2021 ꓘꓳꓼ 12 ꓦ 16 ꓠꓬꓲ ꓗꓪ ꓴꓢꓮ ꓗꓴꓷꓼ ꓙꓵꓽ ꓜꓴ ꓡꓰ ꓤ ꓠꓱ ꓧꓳꓹ ꓠꓯ ꓞꓲꓼ ꓢ ꓢ ꓣꓱꓽ ꓓ ꓟ ꓙꓵꓽ ꓗ ꓕꓲ ꓟ ꓔꓶ ꓓꓳ ꓡ ꓡꓳ꓿
ꓮ ꓟꓶ ꓔꓶꓺ ꓩꓴ ꓡ ꓟ ꓙꓵꓽ ꓗ ꓗꓪ꓾ ꓤ ꓠꓱ ꓧꓳꓹ ꓩꓴ ꓠꓲꓹ ꓫꓵ ꓢꓴ ꓐꓴ ꓠꓬ ꓠꓯ ꓞꓲꓼ ꓦꓲ ꓗꓪ ꓙꓰ ꓢꓲꓸ ꓛꓲꓽ ꓝꓳꓹ ꓚꓹ ꓠꓬꓲ ꓟꓽ ꓛꓲ ꓛꓲ꓾ ꓕꓳ ꓶ ꓦ ꓩꓴ ꓢꓲꓸ ꓠꓯ ꓞꓲꓼ ꓪꓴꓻ ꓪ ꓓ ꓡꓳ ꓐꓰ ꓐꓯ ꓔ ꓡꓳ꓿
ꓠꓯ ꓞꓲꓼ ꓠꓬ mifepristone ꓥ ꓢꓲ꓾ ꓤ ꓠꓱ ꓶꓻ ꓡꓰ ꓗꓸ ꓠꓯꓸ 10 ꓫꓵꓽ ꓠꓽ ꓗꓪ ꓛꓲ ꓙꓳ ꓢꓴ ꓐꓴ ꓔꓯ ꓤ ꓠꓱ ꓧꓳꓹ ꓖꓶ ꓓꓴ ꓥ ꓡꓳ꓿ ꓟꓽ ꓞꓲ꓾ ꓠꓯ ꓞꓲꓼ ꓕꓱ ꓟ ꓠꓽ ꓠꓰ ꓤꓽ ꓘꓶꓻ ꓗꓪ ꓙꓲ ꓙꓲ ꓟꓽ ꓙꓳ ꓟ ꓤ ꓠꓱ ꓐꓴ ꓔꓯ ꓧꓳꓹ ꓩꓴ ꓠꓹ ꓟ ꓥ ꓟꓲ ꓣꓱꓽ ꓚꓰꓼ ꓡꓳ꓿
ꓕꓱ ꓡꓱ ꓣꓱꓽ ꓐ ꓡ ꓠꓹ ꓟ ꓐꓱ ꓶ ꓓꓵꓽ ꓙ ꓞꓰꓹ ꓜꓴ ꓠꓬ ꓜꓽ ꓓꓴ ꓐꓰ ꓠꓯ ꓞꓲꓼ ꓠꓯ ꓟꓲ ꓗꓪꓽ ꓫꓵꓽ ꓜꓴ- ꓝꓓꓮ (Food and Drug Administration) ꓥ ꓡꓳ꓿ ꓕꓱ ꓟ ꓠꓬ 1973 ꓘꓳꓼ ꓗꓪ ꓤ ꓠꓱ ꓧꓳꓹ ꓓˍ ꓟ ꓙꓵꓽ ꓗ ꓔꓯ ꓕꓲ ꓧꓪꓹ ꓪꓴꓽ ꓟꓴ ꓛꓵꓽ ꓔꓴ ꓩꓴ ꓡ ꓟ ꓥ ꓡꓳ꓿
