ꓮꓳ-ꓢꓸ (ꓡꓳ-ꓟꓲꓽ ꓒꓽ) ꓐꓰ꓾ ꓘꓰ-ꓚꓰꓺ (ꓗ-ꓬꓲ ꓟ) ꓐꓴ ꓤꓼ ꓟꓶꓼ ꓮꓳ-ꓢꓸ-ꓢꓴ-ꓚꓰꓽ ꓠꓬ ꓠꓬꓲꓸ ꓠꓬꓲ 2022 ꓘꓳꓼ 6 ꓦ 19 ꓠꓬꓲ ꓕꓯꓽ 77 ꓘꓳꓼ ꓐꓲ ꓡꓰꓳ꓿
ꓬꓲꓸ ꓔꓯ 1945 ꓘꓳꓼ 6 ꓦ 19 ꓠꓬꓲ ꓕꓯꓽ ꓬꓥ-ꓖꓳꓥ ꓗꓪ ꓦꓵ ꓗꓷ ꓟ ꓥ ꓡꓳ꓿
ꓬꓲꓸ ꓐꓹ ꓐ ꓠꓬ ꓟꓬ-ꓟ ꓗꓴꓷꓼ ꓔꓯ ꓐꓲ-ꓔꓲ-ꓫꓼ ꓡꓯ ꓒꓯꓹ ꓗꓪ ꓐꓰ ꓣꓴ ꓡꓲꓸ ꓠꓹ ꓟ ꓙ-ꓑ ꓗꓴꓷꓼ ꓗꓪ ꓟꓯꓼ ꓤꓹ ꓢꓲꓸ ꓢꓯꓼ ꓕꓵꓼ ꓗꓷ ꓢꓴ꓾ ꓗꓸ ꓠꓯꓸ ꓟꓯꓼ ꓙꓵꓽ ꓪ ꓡꓳꓻ ꓗꓷ ꓢꓲꓸ ꓗꓴꓷꓼ ꓟꓬꓱꓽ ꓬꓰ꓾ ꓮꓳ-ꓢ~ ꓯꓼ-ꓔ-ꓡꓲ ꓙ ꓟꓳ ꓘꓶꓽ ꓕꓳ ꓶ ꓐꓳ ꓪ ꓗꓪ ꓛꓲ ꓢꓯꓼ ꓕꓵꓼ ꓗꓷ ꓢꓴ꓾ 1947 ꓘꓳꓼ 7 ꓦ 19 ꓠꓬꓲ ꓕꓯꓽ ꓡꓽ ꓛꓴꓸ ꓠꓰ ꓐꓶ ꓢꓰꓼ ꓢꓴ ꓟꓯꓼ ꓜꓲꓽ ꓮꓳ-ꓢꓸ ꓥ ꓡꓳ꓿
ꓬꓲꓸ ꓟꓹ ꓟ ꓠꓬ ꓗ-ꓬꓲ ꓟꓻ ꓠꓯ ꓞꓲꓼ ꓟꓸ ꓟ ꓥ ꓢꓲ꓾ ꓮꓳ-ꓢꓸ ꓔꓯ ꓠꓯ ꓞꓲꓼ ꓦꓲ ꓗꓪ ꓟꓳꓻ ꓡꓯ ꓘꓳ ꓢꓲꓸ ꓡꓯ ꓒꓯꓹ ꓝꓸ ꓗꓷ ꓢꓴ ꓥ ꓡꓳ꓿ ꓮꓳ-ꓢꓸ ꓫꓵꓻ ꓗꓸ ꓠꓯꓸ ꓲ-ꓓꓲ-ꓬ ꓗꓴꓷꓼ ꓐꓱ ꓶ ꓟꓬ-ꓟ ꓗꓴꓷꓼ ꓝꓲꓺ ꓓꓴ ꓕꓲ ꓞꓲꓼ ꓕꓲꓽ ꓟꓳꓽ ꓬꓰ ꓗꓷ ꓢꓴ ꓥ ꓡꓳ꓿
