ꓴꓢꓮ ꓗꓴꓷꓼ ꓗꓪ ꓧꓶꓸ ꓕꓯ 400 ꓘꓳꓼ ꓛꓲ ꓗꓪ ꓠꓲꓽ ꓟ ꓥꓳ ꓐꓯ ꓠꓰ ꓡꓲꓺ ꓢꓲꓸ ꓢꓰꓼ ꓪ ꓡꓰ ꓢꓴ (12) ꓣꓳ ꓠꓬ ꓝꓴꓲꓸ ꓟꓽ ꓙꓳ ꓐꓰ ꓠꓰ-ꓬꓴ ꓲ-ꓖ-ꓡ ꓑ ꓫꓬ ꓝꓲ ꓓꓴ ꓜꓲꓼ ꓓꓴ ꓗꓪ ꓐꓰ 2023 ꓘꓳꓼ 5 ꓦ (25) ꓠꓬꓲ ꓕꓯꓽ ꓐꓯ ꓞꓷꓸ ꓢꓲꓸ ꓢꓷ ꓙ ꓟꓴ ꓙ ꓩꓴ ꓡ ꓡꓳ꓿
ꓑ ꓫꓬ ꓝꓲ ꓓꓴ ꓐꓴ ꓕꓱ ꓡꓱ ꓐꓯ ꓞꓷꓹ ꓠꓹ ꓟ ꓟꓯꓹ ꓗꓶꓺ ꓡꓯ ꓘꓳ ꓕꓯ ꓪꓽ ꓓꓴ ꓟ (33) ꓛꓬꓽ꓾ ꓟꓽ ꓪꓽ ꓓꓴ ꓟ (1) ꓛꓬꓽ ꓥ ꓡꓳ꓿
ꓢꓰꓼ ꓪ ꓡꓰ ꓢꓴ ꓞꓲꓼ ꓤ ꓡꓯꓹ ꓤ ꓐꓴ ꓡꓰ ꓧꓳꓽ ꓣꓱꓽˍ ꓟ CT Witch Trial Exoneration Project ꓑꓶꓸ ꓓꓴ ꓗꓳ-ꓠꓯ-ꓔꓲ-ꓗꓼ ꓑ ꓫꓬ ꓖꓪ ꓙꓱ ꓜꓲꓼ ꓓꓴ ꓗꓪ ꓐꓰ ꓕꓱ ꓡꓱ ꓓꓵꓽ ꓙ ꓞꓷꓹ ꓢꓲꓸ ꓢꓷꓸ ꓙ ꓟꓴ ꓙ ꓠ ꓗ ꓬꓰˍ ꓟ ꓥ ꓡꓳ꓿
ꓠꓰ-ꓬꓴꓹ ꓲ-ꓖ-ꓡ ꓟꓵꓽ ꓗꓪ Alse Young (Alice Young) ꓟꓬꓱꓺ ꓔꓸ ꓢꓴ ꓤ ꓟꓶ ꓕꓲꓽ ꓣꓳ ꓠꓬ ꓠꓲꓽ ꓟ ꓥꓳ ꓐꓯ ꓢꓲꓸ 1647 ꓘꓳꓼ 5 ꓦ 26 ꓠꓬꓲ ꓕꓯꓽ ꓬꓲꓸ ꓪꓴꓸ ꓢꓰꓼ ꓪ ꓡꓰ ꓢꓴ ꓥ ꓡꓳ꓿ ꓖꓳ ꓗꓸ ꓠꓯꓸ ꓟꓵꓽ ꓮ ꓟꓬꓹ ꓗꓪ ꓞꓳ ꓟꓳꓽ ꓟ ꓬꓲꓸ ꓦ ꓣꓳ ꓟꓽ ꓞꓲ ꓔꓯ ꓠꓲꓽ ꓟ ꓥꓳ ꓐꓯ ꓠꓰ ꓡꓲꓺ ꓢꓲꓸ ꓢꓰꓼ ꓗꓷ ꓟ ꓙꓳ ꓡꓳ꓿
ꓢꓲ-ꓗꓳꓼ-ꓔ-ꓡ ꓗꓴꓷꓼ ꓗꓪ ꓠꓬ 2500 ꓣꓳ ꓛꓲ ꓢꓰꓼ ꓪ ꓡꓰꓳ ꓐꓰ ꓚ ꓟꓲꓽ ꓗꓪ ꓐꓳ ꓔꓸ ꓡꓳ꓿
ꓫꓵꓻ ꓢꓴ ꓠꓬ ꓢꓯꓸ ꓬꓲꓼ ꓡ ꓟꓽ ꓐ ꓡ ꓥ ꓟꓲ꓾ ꓖꓳ ꓕꓲ ꓦꓬꓼ ꓠꓬꓲ ꓗꓪ ꓙꓵꓽ ꓢꓴ ꓟꓴ ꓢꓴ ꓐꓴ ꓡꓰꓽ ꓫꓵꓽ ꓘꓶꓽ ꓗꓷ ꓟ ꓟꓽ ꓜꓳ ꓐꓯˍ ꓟ ꓐꓰ꓾ ꓫꓵꓻ ꓢꓴ ꓟꓬꓱꓺ ꓓꓳꓽ ꓐꓬ ꓡꓰ ꓟ ꓔꓯ ꓫꓬꓹ ꓡꓶꓸ ꓟ ꓥ ꓡꓳ꓿
Source: AFP
Image Credit: The Economist, JESSICA HILL / AP, Hugh McQuaid / CTNewsJunkie,
