(ꓢꓷꓸ ꓡꓰ ꓓꓴ – ꓕꓱ ꓟ ꓠꓬ ꓧꓶꓸ ꓕꓯ ꓐꓳ ꓔꓸ ꓟ ꓖꓪ ꓙꓱ ꓘꓶꓽ ꓐꓰ ꓑꓮꓲ ꓬꓰ ꓚꓱꓹ ꓖꓴ ꓟꓳꓸ ꓖꓶ ꓘꓶꓽ ꓔꓯ ꓓꓴꓸ ꓓꓴꓸ ꓤꓼ ꓕꓲ ꓧꓪꓹ ꓐꓳ ꓔꓸ ꓟ ꓥ ꓡꓳ= ꓠꓻ ꓠꓬꓲ/ꓒꓳꓹ ꓖꓶ ꓘꓶꓽ ꓥ ꓟꓲ ꓐꓳ ꓔꓺ ꓔꓸ ꓡꓳ= ꓮ ꓙꓵꓽ ꓢꓴ ꓣꓳ ꓮ ꓡꓲ ꓓꓵꓽ ꓙ ꓢꓲ꓾ ꓮ ꓡꓲ ꓐꓰ ꓑꓮꓲ ꓣꓱꓽ ꓬꓰ ꓙꓰ ꓠꓹ ꓟ ꓙ ꓜꓲꓼ ꓡꓰ ꓠꓹ ꓟ ꓥ ꓡꓳ=)
ꓡꓲ-ꓢꓴ ꓫꓵꓽ ꓦꓬꓼ ꓠꓬꓲ ꓠꓬ ꓡꓲ-ꓢꓴ ꓥ ꓕ ꓑꓳꓸ ꓔꓺ ꓙꓲˍ ꓟ꓾ ꓡꓲ-ꓢꓴ ꓠꓶ ꓧꓪ ꓐꓴ꓾ ꓛꓳ ꓒꓯꓹ ꓐꓴ꓾ ꓠꓶ ꓛꓳ ꓕꓲ ꓛꓳ ꓐꓴ ꓐꓰ꓾ ꓡꓲ-ꓢꓴ ꓔꓯ ꓢꓯꓼ ꓖꓶ ꓢꓴ ꓥ ꓕ ꓑꓳꓸ ꓔꓺ ꓐ ꓡ ꓟ꓾ ꓟꓲ ꓔꓬ ꓖꓴ ꓟꓲ ꓗꓪ ꓦ ꓐꓬꓱꓽ ꓐꓰ ꓔꓶ ꓙꓱꓼ ꓕꓱ ꓟ ꓔꓯ ꓪꓽ ꓐ ꓡ ꓢꓴ ꓐꓴ ꓬꓰ ꓠꓹ ꓟ ꓜꓲꓼ ꓓꓴ ꓑꓮꓲ ꓕꓲꓽ ꓟ ꓥ ꓡꓳ= ꓣꓳ ꓔꓯ ꓕꓲ ꓜꓴ ꓜꓴ ꓡꓰ꓾ ꓕꓲ ꓣꓳ ꓣꓳ ꓡꓰꓽ ꓧꓳꓽˍ ꓟ ꓟꓽ ꓥ ꓥ꓾ ꓓꓵꓽ ꓙ ꓚꓱꓹ ꓕꓱ ꓟ ꓔꓯ ꓪꓽ ꓐ ꓡ ꓢꓴ ꓬꓰ ꓠꓹ ꓟ꓾ ꓓꓵꓽ ꓙ ꓚꓱꓹ ꓦ ꓐꓬꓱꓽ ꓡꓰ ꓣꓳ ꓔꓯ ꓧꓳꓽ ꓙꓰ ꓠꓹ ꓟ ꓟꓳꓸ ꓙ ꓔꓸ ꓟ ꓥ ꓡꓳ=
ꓑꓮꓲ ꓕꓱ ꓟ ꓬꓰˍ ꓟ ꓬꓲꓸ ꓔꓶ ꓙꓱꓼ ꓓꓽ ꓟ ꓠꓬ꓾ (3) ꓘꓶꓽ ꓠꓬ꓾ (1) ꓡꓲ-ꓢꓴ ꓥꓳꓽ ꓐꓰ ꓡꓲ ꓒꓰꓼ ꓗ ꓟꓲꓽ ꓟꓳꓸ ꓖꓶ ꓓꓴ- Identity (2) ꓡꓲ-ꓢꓴ ꓐꓴ ꓪ: ꓡꓯ ꓘꓳ ꓟ ꓟꓳꓸ ꓖꓶ ꓓꓴ- Unity (3) ꓡꓲ-ꓢꓴ ꓞꓲꓼ ꓤ ꓡꓯꓹ ꓤ ꓐꓴ ꓔꓯ ꓢꓯꓼ ꓖꓶ ꓓꓴ ꓥ ꓡꓳ= ꓖꓳ ꓟ ꓑꓶꓸ ꓓꓴ ꓞꓳ ꓦꓲ ꓕꓲ ꓦꓲ ꓗꓪ ꓥ ꓟꓲ꓾ ꓞꓳ ꓜꓴ ꓜꓲꓼ ꓔꓶꓸ ꓗꓪ ꓥ ꓟꓲ ꓡꓲ-ꓢꓴ ꓒꓯꓽ ꓛꓵꓽ ꓔꓶꓸ ꓢꓲ꓾ ꓮ ꓙꓵꓽ ꓢꓴ ꓦꓰꓼ ꓔꓴ ꓡ ꓢꓲ꓾ ꓧꓳꓽ ꓪꓴꓸ ꓟꓴ ꓢꓴ ꓕꓲꓽ ꓣꓳ ꓡꓰ ꓙꓱ ꓘꓪ ꓐꓳ ꓔꓸ ꓟ ꓪꓵꓼ ꓘꓶꓽ ꓔꓯ ꓐꓯ ꓖꓶ ꓡ ꓠꓬ꓾ ꓠꓲꓹ ꓡꓱ ꓡꓱ ꓐꓯ ꓛꓳ ꓓꓴ ꓥ ꓡꓳ=
ꓠꓲꓹ ꓟ ꓔꓯꓹ ꓔꓯꓹ ꓪꓵꓼ ꓘꓶꓽ (3) ꓘꓶꓽ꓾
(1) ꓡꓲ-ꓢꓴ ꓥꓳꓽ ꓫꓵꓽ ꓐꓰ꓾ ꓡꓲ ꓒꓰꓼ ꓗ ꓟꓲꓽ ꓔꓯ ꓠꓲꓹ ꓠꓵ ꓫꓺ ꓒꓵꓽ ꓓꓴ ꓥꓳ=
(2) ꓡꓲ-ꓢꓴ ꓠꓬꓲꓽ ꓡꓲ-ꓢꓴ ꓟꓽ ꓙꓳ꓾ ꓕꓲ ꓧꓶꓹ ꓕꓲ ꓚ ꓪꓽ ꓡꓯ ꓘꓳ ꓓꓴ ꓥꓳ=
(3) ꓠꓵ ꓠꓲꓹ꓾ ꓙ ꓗꓴ ꓠꓲꓹ꓾ ꓪꓴꓽ ꓟꓴ ꓡ ꓚꓱꓹ ꓗꓪ ꓢꓯꓼ ꓕꓵꓼ ꓓꓴ ꓥꓳ=
The Three heartfelt Lisu National Pledge:
(1) We shall cherish our Lisu language and cultural identity
(2) We shall stand united, beyond borders, as one people.
(3) We shall secure a future of love, wisdom and prosperity.
