ꓪꓯꓼ-ꓠ ꓠꓰ ꓑꓴ-ꓔꓲ ꓔꓯ ꓔꓳꓹ ꓔꓬꓳ

ꓪꓯꓼ-ꓠ ꓟꓯꓼ ꓜꓴ ( Wagner army) ꓡꓰ ꓣ-ꓫꓸ ꓗꓴꓷꓼ ꓙꓵꓽ ꓢꓴ ꓑꓴ-ꓔꓲ ꓐꓰ ꓣ-ꓫꓸ ꓟꓯꓼ ꓔꓯ ꓒꓳꓹ ꓔꓳꓹ ꓔꓬ ꓡꓳ꓿

ꓪꓯꓼ-ꓠ ꓟꓯꓼ ꓠꓬ ꓣ-ꓫꓸ ꓡꓰ ꓒꓴ ꓫꓵꓺ ꓐꓰ ꓟꓯꓼ ꓶ ꓤ ꓔꓳꓹ ꓙ ꓢꓲꓸ ꓫꓳ ꓔꓸ ꓟ꓾ ꓢꓰꓸ-ꓣꓲ-ꓬ ꓗꓴꓷꓼ ꓐꓰ ꓣꓴ-ꓗ-ꓣꓲꓸ ꓗꓴꓷꓼ ꓗꓪ ꓟꓯꓼ ꓓꓶꓽ ꓝꓲ ꓔꓬ ꓟ ꓟꓯꓼ ꓜꓴ ꓥ ꓡꓳ꓿ ꓟꓯꓼ ꓧꓳꓽ ꓢꓴ ꓠꓬ Yevgeny Prigozhin ꓥ ꓡꓳ꓿

ꓪꓯꓼ-ꓠ ꓟꓯꓼ ꓠꓰ ꓣ-ꓫꓸ ꓟꓯꓼ ꓒꓱ Rostov army HQ ꓔꓯ ꓓꓶꓽ ꓧꓪꓸ ꓡꓰꓳ ꓐꓰ꓾ ꓣ-ꓫꓸ ꓟꓯꓼ ꓜꓲꓽ ꓠꓬꓲꓺ ꓖꓴ ꓗꓪ ꓚꓳꓸ ꓠꓲꓹ ꓞ ꓓꓳ ꓙꓰ ꓓꓴ ꓬꓰ ꓐꓰ꓾ Yevgeny Prigozhin ꓡꓰ ꓐꓯ ꓩꓴ ꓡ ꓡꓳ꓿

“ꓥ ꓠꓴ ꓟꓯꓼ ꓔꓯ ꓢꓰꓼ ꓢꓴ ꓣ-ꓫꓸ ꓟꓯꓼ ꓜꓲꓽ ꓗꓽ ꓬꓲꓸ ꓠꓬꓲ ꓖꓴ ꓗꓪ ꓐꓰ ꓓꓳ ꓐꓯ ꓐꓲꓹ ꓞ ꓓꓳ꓾ ꓟꓽ ꓥ ꓐꓯ ꓥ ꓠꓴ ꓟꓳ-ꓢꓲ-ꓗꓳ ꓗꓪ ꓡ ꓢꓲꓸ ꓢꓰꓼ ꓓꓴ ꓥ” ꓐꓯ ꓡꓳ꓿

ꓪꓯ-ꓠ ꓟꓯꓼ ꓠꓬ ꓬꓴ-ꓗ-ꓣꓲꓸ ꓗꓪ ꓟꓯꓼ ꓓꓶꓽ ꓔꓬ ꓟ ꓬꓲꓸ ꓘꓳꓼ ꓕꓯ ꓢꓲ ꓪꓽ ꓐꓶꓽ ꓡ ꓕꓯꓽ꓾ ꓟꓯꓼ ꓶ ꓤ ꓒ ꓛꓲ ꓒ ꓡꓳꓼ ꓟꓽ ꓔꓳꓹ ꓙ ꓡ ꓟ ꓕꓯ ꓢꓲ꓾ ꓟꓯꓼ ꓘꓶꓽ ꓗꓪ ꓣ-ꓫ ꓙꓱ ꓦꓲ ꓗꓪ ꓐꓰ ꓐꓳꓽ ꓐꓶ ꓜꓯꓼ ꓡ ꓟ ꓑꓶꓸ ꓓꓴ ꓣ-ꓫꓸ ꓔꓯ ꓠꓲꓹ ꓟ ꓩꓴ ꓡ ꓢꓲ꓾ ꓣ-ꓫꓸ ꓟꓵꓽ ꓧꓳꓽ ꓢꓴ ꓟꓯꓼ ꓜꓲꓽ ꓐꓴ ꓔꓯ ꓬꓲꓸ ꓧꓶꓽ ꓔꓳꓼ ꓠꓹ ꓟ ꓢꓯꓼ ꓕꓵꓼ ꓡ ꓟ ꓟꓯꓼ ꓕꓲ ꓜꓴ ꓥ ꓡꓳ꓿

ꓪꓯꓼ-ꓠ ꓟꓯꓼ ꓐꓴ ꓠꓰ ꓣ-ꓫꓸ ꓙꓱ ꓦꓲ ꓑꓳꓼ ꓡꓳꓼ 3 ꓟ ꓐꓶ ꓞꓰ ꓩꓴ ꓡ ꓠꓰ ꓣ-ꓫꓸ ꓗꓴꓷꓼ ꓙꓵꓽ ꓢꓴ ꓑꓴ-ꓔꓲ ꓠꓬꓹ ꓟꓽ ꓙ ꓬꓰ ꓢꓲꓸ ꓕꓱ ꓕꓲ ꓑꓹ ꓠꓲꓹ ꓞ ꓠꓲꓹ ꓧꓳꓽ ꓓꓳꓽ ꓫꓸ ꓕꓱ ꓔꓬ ꓡꓳ꓿

ꓒꓳꓹ ꓔꓳꓹ ꓡ ꓟ ꓔꓯ ꓗꓽ ꓔꓸ ꓠꓹ ꓟ ꓣ-ꓫꓸ ꓡꓳ ꓒꓱ ꓓꓽ ꓟꓳ-ꓢꓲ-ꓗꓳ ꓗꓪ ꓣ-ꓫꓸ ꓟꓯꓼ ꓐꓴ ꓙꓲ ꓙꓲ ꓡꓳꓸ ꓠꓹ ꓟ ꓑꓴ-ꓔꓲ ꓡꓰ ꓕꓵꓼ ꓪ ꓖꓶ ꓔꓬ ꓡꓳ꓿