ꓟꓶ ꓦ ꓟꓽ ꓜꓯꓼ ꓡ ꓢꓰ ꓕꓯꓽ ꓡꓲ-ꓢꓴ ꓟꓯꓼ ꓗꓽ ꓟꓵꓽ ꓓꓳ ꓡ ꓝꓲ ꓓꓴ ꓥꓳ

ꓪꓮꓲ-ꓟꓳ ꓐꓰ ꓟꓶ-ꓚꓲ-ꓠ ꓟꓵꓽ ꓗꓪ ꓡꓲ-ꓢꓴ ꓟꓯꓼ ꓬꓰ ꓠꓹ ꓟ ꓐꓯ ꓢꓲꓸ ꓞꓳ ꓤ ꓖꓼ ꓣꓴ ꓔꓬ ꓟ ꓓꓳꓽ ꓠꓬ ꓕꓱ ꓕꓲꓽ ꓝꓲꓸ ꓡꓲ-ꓢꓴ ꓐꓰ ꓡꓲ-ꓢꓴ ꓟꓽ ꓥ ꓢꓴ ꓮ ꓙꓵꓽ ꓐꓱ ꓶ ꓢꓰꓸ ꓮ ꓢꓸ ꓓꓴ ꓒꓬꓱꓼ ꓔꓬ ꓡꓳ꓿

ꓢꓲꓽ ꓒ ꓓ ꓟ ꓡ-ꓡꓴꓹ ꓟꓬꓱꓺ ꓐꓳ꓾ꓡꓯꓼ ꓓꓴ ꓢꓽ ꓔꓸ ꓟ ꓡꓲ-ꓢꓴ ꓟꓯꓼ ꓘꓴ ꓕꓳ ꓶ ꓕꓲꓽ ꓟ ꓠꓬ 2023 ꓘꓳꓼ 10 ꓦ 30 ꓠꓬꓲ ꓕꓯꓽ ꓓꓳ ꓩꓴ ꓡ ꓟ ꓗꓪ ꓐꓰ ꓞꓳ ꓤ ꓢꓰꓸ ꓮ ꓢꓸ ꓓꓴ ꓓꓳꓽ ꓕꓱ ꓟ ꓪꓴꓸ ꓔꓴ ꓡ ꓡꓳ꓿

ꓞꓲ ꓠꓲꓹ 2023 ꓘꓳꓼ 11 ꓦ 1-8 ꓠꓬꓲ ꓠꓬ ꓟꓯꓼ ꓘꓴ ꓓꓳꓽ ꓐꓯ ꓒꓬꓱꓺ ꓟ꓾ 11 ꓦ 9-22 ꓠꓬꓲ ꓗꓪ ꓠꓬ ꓟꓯꓼ ꓵ ꓟꓬꓱꓺ ꓘꓳ ꓣꓴ ꓟ꓾ 11 ꓦ 23 ꓠꓬꓲ ꓗꓪ ꓐꓰ ꓠꓬ ꓟꓯꓼ ꓗꓶ ꓡ ꓟꓽ ꓫꓳ ꓢꓴ ꓐꓴ ꓔꓯ ꓦꓲ ꓗꓪ ꓣꓴ ꓡ ꓠꓹ ꓟ ꓢꓷꓸ ꓙ ꓟꓴ ꓙ ꓘꓶꓽ ꓐꓳ ꓔꓸ ꓡꓳ꓿

“ꓥ ꓠꓴ ꓮ ꓙꓲꓸ ꓠ ꓤꓼ ꓟꓶꓼ ꓬꓳꓹ-ꓔꓳꓽ ꓟ ꓔꓯ ꓢꓲꓺ ꓒꓽ ꓦꓬꓼ ꓠꓬꓲ ꓟꓶ ꓘꓶꓼ ꓕꓽ ꓐꓱ ꓙ ꓗꓪ ꓚꓳꓸ ꓡꓽ ꓛꓴꓸ ꓗꓸ ꓗꓸ ꓥꓪꓽ ꓣꓳ ꓡ ꓢꓲꓸ ꓣꓴ ꓤꓼ ꓬꓰꓳ” ꓐꓯˍ ꓟ ꓫꓸ ꓪ ꓢꓯꓼ ꓕꓲꓽ ꓟ ꓠꓬ messenger ꓗꓪ ꓚꓳꓻ ꓔꓬ ꓟ ꓑ ꓙ ꓪ ꓡꓳ꓿ ꓬꓲꓸ ꓡꓰ ꓐꓯˍ ꓟ ꓢꓲꓺ ꓒ ꓦꓬꓼ ꓠꓬꓲ ꓠꓬ 11 ꓦ 12 ꓠꓬꓲ ꓔꓯ ꓖꓴ ꓡꓳ꓿

ꓖꓳ ꓡꓱ ꓥ ꓟꓲ messenger ꓗꓪ ꓕꓱ ꓔꓸ ꓟ ꓬꓲꓸ ꓢꓯꓼ ꓖꓳ ꓟ ꓔꓲꓸ ꓠꓰ ꓢꓲꓺ ꓒꓽ ꓡ-ꓡꓴꓹ ꓔꓯ ꓟꓽ ꓒꓵ ꓟꓽ ꓚ ꓮ ꓔꓳ ꓕꓱ ꓗꓷ ꓟ ꓔꓯ ꓖꓽ ꓖꓶ ꓡꓯ ꓐꓯ ꓢꓲꓸ ꓖꓶ ꓬꓲꓽ ꓘꓶꓽ ꓕꓱ ꓔꓸ ꓟ ꓢꓯꓸ ꓐꓬꓱꓽ ꓓꓳ ꓡ ꓡꓳ꓿

ꓢꓲꓽ ꓒ ꓡ-ꓡꓴ ꓔꓯ ꓖꓶ ꓬꓲꓽ ꓘꓶꓽ ꓫ ꓕꓱ ꓟ꓾ Watch Videohttps://m.facebook.com/story.php?story_fbid=6906722899408506&id=100002125928321&mibextid=Nif5oz

ꓖꓳ ꓟ ꓑꓶꓸ ꓓꓴ ꓝꓰꓹ ꓔꓸ ꓟ ꓦꓬꓼ ꓠꓬꓲ ꓗꓪ ꓟꓯꓼ ꓬꓲꓸ ꓚꓽ ꓣꓴ ꓔꓬ꓾ ꓟꓽ ꓔꓬ ꓟ ꓚꓲꓸ ꓚ ꓫꓸ ꓓꓴ ꓒꓬꓱꓼ ꓡ ꓡꓳ꓿ ꓗꓸ ꓠꓯꓸ ꓢꓲ ꓗꓴ ꓗꓴ ꓗꓪ ꓮ ꓡꓲ ꓒꓬꓱꓼ ꓔꓬ ꓟ ꓔꓯ ꓢꓷꓸ ꓠꓹ ꓟ ꓬꓰ ꓫꓸ ꓡ ꓡꓳ꓿

“ꓖꓳ ꓑꓳꓸ ꓕ ꓑꓳꓸ ꓚꓳꓹ ꓡꓯ ꓘꓳ_ ꓟ ꓓꓳꓽ ꓥ ꓪ ꓡꓰ ꓔꓸ ꓥ꓿ ꓔꓳꓼ ꓕꓱ ꓕꓲ ꓣꓳ ꓟ ꓣꓴ ꓤ ꓙꓰꓳ ꓐꓯ ꓓꓴ ꓟꓽ ꓙꓳ ꓢꓰ:꓿ ꓪ ꓘꓴ ꓦꓲ ꓗꓪ ꓓꓵꓽ ꓢꓲꓸ ꓟꓯꓼ ꓝꓲꓸ ꓙꓰ ꓟ ꓟꓽ ꓙꓳ ꓢꓰ꓿” ꓐꓰ ꓟꓶ-ꓚꓲ-ꓠ ꓑ-ꓟꓶ-ꓓꓰ ꓘꓹ ꓢꓴ ꓕꓲ ꓣꓳ ꓠꓰ ꓐꓯ ꓡꓳ꓿