ꓓꓵꓽ ꓙ ꓚꓱꓹ ꓛꓲ ꓕꓳꓼ ꓮ ꓗꓪ ꓐꓰ ꓡˍ ꓟ
ꓡꓲ-ꓢꓴ ꓫꓵꓽ ꓠꓬ ꓗ ꓟꓲ ꓡꓲꓽ ꓒꓰꓼ ꓐꓰ ꓚ ꓟꓲꓽ ꓐꓲ ꓜꓲꓼ ꓜꓲꓼ ꓙꓳˍ ꓟ ꓞꓳ ꓫꓵꓽ ꓕꓲ ꓫꓵꓽ ꓥ ꓡꓳ ꓐꓯ ꓥ ꓟꓲ꓾ ꓣꓳ ꓡꓲꓽ ꓒꓰꓼ꓾ ꓣꓳ ꓚꓱꓹ ꓣꓳ ꓡꓲꓽ ꓔꓯ ꓟꓳꓸ ꓖꓶ ꓟ ꓦꓬꓼ ꓠꓬꓲ꓾ ꓣꓳ ꓕꓲ ꓠꓲꓹ ꓕꓲ ꓪ ꓥ ꓟ ꓔꓯ ꓟꓳꓸ ꓖꓶ ꓟ ꓦꓬꓼ ꓠꓬꓲ꓾ ꓞꓲꓼ ꓤ ꓡꓯꓹ ꓤ ꓐꓴ ꓔꓯ ꓢꓯꓼ ꓖꓶ ꓪ ꓖꓶ ꓟ ꓦꓬꓼ ꓠꓬꓲ ꓬꓲꓸ ꓫꓳꓽ ꓕꓲꓽ ꓠꓬꓲ ꓟꓽ ꓬꓰ ꓬꓰ ꓟꓶ ꓤ ꓔꓬꓹ ꓗꓳꓸ ꓡ ꓟ ꓥ ꓡꓳ= ꓕꓱ ꓡꓱꓳ ꓫꓵꓽ ꓦꓬꓼ ꓠꓬꓲ ꓙꓳ ꓠ ꓗꓹ ꓡꓳ꓾ ꓐꓯˍ ꓟ ꓠꓬ ꓟꓳꓻ ꓐ ꓡ ꓢꓴ ꓮ ꓙꓵꓽ ꓠꓲꓹ ꓟ ꓗꓪ ꓙꓳˍ ꓡꓳ= ꓟꓬꓽ ꓠꓬꓲ ꓠꓬ ꓢꓴ ꓫꓵꓽ ꓢꓴ ꓪꓳꓼ ꓐꓰ ꓙ ꓡꓯ ꓘꓳ ꓟ ꓗꓪ ꓔꓬ ꓢꓴ ꓐꓴ ꓠꓲꓹ ꓟ ꓗꓪ ꓮ ꓘꓶꓸ ꓔꓳꓹ ꓜꓳꓽ ꓟꓶˍ ꓟ ꓟꓬꓱꓽ ꓶꓻ ꓕꓲꓽ ꓟ ꓥ ꓡꓳ= ꓝꓮꓲ ꓢꓪꓼ ꓠꓬꓲ ꓢꓴ ꓐꓴ ꓡꓰ ꓡꓲ-ꓢꓴ ꓠꓬ ꓮ ꓡꓻ ꓡ ꓠꓹ ꓟ 50 ꓘꓳꓼ ꓛꓲ ꓗꓪ ꓟꓶꓽ ꓬꓰ ꓔꓳꓼ ꓬꓰꓳꓸ ꓐꓰ ꓢꓪꓼ ꓓꓳ ꓡ ꓟ ꓑꓶꓸ ꓓꓴ꓾ ꓠꓬꓲꓸ ꓠꓬꓲ ꓣꓳ ꓕꓱ ꓡꓱ ꓟꓽ ꓬꓰ꓾ ꓟꓽ ꓢꓯꓼ ꓕꓵꓼ ꓠꓬ ꓕꓱ ꓟ ꓕꓯ ꓢꓲ ꓕꓶꓸ ꓕꓶꓸ ꓟꓶꓽ ꓬꓰ ꓐ ꓡ ꓥꓳ= ꓖꓳ ꓟ ꓑꓶꓸ ꓓꓴ ꓮ ꓙꓵꓽ ꓢꓴ ꓔꓺ ꓡꓯ ꓘꓳ ꓢꓲꓸ ꓣꓳ ꓫꓵꓽ ꓣꓳ ꓡꓲ ꓒꓰꓼ꓾ ꓣꓳ ꓪꓽ ꓡꓯ ꓘꓳ ꓓꓴ꓾ ꓣꓳ ꓞꓲꓼ ꓤ ꓡꓯꓹ ꓤ ꓔꓯ ꓢꓯꓼ ꓖꓶ ꓓꓴ ꓦꓬꓼ ꓠꓬꓲ ꓔꓳꓼ ꓔꓳꓼ ꓕꓲꓽ ꓠꓬꓲ ꓙꓳ ꓙꓲꓽ ꓙꓳ ꓡꓰ ꓐꓰ ꓓꓵꓽ ꓙ ꓓꓳ ꓡ ꓟ ꓥ ꓡꓳ=
ꓕꓱ ꓟ ꓑꓶꓸ ꓓꓴ ꓮ ꓡꓲ ꓕꓲ ꓠꓬꓲ ꓠꓬ “ꓡꓲ-ꓢꓴ ꓫꓵꓽ ꓦꓬꓼ ꓠꓬꓲ” ꓒꓬꓱꓼ ꓡ ꓓ ꓡ? ꓐꓰ ꓧꓪ ꓟꓰꓹ ꓠꓬꓲ ꓗꓷꓳ= ꓡꓲꓽ ꓒꓰꓼ ꓜꓴ ꓒꓴˍ ꓟ꓾ ꓡꓲ-ꓢꓴ ꓫꓵꓽ ꓐꓱ ꓶ ꓟꓬꓱꓽ ꓓꓽ ꓟ ꓬꓰ ꓓꓳ ꓡ ꓟ꓾ ꓡꓲ-ꓢꓴ ꓢꓯꓼ ꓡꓲ-ꓢꓴ ꓓꓳꓽ ꓐꓱ ꓶ ꓫꓵꓻ ꓙ ꓢꓴ ꓙꓳˍ ꓟ ꓕꓱ ꓡꓱ ꓮ ꓟꓬꓹ ꓫꓵꓽ ꓔꓯ ꓟꓳꓸ ꓧꓪ ꓟꓰꓹ ꓠꓬꓲ ꓗꓷꓳ= ꓗꓴꓷꓼ 4 ꓟ ꓐꓰ꓾ ꓮ ꓟꓶ ꓟꓵ ꓗꓳ ꓓꓵ ꓓꓵ ꓛꓱ ꓔꓬ ꓟ ꓡꓲ-ꓢꓴ ꓐꓴ ꓮ ꓙꓵꓽ ꓪꓽ ꓓˍ ꓟ꓾ ꓬꓲꓸ ꓟꓸ ꓟꓲꓽ ꓙꓳˍ ꓟ꓾ ꓮ ꓙꓵꓽ ꓔꓯ ꓗꓪꓽ ꓫꓵꓽˍ ꓟ ꓕꓲꓽ ꓫꓵꓽ ꓫꓵꓽ ꓧꓪ ꓠꓹ ꓟ ꓟꓽ ꓢꓻ ꓐꓶ= ꓕꓱ ꓕꓲ ꓗꓴꓷꓼ ꓗꓪ ꓔꓬ ꓢꓴ ꓡꓲ-ꓢꓴ ꓐꓱ ꓶ ꓮ ꓘꓶꓸ ꓥꓻꓳ ꓐꓯˍ ꓟ ꓠꓬ ꓕꓲꓽ ꓫꓵꓽ ꓠꓬ꓾ ꓝꓮꓲ ꓕꓲ ꓗꓴꓷꓼ ꓗꓪ ꓔꓬ ꓟ ꓡꓲ-ꓢꓴ ꓐꓴ ꓐꓱ ꓶ ꓬꓲꓸ ꓟꓸ ꓟꓲꓽ ꓟꓽ ꓙꓳ= ꓖꓳ ꓡꓱ ꓥ ꓟꓲ꓾ ꓬꓲꓸ ꓟꓶꓽ ꓗꓪ ꓠꓬ ꓗꓹ ꓛꓲ ꓓꓴ ꓕꓲ ꓟ ꓧꓪ ꓟꓶ ꓡꓰꓳ= ꓣꓳ ꓔꓯ ꓡꓲ-ꓢꓴ ꓫꓵꓽ ꓦꓬꓼ ꓠꓬꓲ ꓟꓽ ꓙꓳˍ ꓟ ꓟꓽ ꓥ= ꓣꓳ ꓟꓽ ꓚꓹ ꓪ꓾ ꓣꓳ ꓟꓽ ꓬꓰ ꓔꓬ ꓟ ꓥ ꓐꓶ ꓐꓰ ꓢꓷꓸ ꓪ ꓡꓰꓳ= ꓕꓱ ꓟ ꓠꓬ ꓡꓲ-ꓢꓴ ꓮ ꓙꓵꓽ ꓪꓽ ꓡꓯ ꓘꓳ ꓓ ꓟ꓾ ꓮ ꓡꓲ ꓕꓲ ꓗꓴꓷꓼ ꓗꓪ ꓔꓬ ꓢꓴ ꓥ ꓟꓲ ꓚꓲꓸ ꓛꓬ ꓗꓴꓷꓼ ꓫꓵꓽ ꓪꓴ ꓔꓯ ꓟꓽ ꓘꓶ ꓡꓶꓽ ꓡꓰˍ ꓟ꓾ ꓝꓮꓲ ꓣꓳ ꓕꓱ ꓡꓱ ꓪꓽ ꓡꓯ ꓘꓳ ꓙꓲˍ ꓟ ꓬꓲꓸ ꓶꓻ ꓐꓬꓱꓽ ꓥ ꓟꓲ ꓝꓰꓸ ꓓꓳ ꓔꓸ ꓟ ꓕꓲꓽ ꓟ ꓔꓯ ꓧꓪ ꓟꓳꓻ ꓡꓰꓳ= ꓖꓳ ꓟ ꓠꓬ “ꓡꓲ-ꓢꓴ ꓕꓳ ꓶ ꓝꓳꓹ ꓫꓬꓹ ꓚꓰꓼ ꓓꓳ ꓡ ꓟ ꓦꓬꓼ ꓠꓬꓲ” ꓥ ꓡꓳ=
