ꓧꓶꓽ ꓖꓴ ꓟꓶꓸ ꓬꓲꓻ ꓡꓴꓽ ꓐꓱ ꓓꓽ ꓟ ꓗꓪ ꓧꓶꓽ ꓐꓰ ꓴꓢꓮ ꓔꓯꓺ ꓡꓯ ꓘꓳ ꓔꓬ
ꓴꓢꓮ ꓠꓬ ꓧꓶꓽ ꓒꓽ ꓙꓵꓽ ꓪ ꓔꓯ ꓮ ꓟꓬꓹ ꓧꓪꓹ ꓘꓶ ꓡꓶꓽ ꓡ ꓔꓬ ꓡꓳ꓿ ~ ꓧꓶꓽ ꓗꓴꓷꓼ ꓗꓪ ꓐꓰ ꓫꓸ ꓕꓱ ꓙꓵꓽ ꓪ ꓙꓳ ꓢꓴ ꓔ-ꓙꓴ-ꓡꓲ (Tian Junli)
ꓧꓶꓽ ꓗꓴꓷꓼ ꓠꓬ ꓟꓵ ꓗꓳ ꓓꓵ ꓓꓵꓬꓲ ꓙꓬ ꓟꓵꓽ ꓙꓵꓽ ꓪ ꓔꓯ ꓘꓶ ꓡꓶꓽ ꓔꓬ ꓡꓳ꓿ ~ ꓴꓢꓮ ꓗꓴꓷꓼ ꓗꓪ ꓐꓰ ꓫꓸ ꓕꓱ ꓙꓵꓽ ꓪ ꓙꓳ ꓢꓴ ꓠꓲ-ꓗꓳ-ꓡꓼ ꓡꓲ-ꓖꓳ (Nicholas Lingo)
ꓴꓢꓮ ꓟꓯꓼ ꓞꓽ ꓒꓳꓽ ꓓꓽ ꓟ USS Benfold ꓠꓬ ꓧꓶꓽ ꓗꓴꓷꓼ ꓔꓯꓸ ꓥ ꓡꓳ ꓐꓰ ꓐꓯ ꓔꓬ ꓟ Paracel ꓬꓲꓻ ꓗꓳ ꓡꓳ ꓒꓻ ꓕꓲ ꓗꓪ 2022 ꓘꓳꓼ 7 ꓦ 12 ꓠꓬꓲ ꓕꓯꓽ ꓫꓵꓸ ꓙ ꓙꓰꓳ ꓐꓰ꓾ꓧꓶꓽ ꓗꓴꓷꓼ ꓐꓱ ꓶ ꓫꓸ ꓕꓱ ꓙꓵꓽ ꓪ ꓙꓳ ꓢꓴ ꓔ-ꓙꓴ-ꓡꓲ (Tian Junli) ꓡꓰ ꓠꓯˍ ꓡꓳ꓿
“ꓴꓢꓮ ꓟꓯꓼ ꓠꓰ ꓬꓰˍ ꓟ ꓚꓱꓹ ꓠꓬ ꓧꓶꓽ ꓗꓴꓷꓼ ꓙꓵꓽ ꓪ ꓔꓯ ꓮ ꓘꓶꓸ ꓘꓶ ꓡꓶꓽ ꓡ ꓔꓬ ꓟˍ ꓐꓰ꓾ ꓧꓶꓽ ꓖꓴ ꓟꓶꓸ ꓬꓲꓻ ꓡꓴꓽ ꓐꓱ ꓗꓪ ꓢꓲ ꓡꓲꓹ ꓟ ꓚꓱꓹ ꓔꓯ ꓘꓶ ꓡꓶꓽ ꓜꓯꓼ ꓡꓰˍ ꓡꓳ꓿ ꓟꓵ ꓗꓳ ꓓꓵ ꓓꓵ ꓙ ꓡꓯ ꓘꓳ ꓚꓱꓹ ꓙꓵꓽ ꓗ ꓔꓯˍ ꓟ ꓘꓱꓻ ꓬꓰꓳ” ꓐꓰ ꓧꓶꓽ ꓟꓯꓼ ꓔꓯ ꓟꓳꓸ ꓫꓸ ꓕꓱ ꓙꓵꓽ ꓪ ꓙꓳ ꓢꓴ ꓔ-ꓙꓴ-ꓡꓲ (Tian Junli) ꓡꓰ ꓕꓱ ꓩꓴ ꓡ ꓡꓳ꓿
