National Unity Government (NUG) ꓡꓰ ꓟꓬ-ꓟ ꓗꓴꓷꓼ ꓒꓳꓹ ꓟꓬꓱꓽ ꓗꓪ ꓣꓱꓽ ꓠꓹ ꓟ ꓒꓴ ꓣꓱꓽ ꓬꓯꓼ ꓔꓬ ꓟ ꓑꓶꓸ ꓓꓴ ꓒꓴ ꓞꓳꓽ ꓦꓲ ꓙ ꓟꓳ ꓘꓶꓽ ꓕꓳ ꓶ (Bond) ꓔꓯ ꓪꓴꓽ ꓪꓴꓸ ꓔꓴ ꓟ ꓬꓲꓸ ꓪꓴꓸ ꓕꓲ ꓠꓬꓲ 2021 ꓘꓳꓼ 11 ꓦ 22 ꓠꓬꓲ ꓗꓪ ꓴꓢ $ 6ꓸ3 ꓪꓹ ꓪꓴꓽ ꓪ ꓡꓰꓳ ꓐꓰ ꓠꓴꓖ ꓡꓰ ꓐꓯ ꓡꓳ=
ꓕꓲ ꓛꓬꓽ ꓗꓪ ꓴꓢ ꓓꓳ-ꓡ 100꓾ 500꓾ 1000꓾ 5000 ꓗꓪ ꓛꓲ ꓚꓲ ꓛꓬ ꓐ ꓡ ꓟ ꓡꓰ ꓐꓰ ꓪꓴꓻ ꓪ ꓓ ꓢꓲ꓾ 2 ꓘꓳꓼ ꓟ ꓘꓴꓽ ꓗꓪ ꓬꓲꓸ ꓐꓵꓽ ꓟꓽ ꓪ ꓪ ꓥꓪꓸ ꓖꓶ ꓟ ꓥꓳ=
ꓕꓲ ꓔꓱꓹ ꓐꓯ ꓠꓬ ꓗꓴꓷꓼ ꓒꓳꓹ ꓟꓬꓱꓽ ꓗꓪ ꓣꓱꓽ ꓓꓴ ꓒꓴ ꓟꓽ ꓙꓳ_ ꓟ ꓠꓴꓖ ꓔꓯ ꓑ ꓫꓬ ꓐꓴ ꓡꓰ ꓦ ꓡꓱ ꓐꓳ ꓢꓲ꓾ ꓒꓴ ꓛꓵꓽ ꓖꓶ ꓟ ꓥ ꓡꓳ= 2 ꓘꓳꓼ ꓖꓳ ꓑꓳꓸ ꓠꓬ ꓙ ꓟꓳ ꓘꓶꓽ ꓕꓳ ꓶ ꓕꓱ ꓟ ꓗꓪ ꓐꓰ ꓚꓲ ꓛꓬ ꓒꓴ ꓚꓲ ꓛꓬ ꓣꓴ ꓡꓲꓸ ꓪ ꓓ ꓡꓳ ꓐꓰ ꓠꓴꓖ ꓡꓰ ꓢꓷ ꓙ ꓟꓴ ꓙ ꓔ ꓡꓳ=
“ꓜꓲ ꓜꓲ ꓑꓰꓹ ꓑꓰꓹ ꓙꓵꓽ ꓢꓴ ꓟꓯꓼ ꓔꓯ ꓬꓲꓸ ꓛꓴ ꓒ ꓞꓰꓹ ꓓꓶꓽ ꓠꓲꓹ ꓫꓵ ꓔꓬ ꓟ ꓑ ꓫꓬ ꓐꓴ ꓠꓲꓹ ꓡꓶꓽ ꓔꓯ ꓕꓱ ꓗꓪ ꓒꓴ ꓒꓴ ꓡꓯꓽ ꓡꓯꓽ ꓟꓳꓸ ꓖꓶ ꓡ ꓔꓬ ꓟ ꓥꓳ” ꓐꓰ ꓓꓣꓸ ꓢ-ꓢ ꓡꓰ ꓐꓯ ꓔ ꓡꓳ=
ꓕꓱ ꓟ ꓪꓴꓻ ꓔꓶꓸ ꓠꓬ꓾ https://www.unitedbonds-nug.org/ ꓗꓪ ꓥ ꓢꓲ꓾ ꓪꓴ ꓚꓱꓹ ꓙ ꓖꓴ ꓜꓲ ꓜꓲ ꓟꓴ ꓟꓴ ꓠꓻ ꓠꓬꓲ ꓠꓲꓹ ꓫꓵ ꓠꓬ꓾ [email protected] ꓗꓪ ꓕꓳ ꓶ ꓐꓳ ꓢꓲꓸ ꓢꓳ ꓣꓴ ꓪ ꓓ ꓡꓳ ꓐꓯ ꓔ ꓡꓳ=
ꓗꓴꓷꓼ ꓒꓳꓹ ꓟꓬꓱꓽ ꓬꓰ ꓟ ꓜꓴ ꓕꓲ ꓟ ꓡꓰ ꓕꓱ ꓡꓱ ꓬꓰ ꓟ ꓠꓬ ꓟꓲ ꓠꓯ ꓕꓲ ꓡꓴꓸ ꓗꓪ ꓬꓲꓸ ꓪꓴꓸ ꓕꓲ ꓧꓪꓹ ꓥ ꓢꓲ꓾ ꓚ ꓟꓲꓽ ꓓꓽ ꓟ ꓥ ꓡꓳ ꓐꓰ ꓐꓯ ꓔꓬ ꓡꓳ=
