ꓪꓮꓲ-ꓟꓳ ꓟꓵꓽ ꓗꓪ ꓔꓬ ꓟ ꓡꓲ-ꓢꓴ ꓐꓴ ꓗꓪ ꓐꓰ ꓕꓲꓽ ꓦꓲ ꓕꓲ ꓣꓳ ꓡꓲ-ꓢꓴ ꓫꓵꓽ ꓪꓴ ꓟꓴ ꓡ ꓚꓱꓹ ꓔꓳꓹ ꓙ ꓟꓯꓼ ꓜꓴ ꓗꓪ ꓓꓵꓽ ꓡ ꓠꓹ ꓟ ꓘꓴ ꓕꓳ ꓶ ꓔꓯ ꓢꓲꓽ ꓒ ꓓ ꓟ ꓡꓽ-ꓡꓴꓹ ꓫꓱ-ꓟꓷ ꓡꓯꓼ ꓓꓴ ꓢꓽ ꓔꓸ ꓢꓲ꓾ 2023 ꓘꓳꓼ 10 ꓦ 30 ꓠꓬꓲ ꓕꓯ ꓕꓳ ꓶ ꓓꓳ ꓩꓴ ꓡ ꓡꓳ꓿
ꓟꓯꓼ ꓘꓴ ꓕꓳ ꓶ ꓗꓪ ꓟꓯꓼ ꓬꓰ ꓡ ꓠꓹ ꓟ ꓔꓯ ꓟꓳꓸ “ꓟꓲ ꓔꓱꓹ ꓟꓲ ꓓꓵꓽ ꓡ ꓟ ꓔꓯ ꓘꓳ ꓣꓴ ꓡꓳ꓿ ꓟꓲ ꓔꓱꓹ ꓟꓲ ꓟꓽ ꓓꓵꓽ ꓡ ꓢꓴ ꓔꓯ ꓠꓬ ꓦꓲ ꓗꓪ ꓧꓳꓽ ꓣꓴ ꓡ ꓥꓳ” ꓐꓯ ꓔꓸ ꓡꓳ꓿
ꓢꓲꓽ ꓒ ꓓ ꓟ ꓡꓽ-ꓡꓴꓹ ꓡꓰ꓾ “ꓡꓲ-ꓢꓴ ꓐꓴ ꓔꓯ ꓘꓴ ꓥꓳ꓿ ꓠꓱꓸ ꓐꓯꓼ ꓫꓵꓽ ꓥ ꓟꓲ ꓔꓺ ꓡ ꓠꓲꓹ ꓫꓵ ꓠꓬ ꓔꓺ ꓡ ꓓ ꓡꓳ꓿ 50 ꓘꓳꓼ ꓕꓲ ꓙꓶ ꓞꓲꓼ ꓟꓳꓽ ꓢꓴ ꓥ ꓟꓲ ꓖꓳ ꓓꓱꓽ ꓔꓬ ꓢ ꓠꓬ ꓓꓵꓽ ꓡ ꓓ ꓡꓳ꓿ ꓮ ꓟꓶ ꓠꓬ ꓪꓮꓲ-ꓟꓳ ꓗꓪ ꓪꓴꓸ ꓔꓴ ꓥꓳ꓿ ꓡ ꓠꓹ ꓟ ꓕꓲꓽ ꓝꓸ ꓕꓲ ꓝꓸ ꓠꓬ ꓟꓶ-ꓚꓲ-ꓠ꓾ ꓔꓲ-ꓠ꓾ ꓑꓴ-ꓔ-ꓳ ꓗꓪ ꓟꓯꓼ ꓜꓴ ꓒꓴ ꓓꓴ ꓥꓳ” ꓐꓰ 74 media ꓗꓪ ꓡꓴ-ꓟꓲꓽ ꓥꓳꓽ ꓗꓪ ꓐꓰ ꓐꓯꓽ ꓧꓳꓽ ꓔꓸ ꓡꓳ꓿