1962 ꓘꓳꓼ ꓗꓪ ꓐꓰ ꓟꓬ-ꓟ ꓗꓴꓷꓼ ꓠꓬ ꓟꓯꓼ ꓡꓰ ꓙꓵꓽ ꓪ ꓣꓴ ꓢꓲꓸ ꓑ ꓫꓬ ꓐꓴ ꓙꓲ ꓖꓴ ꓕꓯꓽ ꓢꓲ ꓟꓯꓼ ꓜꓲꓽ ꓐꓴ ꓶ ꓡꓯꓼ ꓬꓰ ꓚꓱꓹ ꓒꓬꓱꓼ ꓡ ꓡꓳ꓿ ꓟꓯꓼ ꓜꓲꓽ ꓐꓴˍ ꓐꓰ ꓬꓲꓸ ꓪ ꓔꓯ ꓪꓽ ꓢꓴ ꓐꓴ ꓠꓬ ꓮ ꓕꓽ ꓟꓽ ꓚꓰꓼ ꓐꓳ ꓔꓳꓹ ꓬꓰ ꓖꓴ ꓢꓲꓸ ꓑ ꓫꓬ ꓮ ꓟꓬꓹ ꓠꓬ ꓕꓲ ꓠꓬꓲ ꓜꓽ ꓓꓴ ꓕꓲ ꓠꓬꓲ ꓧꓪ ꓜꓽ ꓔꓬ ꓠ ꓗꓷ ꓡꓰꓳ꓿
ꓟꓬ-ꓟ ꓑ ꓫꓬ ꓙꓵꓽ ꓪ ꓔꓯ ꓟꓯꓼ ꓡꓯ ꓒꓯꓹ ꓗꓪ ꓐꓰ ꓡꓲꓸ ꓪ ꓠꓹ ꓟ ꓢꓯꓼ ꓕꓵꓼ ꓟ ꓗꓪ ꓮꓳ-ꓢ-ꓢꓴ-ꓚꓰꓽ ꓠꓬ ꓑ ꓫꓬ ꓦ ꓡꓱ ꓐꓳˍ ꓟ ꓧꓳꓽ ꓢꓴ ꓕꓲ ꓣꓳ ꓒꓬꓱꓼ ꓡ ꓡꓳ꓿
ꓟꓯꓼ ꓜꓲꓽ ꓐꓴ ꓠꓬ ꓑ ꓫꓬ ꓐꓱ ꓶ ꓢꓯꓼ ꓕꓵꓼ ꓢꓴ꓾ ꓑ ꓫꓬ ꓔꓯ ꓡꓲꓹ ꓗꓷ ꓟꓶ ꓠꓹ ꓟ ꓚꓱꓹ ꓙ ꓖꓶꓽ ꓢꓴ ꓬꓲꓸ ꓔꓯ ꓠꓲꓹ ꓜꓳˍ ꓡꓳ꓿ ꓖꓲ ꓟ ꓑꓶꓸ ꓓꓴ ꓝꓴꓲꓸ ꓟꓽ ꓙꓳ ꓝꓴꓲꓸ ꓧꓪ ꓢꓲꓸ ꓡꓴꓽ ꓔꓸ ꓟ ꓮ ꓟꓶ ꓗꓪ ꓛꓲ (16) ꓘꓳꓼ ꓕꓯꓽ ꓢꓲ ꓙꓳ ꓡꓰ ꓢꓲ꓾ ꓬꓲꓸ ꓔꓯ 100 ꓘꓳꓼ ꓟꓽ ꓞꓲ ꓡꓴꓽ ꓠꓹ ꓟ ꓝꓴꓲꓸ ꓓꓰꓺ ꓢꓲꓸ ꓐꓯ ꓟꓴ ꓩꓴ ꓔꓬ ꓡꓳ꓿
1989-1995 ( 6 ꓘꓳꓼ)
1990 – 1992 ( 2 ꓘꓳꓼ)
2003 – 2010 (7 ꓘꓳꓼ)
2021 – ꓮ ꓟꓶ ꓗꓪ ꓛꓲ (1 ꓘꓳꓼ ꓙ ꓬꓰꓳ)
ꓠꓬꓲꓸ ꓠꓬꓲ 77 ꓘꓳꓼ ꓦꓵ ꓦꓬꓼ ꓠꓬꓲ ꓗꓪ ꓟꓬ-ꓟ ꓟꓯꓼ ꓡꓰ ꓣꓴ ꓡꓴꓽ ꓔꓸ ꓟ ꓮꓳ-ꓢ-ꓢꓴ-ꓚꓰꓽ ꓔꓯ ꓑ ꓫꓬ ꓐꓴ ꓠꓲꓹ ꓠꓵˍ ꓟ ꓟꓳꓸ ꓖꓶ ꓔꓬ꓾ ꓪ ꓘꓴ ꓙ ꓔꓬ ꓡꓳ꓿
