https://www.youtube.com/watch?v=BJ1dcxx9al8
[ꓠꓬꓲꓽ ꓡꓲ-ꓢꓴ ꓟꓽ ꓙꓳ]
ꓐꓳ꓾ ꓟꓳ-ꓫꓲ
ꓖꓪ꓾ ꓮ-ꓥꓰ ꓢꓳ-ꓩꓲ-ꓬ
ꓜꓲꓽ ꓢꓴ꓾ LT
❤️ ꓡꓲ-ꓢꓴ ꓞꓳ ꓫꓵꓽ ꓖꓴ ꓪꓴꓸ ꓖꓴ ꓟꓶꓸ ꓐꓰ꓾ ꓐꓶ ꓓꓳ ꓐꓶ ꓓꓵꓽ ꓮ ꓡꓲ ꓗꓪ ꓔꓬ ꓟꓲ꓾
ꓒꓵꓽ ꓒ ꓒꓵ ꓟ ꓬꓲꓸ ꓚꓰꓺ ꓕꓲꓽ ꓟˍ ꓥꓳ꓾ ꓮ ꓬꓲꓼ ꓠꓬꓲ ꓤ ꓮ ꓝꓲ ꓠꓬꓲ ꓟˍ ꓡꓰꓽ=
❤️ꓞꓳ ꓙꓳ ꓬꓲꓸ ꓟꓵꓽ ꓟꓽ ꓫꓱꓸ ꓡꓯ ꓘꓳ ꓟꓲ꓾ ꓮ ꓖ ꓟꓵꓽ ꓐꓰ ꓡꓳ ꓒꓱ ꓗꓪ ꓔꓬ ꓟꓲ꓾
ꓕꓲꓽ ꓢꓯꓼ ꓕꓲ ꓦ ꓠꓲꓹ ꓟ ꓙꓽ ꓗꓳ ꓡꓯ ꓘꓳ꓾ ꓮ ꓬꓲꓼ ꓠꓬꓲ ꓤ ꓮ ꓝꓲ ꓠꓬꓲ ꓟ ꓥꓳ=
(ꓓꓴ ꓔꓲꓸ ꓡꓰꓼ)
ꓫꓵꓽ ꓔꓯ ꓠꓲꓹ ꓥꓳꓻ ꓣꓳ ꓥꓳꓽ ꓕꓳ ꓶ ꓵꓺ= ꓡꓲꓽ ꓒꓰꓼ ꓗ ꓟꓲ ꓔꓯˍ ꓟꓲ ꓫꓺ ꓒꓵꓽ ꓓꓴ꓾
ꓡꓲ-ꓢꓴ ꓞꓳ ꓫꓵꓽ ꓐꓯˍ ꓟ ꓠꓬꓲꓽ ꓡꓲ-ꓢꓴ ꓟꓽ ꓙꓳ꓾ ꓕꓲ ꓧꓶꓹ ꓕꓲ ꓚ ꓠꓲꓹ ꓟ ꓪꓽ ꓡꓯ ꓘꓳ=
ꓙ ꓗꓳ ꓠꓲꓹ ꓗꓪ ꓫꓵꓽ ꓠꓵ ꓠꓲꓹ ꓔꓺ꓾ ꓣꓳ ꓫꓵꓽ ꓪꓴꓽ ꓡ ꓟꓴ ꓡ ꓚꓱꓹ ꓬꓰ꓾
ꓤꓽ ꓘꓹ ꓒꓽ ꓤ ꓘꓹ ꓟ ꓪꓽ ꓠꓬꓲ ꓫꓱꓹ ꓐꓲ ꓢꓴ꓾ ꓡꓲ-ꓢꓴ ꓗꓴ ꓒꓬꓱꓽ ꓔꓯ ꓡꓬꓸ ꓡ ꓝꓲ=
=======
