꓴ ꓠꓬ ꓕꓲ ꓟˍ ꓡꓰ ꓥ ꓟ ꓟꓳꓸ ꓖꓶ ꓔꓬ ꓡꓳ= ꓝꓮꓲ ꓡꓳ ꓒꓱ ꓮ ꓟꓬꓹ ꓗꓪ ꓠꓬ ꓡ ꓞꓳ 5 ꓣꓳ ꓕꓯ ꓢꓲ ꓜꓲꓼ ꓟꓽ ꓓ ꓟ ꓙꓵꓽ ꓗ ꓔꓶ ꓔꓸ ꓟ ꓦꓬꓼ ꓠꓬꓲ ꓗꓪ ꓕꓱ ꓡꓱ ꓬꓰ ꓒꓬꓱꓼ ꓡ ꓔꓬ ꓟ ꓥ ꓡꓳ=
“ꓜꓲꓼ ꓓꓴ ꓗꓪ ꓘꓶ ꓡꓶꓽ ꓡ ꓢꓴ ꓑꓓꓝ ꓕꓲ ꓣꓳ ꓡꓲꓸ ꓟꓽ ꓢꓯꓸ ꓔꓬ ꓝꓲ” ꓐꓰ ꓟꓯꓼ ꓔꓯ ꓢꓯꓼ ꓖꓶ ꓢꓴ꓾ ꓟꓶ ꓤ ꓟꓽ ꓥ ꓕꓯ ꓐꓱ ꓓꓴꓽ ꓗꓪ ꓐꓰ ꓡꓲꓹ ꓡ ꓢꓴ ꓟ-ꓗꓯ-ꓚꓳ-ꓟꓰꓼ ꓡꓰ ꓬꓲꓸ ꓝꓮꓚꓰꓐꓳꓳꓗ ꓗꓪ 2021 ꓘꓳꓼ 10 ꓦ 23 ꓠꓬꓲ ꓕꓯ ꓐꓳ ꓔꓸ ꓡꓳ=
ꓚꓳꓦꓲꓓ-19 ꓙꓳ ꓟ ꓦꓬꓼ ꓠꓬꓲ꓾ ꓑ ꓫꓬ ꓮ ꓟꓬꓹ ꓠꓲꓹ ꓫꓸ ꓟꓬ ꓫꓸ ꓔꓬ ꓟ ꓦꓬꓼ ꓠꓬꓲ꓾ ꓡꓳ ꓒꓱ ꓐꓰ ꓟꓵꓽ ꓘꓶ ꓟꓵꓽ ꓡꓯꓼ ꓗꓪ ꓟꓯꓼ ꓢꓰꓼ ꓡꓯ ꓘꓳ ꓔꓬ ꓟ ꓦꓬꓼ ꓠꓬꓲ꓾ ꓮ-ꓢꓲ-ꓬ ꓗꓪ ꓟꓬ-ꓟ ꓟꓯꓼ ꓔꓯ ꓖꓪ ꓙꓱ ꓜꓲꓼ ꓓꓴ ꓟꓽ ꓔ ꓝꓲ ꓟ ꓦꓬꓼ ꓠꓬꓲ ꓗꓪ ꓟꓬ-ꓟ ꓟꓯꓼ ꓔꓯ ꓢꓯꓼ ꓖꓶ ꓢꓴ ꓐꓴ ꓕꓱ ꓡꓱ ꓬꓰ ꓓꓳ ꓡ ꓟ ꓥ ꓡꓳ= ꓖꓳ ꓡꓱ ꓥ ꓟꓲ ꓕꓱ ꓟ ꓔꓯꓸ ꓟꓳ ꓟꓯꓼ ꓡꓰ ꓙꓵꓽ ꓗ ꓡꓳ ꓚ ꓮ ꓡꓲ ꓟꓬꓱꓽ ꓬꓰ ꓟ꓾ ꓮ ꓡꓲ ꓔꓳꓹ ꓙ ꓟ ꓟꓸ ꓟꓲꓽ ꓟꓽ ꓢꓷꓸ ꓪ ꓢꓰ=
