ꓡ ꓠꓹ ꓟ 2022 ꓘꓳꓼ 1 ꓦ 18-19 ꓕꓯꓽ ꓗ-ꓐꓳ-ꓓꓲ-ꓬ ꓗꓴꓷꓼ ꓗꓪ ꓬꓰ ꓠꓹ ꓟ ꓟꓳꓸ ꓙ ꓔꓸ ꓟ ꓜꓲꓼ ꓓꓴ ꓗꓪ ꓜꓲꓼ ꓡ ꓠꓲꓹ ꓫꓵ ꓢꓴ ꓮ-ꓢꓰ-ꓬ ꓢꓲꓽ ꓒꓽ ꓐꓴ ꓟꓽ ꓙꓳˍ ꓠꓬꓲ ꓜꓲꓼ ꓓꓴ ꓦꓬꓼ ꓠꓬꓲ ꓙꓲꓺ ꓩꓴꓳ ꓐꓰ 2022 ꓘꓳꓼ 1 ꓦ 12 ꓠꓬꓲ ꓠꓽ ꓢꓽ ꓠꓬꓲ ꓕꓯꓽ ꓢꓷ ꓙ ꓟꓴ ꓙ ꓩꓴ ꓡ ꓡꓳ꓿
“ꓢꓲꓽ ꓒꓽ ꓐꓴ ꓜꓲꓼ ꓓꓴ ꓗꓪ ꓔꓺ ꓡ ꓠꓹ ꓟ ꓡꓯꓼ ꓕꓱꓼ ꓢꓴ ꓟꓽ ꓙꓳ ꓟ ꓑꓶꓸ ꓓꓴ꓾ ꓗꓸ ꓟꓽ ꓘꓳꓽ ꓢꓴ ꓟꓬꓽ ꓟ ꓑꓶꓸ ꓓꓴ ꓜꓲꓼ ꓓꓴ ꓔꓯ ꓧꓶꓸ ꓕꓯꓽ ꓟꓳꓸ ꓙ ꓔ ꓟ ꓡꓰ ꓐꓰ ꓬꓰ ꓟꓽ ꓪ” ꓐꓰ H.E Koy Kuong ꓡꓰ ꓐꓯ ꓡꓳ꓿
2022 ꓘꓳꓼ ꓗꓪ ꓮ-ꓢꓰ-ꓬ ꓜꓴ ꓐꓱ ꓶ ꓗ-ꓐꓳ-ꓓꓲ-ꓬ ꓗꓴꓷꓼ ꓠꓬ ꓢꓽ ꓡ ꓙꓵꓽ ꓟꓬꓱꓽ ꓪ ꓔꓸ ꓟ ꓥ ꓡꓳ꓿
ꓗ-ꓐꓳ-ꓓꓲ-ꓬ ꓗꓴꓷꓼ ꓙꓵꓽ ꓓꓲꓽ ꓒ ꓧꓳ-ꓢ ꓡꓰ ꓧꓳꓽ ꓪꓴꓸ ꓟꓴ ꓢꓲꓸ ꓜꓲꓼ ꓓꓴ ꓓꓽ ꓟ ꓢꓽ ꓟ꓾ 1 ꓦ ꓘꓴꓽ ꓗꓪ ꓕꓲꓽ ꓟ꓾ 7 ꓦ ꓘꓴꓽ ꓗꓪ 1 ꓟ꓾ 10 ꓦ ꓘꓴꓽ ꓗꓪ ꓕꓲ ꓟ ꓬꓰ ꓠꓹ ꓟ ꓟꓳꓸ ꓙ ꓔꓸ ꓥ ꓟꓲ꓾ ꓬꓲꓸ ꓪꓴˍ ꓟ ꓜꓲꓼ ꓓꓴ ꓗꓪ ꓕꓱ ꓡꓱ ꓘꓶ ꓡꓶꓽ ꓓꓴ ꓙꓳ ꓡꓰˍ ꓟ ꓥ ꓡꓳ꓿
“ꓟꓬ-ꓟ ꓟꓯꓼ ꓐꓴ ꓔꓯ ꓮ-ꓢꓰ-ꓬ ꓜꓲꓼ ꓓꓴ ꓗꓪ ꓔꓺ ꓝꓲ ꓠꓲꓹ ꓫꓵ ꓢꓴ ꓠꓬ ꓗ-ꓐꓳ-ꓓꓲ-ꓬ ꓢꓲꓽ ꓒ ꓧꓳ-ꓢ ꓥꓳ꓿ ꓬꓲꓸ ꓠꓬ ꓟꓬ-ꓟ ꓗꓴꓷꓼ ꓗꓪ ꓗ ꓕꓲ ꓧꓪꓹ ꓗꓹ ꓛꓲꓺ ꓡꓻꓳ꓿ ꓖꓳ ꓡꓱ ꓥ ꓟꓲ ꓗꓴꓷꓼ ꓙꓵꓽ ꓪ ꓦꓴ ꓢꓴ ꓔꓯ ꓕꓱ ꓡꓱ ꓞꓳ ꓒꓵꓽ ꓒꓵꓽ ꓘꓳ ꓣꓴˍ ꓟ ꓔꓯ ꓟꓽ ꓠꓲꓹ ꓫꓵ ꓢꓴ ꓮ-ꓢꓰ-ꓬ ꓗꓴꓷꓼ ꓮ ꓟꓬꓹ ꓙꓳˍ ꓠꓬꓲ ꓜꓲꓼ ꓓꓴ ꓬꓰ ꓟꓽ ꓒꓬꓱꓼ ꓡˍ ꓟ ꓥꓳ” ꓐꓰ ꓢꓪꓼ ꓐꓯ ꓢꓴ ꓙꓳˍ ꓡꓳ꓿
ꓬꓲꓸ ꓚꓰ꓾ ꓮꓗꓑ