“ꓡꓲ-ꓢꓴ ꓫꓵꓽ ꓦꓬꓼ ꓠꓬꓲ” ꓔꓯ ꓟꓳꓸ ꓚꓺ ꓟꓲꓽ ꓓꓴꓸ ꓓꓴꓸ ꓤꓼ ꓠꓬ ꓕꓱ ꓡꓱ ꓥꓳ꓿
❤️ 2025 ꓘꓳꓼ 12 ꓦ 22-29 ꓠꓬꓲ ꓗꓪ ꓡꓲ-ꓢꓴ ꓫꓵꓽ ꓦꓬꓼ ꓠꓬꓲ ꓬꓰ ꓠꓹ ꓟ ꓔꓯ ꓟꓳꓸ ꓠꓲꓹ ꓡꓱ ꓧꓳꓽ ꓪꓴꓸ ꓟꓴ ꓢꓴ ꓐꓴ ꓗꓴꓷꓼ (5) ꓗꓴꓷꓼ ꓗꓪ ꓐꓰ ꓖꓪ ꓙꓱ ꓠꓲꓹ ꓧꓳꓹ ꓗꓷ ꓟ ꓥ ꓡꓳ꓿ ꓞꓲ ꓠꓲꓹ ꓟꓶ-ꓡꓯ-ꓫ ꓗꓪ ꓐꓰ ꓪꓴꓸ ꓔꓴ ꓠꓹ ꓟ ꓥ ꓡꓳ꓿
❤️ ꓢꓴ ꓟꓵꓽ ꓢꓴ ꓡꓳ ꓗꓪ ꓬꓯꓽ ꓐꓯꓽ ꓟꓴ ꓔꓬ ꓠ ꓗꓷ ꓡꓰ ꓢꓴ ꓡꓲ-ꓢꓴ ꓐꓴ ꓐꓰ꓾ ꓡꓲ-ꓢꓴ ꓤ ꓠꓱ ꓞꓲꓼ ꓤ ꓡꓯꓹ ꓤ ꓐꓴ ꓐꓱ ꓶ “ꓡꓲ-ꓢꓴ ꓫꓵꓽ ꓦꓬꓼ ꓠꓬꓲ” ꓕꓱ ꓟ ꓮ ꓘꓶꓸ ꓣꓱꓽ ꓬꓯꓼ ꓡꓳ ꓐꓰ꓾ ꓔꓳꓹ ꓜꓳꓽ ꓙ ꓜꓲꓼ ꓡ ꓟ ꓑꓶꓸ ꓓꓴ “ꓡꓲ-ꓢꓴ ꓫꓵꓽ ꓦꓬꓼ ꓠꓬꓲ” ꓕꓲꓽ ꓠꓬꓲ ꓔꓶ ꓠꓹ ꓟ ꓪꓽ ꓗꓷꓳ꓿ ꓑꓮꓲ ꓬꓰ ꓗꓸ ꓘꓳꓽ ꓟ ꓬꓲꓸ ꓝꓲꓸ ꓐꓰ꓾ ꓬꓲꓸ ꓫꓵꓼ ꓪꓴꓸ ꓔꓴ ꓟ ꓢꓷꓸ ꓡꓰ ꓓꓴ ꓐꓯ ꓢꓲꓸ ꓘꓳꓼ ꓫꓵꓼ 1 ꓦ 15 ꓠꓬꓲ ꓕꓯꓽ ꓬꓰ ꓠꓹ ꓟ ꓥ ꓡꓳ꓿