ꓡꓲ-ꓢꓴ ꓕꓳ ꓶ ꓔꓯ 20 ꓦ ꓜꓴ ꓘꓳꓼ ꓬꓲꓸ ꓪꓴꓸ ꓔꓴ ꓟ ꓗꓪ ꓟꓸ ꓒꓽ ꓮ-ꓬꓲꓼ-ꓢ ꓐꓰ ꓟꓸ ꓒ ꓐ-ꓔꓳ ꓐꓴ ꓡꓰ ꓫꓬꓹ ꓚꓰꓼ ꓓꓳ ꓡ ꓟ ꓥ ꓡꓳ= ꓕꓱ ꓟ ꓗꓪ ꓐꓰ ꓡꓲ-ꓢꓴ ꓫꓵꓽ ꓚ ꓟꓲꓽ ꓔꓯ ꓓꓵ ꓙ ꓟꓶ ꓟꓶ ꓮ ꓕꓯ ꓟꓽ ꓚꓰꓼ ꓑꓶꓸ ꓡꓰ ꓝꓲꓳ= ꓣꓳ ꓮ ꓙꓵꓽ ꓐꓱ ꓶ ꓧꓪꓸ ꓡꓰ ꓓꓴ ꓛꓲ ꓕꓳꓼ ꓕꓲ ꓟ꓾ ꓣꓳ ꓮ ꓙꓵꓽ ꓢꓴ ꓪꓽ ꓡꓯ ꓘꓳ ꓐ ꓡ ꓟ ꓛꓲ ꓕꓳꓼ ꓕꓱ ꓟ꓾ ꓣꓳ ꓮ ꓙꓵꓽ ꓢꓴ ꓔꓯ ꓢꓷꓸ ꓠꓲꓹ ꓟꓬ ꓢꓶꓽ ꓠꓬꓲ ꓟꓳꓻ ꓡ ꓝꓲ ꓟ ꓛꓲ ꓕꓳꓼ ꓥ ꓡꓳ= ꓛꓲ ꓕꓳꓼ ꓕꓱ ꓟ ꓠꓬ꓾ ꓮ ꓫꓵꓽ ꓞꓳ ꓫꓵꓽ ꓥ ꓟ (Our Identity)꓾ ꓣꓳ ꓮ ꓡꓲ ꓪꓽ ꓡꓯ ꓘꓳ ꓐ ꓡ ꓟ (Our Unity)꓾ ꓝꓮꓲ ꓣꓳ ꓞꓲꓼ ꓤ ꓡꓯꓹ ꓤ ꓐꓴ ꓔꓯ ꓢꓯꓼ ꓖꓶ ꓠꓹ ꓟ (Our Empowerment) ꓟꓳꓸ ꓖꓶ ꓔꓬ ꓠꓬꓲ꓾ ꓟꓬꓱꓽ ꓓꓳꓽ ꓦꓬꓼ ꓠꓬꓲ ꓬꓰ ꓒꓵꓽˍ ꓡꓳ=
ꓬꓲꓸ ꓠꓬꓲ ꓔꓯ ꓟꓳꓸ ꓠꓬ ꓕꓱ ꓡꓱ ꓓꓵꓽ ꓙ ꓔꓸ ꓟ ꓥ ꓡꓳ= ꓟꓸ ꓒ ꓮ-ꓬꓲꓼ-ꓢ ꓐꓰ ꓟꓸ ꓒ ꓐ-ꓔꓳ ꓐꓴ ꓔꓺ ꓡꓯ ꓘꓳ ꓢꓲꓸ 20 ꓦ ꓜꓴ ꓘꓳꓼ ꓬꓲꓸ ꓪꓴꓸ ꓗꓪ ꓡꓲ-ꓢꓴ ꓕꓳ ꓶ ꓝꓳꓹ ꓕꓱ ꓟ ꓫꓬꓹ ꓚꓰꓼ ꓩꓴ ꓡ ꓢꓲ꓾ 1917 ꓘꓳꓼ ꓗꓪ ꓠꓬ ꓮ ꓟꓶ ꓣꓳꓽ ꓣꓱꓽ ꓔꓬ ꓟ ꓡꓰ ꓐꓰ ꓐꓲ ꓜꓲꓼ ꓜꓲꓼ ꓫꓬꓹ ꓚꓰꓼ ꓓꓳ ꓡꓰ ꓟ ꓥ ꓡꓳ= ꓕꓱ ꓟ ꓠꓬ ꓣꓳ ꓡꓲ-ꓢꓴ ꓫꓵꓽ ꓚ ꓟꓲꓽ ꓔꓯ ꓧꓶꓸ ꓕꓯ ꓡꓰ ꓐꓰ ꓟꓽ ꓥ ꓬꓲꓸ ꓫꓵꓼ ꓑꓶꓸ ꓡꓰ ꓝꓲ ꓟ ꓦꓬꓼ ꓠꓬꓲ ꓥ ꓟ ꓑꓶꓸ ꓓꓴ꓾ ꓡꓲ-ꓢꓴ ꓥ ꓕ ꓑꓳꓸ ꓔꓯ ꓗꓪꓽ ꓫꓵꓽ ꓟ꓾ ꓟꓬꓱ ꓓꓳꓽ ꓙꓳˍ ꓟ ꓦꓬꓼ ꓠꓬꓲ ꓥ ꓡꓳ= ꓕꓱ ꓟ ꓔꓯ ꓟꓳꓸ ꓠꓬ ꓡꓲ-ꓢꓴ ꓮ ꓙꓵꓽ ꓪꓽ ꓡꓯ ꓓˍ ꓟ ꓗꓸ ꓚꓵ ꓥ ꓟꓲ ꓙꓳ ꓗꓷꓳ= ꓡꓲ-ꓢꓴ ꓕꓳ ꓶ 100 ꓘꓳꓼ ꓐꓲ ꓡꓰ ꓟ ꓑꓮꓲ ꓔꓯ 2017 ꓘꓳꓼ ꓕꓯꓽ ꓟꓵ ꓗꓳ ꓓꓵ ꓓꓵ ꓗꓪ ꓐꓰ ꓡꓲ-ꓢꓴ ꓐꓴ ꓜꓲꓼ ꓡ ꓢꓲ꓾ ꓚꓲꓸ ꓟꓶ ꓓꓴ ꓑꓮꓲ ꓔꓯ ꓟꓶ-ꓚꓲ-ꓠ ꓗꓪ ꓬꓰ ꓗꓷ ꓟ ꓥ ꓡꓳ꓿ ꓮ ꓟꓶ ꓦꓬꓼ ꓠꓬꓲ ꓬꓲꓸ ꓠꓬꓲ ꓮ ꓡꓲ ꓕꓲ ꓠꓬꓲ ꓬꓰ ꓠꓹ ꓟ ꓔꓳꓼ ꓐꓯ ꓔꓸ ꓟ ꓟꓽ ꓙꓳ ꓥ ꓟꓲ꓾ ꓘꓳꓼ ꓫꓵꓼ 1 ꓦ ꓘꓴ ꓗꓪ ꓬꓰ ꓠꓬ ꓣꓳ ꓡꓲ-ꓢꓴ ꓐꓴ ꓕꓳ ꓶ ꓐꓰ ꓡꓲꓽ ꓒꓰꓼ꓾ ꓢꓷꓸ ꓠꓲꓹ ꓚꓱꓹ ꓮ ꓙꓵꓽ ꓗꓪ ꓬꓲꓸ ꓫꓵꓼ ꓪꓴꓸ ꓔꓴ ꓡ ꓟ ꓚꓺ ꓟꓲꓽ ꓔꓯ ꓜꓯꓻ ꓜꓳꓽ ꓡꓰ ꓡꓳ ꓐꓰ ꓓꓵꓽ ꓙ ꓔꓸ ꓡꓳ= ꓝꓮꓲ 12 ꓦ ꓗꓪ ꓬꓰˍ ꓠꓬ ꓬꓰ-ꓢꓴ ꓦꓵ ꓑꓮꓲ ꓙꓳˍ ꓠꓬꓲ ꓮ ꓔꓲꓸ ꓗꓸ ꓟꓽ ꓘꓳ ꓓꓴ ꓥ ꓟꓲ ꓙꓳˍ ꓡꓳ= ꓝꓮꓲ ꓘꓳꓼ ꓫꓵꓼ 1 ꓦ 1 ꓠꓬꓲ ꓗꓪ ꓬꓰˍ ꓠꓬ ꓟꓵ ꓗꓳ ꓓꓵ ꓓꓵ ꓘꓳꓼ ꓫꓵꓼ ꓥ ꓟ ꓑꓶꓸ ꓓꓴ ꓬꓲꓸ ꓓꓳꓽ ꓬꓲꓸ ꓒꓬꓱꓽ ꓮ ꓘꓶꓸ ꓟꓽ ꓓꓳ ꓡ= ꓣꓳ ꓡꓲ-ꓢꓴ ꓘꓳꓼ ꓫꓵꓼ ꓠꓬ 1 ꓦ 15 ꓗꓪ ꓐꓰ 2 ꓦ ꓘꓴꓽ ꓗꓪ ꓬꓰ ꓚꓰꓼ ꓟ ꓑꓶꓸ ꓓꓴ ꓕꓱ ꓟ ꓟꓽ ꓛꓲ ꓡ ꓢꓰꓽ ꓕꓯ ꓬꓰ ꓠꓹ ꓟ ꓓꓵꓽ ꓙ ꓔꓸ ꓟ ꓥ ꓡꓳ= ꓖꓳ ꓟ ꓑꓶꓸ ꓓꓴ ꓘꓳꓼ ꓫꓵꓼ 1 ꓦ 15 ꓠꓬꓲ ꓔꓯ “ꓡꓲ-ꓢꓴ ꓫꓵꓽ ꓦꓬꓼ ꓠꓬꓲ” ꓐꓰ ꓢꓪꓼ ꓢꓲꓸ ꓑꓮꓲ ꓬꓰ ꓙꓰ ꓡꓯ ꓐꓯ ꓟ ꓥ ꓡꓳ=
ꓡꓲ–ꓢꓴ ꓫꓵꓽ ꓦꓬꓼ ꓠꓬꓲ ꓑꓮꓲ ꓔꓶ ꓙꓱꓼ ꓓꓽ ꓟ (3) ꓟ꓾