ꓕꓱ ꓡꓱ ꓗꓹ ꓟ ꓠꓬꓲꓽ ꓗꓴꓸ ꓚꓸ ꓗꓪ ꓐꓶꓽ ꓟꓵꓽ ꓗꓪ ꓛꓲ ꓔꓬ ꓟ ꓡꓲ-ꓢꓴ ꓐꓴ ꓡꓰ ꓢꓲꓽ ꓒ ꓓꓽ ꓟ ꓡ-ꓡꓴꓹ ꓬꓰ ꓔꓬ ꓟ ꓙ ꓖꓴ ꓔꓯ ꓐꓯ ꓕꓼ ꓠꓬꓲ꓾ ꓔꓳꓹ ꓘꓶꓽ ꓫꓸ ꓪ ꓕꓱ ꓓꓳ ꓡ ꓟ꓾ ꓕꓳ ꓶ ꓐꓳ ꓓꓳ ꓡ ꓟ ꓙꓳ ꓡꓳ꓿ ꓖꓳ ꓗꓪ ꓮ-ꓟꓯ-ꓣꓲ-ꓗ ꓐꓰ ꓳ-ꓢꓲ-ꓔꓯ-ꓡꓲ-ꓬ ꓢꓴ ꓐˍ ꓡꓳ꓿ ꓝꓮꓲ ꓧꓶꓸ ꓕꓯ ꓡꓲ-ꓢꓴ ꓢꓲꓽ ꓒ ꓡꓵꓺ ꓮ-ꓔꓲ ꓬꓳ-ꓦ ꓥ ꓟꓲ ꓗꓠꓖ ꓓꓳꓽ ꓗꓪ ꓕꓱ ꓟ ꓙ ꓖꓴ ꓔꓯ ꓒꓶꓻ ꓟꓸ ꓘꓶ ꓕꓱ ꓔꓸ ꓡꓳ꓿

Watch More Video From Australia Lisu Youth.

LNO Statement; https://www.facebook.com/photo?fbid=698241315818622&set=a.405794331729990

“ꓡꓲ-ꓢꓴ ꓟꓯꓼ ꓣꓴ ꓚꓱꓹ ꓬꓰ ꓡ ꓟ ꓠꓬ ꓡꓲ-ꓢꓴ ꓔꓯ ꓠꓬꓲ ꓟꓽ ꓟꓳꓻ꓾ ꓟꓽ ꓒꓵꓽ ꓟ ꓥꓳ꓿ … ꓗꓲꓳ/ꓗꓲꓮ ꓔꓯ ꓒꓵꓽ ꓒ ꓐꓴ ꓡꓰ ꓔꓶ ꓔꓸ ꓟ ꓥꓳ꓿ ꓕꓱ ꓟ ꓔꓯ ꓓꓶꓽ ꓠꓹ ꓟ ꓔꓳꓼ ꓡ ꓟ ꓠꓬ ꓫꓱ-ꓟꓷ ꓬꓲꓸ ꓶ ꓡꓯꓼ ꓚꓱꓹ ꓬꓰˍ ꓟ ꓥ ꓡꓳ” ꓐꓰ ꓗꓠꓖ ꓓꓳꓽ ꓗꓪ ꓡꓲ-ꓢꓴ ꓢꓲꓽ ꓒ ꓡꓵꓺ ꓮ-ꓔꓲ ꓬꓳ-ꓦ ꓡꓰ ꓢꓯꓸ ꓐꓬꓱꓽ ꓗꓪ ꓐꓰ ꓫꓸ ꓕꓱ ꓔꓸ ꓡꓳ꓿

ꓡꓲ-ꓢꓴ ꓢꓲꓽ ꓒ ꓡꓵꓸꓸ ꓮ-ꓔꓲ ꓬꓳ-ꓦ ꓫ ꓕꓱ ꓘꓶ ꓢꓯꓼ ꓐꓬꓱꓽ ꓸꓸ More Watch.https://fb.watch/osVkWte0g9/