❤️ ꓡꓲ-ꓢꓴ ꓫꓵꓽ ꓚꓺ ꓟꓲꓽ ꓗꓪ ꓡꓲ-ꓢꓴ ꓐꓴ ꓢꓷꓸ ꓠꓲꓹ ꓟꓬ ꓢꓶ ꓒꓴ ꓡ ꓟ ꓐꓰ꓾ ꓮ ꓙꓵꓽ ꓠꓲꓹ ꓧꓳꓹ ꓟ ꓟꓳꓸ ꓖꓶ ꓔꓬ ꓟ ꓕꓲꓽ ꓕꓳꓼ ꓠꓬ “ꓡꓲ-ꓢꓴ ꓕꓳ ꓶ ꓚꓰꓼ ꓓꓳ ꓩꓴ ꓡ ꓟ” ꓥ ꓟ ꓑꓶꓸ ꓓꓴ ꓫꓵꓽ ꓦꓬꓼ ꓠꓬꓲ ꓐꓱ ꓶ ꓕꓱ ꓕꓲꓽ ꓕꓳꓼ ꓔꓯ ꓬꓲꓸ ꓚꓰꓺ ꓣꓴ ꓔꓸ ꓡꓳ꓿ 1900 ꓖꓼ ꓡꓯꓼ ꓖꓼ ꓙꓲ ꓗꓪ ꓐꓰ ꓪꓴꓸ ꓔꓴ ꓩꓴ ꓡ ꓢꓲ꓾ 1917 ꓘꓳꓼ ꓗꓪ ꓛꓲ ꓡ ꓕꓯꓽ ꓡꓲ-ꓢꓴ ꓕꓳ ꓶ ꓠꓬ ꓐꓲ ꓜꓲꓼ ꓜꓲꓼ ꓚꓰꓼ ꓓꓳ ꓡꓰꓳ꓿ 2017 ꓘꓳꓼ ꓗꓪ ꓠꓬ ꓡꓲ-ꓢꓴ ꓕꓳ ꓶ 100 ꓘꓳꓼ ꓐꓲ ꓡꓰꓳ꓿ ꓮ ꓟꓶ 2026 ꓘꓳꓼ ꓗꓪ ꓠꓬ 109 ꓘꓳꓼ ꓐꓲ ꓡꓰꓳ꓿ ꓕꓱ ꓟ ꓔꓯ ꓧꓪ ꓟꓰꓹ ꓬꓲꓸ ꓚꓰꓺ ꓣꓴ ꓢꓲ꓾ 109 ꓘꓳꓼ ꓟ ꓡꓲ-ꓢꓴ ꓫꓵꓽ ꓦꓬꓼ ꓠꓬꓲ ꓑꓮꓲ ꓬꓰ ꓓꓴ ꓥꓳ꓿
❤️ ꓑꓮꓲ ꓦ ꓐꓬꓱꓽ ꓠꓬ꓾ “ꓡꓲꓽ ꓒꓰꓼ ꓢꓯꓸ ꓔꓬ ꓟ꓾ ꓠꓲꓹ ꓥꓳꓻ ꓬꓰ ꓙ ꓡꓯ ꓘꓳ ꓔꓬ ꓟ ꓐꓰ ꓪꓴꓽ ꓟꓴ ꓡ ꓚꓱꓹ ꓢꓯꓼ ꓖꓶ ꓡꓯ ꓘꓳ ꓔꓬ ꓟ ꓡꓲ-ꓢꓴ” ꓥ ꓡꓳ꓿ ꓑꓮꓲ ꓗꓪ ꓔꓺ ꓡ ꓢꓴ ꓐꓴ ꓕꓲ ꓠꓲꓹ ꓕꓲ ꓪ ꓖꓪ ꓓꓴ “ꓠꓬꓲꓽ ꓡꓲ-ꓢꓴ ꓟꓽ ꓙꓳ” ꓐꓯ ꓟ ꓟꓴ ꓖꓪ ꓕꓲ ꓚꓱꓹ ꓥ ꓟꓲ ꓚꓰꓼ ꓔꓸ ꓡꓳ꓿
ꓝꓮꓲ ꓕꓱ ꓠꓹ ꓟ ꓪꓵꓼ ꓘꓶꓽ (3) ꓘꓶꓽ ꓠꓬ꓾ (Three Pledges)