- ꓡꓲ-ꓢꓴ ꓥꓳꓽ ꓐꓰ ꓡꓲ ꓒꓰꓼ ꓗ ꓟꓲꓽ ꓟꓳꓸ ꓖꓶ ꓓꓴ (Identity) – ꓕꓱ ꓟ ꓠꓯꓸꓼ ꓗꓪ ꓠꓬ ꓡꓲ-ꓢꓴ ꓥꓳ ꓫꓵꓽ꓾ ꓡꓲ ꓒꓰꓼ ꓡꓲ ꓚꓱꓹ꓾ ꓛꓲ ꓐꓶ ꓟꓴ ꓖꓪ ꓐꓰ ꓟꓶ ꓢꓯꓼ꓾ ꓚ ꓟꓲꓽ ꓠꓲꓸ ꓫꓬꓸ ꓬꓲ ꓫꓵ ꓬꓲ ꓙꓰ ꓔꓯ ꓧꓪ ꓟꓰꓹ ꓫꓺ ꓒꓵꓽ ꓟ꓾ ꓟꓬꓱ ꓓꓳꓽ ꓖꓶꓽ ꓙꓲꓽ ꓙꓳ ꓢꓴ ꓐꓴ ꓔꓯ ꓞꓳ ꓒꓵꓽ ꓟꓬꓱ ꓓꓳꓽ ꓖꓶˍ ꓟ ꓬꓰ ꓓꓴ ꓥ ꓡꓳ= ꓣꓳ ꓕꓳ ꓶ ꓚꓰꓼ ꓖꓶ ꓢꓴ ꓟꓸ ꓒ ꓮ-ꓬꓲꓼ-ꓢ ꓐꓰ ꓟꓸ ꓒ ꓐ-ꓔꓳ꓾ ꓝꓮꓲ ꓡꓲ-ꓢꓴ ꓟꓸ ꓒ/ꓟ ꓐꓴ꓾ ꓝꓮꓲ ꓡꓲ-ꓢꓴ ꓕꓳ ꓶ ꓐꓰ ꓥꓳꓽ ꓫꓵꓽ꓾ ꓖꓪꓽ ꓫꓵꓽ꓾ ꓣꓱꓽ ꓫꓵꓽ ꓣꓱ ꓙꓰ ꓕꓱ ꓡꓱꓳ ꓫꓵꓽ ꓡꓲꓽ ꓒꓰꓼ ꓡꓲꓽ ꓚꓱꓹ ꓟꓬꓱꓽ ꓗꓪ ꓟꓬꓱ ꓓꓳꓽ ꓖꓶ ꓠ ꓗꓹ ꓢꓴ ꓐꓴ ꓟꓸ ꓟꓲꓽ ꓧꓪ ꓟꓰꓹ ꓢꓳ ꓠꓬꓲ ꓟ꓾ ꓟꓳꓸ ꓖꓶ ꓟ ꓬꓰ ꓠꓹ ꓟ ꓥ ꓡꓳ=
- ꓡꓲ-ꓢꓴ ꓐꓴ ꓪ: ꓡꓯ ꓘꓳ ꓟ ꓟꓳꓸ ꓖꓶ ꓓꓴ (Unity) – ꓕꓱ ꓟ ꓠꓯꓸꓼ ꓗꓪ ꓠꓬ ꓕꓲ ꓟꓲ ꓠꓯ ꓗꓪ ꓟ ꓡꓲ-ꓢꓴ ꓐꓴ ꓕꓲ ꓠꓲꓹ ꓕꓲ ꓪ ꓟ ꓐꓰ ꓙ ꓡꓯ ꓘꓳ ꓚꓱꓹ ꓗꓪ ꓪꓽ ꓡꓯ ꓘꓳ ꓠꓹ ꓟ ꓐꓱ ꓶ ꓥ ꓡꓳ=
- ꓡꓲ-ꓢꓴ ꓞꓲꓼ ꓤ ꓡꓯꓹ ꓤ ꓐꓴ ꓔꓯ ꓢꓯꓼ ꓖꓶ ꓓꓴ (Empowerment) – ꓕꓱ ꓟ ꓠꓯꓸꓼ ꓗꓪ ꓠꓬ ꓡꓲ-ꓢꓴ ꓐꓴ ꓔꓬ ꓙꓶ ꓪꓴꓽ ꓟꓴ ꓡ ꓠꓹ ꓟ ꓐꓱ ꓶ ꓕꓶˍ ꓟ ꓪꓴꓽ ꓟꓴ ꓡ ꓚꓱꓹ꓾ ꓢꓷꓸ ꓠꓲꓹ ꓢꓳ ꓚꓱꓹ꓾ ꓢꓯꓼ ꓖꓶ ꓪ ꓖꓶ ꓚꓱꓹ ꓗꓪ ꓔꓺ ꓡꓯ ꓘꓳ ꓟ ꓪꓴꓽ ꓟꓴ ꓡ ꓠꓹ ꓟ ꓚꓱꓹ ꓝꓰꓸ ꓖꓶ꓾ ꓢꓯꓼ ꓖꓶ ꓓꓴ ꓥ ꓡꓳ= ꓣꓳ ꓡꓲ ꓒꓰꓼ ꓣꓳ ꓠꓲꓸ ꓫꓬꓸ ꓔꓯ ꓫꓺ ꓒꓵꓽ ꓟ ꓡꓰꓽ ꓟꓽ ꓞꓲ꓾ ꓬꓲꓸ ꓫꓵꓼ ꓫꓬꓹ ꓜꓶ ꓟ꓾ ꓧꓳꓽ ꓪꓴꓸ ꓟꓴ ꓟ ꓐꓰ꓾ ꓤꓶ ꓫꓵꓼ ꓗꓪ ꓡꓲ-ꓢꓴ ꓐꓴ ꓮ ꓡꓲ ꓢꓯꓸ ꓔꓬ ꓠꓹ ꓟ ꓬꓲꓸ ꓚꓱꓹ ꓧꓪ ꓟꓰꓹ ꓡ ꓢꓴ ꓐꓴ ꓔꓯ ꓔꓳꓹ ꓙ ꓢꓯꓼ ꓖꓶ ꓠꓹ ꓟ ꓥ ꓡꓳ=
ꓬꓲꓸ ꓪꓴꓸ ꓕꓲꓽ ꓕꓳꓼ ꓮ ꓡꓲ ꓓꓵꓽ ꓙ ꓖꓪ ꓙꓱ ꓔꓸ ꓟ ꓔꓯ ꓟꓳꓸ ꓜꓲ ꓜꓲ ꓟꓴ ꓟꓴ ꓵꓺ ꓠꓹ ꓟ ꓕꓱ ꓗꓪ ꓙꓰ= https://lisutimes.com/%ea%93%a1%ea%93%b2-%ea%93%a2%ea%93%b4-%ea%93%ab%ea%93%b5%ea%93%bd-%ea%93%a6%ea%93%ac%ea%93%bc-%ea%93%a0%ea%93%ac%ea%93%b2-%ea%93%94%ea%93%b6-%ea%93%a0%ea%93%b9-%ea%93%9f-%ea%93%96%ea%93%aa/
ꓡꓲ-ꓢꓴ ꓫꓵꓽ ꓦꓬꓼ ꓠꓬꓲ ꓑꓮꓲꓽ ꓬꓰ ꓚꓱꓹ ꓖꓴ ꓟꓳꓸ ꓖꓶ ꓟ
ꓒꓴ ꓟꓶꓽ ꓚꓱꓹ ꓕꓽ ꓬꓰ- ꓔꓶ ꓙꓱꓼ ꓔꓯ ꓛꓳ ꓢꓲꓸ ꓙꓲ ꓖꓴ ꓓꓳ ꓡ ꓠꓹ ꓟ ꓢꓯꓼ ꓕꓵꓼ= ꓡꓲ-ꓢꓴ ꓫꓵꓽ ꓦꓬꓼ ꓠꓬꓲ ꓑꓮꓲ ꓬꓰ ꓕꓯ꓾ ꓕꓲ ꓘꓹ ꓕꓲ ꓟꓵꓽ ꓗꓪ ꓡꓲ-ꓢꓴ ꓫꓵꓽ ꓦꓬꓼ ꓠꓬꓲ ꓑꓮꓲ ꓬꓰ ꓗꓳ-ꓟꓲ-ꓔꓲ ꓒꓴ ꓡꓯ ꓘꓳ ꓢꓲ꓾ ꓕꓯ ꓢꓲ ꓗꓪ ꓟ ꓔꓶ ꓙꓱꓼ ꓔꓯ ꓜꓯꓻ ꓠꓬꓲ ꓢꓲꓸ ꓣꓳ ꓔꓬ ꓟ ꓟꓵꓽ ꓗꓪ ꓬꓰ ꓐ ꓡ ꓟ ꓬꓲꓸ ꓫꓵꓽ ꓬꓲ ꓙꓰ ꓬꓰ ꓙꓰ ꓠꓹ ꓟ ꓥ ꓡꓳ= ꓚꓲꓸ ꓟꓶ ꓓꓴ ꓜꓲꓼ ꓓꓴ/ꓑꓮꓲ ꓬꓰ ꓡꓳ ꓐꓯ ꓕꓯ ꓒꓴ ꓮ ꓘꓶꓸ ꓟꓶꓽ ꓢꓲꓸ ꓬꓰ ꓠ ꓗꓹ ꓡꓳ ꓐꓰ ꓕꓽ ꓓꓵꓽ ꓙ= ꓦꓲ ꓘꓴ ꓗꓪ ꓐꓰ ꓪꓴꓸ ꓔꓴ ꓢꓲꓸ ꓖꓳ ꓕꓲ ꓠꓬꓲ ꓗꓪ ꓡꓲ-ꓢꓴ ꓮ ꓙꓵꓽ ꓔꓯ “ꓥꓳꓽ ꓫꓵꓽ ꓐꓰ ꓡꓲ ꓒꓰꓼ ꓔꓯ ꓫꓺ ꓒꓵꓽ ꓠꓹ ꓟ꓾ ꓡꓲ-ꓢꓴ ꓐꓴ ꓕꓲ ꓧꓶꓹ ꓕꓲ ꓚ ꓪꓽ ꓡꓯ ꓘꓳ ꓠꓹ ꓟ ꓐꓰ꓾ ꓪꓴꓽ ꓟꓴ ꓡ ꓚꓱꓹ ꓗꓪ ꓢꓯꓼ ꓕꓵꓼ ꓠꓹ ꓟ” ꓬꓲꓼ ꓠꓬꓲꓸ ꓖꓶ ꓠꓹ ꓟ ꓠꓬ ꓬꓲꓸ ꓓꓽ ꓟ ꓥ ꓡꓳ= ꓡꓲ-ꓢꓴ ꓟꓴ ꓖꓪ ꓖꓪ꓾ ꓥꓳꓽ ꓜꓱ ꓒꓶꓻ ꓟꓸ ꓡꓯ ꓘꓳ꓾ ꓡꓲꓽ ꓒꓰꓼ ꓢꓷꓸ ꓠꓲꓹ ꓐꓯ ꓟꓸ ꓡꓯ ꓘꓳ꓾ ꓕꓲ ꓣꓳ ꓛꓳ ꓕꓲ ꓣꓳ ꓙ ꓡꓯ ꓘꓳ ꓢꓲꓸ ꓪꓴꓽ ꓟꓴ ꓡ ꓚꓱꓹ ꓔꓯ ꓟꓳꓸ ꓢꓯꓼ ꓖꓶ꓾ ꓢꓷꓸ ꓠꓲꓹ ꓖꓶ ꓡꓯ ꓘꓳ ꓓꓴ ꓥ ꓡꓳ=