ꓡꓲ-ꓢꓴ ꓐꓴ ꓮ ꓟꓬꓹ ꓔꓬ ꓟ ꓗ-ꓛꓲ ꓟꓵꓽ ꓗꓪ ꓲꓠꓔꓰꓣꓠꓰꓔ ꓥ ꓟꓲ ꓟꓽ ꓙꓲ ꓗꓷ ꓡꓰ ꓟ ꓕꓲꓽ ꓫꓵꓽ ꓠꓽ ꓛꓲ ꓗ ꓬꓰꓳ꓿ Internet ꓙꓲ ꓡ ꓟ ꓕꓲꓽ ꓠꓬꓲ ꓗꓪ ꓢꓲꓽ ꓒ ꓓ ꓟ ꓡ-ꓡꓴꓹ ꓡꓰ꓾ the Lisu Time ꓠꓻ ꓠꓬꓲ ꓘꓶꓽ ꓔꓯ ꓒꓶꓻ ꓖꓶ ꓡ ꓟ ꓠꓬ꓾

“.. ꓫꓵꓽ ꓐꓱ ꓶ ꓟꓬꓱꓽ ꓬꓰ ꓟ ꓗꓪ ꓔꓳꓹ ꓢꓴ ꓙꓳ ꓥ ꓟꓲ (0.001%) ꓡꓰ ꓙꓳ ꓡꓳ꓿ ꓬꓲꓸ ꓪ ꓟꓲ ꓠꓱꓸ ꓐꓯꓼ ꓢꓴ ꓐꓯˍ ꓟ ꓔꓯ ꓮ ꓔꓳ ꓔꓳ ꓔꓺ ꓔꓬ ꓟ ꓥ ꓡꓳ꓿ ꓥꓪ ꓠꓬ ꓗꓲꓳ/ꓗꓲꓮ ꓟꓽ ꓥ ꓠꓬ ꓠꓱꓸ ꓐꓯꓼ ꓮ ꓟ ꓔꓯˍ ꓟꓲ ꓟꓽ ꓔꓳꓹ ꓠꓬꓲ꓿ NLD NUG CRPH NUCC PDF ꓮ ꓡꓲ ꓕꓲꓽ ꓜꓴ ꓔꓯˍ ꓟꓲ ꓟꓽ ꓫꓸ ꓝꓲꓸ꓾ ꓟꓽ ꓐꓯ ꓕꓼ꓿ ꓬꓲꓸ ꓪ ꓠꓬ ꓣꓳˍ ꓐꓰ ꓔꓳꓼ ꓟꓽ ꓠꓶꓽ ꓡꓯ ꓘꓳ꓿ ꓮ ꓟꓶ ꓣꓳ ꓔꓯ ꓘꓶꓻ ꓙꓲ ꓫꓸ ꓟꓴ ꓫꓸ ꓚꓬ ꓬꓰ ꓔꓬ ꓢꓴ ꓠꓬ ꓗꓲꓳ/ꓗꓲꓮ ꓥꓳ꓿” ꓐꓯ ꓡꓳ꓿ (ꓡꓴ-ꓟꓲꓽ ꓥꓳꓽ ꓗꓪ ꓐꓰ ꓐꓳ ꓔꓸ ꓟ ꓔꓯ ꓓꓴꓸ ꓓꓴꓸ ꓤꓼ ꓡꓶꓸ ꓐꓳ ꓔꓸ ꓟ ꓥꓳ)