(1) ꓡꓲ-ꓢꓴ ꓥꓳꓽ ꓫꓵꓽ ꓐꓰ꓾ ꓣꓳ ꓙꓳ ꓣꓳ ꓡꓲꓽ ꓒꓰꓼ ꓔꓯ ꓠꓲꓹ ꓠꓵ ꓫꓺ ꓒꓵꓽ ꓓꓴ ꓥꓳ= (Identity)
(2) ꓡꓲ-ꓢꓴ ꓠꓬꓲꓽ ꓡꓲ-ꓢꓴ ꓟꓽ ꓙꓳ꓾ ꓠꓲꓹ ꓥꓳꓻ ꓬꓰ ꓙ ꓡꓯ ꓘꓳ ꓓꓴ ꓥꓳ= (Solidarity)
(3) ꓠꓵ ꓠꓲꓹ꓾ ꓙ ꓗꓴ ꓠꓲꓹ꓾ ꓪꓴꓽ ꓟꓴ ꓡ ꓚꓱꓹ ꓗꓪ ꓢꓯꓼ ꓕꓵꓼ ꓓꓴ ꓥꓳ= (Empowerment)
4. ꓑꓮꓲ ꓗꓪ ꓣꓱꓽ ꓓꓴ ꓒꓯꓽ ꓥ ꓟꓲ ꓕꓲꓽ ꓟ ꓚꓰꓼ ꓔꓸ ꓡꓳ꓿ ꓪꓴꓸ ꓔꓴ ꓕꓯꓽ ꓡ ꓞꓳ ꓠꓲꓸ ꓠꓲꓸ ꓕꓲꓽ ꓜꓴ ꓗꓪ ꓐꓰ ꓓꓵꓽ ꓙ ꓚꓰꓼ ꓪꓴꓸ ꓔꓴ꓾ ꓣꓱꓽ ꓪꓴꓸ ꓔꓴ ꓔꓸ ꓥ ꓟꓲ꓾ ꓡꓶꓸ ꓑ ꓠ ꓗꓹ ꓟ ꓡꓳꓸ ꓟꓳꓻ ꓡ ꓠꓬ꓾ ꓕꓱ ꓕꓲꓽ ꓚꓱꓹ ꓔꓯ ꓢꓰꓸ ꓮ ꓢꓸ ꓠꓲꓹ ꓡꓱ ꓢꓴ ꓡꓲ-ꓢꓴ ꓐꓴ ꓖꓪ ꓙꓱ ꓖꓪ ꓟꓴ ꓢꓲꓸ ꓫꓬꓹ ꓔꓱꓹ ꓫꓬꓹ ꓡꓶꓸ ꓠꓹ ꓟ ꓠꓲꓹ ꓧꓳꓹ ꓗꓷꓳ꓿
❤️ ꓣꓳ ꓡꓲ-ꓢꓴ ꓫꓵꓽ ꓦꓬꓼ ꓠꓬꓲ ꓠꓬ ꓗꓴꓷꓼ ꓔꓯ ꓒꓳꓹ ꓔꓳꓹ ꓓꓴ꓾ ꓞꓳ ꓫꓵꓻ ꓪꓽ ꓫꓵꓻ ꓢꓲꓸ ꓜꓲꓽ ꓟꓽ ꓘꓴ ꓓꓴ ꓕꓲꓽ ꓫꓵ ꓫꓵ ꓗꓪ ꓬꓲꓸ ꓚꓰꓺ ꓔꓶ ꓢꓲꓸ ꓬꓰˍ ꓟ ꓑꓮꓲ ꓟꓽ ꓥ ꓟ ꓑꓶꓸ ꓓꓴ꓾ ꓗꓹ ꓛꓲ ꓑꓮꓲ꓾ ꓠꓲꓹ ꓧꓳꓹ ꓑꓮꓲ꓾ ꓪꓴꓽ ꓟꓴ ꓡ ꓚꓱꓹ ꓐꓱ ꓶ ꓡꓵꓹ ꓔꓴ ꓡꓯ ꓘꓳ ꓑꓮꓲ ꓥ ꓡꓳ꓿ ꓮ ꓡꓲ ꓕꓲ ꓗꓴꓷꓼ ꓗꓪ ꓟꓲ꓾ ꓮ ꓫꓵꓽ ꓡ ꓞꓳ ꓡꓰ ꓥ ꓟꓲ ꓘꓶ ꓡꓶꓽ ꓓꓴ ꓟꓽ ꓙꓳ꓾ ꓐꓰ ꓥꓳ ꓡꓳꓸ ꓡꓳ꓿ (ꓣꓱꓽ ꓬꓯꓼ ꓔꓬ ꓢꓴ ꓡꓰ ꓬꓰ ꓑꓰ ꓩꓴ ꓡ ꓟ ꓗꓪ ꓠꓴ ꓔꓺ ꓟꓽ ꓐ ꓡ ꓢꓰꓽ ꓐꓯ ꓥ ꓟꓲ꓾ ꓗꓽ ꓔꓸ ꓘꓶ ꓡꓶꓽ ꓓꓴ ꓕꓽ ꓬꓰ ꓡꓯ ꓐꓰ ꓖꓶ ꓬꓲꓽ ꓠꓲꓹ ꓫꓵ ꓡꓳ꓿ ꓣꓱꓽ ꓬꓯꓼ ꓢꓴ ꓙꓳˍ ꓠꓬꓲ ꓬꓰ ꓩꓴ ꓡ ꓕꓯꓽ꓾ ꓠꓴ ꓬꓰ ꓙ ꓟꓽ ꓐ ꓡ ꓖꓶ ꓕꓽ ꓘꓶ ꓡꓶꓽ ꓡꓯ꓿ ꓫꓸ ꓟꓳ ꓪ꓿ ) ꓔꓳꓹ ꓡ ꓢꓴ ꓙꓳ ꓡ ꓥ ꓟꓲ꓾ ꓠꓲꓹ ꓟ ꓫꓵꓺ ꓫꓵꓺ꓾ ꓠꓵ ꓠꓲꓹ ꓗꓪ ꓐꓰ ꓒꓶꓻ ꓟꓸ ꓖꓶ ꓙꓰ ꓡꓯ꓿
❤️ ꓑꓮꓲ ꓔꓯ ꓡꓲ-ꓢꓴ ꓦꓲ ꓘꓴ ꓮ ꓙꓵꓽ ꓗꓪ꓾ ꓡꓲ-ꓢꓴ ꓘꓹ ꓗꓪ꓾ ꓡꓲ-ꓢꓴ ꓔꓬ ꓟꓵꓽ ꓡꓳ ꓒꓱ ꓮ ꓙꓵꓽ ꓗꓪ ꓬꓰ ꓐ ꓡ ꓠꓹ ꓟ ꓟꓳꓸ ꓙ ꓢꓯꓼ ꓕꓵꓼ ꓙꓰ ꓡꓯ꓿ 2026-27-28 ꓗꓪ ꓠꓬ ꓮ ꓟꓬꓹ ꓐꓲ ꓜꓲꓼ ꓜꓲꓼ ꓬꓰ ꓪ ꓓꓴ ꓓꓵꓽ ꓙ ꓔꓬ ꓡꓳ꓿ ꓑꓮꓲ ꓕꓱ ꓟ ꓗꓪ ꓐꓰ ꓞꓲꓼ ꓤ ꓡꓯꓹ ꓤ ꓐꓴ ꓗꓪ ꓛꓲ ꓡꓲ-ꓢꓴ ꓐꓴ ꓪꓴꓽ ꓟꓴ ꓡ ꓚꓱꓹ ꓐꓱ ꓶ platform ꓓꓽ ꓟ ꓒꓬꓱꓼ ꓡ ꓝꓲ ꓡꓯ꓿ ꓣꓳ ꓔꓬ ꓟꓵꓽ ꓗꓪ ꓣꓳ ꓗꓸ ꓘꓳ ꓟ ꓔꓯ ꓛꓳ ꓢꓲꓸ ꓬꓰ ꓙꓰ ꓡꓯ꓿