ꓑꓮꓲ ꓙ ꓖꓴ ꓜꓲ ꓜꓲ ꓟꓴ ꓟꓴ ꓵꓺ ꓠꓲꓹ ꓫꓵꓺ ꓠꓬ ꓕꓱ ꓗꓪ ꓙꓰ ꓢꓲ ꓵꓺ ꓪ ꓝꓲ= https://lisutimes.com/%ea%93%a1%ea%93%b2-%ea%93%a2%ea%93%b4-%ea%93%ab%ea%93%b5%ea%93%bd-%ea%93%a6%ea%93%ac%ea%93%bc-%ea%93%a0%ea%93%ac%ea%93%b2-%ea%93%91%ea%93%ae%ea%93%b2-%ea%93%ae-%ea%93%a1%ea%93%b2-%ea%93%ac%ea%93%b0/
ꓡꓲ-ꓢꓴ ꓫꓵꓽ ꓦꓬꓼ ꓠꓬꓲ ꓗꓪ ꓣꓱꓽ ꓓꓴ ꓪꓵꓼ ꓘꓶꓽ (3) ꓘꓶꓽ
(1) ꓡꓲ-ꓢꓴ ꓥꓳꓽ ꓫꓵꓽ ꓐꓰ꓾ ꓡꓲ ꓒꓰꓼ ꓗ ꓟꓲꓽ ꓔꓯ ꓠꓲꓹ ꓠꓵ ꓫꓺ ꓒꓵꓽ ꓓꓴ ꓥꓳ=
(2) ꓡꓲ-ꓢꓴ ꓠꓬꓲꓽ ꓡꓲ-ꓢꓴ ꓟꓽ ꓙꓳ꓾ ꓕꓲ ꓧꓶꓹ ꓕꓲ ꓚ ꓪꓽ ꓡꓯ ꓘꓳ ꓓꓴ ꓥꓳ=
(3) ꓠꓵ ꓠꓲꓹ꓾ ꓙ ꓗꓴ ꓠꓲꓹ꓾ ꓪꓴꓽ ꓟꓴ ꓡ ꓚꓱꓹ ꓗꓪ ꓢꓯꓼ ꓕꓵꓼ ꓓꓴ ꓥꓳ=
ꓡꓲ-ꓢꓴ ꓫꓵꓽ ꓦꓬꓼ ꓠꓬꓲ ꓑꓮꓲ ꓗꓪ ꓣꓱꓽ ꓓꓴ ꓒꓯꓽ
ꓒꓯꓽ ꓐꓬꓱꓽ ꓬꓲꓸ ꓟꓸ ꓟꓲꓽ ꓒꓶꓻ ꓘꓶꓽ ꓠꓬ꓾
- ꓟꓲꓼ ꓪꓳꓼ ꓠꓲꓹ ꓛꓵꓼ ꓜꓸ ꓔꓸ ꓟ ꓠꓬ ꓠꓲꓹ ꓔꓱꓹ ꓠꓲꓹ ꓓꓰ ꓟ ꓐꓰ ꓢꓲ ꓡꓲꓹ ꓟ ꓔꓯ ꓖꓴ ꓡꓳ=
- ꓢꓲꓽ ꓢꓲꓽ (ꓠꓲꓺ ꓠꓲꓺ) ꓜꓸ ꓔꓸ ꓟ ꓠꓬ ꓤ ꓘꓹ ꓘꓹ ꓑꓶꓸ ꓑꓶꓸ ꓬꓰ ꓐ ꓡ ꓢꓴ ꓥ ꓟ ꓡꓲ-ꓢꓴ ꓒꓬꓱꓽ ꓔꓯ ꓖꓴ ꓡꓳ=
- ꓒꓴ ꓛꓼ ꓛꓼ ꓜꓸ ꓐꓬꓱꓽ ꓠꓬ ꓠꓲꓹ ꓟ ꓢꓲꓽ ꓫꓬ ꓟ ꓔꓯ ꓖꓴˍ ꓡꓳ=
- ꓛꓬꓹ ꓠꓬ ꓡꓲ-ꓢꓴ ꓐꓴ ꓠꓲꓸ ꓫꓬꓸ ꓶ ꓤ ꓶ ꓟꓲ ꓮ ꓙꓵꓽ ꓔꓯ ꓖꓴ ꓡꓳ=
- ꓗꓴ ꓟ ꓜꓰ ꓠꓬ ꓡꓲ-ꓢꓴ ꓡ ꓞꓳ ꓐꓴ ꓔꓯ ꓖꓴ ꓔꓸ ꓟ ꓥ ꓡꓳ= (ꓗꓴ ꓟ 4 ꓢꓶꓽ ꓠꓬ ꓡꓲ-ꓢꓴ ꓐꓴ ꓦꓲ ꓚꓰꓺ ꓥ ꓟ ꓧꓶ ꓗꓴꓷꓼ꓾ ꓲ-ꓓꓲ-ꓬ ꓗꓴꓷꓼ꓾ ꓟꓬ-ꓟ ꓗꓴꓷꓼ꓾ ꓕꓮꓲꓹ ꓗꓴꓷꓼ ꓗꓪ ꓟ ꓡꓲ-ꓢꓴ ꓐꓴ ꓔꓯ ꓖꓴ ꓢꓲ꓾ ꓝꓮꓲ ꓗꓴ ꓟ ꓜꓰ 1 ꓢꓶꓽ ꓠꓬ ꓟꓵꓽ ꓗꓳ ꓓꓵ ꓓꓵ ꓗꓪ ꓔꓬ ꓒꓬꓱ ꓙꓰ ꓟ ꓡꓲ-ꓢꓴ ꓮ ꓙꓵꓽ ꓔꓯ ꓖꓴˍ ꓡꓳ=)
- ꓗꓴ ꓟ ꓜꓰ ꓥꓪꓽ ꓢꓶꓽ ꓛꓬꓹ ꓔꓯ ꓚꓳꓸ ꓔꓬ ꓟ ꓠꓬ꓾ ꓮ ꓡꓲ ꓕꓲ ꓟꓵꓽ ꓗꓪ ꓔꓬ ꓢꓴ ꓡꓲ-ꓢꓴ ꓥ ꓟꓲ ꓡꓲ-ꓢꓴ ꓡꓲꓽ ꓒꓰꓼ ꓡꓲꓽ ꓚꓱꓹ ꓔꓯ ꓫꓺ ꓒꓵꓽ ꓔꓬ ꓟ ꓔꓯ ꓖꓴˍ ꓡꓳ=
ꓖꓳ ꓟ ꓑꓶꓸ ꓓꓴ ꓒꓯꓽ ꓕꓱ ꓟ ꓬꓲꓸ ꓟꓸ ꓟꓲ ꓬꓲꓸ ꓧꓶꓹ ꓚ ꓠꓬ꓾ “ꓡꓲ-ꓢꓴ ꓐꓴ ꓠꓬ ꓢꓲ ꓡꓲꓹ ꓟ ꓔꓯ ꓠꓲꓹ ꓠꓵ ꓗꓴꓸ ꓢꓴ꓾ ꓒꓵꓽ ꓒ ꓡꓲ ꓒꓰꓼ ꓗ ꓟꓲ ꓐꓰ ꓣꓱꓽ ꓫꓵ ꓣꓱ ꓙꓰ ꓔꓯ ꓥ ꓟꓲ ꓫꓺ ꓒꓵꓽ ꓔꓬ ꓢꓴ ꓥ ꓢꓲ꓾ ꓪꓴꓽ ꓟꓴ ꓡ ꓚꓱꓹ ꓔꓯ ꓖꓼ ꓔꓬ ꓢꓴ꓾ ꓮ ꓘꓶꓸ ꓤ ꓘꓹ ꓢꓴ꓾ ꓑꓶꓸ ꓢꓴ ꓥ ꓡꓳ” ꓐꓰ ꓐꓯ ꓬꓯꓼ ꓡꓳ=
ꓡꓲ-ꓢꓴ ꓫꓵꓽ ꓦꓬꓼ ꓠꓬꓲ ꓗꓪ ꓖꓪ ꓓꓴ ꓟꓴꓽ ꓖꓪ
ꓟꓶ ꓤ ꓟꓽ ꓥ ꓕꓯ ꓟꓴ ꓖꓪ ꓥ ꓟꓲ ꓚꓰꓼ ꓓꓳ ꓡ ꓓꓴ ꓥꓳ= ꓣꓳ ꓖꓪ ꓢꓳ ꓢꓲꓸ ꓡꓲ-ꓢꓴ ꓫꓵꓽ ꓦꓬꓼ ꓠꓬꓲ ꓗꓪ ꓫꓵꓽ ꓫꓵꓽ ꓪꓽ ꓪꓽ ꓖꓪ ꓠꓹ ꓟ ꓟꓳꓸ ꓙ ꓔꓸ ꓡꓳ=
