ꓮ ꓟꓲ 2021 ꓘꓳꓼ 12 ꓦ 5 ꓠꓬꓲ ꓟꓶ ꓘꓶꓼ ꓗꓪ ꓐꓰ ꓪꓴꓸ ꓔꓴ ꓢꓲꓸ ꓬꓥ-ꓖꓳꓥ ꓗꓪ ꓡꓳ ꓒꓱ ꓕꓲ ꓐꓱ ꓗꓪ ꓠꓬ ꓧꓳꓺ ꓐꓳ ꓔꓲꓸ ꓢꓯꓼ ꓑ ꓙ ꓡ ꓡꓳ=
ꓮ ꓟꓲ ꓘꓴ ꓔꓴ ꓢꓴ ꓐꓴ ꓔꓯ ꓟꓯꓼ ꓑꓳꓡꓲꓚꓰ ꓟꓳ-ꓓꓳ ꓡꓰ ꓕꓯꓼ ꓡ ꓢꓲꓸ 5 ꓣꓳ ꓫꓵꓻ꓾ 15 ꓣꓳ ꓕꓯ ꓢꓲ ꓣꓴ ꓟꓶ ꓡꓰ ꓗꓸ ꓠꓯꓸ ꓑ ꓫꓬ ꓐꓴ ꓟꓬꓽ ꓠꓬꓲ ꓠꓲꓹ ꓟ ꓦꓶ ꓡ ꓢꓲꓸ ꓟꓶ ꓘꓶꓼ ꓝꓲꓸ ꓗꓪ ꓧꓳꓺ ꓐꓳ ꓔꓲꓸ ꓢꓯꓼ ꓓꓳ ꓡ ꓡꓳ=
ꓠꓬꓲꓸ ꓠꓬꓲ 2021 ꓘꓳꓼ 12 ꓦ 6 ꓠꓬꓲ ꓗꓪ ꓠꓬ ꓗꓴꓷꓼ ꓚꓴ ꓬꓲꓹ ꓖꓶꓽ ꓟ ꓮꓳ-ꓢ-ꓢꓴ-ꓚꓰꓽ ꓐꓰ꓾ ꓪ ꓔꓲꓸ ꓪꓰꓹ-ꓟꓲꓼ ꓐꓴ ꓔꓯ ꓫꓵꓽ ꓪꓴ 2 ꓚꓱꓹ ꓑꓶꓸ ꓓꓴ 4 ꓘꓳꓼ ꓡꓴꓽ ꓠꓹ ꓟ ꓠꓯꓼ ꓝꓲꓸ ꓗꓪ ꓐꓯ ꓟꓴ ꓘꓶꓽ ꓗꓷ ꓗꓸ ꓠꓯꓸ꓾ ꓟꓶ ꓘꓶꓼ ꓝꓲꓸ ꓗꓪ ꓠꓬ ꓟꓯꓼ ꓜꓲꓽ ꓟꓰꓹ-ꓮꓳ-ꓡꓮꓲꓽ ꓡꓰ 2 ꓘꓳꓼ ꓠꓽ ꓖꓴꓼ ꓢꓲ꓾ 2 ꓘꓳꓼ ꓡꓴꓽ ꓠꓹ ꓟ꓾ ꓮ ꓟꓶ ꓔꓬ ꓟ ꓦꓲ ꓗꓪ ꓔꓬ ꓠꓹ ꓟ ꓐꓯ ꓞꓷꓹ ꓗꓷꓳ ꓐꓰ ꓟꓣꓔꓦ ꓗꓪ ꓐꓰ ꓓꓳꓽ ꓐꓯ ꓩꓴ ꓡ ꓡꓳ=
“ꓠꓯꓼ ꓝꓲꓸ ꓗꓪ ꓠꓽ 4 ꓘꓳꓼ꓾ ꓟꓶ ꓘꓶꓼ ꓗꓪ 2 ꓘꓳꓼ ꓥꓳ ꓙꓳꓽ= 50% ꓬꓲꓻ ꓖꓴꓼꓳ ꓫꓵꓽ 12 ꓦ ꓐ ꓶ ꓡꓯꓼ ꓚꓱꓹ ꓥ ꓢꓶ? ꓥꓪ ꓟꓹ ꓟ (ꓮꓳ-ꓢꓸ-ꓢꓴ-ꓚꓰꓽ) ꓠꓽ ꓪꓽ ꓢꓯ ꓠꓬꓹ ꓓꓳ ꓥ” ꓐꓰ ꓕꓳ ꓶ ꓐꓳ ꓟ ꓑ-ꓢꓯ-ꓡꓳ ꓡꓰ ꓡꓯꓽ ꓔꓯꓽ ꓔ ꓡꓳ=