ꓤ ꓠꓱ ꓧꓳꓹ ꓟ ꓔꓯ ꓢꓯꓼ ꓖꓶ ꓜꓴ ꓐꓴ ꓠꓬ꓾ ꓕꓱ ꓟ ꓠꓬ ꓙꓲ ꓣꓴ ꓓꓴ ꓔꓳꓹ ꓜꓳꓽ ꓔꓬ ꓟ ꓤ ꓟꓶꓼ ꓤ ꓐꓴ ꓢꓯꓼ ꓟꓬ ꓔꓯ ꓚꓬꓴꓹ ꓙ ꓟ ꓥ ꓡꓳ ꓐꓰ ꓐꓯ ꓔꓬ ꓡꓳ꓿
ꓧꓶꓸ ꓕꓯ ꓠꓬ ꓤ ꓠꓱ ꓧꓳꓹ ꓠꓲꓹ ꓫꓵ ꓢꓴ ꓐꓴ ꓠꓬ ꓠꓯ ꓞꓲꓼ ꓦꓲ ꓗꓪ ꓙꓰ ꓢꓲꓸ ꓛꓲꓽ ꓝꓳꓹ ꓓꓰꓽ ꓠꓯ ꓡꓳ꓿ ꓠꓯ ꓞꓲꓼ ꓪꓴꓽ ꓔꓶꓸ ꓗꓪ ꓮ ꓔꓳ ꓔꓳ ꓠꓯ ꓞꓲꓼ ꓟꓽ ꓪꓴꓽ ꓖꓶ ꓚꓰꓼ ꓟ ꓙꓵꓽ ꓗ ꓥ ꓡꓳ꓿ ꓮ ꓟꓶ ꓠꓬ ꓖꓳ ꓡꓱ ꓛꓲꓽ ꓝꓳꓹ ꓙꓰ ꓟꓽ ꓛꓲ ꓛꓲ ꓕꓳ ꓶ ꓦ ꓖꓶ ꓩꓴ ꓢꓲꓸ ꓠꓯ ꓞꓲꓼ ꓪꓴꓻ ꓪ ꓓ ꓡꓳ꓿
ꓖꓳ ꓡꓱ ꓥ ꓟꓲ꓾ ꓔꓯ-ꓗ-ꓢꓼ ꓡꓳ ꓒꓱ (Texas) ꓐꓰ ꓠꓱꓸ ꓐꓯꓼ 16 ꓡꓳ ꓒꓱ ꓐꓴ ꓠꓬ ꓙꓵꓽ ꓗ ꓕꓱ ꓟ ꓔꓯ ꓛꓳ ꓠꓲꓹ ꓟꓽ ꓫꓵ꓿ ꓖꓳ ꓟ ꓑꓶꓸ ꓓꓴ ꓖꓳ ꓡꓱꓳ ꓫꓵ ꓟꓵꓽ ꓢꓴ ꓤ ꓟꓶꓼ ꓤꓼ ꓐꓴ ꓠꓬ ꓪꓴꓻ ꓪ ꓓ ꓟ ꓟꓵꓽ ꓫꓴ ꓗꓪ ꓙꓰ ꓢꓲꓸ ꓪꓴꓻ ꓜꓽ ꓠ ꓗꓷ ꓡꓰ ꓥꓳ꓿
ꓘꓯ-ꓡꓲ-ꓩꓴ-ꓠꓲ-ꓬ ꓐꓰ꓾ ꓠꓰ-ꓬꓴ-ꓬꓳꓼ (California and New York) ꓟꓵꓽ ꓫꓴ ꓠꓬ ꓠꓱꓸ ꓐꓯꓼ ꓟꓵꓽ ꓫꓴ ꓗꓪ ꓐꓰ ꓤ ꓠꓱ ꓧꓳꓹ ꓠꓯ ꓞꓲꓼ ꓪꓴꓻ ꓠꓲꓹ ꓫꓵ ꓢꓴ ꓐꓱ ꓶ ꓢ ꓢˍ ꓪꓴꓻ ꓪ ꓠꓹ ꓟ ꓬꓲꓸ ꓚꓱꓹ ꓙ ꓖꓶ ꓔꓬ ꓡꓳ꓿
ꓬꓲ ꓚꓰ꓾ Reuters