ꓟꓶ-ꓚꓲ-ꓠ ꓗꓪ ꓟꓯꓼ ꓔꓯ ꓢꓯꓼ ꓖꓶ ꓔꓬ ꓢꓴ ꓐꓴ 
ꓑꓴ-ꓔ-ꓳ ꓗꓪ ꓟꓯꓼ ꓔꓯ ꓢꓯꓼ ꓖꓶ ꓢꓴ ꓐꓴ 
ꓑꓴ-ꓔ-0 ꓗꓪ ꓟꓯꓼ ꓔꓯ ꓢꓯꓼ ꓖꓶ ꓢꓴ ꓐꓴ
“ꓟꓯꓼ ꓔꓯ ꓢꓯꓼ ꓖꓶ ꓢꓴ ꓐꓴ ꓞꓳ ꓤ ꓟ ꓟꓬꓽ ꓠꓬꓽ ꓜꓲ ꓠꓲ ꓞ ꓑꓵꓸ ꓞ ꓛꓵꓽ ꓗ ꓬꓰ ꓛꓶꓹꓳ ꓟꓽ= ꓡ ꓛꓴꓸ ꓠꓰ ꓟꓽ ꓐꓶ ꓐꓯ ꓠꓽ ꓮ ꓟꓶ ꓑ ꓫꓬ ꓠꓲꓹ ꓡꓶꓽ ꓔꓯ ꓟꓳꓸ ꓖꓶ ꓠꓹ ꓟ ꓜꓲꓼ ꓓꓴ ꓬꓰ ꓝꓲ ꓡ ꓥꓳ ꓐꓯ ꓠꓽ 2 5 ꓢꓶꓽ ꓦꓬꓼ ꓠꓬꓲ (22222 ꓦꓬꓼ ꓠꓬꓲ) ꓕꓯ ꓢꓲ ꓟꓬꓽ ꓡ ꓠꓯꓸ= ꓟꓯꓼ ꓔꓯ ꓢꓯꓼ ꓟꓽ ꓖꓶ ꓢꓴ ꓐꓴ ꓜꓲꓼ ꓓꓴ ꓔꓯ ꓗꓸ ꓘꓳ ꓗꓸ ꓫꓵ ꓬꓰ ꓝꓲ ꓡꓯ ꓠꓯꓸ ꓮ ꓡꓲ ꓗ ꓡ ꓥ ꓢꓶꓽ!” ꓐꓰ ꓑ-ꓢꓯ-ꓡꓳ ꓡꓰ 2021 ꓘꓳꓼ 10 ꓦ 25 ꓠꓬꓲ ꓕꓯꓽ ꓐꓳ ꓡꓯꓽ ꓔꓯꓽ ꓩꓴ ꓡ ꓡꓳ=
2021 ꓘꓳꓼ 2 ꓦ 1 ꓠꓬꓲ ꓕꓯ꓾ ꓟꓯꓼ ꓡꓰ ꓟꓬ-ꓟ ꓑ ꓫꓬ ꓠꓲꓹ ꓡꓶꓽ ꓔꓯ ꓟꓽ ꓛꓳ ꓛꓳ ꓙꓵꓽ ꓪ ꓣꓴ ꓙꓰ ꓠꓬꓲ꓾ ꓒꓳꓹ ꓔꓳꓹ ꓟ ꓜꓲꓼ ꓓꓴ ꓔꓯ 2021 ꓘꓳꓼ 2 ꓦ ꓗꓪ ꓐꓰ ꓪꓴꓸ ꓔꓴ ꓡ ꓕꓯꓽ ꓟꓯꓼ ꓐꓴ ꓡꓰ ꓡ ꓛꓴꓸ ꓡꓰ ꓐꓶ ꓢꓰꓼ ꓡ ꓟ ꓮ ꓟꓶ ꓗꓪ ꓛꓲ 1000 ꓣꓳ ꓟꓽ ꓞꓲ ꓙꓳ ꓡꓳ ꓐꓰ ꓮꓮꓑꓑ ꓡꓰ ꓧꓪ ꓜꓲꓼ ꓔꓸ ꓡꓳ=
