ꓟꓬ-ꓟ ꓟꓯꓼ ꓶ ꓡꓯꓼ ꓜꓴ ꓕꓲ ꓟ ꓥ ꓟ Myanmar Brewery ꓡꓰ ꓶ ꓡꓯꓼ ꓚꓱꓹ ꓞꓳꓸ ꓬꓰ ꓡ ꓔꓬ ꓠꓬꓲ ꓶ ꓡꓯꓼ ꓜꓴ ꓔꓯ ꓒꓬꓹ ꓠꓽ ꓩꓴ ꓠꓹ ꓟ ꓫꓵꓽ꓿ ꓘꓶ ꓖꓶ ꓡꓯ ꓐꓯ ꓢꓲ꓾ 2021 ꓘꓳꓼ 11 ꓦ 19 ꓠꓬꓲ ꓕꓯꓽ ꓬꓥ-ꓖꓳꓥ ꓐꓶꓽ ꓓꓵꓽ ꓫꓵꓽ ꓘꓶꓽ ꓖꓴ ꓗꓪ ꓓꓰꓽ ꓗꓷ ꓟ ꓔꓯ ꓙ-ꓑ ꓶ ꓡꓯꓼ ꓜꓴ ꓗꓲꓣꓲꓠ ꓡꓰ ꓒꓳꓹ ꓔꓳꓹ ꓩꓴ ꓡ ꓡꓳ꓿
ꓕꓱ ꓟ ꓠꓬ ꓶ ꓡꓯꓼ ꓜꓴ ꓠꓬꓲꓽ ꓟ ꓑꓯꓹ ꓡꓯ꓿ ꓘꓳ ꓔꓸ ꓟ ꓔꓯ ꓕꓲ ꓜꓴ ꓠꓲꓹ ꓡꓶꓽ ꓗꓪ ꓐꓰ ꓮ ꓡꓲ ꓜꓳꓽ ꓮ ꓡꓲ ꓶ ꓡꓯꓼ ꓛꓬꓹ ꓖꓪꓽ ꓩꓴ ꓓꓴ ꓬꓰ ꓟ ꓥꓳ ꓐꓰ ꓗꓲꓣꓲꓠ ꓶ ꓡꓯꓼ ꓜꓴ ꓡꓰ ꓐꓯ ꓡꓳ꓿
“ꓶ ꓡꓯꓼ ꓔꓺ ꓡꓯ ꓘꓳ ꓚꓱꓹ ꓡꓳ ꓚ꓾ ꓶ ꓡꓯꓼ ꓬꓰ ꓚꓱꓹ ꓠꓽ ꓬꓰ ꓠꓬ ꓮ ꓡꓲ ꓬꓰ ꓠꓹ ꓟ ꓗꓲꓣꓲꓠ ꓡꓰ ꓬꓲꓸ ꓚꓱꓹ ꓖꓴ ꓟꓳꓸ ꓔꓸ ꓟ ꓔꓯ ꓛꓳ ꓟꓽ ꓫꓳ꓿ ꓮ ꓟꓶ ꓫꓵꓽ ꓘꓶꓽ ꓖꓴ ꓗꓪ ꓕꓱ ꓡꓱ ꓓꓰꓽ ꓔꓬ ꓟ ꓠꓬ꓾ ꓶ ꓡꓯꓼ ꓚꓱꓹ ꓗꓪ ꓮ ꓡꓲ ꓠꓲꓹ ꓫꓵ ꓮ ꓡꓲ ꓛꓬꓹ ꓠꓹ ꓟ ꓢꓯꓼ ꓕꓵꓼ ꓔꓬ ꓠꓬꓲ꓾ ꓪꓽ ꓟꓽ ꓓ” ꓐꓰ ꓗꓲꓣꓲꓠ ꓡꓰ ꓐꓯ ꓩꓴ ꓡ ꓡꓳ꓿
ꓗꓲꓣꓲꓠ ꓠꓬ ꓟꓬ-ꓟ ꓟꓯꓼ ꓶ ꓡꓯꓼ ꓜꓴ ꓥ ꓟ ꓟꓬꓮꓠꓟꓮꓣ ꓐꓣꓰꓪꓰꓣꓬ ꓐꓰ ꓶ ꓡꓯꓼ ꓔꓺ ꓡꓯ ꓘꓳ ꓩꓴ ꓡ ꓟ ꓥ ꓢꓲ꓾ ꓙꓲ ꓒꓶꓽ ꓐꓰ ꓐꓲ-ꓬ ꓬꓲ ꓫꓵ ꓬꓲ ꓙꓰꓽ ꓫꓬꓹ ꓪꓴꓽ ꓟ ꓚꓱꓹ ꓗꓪ 100 ꓩꓴꓸ 51 ꓒꓴ ꓬꓲꓸ ꓗꓳ ꓗꓷ ꓔꓸ ꓡꓳ꓿ ꓕꓱ ꓟ ꓠꓬ 2015 ꓘꓳꓼ ꓗꓪ ꓐꓰ ꓪꓴꓸ ꓔꓴ ꓩꓴ ꓡ ꓟ ꓥ ꓢꓲ꓾ ꓧꓪꓽ ꓒꓴ ꓓꓳ-ꓡ 560 ꓪꓹ ꓬꓲꓸ ꓗꓳ ꓗꓶꓺ ꓡꓴꓽ ꓔ ꓡꓳ꓿
