Listen
Watch
ꓮꓳ-ꓢ-ꓢꓴ-ꓚꓰꓽ ꓔꓯ 20 ꓘꓳꓼ ꓡꓴꓽ ꓝꓴꓲꓸ ꓐꓯ ꓞꓷꓹ꓾ ꓡꓯꓽ ꓫꓵ ꓝꓴꓲꓸ ꓓꓰꓺ ꓐꓯ ꓟꓴ ꓩꓴ ꓔꓸ
2020 ꓘꓳꓼ ꓢꓲꓻ ꓣꓴ ꓑꓮꓲꓽ ꓗꓪ ꓟꓽ ꓜꓳꓽ ꓟꓽ ꓔꓱꓹ ꓬꓰ ꓥ ꓐꓯ ꓢꓲꓸ ꓮꓳ-ꓢ-ꓢꓴ-ꓚꓰꓽ ꓔꓯ 2022 ꓘꓳꓼ 9 ꓦ 2 ꓠꓬꓲ ꓕꓯꓽ ꓟꓬꓱꓽ ꓩꓴ ꓩꓴ ꓬꓰ ꓢꓲꓸ ꓐꓱ ꓓꓴꓽ ꓗꓪ 3 ꓘꓳꓼ ꓡꓴꓽ ꓠꓹ ꓟ ꓐꓯ ꓟꓴ ꓞꓷꓹ ꓩꓴ ꓡ ꓡꓳ꓿
2020 ꓘꓳꓼ ꓢꓲꓻ ꓣꓴ ꓑꓮꓲꓽ ꓗꓪ ꓛꓳꓽ ꓡꓳꓸ ꓢꓴ ꓜꓴ ꓐꓴ ꓡꓰꓽ ꓔꓱꓹ ꓔꓱꓹ ꓜꓳꓽ ꓜꓳꓽˍ ꓡꓰ ꓢꓲꓻ ꓣꓴ ꓑꓮꓲ ꓬꓰ ꓓꓳ ꓡꓰˍ ꓡꓳ꓾ ꓐꓰ ꓐꓯ ꓔꓸ ꓥ ꓟꓲ꓾ ꓟꓯꓼ ꓡꓰꓽ ꓝꓴꓲꓸ ꓧꓪ ꓔꓬ ꓟ ꓥ ꓡꓳ꓿
ꓝꓮꓲ 2008 ꓗꓴꓷꓼ ꓙꓵꓽ ꓚꓱꓹ ꓟꓴ ꓚꓱꓹ ꓙꓵꓽ ꓗ ꓬꓲ ꓚꓰꓺ ꓗꓪ꓾ ꓢꓲꓻ ꓣꓴ ꓑꓮꓲ ꓔꓯ ꓟꓳꓸ ꓠꓲꓹ ꓘꓪ ꓟꓽ ꓫꓵꓺ ꓓꓴ ꓙꓳˍ ꓠꓬ ꓴꓰꓚ (ꓗꓴꓷꓼ ꓢꓲ ꓣꓴ ꓜꓴ ꓗꓳ-ꓟꓲ-ꓫꓲ) ꓗꓪ ꓗꓳꓹ ꓓ ꓢꓲ꓾ ꓴꓰꓚ ꓡꓰꓽ ꓫꓵꓽ ꓘꓶꓽ ꓟ ꓕꓯꓽ ꓢꓲ ꓪꓴꓽˍ ꓟ ꓟꓽ ꓙꓳ꓾ ꓐꓰ ꓴꓰꓚ ꓔꓯ ꓙꓵꓽ ꓪ ꓒ ꓐꓲ ꓖꓶ ꓔ ꓡꓳ꓿ ꓖꓳ ꓡꓱ ꓥ ꓟꓲ ꓟꓬ-ꓟ ꓟꓯꓼ ꓠꓬ ꓴꓰꓚ ꓗꓪ ꓟꓽ ꓗꓳꓹ ꓗꓳꓹ ꓗꓴꓷꓼ ꓧꓳꓽ ꓢꓴ ꓟꓴ ꓢꓴ ꓮ ꓙꓵꓽ ꓔꓯ ꓣꓴ ꓡꓴꓽ ꓔꓸ꓾ꓝꓴꓲꓸ ꓓꓰꓺ ꓔꓬ ꓟ ꓥ ꓡꓳ꓿
“ꓴꓰꓚ ꓙꓵꓽ ꓪ ꓔꓯ ꓘꓱꓻ ꓢꓲꓸ ꓬꓰˍ ꓟ꓾ 2021 ꓘꓳꓼ 2 ꓦ 1 ꓠꓬꓲ ꓗꓪ ꓗꓴꓷꓼ ꓑ ꓫꓬ ꓝꓲ ꓓꓴ ꓐꓴ ꓖꓪ ꓙꓱ ꓜꓲꓼ ꓓꓴ ꓘꓴˍ ꓟ ꓠꓬ ꓟꓽ ꓜꓳꓽ ꓐꓰ ꓐꓯˍ ꓟ ꓮ ꓙꓵꓽ ꓠꓬ꓾ ꓗꓶꓸ ꓘꓶꓽ ꓥ ꓡꓳ” ꓐꓰ ꓬꓯꓹ-ꓕꓵꓼ ꓡꓰ Facebook ꓗꓪ ꓡꓯ ꓫꓵ ꓐꓳ ꓔꓬ ꓡꓳ꓿