* ꓟꓴ ꓖꓪ ꓐꓳ ꓔꓬ ꓡꓳ= ꓟꓽ ꓟꓶ ꓫꓵ ꓕꓯ ꓣꓳ ꓮ ꓙꓵꓽ ꓖꓪ ꓢꓳ ꓓꓴ ꓒꓬꓱꓼ ꓡ ꓥꓳ꓿
ꓠꓻ ꓠꓬꓲ/ꓒꓳꓹ ꓖꓶ ꓘꓶꓽ ꓕꓲ ꓐꓱ (Feedbacks and our responses)
*ꓡꓲ-ꓢꓴ ꓮ ꓙꓵꓽ ꓔꓯ ꓗꓪꓽ ꓫꓵˍ ꓠꓬꓲ ꓟꓵ ꓗꓳꓹ ꓓꓵ ꓓꓵ ꓡꓲ-ꓢꓴ ꓧꓳꓽ ꓪꓴꓸ ꓟꓴ ꓢꓴ ꓐꓴ ꓮ ꓙꓵꓽ ꓔꓺ ꓢꓲꓸ ꓬꓰ ꓠꓬ ꓙꓲˍ ꓥꓳ!!= (ꓕꓱ ꓟ ꓬꓰ ꓐ ꓡ ꓠꓬ ꓙꓲ ꓡꓳꓹ ꓬꓰ ꓟ ꓥꓳ= ꓖꓳ ꓡꓱ ꓥ ꓟꓲ ꓮ ꓟꓶ ꓗꓪ ꓛꓲ ꓣꓳ ꓡꓲ-ꓢꓴ ꓐꓴ ꓠꓯꓸꓼ ꓗꓪ ꓟꓵ ꓗꓳ ꓓꓵ ꓓꓵ ꓡꓲ-ꓢꓴ ꓮ ꓙꓵꓽ ꓔꓯ ꓗꓪꓽ ꓫꓵꓽ ꓟ ꓜꓴ ꓟꓽ ꓙꓳ= ꓣꓳ ꓠꓬ ꓟꓲ ꓟꓵꓽ ꓟꓲ ꓗꓪ ꓔꓬ ꓢꓲ꓾ ꓮ ꓡꓲ ꓐ ꓡ ꓖꓳ ꓡꓱ ꓬꓰ ꓔꓬ ꓟ ꓡꓲꓹ ꓗꓷ ꓟꓶ ꓟ ꓙꓵꓽ ꓪ ꓒ ꓐꓲ ꓣꓱꓽ ꓔꓬ ꓢꓴ ꓥ ꓡꓳ= ꓔꓯꓺ ꓥꓳꓽ ꓕꓲꓽ ꓟ ꓐꓯˍ ꓠꓬ꓾ ꓡꓲ-ꓢꓴ ꓘꓳꓼ ꓫꓵꓼ ꓦꓬꓼ ꓠꓬꓲ ꓔꓯ ꓮ ꓡꓲ ꓕꓲ ꓟꓵꓽ ꓢꓴ ꓮ ꓕꓯ ꓬꓰ ꓠꓲꓹ ꓫꓵ꓾ ꓮ ꓡꓲ ꓬꓰ ꓗꓸ ꓘꓳꓽ ꓖꓳ ꓡꓱ ꓬꓰ ꓓꓳ ꓡ ꓟ ꓣꓳ ꓡꓳꓸ ꓟꓳ ꓗꓷꓳ= ꓕꓱ ꓟ ꓔꓯ ꓔꓳꓼ ꓔꓳꓼ ꓒꓶꓻ ꓐ ꓡ ꓢꓴ ꓟꓽ ꓙꓳ= ꓕꓲ ꓜꓴ ꓜꓴ ꓡꓰ ꓙꓵꓽ ꓗꓪꓼ ꓩꓴ ꓡ ꓟ ꓟꓽ ꓙꓳ= ꓖꓳ ꓟ ꓑꓶꓸ ꓓꓴ ꓮ ꓙꓵꓽ ꓔꓯ ꓗꓪꓼ ꓙꓵꓽ ꓔꓬ ꓟ ꓜꓴ ꓟꓽ ꓙꓳ= ꓖꓳ ꓡꓱ ꓙꓳ ꓡ ꓠꓹ ꓟ ꓥ ꓟꓲ ꓬꓲꓸ ꓙꓵꓹ ꓡꓳꓸ ꓔꓬ ꓟꓽ ꓐ ꓡꓻꓳ= ꓕꓱ ꓡꓱ ꓥ ꓕꓯꓽ ꓣꓳ ꓬꓰ ꓙꓲꓽ ꓙꓳˍ ꓟ ꓔꓯ ꓬꓰ ꓢꓲ꓾ ꓪꓽ ꓡ ꓢꓴ ꓙꓳ ꓠꓬ ꓬꓰ ꓔꓺ ꓡ ꓠꓹ ꓟ ꓢꓯꓼ ꓕꓵꓼ ꓩꓴ ꓡ ꓟ ꓥ ꓡꓳ= ꓕꓲ ꓣꓳ꓾ ꓕꓲ ꓜꓴ ꓡꓰ ꓧꓳꓽ ꓪꓴꓸ ꓟꓴˍ ꓟ ꓟꓽ ꓥ ꓥ꓾ ꓦ ꓐꓬꓱꓽ ꓐꓰ ꓓꓵꓽ ꓙ ꓚꓱꓹ ꓙꓲˍ ꓟ ꓡꓰ ꓣꓳꓽ ꓔꓯ ꓧꓳꓽ ꓙꓰ ꓝꓲ ꓡꓯ ꓐꓰ ꓪꓴꓸ ꓡꓯ ꓘꓳ ꓠꓲꓹ ꓫꓵ ꓡꓳ= ꓫꓸ ꓟꓳ ꓪ=)
*ꓡꓲ-ꓢꓴ ꓫꓵꓽ ꓦꓬꓼ ꓠꓬꓲ ꓔꓯ Lisu National Day ꓘꓴˍ ꓠꓬ ꓥꓪ ꓠꓴ ꓟꓵꓽ ꓗꓪ ꓙꓵꓽ ꓢꓴ ꓗꓪꓼ ꓢꓴ ꓐꓴ ꓔꓯ ꓙ ꓡꓯ ꓘꓳ ꓫꓸ ꓡ ꓡꓲꓸ ꓟꓽ ꓢꓷꓸ!!= (19 ꓦ ꓜꓴ ꓘꓳꓼ ꓗꓪ ꓣꓳ ꓡꓲ-ꓢꓴ ꓟꓸ ꓟꓲꓽ ꓐꓳ ꓔꓸ ꓟ ꓕꓳ ꓶ ꓮ ꓟꓬꓹ ꓗꓪ National ꓕꓱ ꓕꓲ ꓘꓶꓽ ꓣꓱꓽ ꓔꓸ ꓡꓳ= ꓟꓵ ꓚꓰꓺ ꓙꓳ ꓢꓴ ꓞꓳ ꓫꓵꓽ ꓥ ꓠꓬꓲ ꓕꓱ ꓕꓲꓽ ꓘꓶꓽ ꓣꓳ ꓠꓲꓹ ꓫꓵ ꓟ ꓥ ꓡꓳ= ꓧꓶꓽ ꓗꓴꓷꓼ ꓙꓵꓽ ꓢꓴ ꓐꓴ ꓡꓰ ꓡꓲ-ꓢꓴ ꓟꓸ ꓟꓲꓽ ꓧꓪ ꓟꓰꓹ ꓔꓸ ꓟ ꓕꓲ ꓑꓷꓠ ꓗꓪ ꓥ ꓟꓲ Lisu Nationality Living in Nujiang ꓐꓰ ꓐꓳ ꓔꓸ ꓡꓳ= ꓣꓳ ꓠꓬ ꓮ ꓡꓲ ꓕꓲ ꓗꓴꓷꓼ ꓥ ꓟꓲ ꓟꓵꓽ ꓚꓰꓺ ꓡ ꓞꓳ ꓥ ꓡꓳ= ꓖꓳ ꓟ ꓑꓶꓸ ꓓꓴ ꓕꓱ ꓕꓲ ꓝꓳꓹ ꓣꓱꓽ ꓥ ꓟꓲ ꓟꓽ ꓛ ꓡꓰ= ꓟꓵꓽ ꓟꓽ ꓙꓳ ꓢꓴ ꓥ ꓟꓲ ꓕꓱ ꓕꓲ ꓝꓳꓹ ꓣꓱꓽ ꓔꓬ ꓡꓳ= ꓖꓳ ꓡꓱ ꓥ ꓟꓲ ꓗꓸ ꓟꓽ ꓘꓳꓽ ꓓꓴ ꓙꓳˍ ꓠꓬ ꓡꓲ-ꓢꓴ ꓥꓳꓽ ꓗꓪ ꓐꓰ “ꓡꓲ-ꓢꓴ ꓫꓵꓽ ꓦꓬꓼ ꓠꓬꓲ” ꓐꓯ ꓢꓲ꓾ ꓲ-ꓖ-ꓡꓲꓼ ꓥꓳꓽ ꓐꓰ ꓠꓱꓸ ꓐꓯꓼ ꓥꓳꓽ ꓗꓪ ꓐꓰ Lisu Ethnic Day, Lisu People’s Day ꓕꓱ ꓡꓱꓳ ꓫꓵꓽ ꓒꓳꓹ ꓣꓱꓽ ꓙꓲˍ ꓥꓳ= ꓣꓳ ꓠꓬ ꓗꓴꓷꓼ ꓔꓯ ꓒꓳꓹ ꓔꓳꓹ ꓟꓬꓱꓽ ꓬꓰ ꓓꓴ ꓟꓽ ꓥ꓾ ꓥꓪ ꓠꓴ ꓥꓳꓽ ꓫꓵꓽ ꓐꓰ ꓡꓲ ꓒꓰꓼ꓾ ꓪꓽ ꓡꓯ ꓘꓳ ꓓꓴ꓾ ꓪꓴꓽ ꓟꓴ ꓡ ꓚꓱꓹ ꓔꓯ ꓢꓯꓼ ꓖꓶ ꓓꓴ ꓦꓬꓼ ꓠꓬꓲ ꓥ ꓡꓳ꓾ ꓐꓰ ꓒꓶꓻ ꓗꓴꓸ ꓠꓹ ꓟ ꓠꓬ ꓣꓳ ꓶꓻ ꓥ ꓡꓳ=)
