ꓢꓲ-ꓣꓲ-ꓡꓲ-ꓗ ꓗꓴꓷꓼ ꓠꓬ ꓟꓵꓽ ꓗꓳ ꓓꓵ ꓓꓵ ꓗꓪ ꓐꓰ ꓛꓵꓽ ꓔꓸ ꓟ ꓒꓴ ꓔꓯ 2022 ꓘꓳꓼ 4 ꓦ 12 ꓠꓬꓲ ꓗꓪ ꓐꓰ ꓝꓱꓹ ꓟꓽ ꓖꓰꓼ ꓬꓰꓳ ꓐꓰ ꓗꓴꓷꓼ ꓒꓴ ꓞꓳꓽ ꓦꓲ ꓚꓰꓺ ꓢꓽ ꓡ ꓙꓵꓽ ꓠ-ꓓ-ꓡꓯ ꓪꓰ-ꓣ-ꓢ-ꓖꓲ ꓡꓰ ꓢꓷ ꓙ ꓟꓴ ꓙ ꓩꓴ ꓡ ꓡꓳ꓿
ꓢꓲ-ꓣꓲ-ꓡꓲ-ꓗ ꓗꓴꓷꓼ ꓔꓯ ꓟꓬꓽ ꓠꓬꓲ ꓒꓴ ꓛꓵꓽ ꓖꓶꓽ ꓔꓸ ꓟ ꓗꓴꓷꓼ ꓠꓬ ꓧꓶꓽ ꓒꓽ ꓗꓴꓷꓼ ꓥ ꓢꓲ꓾ ꓙ ꓖꓴ꓾ ꓞꓽ ꓒꓳꓽ ꓠꓽ ꓖꓴ꓾ ꓙꓱ ꓦꓲ ꓠꓽ ꓖꓴ ꓐꓰ꓾ ꓟꓯꓹ ꓕꓸ ꓙ ꓖꓴ ꓮ ꓟꓬꓹ ꓫꓬꓹ ꓔꓸ ꓟ ꓥ ꓡꓳ꓿
ꓝꓱꓹ ꓟꓽ ꓖꓰꓼ ꓠꓬ ꓟꓬꓱꓽ ꓚꓱꓹ ꓮ ꓙꓵꓽ꓾ ꓬꓲꓸ ꓟꓶꓽ ꓗꓪ ꓗꓴꓷꓼ ꓥ ꓟꓲ ꓧꓶꓽ ꓒꓽ ꓔꓯ ꓡꓯꓼ ꓙꓱ ꓩꓴ ꓠ ꓗ ꓬꓰ ꓡ ꓥꓳ꓾ ꓐꓰ ꓢꓴꓺ ꓡꓯ ꓘꓳ꓾ ꓐꓯ ꓡꓯ ꓘꓳ ꓔꓬ ꓡꓳ꓿
ꓧꓶꓽ ꓗꓴꓷꓼ ꓠꓬ ꓶ ꓡꓯꓼ ꓗꓪ ꓐꓰ ꓗꓴꓷꓼ ꓤꓹ ꓤꓽ ꓐꓴ ꓔꓯ ꓗꓪꓼ ꓠꓹ ꓟ ꓢꓯꓼ ꓕꓵꓼ ꓩꓴ ꓡ ꓟ 20 ꓘꓳꓼ ꓖꓼ ꓡꓯꓼ ꓖꓼ ꓙꓲ ꓙꓳ ꓢꓲ꓾ ꓕꓱ ꓟ ꓠꓬ ꓬꓲꓸ ꓪꓴꓸ ꓕꓲ ꓗꓴꓷꓼ ꓐꓬ ꓡꓰ ꓔꓬ ꓟ ꓥ ꓡꓳ꓿
ꓢꓲ-ꓣꓲ-ꓡꓲ-ꓖ ꓗꓴꓷꓼ ꓙꓵꓽ ꓜꓴ ꓥ ꓟꓲ ꓜꓽ ꓓꓴ ꓓꓳ ꓓꓴ ꓣꓱꓽ ꓬꓯꓼ ꓟ ꓡꓰ ꓐꓰ ꓔꓱꓽ ꓟꓽ ꓘꓴ ꓠꓬꓲ꓾ ꓙꓼ ꓞꓶ ꓒꓵꓽ ꓐꓰ ꓜꓽ ꓓꓴ ꓒꓵꓽ ꓠꓯꓸ ꓡ ꓔꓬ ꓟ ꓡꓰꓽ ꓟꓽ ꓞꓲ꓾ ꓒꓴ ꓙꓳˍ ꓡꓲꓸ ꓪꓴ ꓠꓲꓹ ꓫꓵ ꓟ ꓡꓰ ꓐꓰ ꓪꓴ ꓪ ꓟꓽ ꓓ ꓗ ꓡ ꓔꓬ ꓡꓳ꓿
“ꓟꓲ ꓠꓯ ꓒꓴ ꓞꓳꓽ ꓦꓲ ꓚꓰꓺ ꓓꓽ ꓟ (IMF) ꓗꓪ ꓐꓰ ꓚꓬꓴꓹ ꓙ ꓠꓬ ꓚꓬꓴꓹ ꓙ꓾ ꓟꓽ ꓥ ꓠꓬ ꓮ ꓙꓵꓽ ꓞꓳꓸ ꓡꓰ ꓓꓴ ꓥꓳ” ꓐꓰ Ahilan Kadirgamar ꓡꓰ the Hindu ꓓꓳ ꓕꓳ ꓶ ꓗꓪ ꓐꓳˍ ꓡꓳ꓿
IMF ꓗꓪ ꓐꓰ $4 billion ꓓꓰꓽ ꓪ ꓠꓹ ꓟ ꓢꓲ-ꓣꓲ-ꓡꓲ-ꓖ ꓢꓲꓽ ꓒꓽ ꓮ-ꓡꓲ ꓢ-ꓐꓲ (Ali Sabry) ꓠꓬ ꓴꓢꓮ ꓗꓪ ꓔꓴ ꓙꓰꓳ꓿ ꓲꓟꓝ ꓙꓵꓽ ꓪ ꓙꓳ ꓢꓴ ꓐꓴˍ ꓐꓰ 4 ꓦ 19-24 ꓠꓬꓲ ꓗꓪ ꓖꓪ ꓙꓱ ꓓꓴ ꓥ ꓡꓳ꓿
Ref: The Hindu, Times of India