ꓟꓬꓮꓠꓟꓮꓣ ꓐꓣꓰꓪꓰꓣꓬ ꓶ ꓡꓯꓼ ꓜꓴ ꓗꓪ ꓗꓲꓣꓲꓠ ꓶ ꓡꓯꓼ ꓜꓴ ꓓꓵꓽ ꓡ ꓗꓸ ꓠꓯꓸ ꓧꓶꓸ ꓕꓯꓽ ꓙꓳˍ ꓟ ꓕꓯꓽ ꓢꓲ ꓬꓲꓸ ꓟꓬꓤꓺ ꓬꓲ ꓫꓵꓼ ꓗꓪ ꓐꓰ ꓓꓳ ꓡ ꓟ ꓐꓲ-ꓬ ꓠꓬ꓾ Kirin Ichiban, Andaman Gold and Black Shield Stout ꓐꓴ ꓥ ꓢꓲ꓾ ꓟꓬ-ꓟ ꓕꓲ ꓗꓴꓷꓼ ꓡꓱꓸꓼ ꓗꓪ ꓪꓴꓽ ꓪ ꓔꓬ ꓟ ꓙꓲ ꓒꓶꓽ ꓐꓰ ꓐꓲ-ꓬ ꓓꓳ ꓫꓵꓽ ꓓꓳ ꓙꓰꓽ 100 ꓩꓴꓸ ꓗꓪ 80 ꓩꓴꓸ ꓛꓲ ꓪꓴꓽ ꓟꓶ ꓡꓳ꓿
ꓖꓳ ꓡꓱ ꓥ ꓟꓲ 2021 ꓘꓳꓼ 2 ꓦ 1 ꓠꓬꓲ ꓑ ꓫꓬ ꓙꓵꓽ ꓪ ꓦꓴ ꓡ ꓟ ꓕꓲ ꓠꓬꓲ ꓗꓪ ꓐꓰ ꓕ ꓑꓳꓸ ꓟꓬ-ꓟ ꓑ ꓫꓬ ꓐꓴ ꓠꓬ ꓟꓯꓼ ꓶ ꓡꓯꓼ ꓚꓱꓹ ꓮ ꓙꓵꓽ ꓔꓯ ꓒꓳꓹ ꓔꓳꓹ ꓡ ꓠꓬꓲ ꓧꓶꓸ ꓕꓯꓽ ꓟ ꓙꓱ ꓘꓪ 30 ꓩꓴꓸ ꓛꓲ ꓪꓴꓽ ꓟꓽ ꓙꓲ ꓬꓰꓳ꓿
ꓮ ꓟꓶ ꓠꓬ ꓶ ꓡꓯꓼ ꓜꓴ ꓕꓱ ꓠꓬꓲꓽ ꓟ ꓐꓶꓽ ꓗꓪ ꓡ ꓚꓱꓹ ꓗꓪ ꓔꓯ ꓟꓳꓸ ꓫꓵꓸ ꓙꓰ ꓔꓬ ꓟ ꓥ ꓡꓳ꓿
ꓗꓴꓷꓼ ꓙꓵꓽ ꓪ ꓔꓯ ꓟꓯꓼ ꓡꓰ ꓦꓴ ꓔꓯꓹ ꓙꓰ ꓡ ꓕ ꓑꓳꓸ ꓐꓶꓽ ꓗꓴꓷꓼ ꓗꓪ ꓐꓰ ꓡ ꓟ ꓶ ꓡꓯꓼ ꓬꓰ ꓜꓴ ꓓꓽ ꓟ Telenor, Metro, Adani, Kempinski Group, Myanmar Metals Limited, British American Tobacco Myanmar ꓡꓲꓳ ꓫꓵꓽ 10 ꓜꓴ ꓟꓽ ꓞꓲ ꓠꓬ ꓟꓬ-ꓟ ꓗꓴꓷꓼ ꓗꓪ ꓐꓰ ꓓꓳ ꓙꓰ ꓖꓴ ꓟ ꓥ ꓡꓳ꓿