ꓡꓲ-ꓢꓴ ꓐꓴ ꓟꓯꓼ ꓝꓲꓸ ꓟꓯꓼ ꓖꓼ ꓚꓱꓹ ꓕꓱ ꓟ ꓔꓯ ꓟꓳꓸ ꓬꓰ ꓝꓲꓸ ꓟꓽ ꓥ꓾ ꓬꓰ ꓞꓳꓸ ꓬꓰ ꓡ ꓔꓳꓼ ꓥ ꓐꓯ ꓢꓲꓸ ꓙ ꓫꓸ ꓙ ꓢꓴ꓾ ꓔꓳꓹ ꓢꓴ ꓙꓳˍ ꓟ ꓡꓰ ꓐꓰ꓾ ꓡꓲ-ꓢꓴ ꓐꓴ ꓥ ꓟꓲ ꓑꓳꓺ ꓟꓽ ꓔꓯꓹ ꓟꓽ ꓓꓻꓳ ꓐꓯ ꓢꓲꓸ ꓢꓯꓼ ꓖꓶ ꓔꓺ ꓙ ꓢꓴ ꓥ ꓟꓲ ꓙꓳˍ ꓟ ꓡꓳꓸ ꓓꓳ ꓡ ꓡꓳ꓿
ꓗ-ꓛꓲ ꓟꓵꓽ ꓫꓴ ꓑꓳꓺ ꓔꓯꓹ ꓟꓯꓼ ꓐꓴ ꓗꓪ ꓐꓰ ꓗꓲꓮ ꓠꓬ ꓢꓯꓼ ꓙꓳ ꓟ ꓜꓴ ꓥ ꓢꓲ꓾ ꓠꓱꓸ ꓐꓯꓼ ꓟꓯꓼ ꓜꓴ ꓥ ꓟꓲ ꓮ ꓟꓬꓹ ꓙꓳ ꓡꓳ꓿ ꓬꓲꓸ ꓪ ꓥ ꓟꓲ ꓟꓲ ꓔꓱꓹ ꓟꓲ ꓗꓪ꓾ ꓟꓲ ꓟꓵꓽ ꓟꓲ ꓗꓪ ꓗꓪꓼ ꓔꓬ ꓡꓳ꓿
ꓡꓲ-ꓢꓴ ꓐꓴ ꓑꓳꓺ ꓔꓯꓹ ꓓꓴ ꓙ ꓖꓶꓽ ꓡ ꓟ ꓔꓯ ꓐꓯ ꓕꓼ ꓢꓴ ꓞꓳ ꓫꓵꓽ ꓞꓳ ꓙꓰꓽ ꓮ ꓟꓬꓹ ꓙꓳ ꓡ ꓔꓬ ꓥ ꓟꓲ꓾ ꓗ-ꓛꓲ ꓟꓵꓽ ꓗꓪ ꓜ-ꓘꓳ-ꓔꓲꓼ-ꓬꓲꓹ꓾ ꓬꓯ-ꓓ-ꓔ꓾ ꓡ-ꓢ-ꓮꓳ-ꓪ ꓡꓰ ꓐꓰ ꓠꓱꓸ ꓐꓯꓼ ꓞꓳ ꓫꓵꓽ ꓐꓴ ꓐꓰ ꓬꓲꓸ ꓣꓳ ꓐꓴ ꓗꓪ ꓐꓰ ꓧꓳꓽ ꓣꓱꓽ ꓢꓲꓸ ꓑꓳꓺ ꓔꓯꓹ ꓔꓬ ꓟ 5 ꓜꓴ ꓕꓯꓽ ꓢꓲ ꓠꓬ ꓢꓯꓸ ꓔꓬ ꓙꓳ ꓔꓬ ꓢꓰꓽ ꓡꓳ꓿
ꓐꓬꓱꓽ꓾ Shwe Minn Facebook account
