ꓢꓲꓼ-ꓗꓮꓲꓹ ꓟꓵꓽ꓾ ꓡꓯꓼ-ꓑ-ꓓꓮꓳꓹ ꓪꓽ ꓜꓱꓽ ꓪꓳ-ꓑꓮꓳ ꓙꓲꓽ ꓚꓴꓸ ꓔꓶꓸ ꓗꓪ ꓖꓶꓽ ꓔꓬ ꓟ ꓮ ꓔꓳꓸ ꓙꓼ ꓚꓶꓹ ꓜꓲ ꓘꓴ ꓔꓯ 2022 ꓘꓳꓼ 6 ꓦ 24 ꓠꓬꓲ ꓟꓶ ꓘꓶꓼ ꓕꓯꓽ ꓮ-ꓟꓲꓼ-ꓟꓬꓯꓽ ꓒꓳꓹ ꓔꓳꓹ ꓜꓴ ꓡꓰ ꓒꓬꓹ ꓩꓴꓳ ꓐꓯˍ ꓡꓳ꓿
ꓧꓶꓽ ꓗꓴꓷꓼ ꓗꓪ ꓐꓰ ꓡˍ ꓟ ꓪꓳ-ꓑꓮꓳ ꓙꓲꓽ ꓚꓴꓸ ꓶ ꓡꓯꓼ ꓗꓳ-ꓑꓶ-ꓠꓰ ꓜꓴ ꓠꓬ ꓟꓬ-ꓟ ꓑ ꓫꓬ ꓔꓯ ꓫꓸ ꓟꓴ ꓫꓸ ꓚꓬ ꓢꓰꓼ ꓔꓬ ꓟ ꓟꓬ-ꓟ ꓟꓯꓼ ꓔꓯ ꓜꓽ ꓓꓴ ꓓꓳ ꓓꓴ ꓖꓶꓽ ꓢꓲꓸ ꓦꓵ ꓙ ꓔꓬ ꓠꓬꓲ ꓕꓱ ꓡꓱ ꓬꓰˍ ꓟ ꓥ ꓡꓳ꓿
ꓧꓶꓽ ꓗꓴꓷꓼ ꓗꓪ ꓐꓰ ꓶ ꓡꓯꓼ ꓬꓰ ꓢꓴ ꓐꓴ ꓠꓬ ꓟꓬ-ꓟ ꓑ ꓫꓬ ꓠꓲꓹ ꓫꓵˍ ꓟ ꓠꓴꓖ ꓗꓴꓷꓼ ꓙꓵꓽ ꓜꓴ ꓔꓯ ꓙ ꓡꓯ ꓘꓳ ꓠꓹ ꓟ ꓓꓵꓽ ꓙ ꓓꓴ ꓬꓰ ꓠ ꓔꓸꓳ꓾ ꓠꓲꓹ ꓟ ꓟꓽ ꓡꓶꓸ ꓠꓬ ꓑ ꓫꓬꓽ ꓟꓯꓼ ꓐꓴ ꓠꓰ ꓡꓯ ꓫꓵ ꓓꓶꓽ ꓓꓴ ꓥꓳ ꓐꓰ ꓢꓷ ꓙ ꓟꓴ ꓙ ꓔꓸ ꓡꓳ꓿
ꓪꓳ-ꓑꓮꓳ ꓗꓳ-ꓑꓶ-ꓠꓰ ꓠꓬ ꓖꓳ ꓗꓪ ꓙꓲꓽ ꓚꓴꓸ ꓔꓬ ꓟ ꓥ ꓢꓲ꓾ ꓟꓬ-ꓟ ꓟꓯꓼ ꓐꓴ ꓐꓰ ꓶ ꓡꓯꓼ ꓛꓳ ꓒꓯꓹ ꓥ ꓟ ꓡꓰ ꓐꓰ꓾ ꓑ ꓫꓬ ꓔꓯ ꓥꓰꓸ ꓤꓲ ꓟ ꓗꓪ ꓔꓺ ꓔꓬ ꓟ ꓡꓰ ꓐꓰ ꓢꓪꓼ ꓪ ꓡꓰˍ ꓔꓬ ꓟ ꓥ ꓡꓳ꓿
ꓧꓶꓸ ꓕꓯꓽ ꓧꓶꓽ ꓒ ꓗꓴꓷꓼ ꓶ ꓡꓯꓼ ꓚꓱꓹ ꓔꓯ ꓢꓲꓹ ꓠꓯ ꓟꓯꓼ ꓐꓰ ꓟꓬ-ꓟ ꓟꓯꓼ ꓐꓴ ꓠꓶꓽ ꓟꓽ ꓑꓶꓸ ꓟ ꓥ ꓡꓳ꓿ ꓮ ꓟꓶ ꓠꓬ ꓑ ꓫꓬ ꓟꓯꓼ ꓕꓲꓽ ꓩꓴꓸ ꓓꓳ ꓡ ꓢꓲꓸ ꓧꓶꓽ ꓒꓽ ꓶ ꓡꓯꓼ ꓚꓱꓹ ꓔꓯˍ ꓟꓲ ꓠꓶꓽ ꓡ ꓔꓬ ꓟ ꓥ ꓡꓳ꓿