ꓬꓲꓸ ꓘꓳꓼ ꓬꓲꓸ ꓠꓬꓲ ꓔꓯ ꓟꓳꓸ ꓔꓳꓼ ꓔꓳꓼ ꓮ ꓡꓲ ꓐꓰ ꓢꓪꓼ ꓡ? (ꓗꓴꓷꓼ ꓓꓽ ꓟ 4 ꓟ ꓗꓪ ꓐꓰ ꓔꓺ ꓢꓲꓸ ꓡꓲ-ꓢꓴ ꓕꓳ ꓶ 100 ꓘꓳꓼ ꓐꓲ ꓡꓰ ꓟ ꓑꓮꓲ ꓔꓯ ꓟꓶ-ꓚꓲ-ꓠ ꓗꓪ 2017 ꓘꓳꓼ ꓕꓯ ꓬꓰ ꓓꓳ ꓡꓰꓳ= ꓫꓬꓹ ꓚꓰꓼ ꓟ ꓠꓬ 1912-17 ꓖꓼ ꓡꓯ ꓖꓼ ꓙꓲ ꓗꓪ ꓥ ꓢꓲ꓾ 1917 ꓗꓪ ꓠꓬ ꓬꓲꓸ ꓑꓷꓠ ꓠꓬꓲꓸ ꓓꓳ ꓡ ꓟ ꓥ ꓡꓳ= ꓕꓱ ꓡꓱ ꓐꓯˍ ꓠꓬ ꓐꓳ ꓙꓲ ꓡꓰ꓾ ꓐꓲ ꓜꓲꓼ ꓡꓰ ꓟ ꓔꓯ ꓖꓴˍ ꓡꓳ= ꓖꓳ ꓗꓪ ꓐꓰ ꓣꓴ ꓔꓯꓹ ꓡ ꓡꓳ= ꓑꓮꓲ ꓦꓬꓼ ꓠꓬꓲ ꓔꓯ ꓟꓳꓸ ꓐꓯˍ ꓠꓬ꓾ ꓡꓲ-ꓢꓴ ꓠꓬ ꓦ ꓡꓱ ꓢꓴ ꓟꓬꓽ ꓟ ꓑꓶꓸ ꓓꓴ 12 ꓦ ꓐ ꓗꓪ ꓠꓬ ꓦ ꓡꓱ ꓢꓴ ꓑꓮꓲ ꓬꓰ-ꓢꓴ ꓦꓵ ꓑꓮꓲ ꓙꓳˍ ꓡꓳ= ꓖꓳ ꓟ ꓗꓪ ꓟꓬꓱꓽ ꓮ ꓘꓶꓸ ꓞꓽ ꓔꓬ ꓟ ꓗꓪ ꓕꓱ ꓡꓱꓳ ꓫꓵꓽ ꓑꓮꓲ ꓐꓱ ꓶ ꓓꓵꓽ ꓙ ꓟꓽ ꓐ ꓡ ꓟ ꓙꓳ ꓡ ꓥꓳ= ꓝꓮꓲ ꓘꓳꓼ ꓫꓵꓼ ꓑꓮꓲ ꓠꓬ 1 ꓦ ꓐꓰ 2 ꓦ ꓠꓬꓲꓽ ꓗꓴꓸ ꓚꓸ ꓗꓪ ꓬꓰ ꓚꓰꓼ ꓡꓳ= ꓖꓳ ꓟ ꓑꓶꓸ ꓓꓴ ꓘꓳꓼ ꓫꓵꓼ ꓑꓮꓲ ꓔꓯ ꓥ ꓟꓲ ꓟꓽ ꓓꓱꓻ ꓡꓰ ꓠꓹ ꓟ 1 ꓦ 15 ꓠꓬꓲ ꓔꓯ ꓢꓲꓺ ꓔꓸ ꓟ ꓥ ꓡꓳ= ꓟꓵ ꓗꓳ ꓓꓵ ꓓꓵ ꓘꓳꓼ ꓫꓵꓼ 1 ꓦ ꓗꓪ ꓣꓳ ꓡꓲ-ꓢꓴ ꓥ ꓟꓲ ꓤꓶ ꓫꓵꓼ ꓗꓪ ꓓꓵꓽ ꓡ ꓪꓴꓸ ꓔꓴ ꓟ ꓔꓯ ꓖꓴ ꓓꓴ ꓢꓪꓼ ꓔꓸ ꓟ ꓥ ꓡꓳ=
ꓮ ꓡꓲ ꓬꓰ ꓠꓹ ꓟ ꓔꓯ ꓟꓳ꓾ ꓮ ꓟ ꓡꓰ ꓧꓳꓽ ꓣꓱꓽ? ꓡ ꓠꓹ ꓟ ꓦꓬꓼ ꓠꓬꓲ ꓐꓱ ꓶ ꓮ ꓡꓲ ꓖꓴ ꓟꓳꓸ ꓘꓶꓽ ꓙꓳˍ ꓡ? ꓣꓳ ꓔꓯ ꓡꓲ-ꓢꓴ ꓫꓵꓽ ꓦꓬꓼ ꓠꓬꓲ ꓑꓮꓲ ꓐꓱ ꓶ ꓔꓶ ꓙꓱꓼ ꓓꓽ ꓟ (3) ꓟ ꓗꓪ ꓐꓰ ꓣꓳ ꓬꓰˍ ꓟ ꓟꓬꓱꓽ ꓮ ꓙꓵꓽ ꓔꓯ ꓚꓱꓹ ꓧꓳꓽ ꓙꓰ ꓠꓹ ꓟ ꓥ ꓡꓳ= ꓖꓳ ꓟ ꓠꓬ (1) ꓡꓲ-ꓢꓴ ꓥꓳꓽ ꓐꓰ ꓡꓲ ꓒꓰꓼ ꓗ ꓟꓲꓽ ꓟꓳꓸ ꓖꓶ ꓓꓴ (Identity)꓾ (2) ꓡꓲ-ꓢꓴ ꓐꓴ ꓪ: ꓡꓯ ꓘꓳ ꓟ ꓟꓳꓸ ꓖꓶ ꓓꓴ (Unity)꓾ (3) ꓡꓲ-ꓢꓴ ꓞꓲꓼ ꓤ ꓡꓯꓹ ꓤ ꓐꓴ ꓔꓯ ꓢꓯꓼ ꓖꓶ ꓓꓴ (Empowerment) ꓥ ꓡꓳ= ꓬꓰˍ ꓟ ꓮ ꓙꓵꓽ ꓠꓬ ꓕꓱ ꓟ ꓔꓯ ꓜꓯꓻ ꓜꓳꓽ ꓡꓰ ꓝꓲ ꓠ ꓗꓹ ꓡꓳ= ꓕꓲ ꓣꓳ ꓔꓵꓸꓼ ꓥ ꓟꓲ꓾ ꓞꓳ ꓦꓲ꓾ ꓞꓳ ꓘꓹ꓾ ꓜꓲꓼ ꓔꓶꓸ ꓕꓲ ꓖ ꓖ ꓗꓪ ꓞꓳ ꓜꓴ ꓜꓲꓼ ꓢꓲꓸ ꓥ ꓟꓲ ꓬꓰ ꓙꓲˍ ꓡꓳ= ꓑꓮꓲ ꓐꓯˍꓟ ꓑꓶꓸ ꓓꓴ ꓧꓶꓸ ꓕꓯ ꓣꓳ ꓓꓵꓽ ꓙ ꓟ ꓡꓰ ꓐꓰ ꓒꓴ ꓮ ꓘꓶꓸ ꓟꓶꓽ ꓢꓲꓸ ꓬꓰ ꓓꓴ ꓕꓽ ꓢꓯꓼ ꓕꓵꓼ= ꓖꓳ ꓡꓱ ꓕꓽ ꓓꓵꓽ ꓙ= ꓣꓳ ꓫꓵꓽ ꓔꓯ ꓟꓽ ꓟꓲ ꓡꓰ ꓓꓴ꓾ ꓣꓳ ꓬꓰ ꓠꓹ ꓟ ꓔꓯ ꓬꓲꓼ ꓠꓬꓲꓸ ꓖꓶ ꓓꓴ꓾ ꓧꓶꓸ ꓕꓯ ꓟꓬꓱ ꓬꓰ ꓗꓷ ꓢꓴ꓾ ꓮ ꓟꓶ ꓟꓬꓱꓽ ꓬꓰ ꓔꓬ ꓢꓴ ꓔꓯ ꓢꓯꓼ ꓖꓶꓽ ꓪ ꓝꓲ ꓠꓹ ꓟ ꓬꓲꓼ ꓠꓬꓲꓸ ꓖꓶ ꓓꓴ ꓥ ꓡꓳ= ꓣꓳ ꓮ ꓟ ꓥ ꓟ꓾ ꓣꓳ ꓪꓽ ꓡꓯ ꓘꓳ ꓟ ꓐꓰ꓾ ꓣꓳ ꓤ ꓠꓱ ꓐꓴ ꓔꓯ ꓢꓯꓼ ꓖꓶˍ ꓟ ꓔꓶ ꓙꓱ ꓔꓯˍ ꓡꓰꓽ ꓟꓳꓸ ꓙ ꓢꓲꓸ ꓣꓳ ꓬꓰ ꓐ ꓡ ꓟ ꓕꓲ ꓙꓶ ꓗꓪ ꓐꓰ ꓕꓲ ꓘꓳꓼ ꓡꓲꓸ ꓕꓲ ꓘꓳꓼ ꓬꓰ ꓓꓴ ꓥ ꓡꓳ= ꓬꓰ ꓓꓴ ꓮ ꓟꓬꓹ ꓫꓵꓽ ꓙꓳ ꓥ ꓟꓲ꓾ ꓟꓽ ꓓ ꓟꓽ ꓢ ꓬꓰ ꓠꓯˍ ꓟ ꓠꓬ꓾ ꓡꓲ-ꓢꓴ ꓫꓵꓽ ꓦꓬꓼ ꓠꓬꓲ ꓒꓯꓽ ꓛꓵꓽ ꓔꓴ ꓟ꓾ ꓪꓵꓼ ꓘꓶꓽ (3) ꓘꓶꓽ ꓕꓱˍ ꓟ꓾ ꓡꓲ-ꓢꓴ ꓫꓵꓽ ꓦꓬꓼ ꓠꓬꓲ ꓔꓶ ꓙꓱꓼ ꓔꓯ ꓫꓱꓸ ꓟ ꓬꓰ ꓟꓬꓱꓽ/ ꓟꓳꓸ ꓖꓶ ꓓꓴ/ ꓫꓸ ꓕꓱ ꓓꓴ/ ꓡꓳ ꓖꓪ ꓓꓴ ꓬꓰˍ ꓟ꓾ ꓝꓮꓲ ꓡꓲ-ꓢꓴ ꓫꓵꓽ ꓜꓽ ꓫꓵꓽ ꓓꓳ ꓫꓵꓽ ꓜꓽ ꓓꓳˍ ꓟ ꓕꓱ ꓟ ꓔꓯ ꓟꓽ ꓬꓰ ꓟꓽ ꓓ=