ꓢꓲꓽ ꓒ ꓓ ꓟ ꓡ-ꓡꓴꓹ ꓠꓬ ꓡꓲ-ꓢꓴ ꓛꓬꓹ ꓑ-ꓔꓲ ꓜꓯꓻ ꓢꓴ꓾ ꓝꓮꓲ ꓟꓰꓹ-ꓮꓳ-ꓡꓮꓲꓽ ꓠꓰ သီရိပျံချီ ꓟꓬꓱ ꓓꓳꓽ ꓡꓯꓼ ꓫꓴ ꓖꓶ ꓔꓸ ꓢꓴ꓾ ꓮ ꓟꓶ ꓡꓲ-ꓢꓴ ꓟꓯꓼ ꓔꓯ ꓧꓳꓽ ꓢꓴ ꓒꓬꓱꓼ ꓡ ꓡꓳ꓿
“ꓡꓲ-ꓢꓴ ꓫꓵꓽ ꓙꓳ ꓠꓬ ꓟꓯꓼ ꓙꓳ ꓠ ꓗ꓿ ꓟꓯꓼ ꓟꓽ ꓙꓳ ꓠꓬ ꓢꓴ ꓡꓰ ꓟꓽ ꓒꓵꓽ ꓡ꓿ ꓣꓳ ꓫꓵꓽ ꓐꓱ ꓶ ꓟꓬꓱꓽ ꓬꓰ ꓟꓽ ꓐ ꓡ꓿ ꓖꓳ ꓟ ꓑꓶꓸ ꓓꓴ ꓡ ꓠꓹ ꓟ ꓟꓶ ꓦ ꓜꓯꓼ ꓝꓲꓸ ꓟꓽ ꓛꓲ ꓡ ꓢꓰꓽ ꓕꓯ ꓡꓲ-ꓢꓴ ꓟꓯꓼ ꓓꓳ ꓢꓲꓸ ꓟꓵꓽ ꓗꓽ ꓠꓹ ꓟ ꓢꓯꓼ ꓕꓵꓼ ꓓꓴ ꓥꓳ꓿ ꓔꓳꓹ ꓢꓴ ꓙꓳˍ ꓟꓲ ꓕꓱ ꓟ ꓠꓬ ꓬꓲꓸ ꓡꓲꓽ ꓥꓳ꓿ ꓢꓲꓺ ꓒ ꓬꓰ-ꓢꓴ ꓠꓬ ꓡ ꓞꓳ ꓔꓯ ꓚꓬꓴꓹ ꓙ ꓠꓹ ꓟ ꓙꓲˍ ꓟ ꓬꓰ ꓖꓶ ꓥ ꓟꓲ ꓬꓲꓸ ꓝꓲ ꓓꓴ꓾ ꓢꓷꓸ ꓠꓲꓹ ꓙꓳ ꓢꓴ ꓠꓰ ꓔꓳꓹ ꓢꓲꓸ ꓪꓴꓽ ꓜꓽ ꓗꓷꓳ ꓟ ꓙꓳ ꓡꓳ꓿ ꓥꓪ ꓠꓬ ꓮ ꓘꓶꓸ ꓓꓻ ꓢꓴ ꓟꓽ ꓥ꓿ ꓖꓳ ꓡꓱ ꓟꓲ ꓫꓵꓽ ꓐꓱ ꓶ ꓔꓶ ꓙꓱꓼ ꓟꓽ ꓶꓹ ꓡꓵ ꓡꓰ ꓝꓲ꓿ ꓟꓶ ꓦ ꓟꓽ ꓜꓯꓼ ꓡ ꓢꓰ ꓕꓯꓽ ꓡꓲ-ꓢꓴ ꓟꓯꓼ ꓗꓽ ꓟꓵꓽ ꓓꓳ ꓡ ꓝꓲ ꓓꓴ ꓥꓳ” ꓐꓯˍ ꓡꓳ꓿” ꓐꓰ ꓐꓯˍ ꓡꓳ꓿

ꓮ ꓟꓶ ꓕꓱ ꓕꓲꓽ ꓝꓲꓸ ꓠꓬ ꓗ-ꓛꓲ ꓟꓵꓽ ꓗꓪ ꓗꓲꓮ ꓐꓰ ꓟꓬ-ꓟ ꓟꓯꓼ ꓐꓴ ꓮ ꓘꓶꓸ ꓔꓳꓼ ꓡꓯ ꓘꓳ ꓔꓬ ꓟ ꓦꓬꓼ ꓠꓬꓲ ꓥ ꓢꓲ꓾ ꓡꓲ-ꓢꓴ ꓐꓴ ꓥ ꓟꓲ ꓮ ꓡꓲ ꓕꓲꓽ ꓛꓱꓽ ꓗꓪ ꓦꓰꓼ ꓠꓹ ꓟ ꓓꓵꓽ ꓙ ꓫꓸ ꓓꓴ ꓙꓳ ꓡ ꓔꓬ ꓡꓳ꓿