ꓖꓲ ꓟ ꓑꓶꓸ ꓓꓴ ꓮ ꓟꓶ ꓐꓯ ꓟꓴ ꓘꓶꓽ ꓓꓳˍ ꓟ ꓮ ꓙꓵꓽ ꓠꓬ꓾ 20 ꓘꓳꓼ ꓡꓴꓽ ꓓꓴ ꓗ ꓬꓰꓳ꓿ ꓖꓳ ꓗꓪ ꓟꓬꓱꓽ ꓩꓴ ꓩꓴ ꓬꓰ ꓠꓹ ꓟ ꓝꓴꓲꓸ ꓥ ꓟꓲ ꓔꓺ ꓩꓴ ꓡ ꓡꓳ꓿ ꓝꓸ ꓢꓲꓸ ꓐꓯ ꓟꓴ ꓚꓱꓹ ꓮ ꓟꓬꓹ ꓜꓰ ꓞˍ ꓢꓰꓽ ꓡꓳ꓿
ꓲ-ꓓꓲ-ꓬ ꓡꓰ ꓬꓲꓸ ꓪꓴꓸ ꓫꓬꓹ ꓓꓳ ꓡ ꓟ ꓙꓱ ꓦꓲ ꓚꓰꓹ ꓞꓽ ꓒꓳꓽ ꓓꓽ ꓟ Vikrant
ꓐꓳꓽ ꓞꓰ ꓟꓯꓼ ꓙꓱ ꓦꓲ ꓐꓰ ꓙꓱ ꓦꓲ ꓑꓳꓼ ꓡꓳꓼ 30 ꓟ ꓚꓰꓹ ꓓˍ ꓟ Vikrant ꓐꓰ ꓬꓲꓸ ꓟꓬꓱꓺ ꓖꓶꓽ ꓔꓸ ꓟ ꓙꓱ ꓦꓲ ꓚꓰꓹ ꓞꓽ ꓒꓳꓽ ꓓꓽ ꓟ ꓕꓲꓽ ꓢꓶꓽ ꓔꓯ ꓲ-ꓓꓲ-ꓬ ꓡꓰ ꓬꓲꓸ ꓪꓴꓸ ꓕꓲꓽ ꓧꓪꓹ ꓫꓬꓹ ꓚꓰꓼ ꓓꓳ ꓩꓴ ꓡ ꓡꓳ꓿
ꓟꓯꓼ ꓞꓽ ꓒꓳꓽ ꓓꓽ ꓟ
13 ꓘꓳꓼ ꓫꓬꓹ ꓚꓰꓼ ꓡ ꓢꓲ꓾ 45000 ꓓꓽ ꓡꓲꓽˍ ꓟ ꓟꓯꓼ ꓞꓽ ꓒꓳꓽ ꓔꓯ 2022 ꓘꓳꓼ 9 ꓦ 2 ꓠꓬꓲ ꓕꓯꓽ ꓲ-ꓓꓲ-ꓬ ꓗꓴꓷꓼ ꓖꓴ ꓟꓶꓸ ꓗ-ꓡ-ꓬ ꓟꓵꓽ ꓗꓪ꓾ ꓒꓴ ꓑꓮꓲꓽ ꓬꓰ ꓡꓳ꓿ ꓑꓮꓲ ꓖꓳ ꓟ ꓗꓪ ꓲ-ꓓꓲ-ꓬ ꓗꓴꓷꓼ ꓟꓬꓱꓽ ꓢꓲꓺ ꓓꓽ ꓟ ꓟꓳ-ꓓꓲ ꓜꓲꓼ ꓡ ꓡꓳ꓿
ꓞꓽ ꓒꓳꓽ ꓓꓽ ꓟ ꓠꓬ꓾ ꓫꓵꓺ ꓓꓴ ꓔꓯ ꓟꓳꓸ 860 ꓑꓯꓸ꓾ ꓟꓴ ꓔꓯ ꓟꓳꓸ 197 ꓑꓯꓸ ꓙꓳ ꓡꓳ꓿ ꓲ-ꓓꓲ-ꓬ ꓢꓷꓸ ꓠꓲꓹ ꓙꓳ ꓢꓴ ꓐꓴ ꓡꓰꓽ ꓬꓲꓸ ꓐꓬꓱꓽ ꓐꓳˍ ꓟ ꓗꓪ ꓐꓰ꓾ ꓬꓲꓸ ꓚꓽ ꓫꓬꓹ ꓚꓰꓼ ꓓꓳ ꓡ ꓗꓪ ꓛꓲ ꓢꓯꓼ ꓕꓵꓼ ꓔꓸ ꓟ ꓥ ꓡꓳ꓿
ꓞꓽ ꓒꓳꓽ ꓓꓽ ꓟ ꓫꓬꓹ ꓒꓬꓱꓼ ꓡ ꓗꓪ ꓛꓲ ꓣꓴ-ꓑꓰꓸ ꓒꓴ 200000 ꓪꓹ (ꓴꓢꓓ 2500 ꓪꓹ) ꓣꓱꓽ ꓔꓸ ꓡꓳ꓿ ꓕꓱ ꓟ ꓑꓶꓸ ꓓꓴ ꓲ-ꓓꓲ-ꓬ ꓗꓴꓷꓼ ꓥ ꓟꓲ ꓟꓲ ꓠꓯ ꓚꓺ ꓟꓲꓽ ꓗꓪ ꓟꓯꓼ ꓞꓽ ꓒꓳꓽ ꓓꓽ ꓟ ꓫꓬꓹ ꓚꓰꓼ ꓐ ꓡ ꓟ ꓗꓴꓷꓼ ꓕꓲꓽ ꓟ ꓒꓬꓱꓼ ꓡ ꓡꓳ꓿