ꓡ ꓠꓹ ꓟ 2026 ꓘꓳꓼ ꓗꓪ ꓠꓬ ꓔꓶ ꓙꓱꓼ ꓓꓽ ꓟ ꓬꓲꓸ ꓪꓴꓸ ꓕꓲꓽ ꓟ ꓔꓯ ꓟꓳꓸ ꓑꓮꓲ ꓬꓰ ꓬꓲꓸ ꓕꓲꓽ ꓟꓴꓽ ꓣꓴ ꓢꓲꓸ ꓬꓰ ꓙꓰ ꓓꓴ ꓥ ꓡꓳ= ꓠꓯꓸ ꓦꓯꓽ ꓕꓲ ꓘꓳꓼ 2027 ꓠꓬ ꓔꓶ ꓙꓱꓼ ꓓꓽ ꓟ ꓠꓬꓲꓽ ꓟ ꓕꓲ ꓟ꓾ ꓠꓯ ꓠꓲꓹ 2028 ꓘꓳꓼ ꓗꓪ ꓠꓬ ꓔꓶ ꓙꓱꓼ ꓓꓽ ꓟ ꓢꓽ ꓟ ꓕꓲ ꓟ ꓔꓯ ꓬꓲꓸ ꓓꓽ ꓟ ꓑꓮꓲ ꓕꓲꓽ ꓟꓴꓽ ꓢꓪꓼ ꓢꓲꓸ ꓬꓰ ꓙꓰ ꓠꓹ ꓟ ꓥ ꓡꓳ= 2026 ꓗꓪ ꓠꓬ ꓕꓱ ꓟ ꓔꓯ ꓠꓶ ꓝꓸ ꓪꓴꓸ ꓔꓴ ꓟ ꓥ ꓟ ꓑꓶꓸ ꓓꓴ ꓬꓰ ꓢꓴ ꓮ ꓟꓬꓹ ꓟꓽ ꓓꓳ ꓡ ꓢꓰꓽ ꓥ ꓟꓲ ꓕꓽ ꓙꓽ ꓫꓸ= ꓪꓴꓸ ꓔꓴ ꓗꓷ ꓠꓬ ꓒꓬꓱꓼ ꓡ ꓥꓳ= ꓧꓶꓸ ꓕꓯˍ ꓡꓰ ꓣꓳ ꓬꓰ ꓠ ꓗꓹ ꓟ ꓟꓽ ꓬꓰ ꓬꓰ ꓔꓬ ꓗꓳꓸ ꓡ ꓟ ꓑꓶꓸ ꓓꓴ ꓣꓳ ꓕꓱ ꓟ ꓔꓯ ꓝꓮꓲ ꓕꓲ ꓧꓪꓹ ꓧꓪ ꓟꓰꓹ ꓢꓲꓸ ꓬꓰˍ ꓟ ꓥ ꓡꓳ=
2027 ꓘꓳꓼ ꓗꓪ ꓠꓬ ꓣꓳꓽ ꓪꓽ ꓡꓯ ꓘꓳ ꓟ ꓮ ꓟꓬꓹ ꓟꓳꓸ ꓖꓶ ꓓꓳ ꓡ ꓝꓲ ꓓꓴ ꓓꓵꓽ ꓙ ꓡꓯ= ꓡꓯ ꓫꓵ ꓡꓲ-ꓢꓴ ꓮ ꓟꓬꓹ ꓢꓷꓸ ꓡꓰ ꓢꓲꓸ ꓔꓺ ꓡ ꓝꓲ ꓡꓯ=
2028 ꓘꓳꓼ ꓗꓪ ꓠꓬ ꓡꓲ-ꓢꓴ ꓞꓲꓼ ꓤ ꓡꓯꓹ ꓤ ꓐꓴ ꓬꓰ ꓓꓳ ꓡ ꓟ ꓬꓲꓸ ꓫꓵꓽ ꓬꓲꓸ ꓙꓰ ꓟꓳꓸ ꓖꓶ ꓑꓮꓲ꓾ ꓪꓴꓽ ꓟꓴ ꓡ ꓚꓱꓹ ꓗꓪ ꓖꓼ ꓙꓰ ꓠꓹ ꓟ ꓢꓯꓼ ꓖꓶ ꓑꓮꓲ ꓓꓽ ꓟ ꓬꓰ ꓒꓬꓱꓼ ꓡ ꓠꓹ ꓟ ꓦ ꓐꓬꓱꓽ ꓟꓳꓸ ꓔꓸ ꓡꓯ= ꓖꓳ ꓗꓪ ꓠꓬ ꓟꓵ ꓗꓳ ꓓꓵ ꓓꓵ ꓗꓪ ꓢꓷꓸ ꓠꓲꓹ ꓗꓴꓸ ꓠꓲꓹ ꓙꓳ ꓢꓴ ꓡꓲ-ꓢꓴ ꓐꓴ ꓗꓪ ꓐꓰ ꓬꓲꓸ ꓪ ꓬꓰ ꓔꓬ ꓟ ꓟꓬꓱꓽ ꓔꓯ ꓟꓳꓸ ꓖꓶ꓾ ꓬꓲꓸ ꓪ ꓔꓯ ꓥ ꓟꓲ ꓞꓳ ꓒꓵꓽ ꓢꓯꓼ ꓖꓶ ꓡꓯ ꓘꓳ ꓠꓹ ꓟ ꓥ ꓡꓳ= ꓟꓬꓱ ꓓꓳꓽ ꓡꓯꓼ ꓫꓴ ꓖꓶ ꓠꓹ ꓟ ꓥ ꓡꓳ=
ꓑꓮꓲ ꓗꓳ-ꓟꓲ-ꓔꓲ ꓮ ꓡꓲ ꓕꓲ ꓟ ꓥ ꓟꓲ꓾ ꓣꓳ ꓫꓵꓽ ꓔꓯ ꓠꓲꓹ ꓠꓵ꓾ ꓣꓳ ꓪꓽ ꓡꓯ ꓘꓳ ꓚꓱꓹ ꓔꓯ ꓒꓵꓽ꓾ ꓣꓳ ꓞꓲꓼ ꓤ ꓡꓯꓹ ꓤ ꓐꓱ ꓶ ꓓꓵꓽ ꓙ ꓢꓲꓸ ꓢꓯꓼ ꓕꓵꓼ ꓝꓲ ꓠꓲꓹ ꓫꓵ ꓡꓳ= ꓑꓮꓲ ꓕꓱ ꓟ ꓗꓪ ꓐꓰ ꓕꓲ ꓣꓳ ꓐꓱ ꓶ ꓶ ꓡꓯꓼ ꓚꓱꓹ ꓬꓰ ꓟꓽ ꓓ= ꓟꓽ ꓔꓱꓹ ꓟꓽ ꓜꓳ ꓟ ꓗꓪ ꓧꓳꓽ ꓪꓴꓸ ꓙꓰ ꓓꓴ ꓬꓰ ꓟꓽ ꓓ= ꓕꓱ ꓟ ꓔꓯ ꓠꓬ ꓡꓲ-ꓢꓴ ꓮ ꓙꓵꓽ ꓶꓻ ꓥ ꓡꓳ꓾ ꓐꓰ ꓢꓪꓼ ꓢꓲꓸ ꓖꓴ ꓟꓳꓸ ꓙꓰ ꓠꓹ ꓟ ꓥ ꓡꓳ=
ꓣꓳ ꓡꓲ-ꓢꓴ ꓫꓵꓽ ꓠꓬ ꓡꓲꓹ ꓗꓷ ꓟꓶˍ ꓟ ꓚꓳ ꓪꓴꓸ ꓙꓵꓽ ꓪ ꓙꓳ ꓢꓴ ꓞꓳ ꓫꓵꓽ ꓥ ꓟ ꓡꓰ ꓐꓰ꓾ ꓮ ꓟ ꓔꓯˍ ꓟꓲ ꓟꓽ ꓓ ꓟꓽ ꓢ ꓙꓵꓽ ꓗ ꓗꓪ ꓐꓰ ꓧꓳꓽ ꓪꓴꓸ ꓟꓴ ꓔꓬ ꓟ ꓟꓽ ꓥ= ꓦ ꓐꓬꓱ ꓕꓱ ꓟ ꓔꓯ ꓠꓴ ꓪꓽ ꓐ ꓡ ꓠꓬ ꓛꓳ ꓡ ꓛꓵˍ ꓡꓳ꓾ ꓐꓰ ꓪꓴꓸ ꓔꓬ ꓟ ꓥ ꓡꓳ= ꓡ ꓞꓳ ꓔꓯ ꓖꓼ ꓟ/ ꓡꓳ ꓑ ꓞꓳ ꓐꓳ ꓔꓯ ꓖꓼ ꓟ ꓦꓬꓼ ꓠꓬꓲ ꓠꓬ ꓖꓴ ꓡꓰꓳ= ꓙꓲˍ ꓟ ꓓꓵꓽ ꓙ ꓚꓱꓹ ꓗꓪ ꓐꓰ ꓣꓳ ꓔꓯ ꓪꓴꓸ ꓧꓳꓽ ꓙꓰ ꓝꓲ ꓡꓯ= ꓡꓲ-ꓢꓴ ꓐꓴ ꓐꓱ ꓶ ꓙꓲ ꓖꓴ ꓙꓳˍ ꓠꓬ꓾ ꓮ ꓙꓵꓽ ꓢꓴ ꓥ ꓟꓲ ꓕꓱ ꓟ ꓔꓯ ꓖꓼ ꓛꓳ ꓡ ꓥꓳ ꓐꓰ ꓥꓳ ꓡꓳꓸ ꓩꓴ ꓡ ꓥꓳ= ꓫꓸ ꓟꓳ ꓪ=
ꓡꓲ-ꓢꓴ ꓫꓵꓽ ꓙꓳ ꓔꓬ ꓝꓲ꓾ ꓡꓲ-ꓢꓴ ꓥꓳꓽ ꓫꓵꓽ ꓐꓰ ꓡꓲꓽ ꓒꓰꓼ ꓠꓲꓸ ꓫꓬꓸ ꓕꓶ ꓔꓬ ꓝꓲ=