❤️ ꓑꓮꓲ ꓦ ꓐꓬꓱꓽ 3 ꓟ ꓙꓳ ꓡꓳ꓿ ꓖꓳ ꓟ ꓒꓬꓱꓼ ꓡ ꓠꓹ ꓟ ꓬꓰ ꓙꓰ ꓠ ꓗꓹ ꓟ ꓟꓬꓱꓽ ꓑꓶꓸ ꓡꓯ ꓫꓵ ꓓꓵꓽ ꓙ ꓢꓲ꓾ ꓣꓳ ꓘꓹ ꓣꓳ ꓟꓵꓽ ꓗꓪ ꓗꓸ ꓘꓳˍ ꓟ ꓬꓰ ꓙꓰ ꓓꓴ ꓥ ꓡꓳ꓿
❤️ ꓑꓮꓲ ꓠꓬ ꓦ ꓡꓱ ꓚꓱꓹ ꓫꓵꓽ ꓪꓴ꓾ ꓗꓴꓷꓼ ꓫꓵꓽ ꓪꓴ꓾ ꓶ ꓡꓯꓼ ꓚꓱꓹ ꓟꓽ ꓫꓳꓹ ꓫꓳꓹ꓾ ꓑꓮꓲ ꓦ ꓐꓬꓱꓽ/ ꓪꓵꓼ ꓘꓶꓽ ꓔꓯ ꓠꓲꓹ ꓧꓳꓹ ꓐ ꓡ ꓢꓴ ꓡꓲ-ꓢꓴ ꓮ ꓙꓵꓽ ꓢꓲꓽ ꓢꓲꓽ ꓫꓬ ꓫꓬ꓾ ꓟꓬꓱ ꓓꓳꓽ ꓙꓳ ꓙꓳ ꓬꓰ ꓠꓹ ꓟ ꓠꓲꓹ ꓧꓳꓹ ꓔꓸ ꓡꓳ꓿ (ꓘꓶ ꓡꓶꓽ ꓢꓴ ꓙꓳ ꓡ ꓥ ꓟꓲ꓾ ꓣꓱꓽ ꓬꓯꓼ ꓢꓴ ꓡꓰ ꓬꓰ ꓩꓴ ꓡ ꓟ ꓔꓯ ꓬꓰ ꓙ ꓟꓽ ꓐ ꓡ ꓟꓲ ꓕꓽ ꓘꓶꓻ ꓡꓶꓽ ꓡꓯ ꓐꓰ ꓖꓶ ꓬꓲꓽ ꓩꓴ ꓡ ꓥꓳ꓿) ꓦ ꓐꓬꓱꓽ ꓗꓪ ꓐꓰ ꓣꓳ ꓔꓯ ꓧꓳꓽ ꓙꓰ ꓔꓬ ꓝꓲ ꓡꓯ꓿
❤️ ꓮ ꓙꓵꓽ ꓢꓴ ꓠꓬ ꓫꓵꓽ ꓔꓯ ꓠꓲꓹ ꓠꓵ ꓟ ꓠꓲꓹ ꓟ ꓗꓪ ꓐꓰ ꓖꓪ ꓙꓱ ꓬꓰ ꓓꓳ ꓩꓴ ꓡ ꓟ ꓥ ꓡꓳ꓿
💕
ꓗꓹ ꓛꓲ ꓟ “ꓡꓲ-ꓢꓴ ꓫꓵꓽ ꓦꓬꓼ ꓠꓬꓲ” ꓗꓪ ꓮ ꓙꓵꓽ ꓢꓴ ꓧꓪꓸ ꓧꓪꓸꓼ ꓔꓬ ꓪ ꓝꓲ꓿ 💕