ꓴꓢꓮ ꓬꓲꓻ ꓙꓬ ꓟꓯꓼ ꓗꓪ ꓐꓰ ꓫꓸ ꓕꓱ ꓙꓵꓽ ꓪ ꓙꓳ ꓢꓴ ꓠꓲ-ꓗꓳ-ꓡꓼ ꓡꓲ-ꓖꓳ (Nicholas Lingo) ꓡꓰꓽ “USS Benfold ꓠꓬ ꓟꓵꓽ ꓗꓳ ꓓꓵ ꓓꓵ ꓬꓲꓻ ꓙꓬ ꓚꓱꓹ ꓗꓪ ꓡꓯ ꓶꓹ ꓡꓯꓽ ꓕꓽ ꓙꓰ ꓐ ꓡ ꓟ ꓙꓵꓽ ꓪ ꓔꓯ 2 ꓧꓪꓹ ꓕꓲꓽ ꓧꓪꓹ ꓣꓱꓽˍ ꓟ ꓥ ꓡꓳ꓿ ꓧꓶꓽ ꓖꓴ ꓟꓶꓸ ꓬꓲꓻ ꓡꓴꓽ ꓐꓱ ꓓꓽ ꓟ ꓗꓪ ꓢꓲ ꓡꓲꓹ ꓟ ꓔꓯ ꓘꓶꓻ ꓡꓶꓽ ꓢꓴ ꓠꓬ ꓴꓢꓮ ꓟꓽ ꓥ꓿ ꓮ ꓔꓳ ꓔꓳ ꓟꓵꓽ ꓦꓴ ꓔꓬ ꓟ ꓧꓶꓽ ꓗꓴꓷꓼ ꓥ ꓡꓳ꓿ ꓧꓶꓽ ꓗꓴꓷꓼ ꓡꓰꓽ ꓬꓰ ꓩꓴ ꓡ ꓔꓬ ꓟ ꓠꓬ ꓟꓵ ꓗꓳ ꓓꓵ ꓓꓵ ꓬꓲꓻ ꓙꓬ ꓚꓱꓹ꓾ ꓟꓵꓽ ꓪꓴꓽ ꓚꓱꓹ꓾ ꓶ ꓡꓯꓼ ꓬꓰ ꓚꓱꓹ꓾ ꓗꓴꓷꓼ ꓮ ꓟꓬꓹ ꓓꓵꓽ ꓓꓳ ꓚꓱꓹ ꓮ ꓙꓵꓽ ꓔꓯ ꓑꓲꓸ ꓞꓲꓽ ꓔꓬ ꓟ꓾ ꓮ ꓘꓶꓸ ꓘꓶꓻ ꓡꓶꓽ ꓔꓬ ꓟ ꓥ ꓡꓳ” ꓐꓰ ꓴꓢꓮ ꓬꓲꓻ ꓙꓬ ꓟꓯꓼ ꓜꓴ (7) ꓗꓪ ꓐꓰ ꓫꓸ ꓕꓱ ꓙꓵꓽ ꓪ ꓙꓳ ꓢꓴ ꓠꓲ-ꓗꓳ-ꓡꓼ ꓡꓲ-ꓖꓳ (Nicholas Lingo) ꓡꓰ ꓐꓯ ꓡꓽ ꓩꓴ ꓡ ꓡꓳ꓿
ꓕꓱ ꓕꓲ ꓝꓲꓸ ꓧꓶꓽ ꓖꓴ ꓟꓶꓸ ꓬꓲꓻ ꓡꓴꓽ ꓐꓱ ꓗꓪ ꓴꓢꓮ꓾ ꓗ-ꓠꓯ-ꓓ꓾ ꓳ-ꓢꓲ-ꓔꓯ-ꓡꓲ-ꓬ ꓟꓯꓼ ꓞꓽ ꓒꓳꓽ ꓐꓴ ꓜꓲꓼ ꓔꓬ ꓢꓲ꓾ ꓧꓶꓽ ꓗꓴꓷꓼ ꓟꓯꓼ ꓙꓱ ꓦꓲ ꓐꓰ ꓞ ꓒꓳꓽ ꓐꓴ ꓥ ꓟꓲ 24 ꓙꓵꓹ ꓗꓽ ꓜꓳꓹ ꓔꓬ ꓡꓳ꓿