ꓑ ꓫꓬꓽ ꓐꓴ ꓠꓲꓹ ꓠꓵ ꓟ ꓗꓴꓷꓼ ꓧꓳꓽ ꓢꓴ ꓐꓴ ꓔꓯ ꓕꓱ ꓡꓱ ꓬꓰ ꓡ ꓠꓬꓲ꓾ ꓑ ꓫꓬ ꓐꓴ ꓠꓽ ꓠꓲꓹ ꓟ ꓦꓶ ꓔꓬ ꓟ꓾ ꓠꓲꓹ ꓘꓪꓽ ꓟꓽ ꓫꓵ ꓔꓬ ꓟ ꓢꓷꓸ ꓡꓰ ꓓꓴ ꓧꓳꓺ ꓐꓳ ꓔꓲꓸ ꓢꓯꓼ ꓓꓳ ꓡ ꓔꓬ ꓡꓳ=
“ꓠꓲꓹ ꓟ ꓪꓴꓽ ꓧꓶ ꓠꓽ ꓟꓽ ꓛꓲ ꓬꓰꓳ= ꓧꓳ ꓐꓳ ꓔꓲꓸ ꓢꓯꓼ ꓑ ꓙ ꓪ ꓠꓬꓲ ꓫꓸ ꓟꓳ ꓪ=” ꓐꓰ ꓠꓴꓖ ꓗꓪ ꓟ ꓢꓲꓽ ꓒꓽ ꓓꓽ ꓟ ꓕꓲ ꓣꓳ ꓥ ꓟ ꓮꓳ-ꓟꓬꓳ-ꓟꓰꓹ ꓡꓰ ꓐꓯ ꓡꓳ=
ꓧꓶꓸ ꓕꓯ 2021 ꓘꓳꓼ 2 ꓦ ꓟ ꓘꓴꓽ ꓗꓪ ꓧꓳꓺ ꓐꓳ ꓔꓲꓸ ꓪꓴꓸ ꓔꓴ ꓗꓷ ꓗꓸ ꓠꓯꓸ ꓟꓶ ꓫꓵ ꓫꓵ ꓠꓬ ꓕꓱ ꓡꓱꓳ ꓫꓵꓽ ꓢꓯꓼ ꓟꓽ ꓑ ꓙ ꓗꓷ ꓡꓰ ꓟ ꓥ ꓢꓲ꓾ ꓮ ꓟꓶ 12 ꓦ ꓘꓴꓽ ꓟ ꓗꓪ ꓠꓬꓲꓽ ꓦꓬꓼ ꓕꓲ ꓦꓬꓼ ꓧꓳꓺ ꓐꓳ ꓔꓲꓸ ꓢꓯꓼ ꓑ ꓙ ꓡ ꓟ ꓥ ꓡꓳ=
ꓟꓬ-ꓟ ꓗꓴꓷꓼ ꓗꓪ ꓑ ꓫꓬ ꓡꓰ ꓢꓲꓻ ꓣꓴ ꓔꓸ ꓢꓴ ꓐꓴ ꓔꓯ ꓫꓵꓽ ꓪꓴ ꓬꓲꓸ ꓗꓯ ꓟꓽ ꓗꓹ ꓩꓴ ꓔꓸ ꓢꓲ꓾ ꓑ ꓫꓬ ꓐꓴ ꓠꓲꓹ ꓘꓪ ꓟꓽ ꓫꓵ ꓟ ꓟꓳꓸ ꓖꓶ ꓡ ꓠꓬ ꓡ ꓛꓴꓸ ꓡꓰ ꓐꓶ ꓢꓰꓼ꓾ ꓟꓳ-ꓓꓳ ꓡꓰ ꓙꓲꓽ ꓢꓰꓼ ꓬꓰ ꓔꓬ ꓟ ꓕꓲ ꓝꓲꓸ ꓥ ꓡꓳ=
