ꓧꓶꓸ ꓕꓯ ꓬꓯꓼ-ꓠ-ꓢꓸ ꓢꓴ꓾ ꓗꓸ ꓠꓯꓸ ꓠꓟ-ꓔ-ꓡꓯꓸ꓾ ꓟꓶ-ꓡ-ꓫꓵ-ꓓꓰ ꓐꓰ꓾ ꓟꓶ-ꓚꓲ-ꓠ ꓣꓮꓟ-ꓑꓴ ꓗꓪ ꓔꓬ ꓢꓴ ꓞꓳ ꓪꓴꓽ ꓙꓬ-ꓢꓲꓹ-ꓬꓯꓼ ꓠꓬ ꓟꓳ-ꓐꓲ ꓡꓳ ꓒꓱ꓾ ꓰꓐꓲ ꓗꓪ 2021 ꓘꓳꓼ 8 ꓦ 5 ꓠꓬꓲ ꓕꓯ ꓢꓲ ꓒ ꓠꓯꓸꓼ ꓗꓪ ꓬꓲꓼ ꓟꓶ ꓡꓰꓳ꓿
ꓬꓲꓸ ꓚ ꓟꓲꓽ ꓓꓴꓸ ꓓꓴꓸ ꓤꓼ ꓠꓬ ꓕꓱ ꓡꓱ ꓥꓳ꓿
ꓞꓳ ꓪꓴꓽ ꓙꓬ-ꓢꓲꓹ-ꓬꓯꓼ ꓔꓯ ꓬꓲꓸ ꓐꓹ ꓐ ꓙꓬ-ꓓꓶꓸ ꓐꓰ꓾ ꓟꓹ ꓟ ꓮ-ꓛ ꓐꓴ-ꓙ-ꓟ ꓐꓴ ꓡꓰ 1936 ꓘꓳꓼ ꓕꓯ ꓓꓰꓽ ꓟ ꓟꓵꓽ ꓬꓯꓼ-ꓠ-ꓢꓸ ꓘꓹ ꓗꓪ ꓦꓵ ꓗꓷꓳ꓿
1960 ꓘꓳꓼ ꓕꓯ ꓮ-ꓠ-ꓫꓳꓹ ꓔꓯ ꓝꓱꓺ ꓡꓯ ꓘꓳ ꓢꓲ꓾ ꓤ (5) ꓣꓳ꓾ ꓤ ꓟꓶꓼ (6) ꓣꓳ꓾ ꓮ ꓙꓵ ꓠꓬ ꓤ ꓠꓱ (11) ꓣꓳ ꓦꓵ ꓪꓴꓽ ꓗꓷꓳ꓿
1964 ꓘꓳꓼ ꓕꓯ ꓬꓯꓼ-ꓠ-ꓢꓸ ꓗꓪ ꓐꓰ ꓠꓟ-ꓔ-ꓡꓯꓸ ꓘꓹ ꓗꓪ ꓚꓲꓸ ꓡ ꓡꓳ꓿ ꓬꓲꓸ ꓠꓬ ꓖꓳ ꓕꓯ ꓕꓲ ꓞꓲꓼ ꓗꓪ ꓢꓷꓸ ꓠꓲꓹ ꓕꓳ ꓶ 7 ꓔꓸ ꓢꓳ ꓔꓸ ꓠꓬꓲ꓾ ꓮ-ꓡ-ꓖꓸ ꓘꓹ ꓐꓰ꓾ ꓟꓶ-ꓡ-ꓫꓵ-ꓓꓰ ꓘꓹ ꓗꓪ (3) ꓘꓳꓼ ꓒ ꓐꓲ ꓢꓷꓸ ꓠꓲꓹ ꓕꓳ ꓶ ꓟꓸ ꓖꓶ ꓢꓴ ꓬꓰ ꓗꓷꓳ꓿
1970 ꓘꓳꓼ ꓗꓪ ꓐꓰ ꓪꓴꓸ ꓔꓴ ꓢꓲ꓾ ꓑ-ꓑ-ꓗꓼ ꓙꓲꓺ ꓔꓲꓺ ꓗꓪꓽ ꓫꓵꓽ ꓢꓴ ꓬꓰ ꓗꓷ ꓟ 7 ꓘꓳꓼ ꓥ ꓡꓳ꓿ ꓝꓮꓲ ꓟꓶ-ꓡ-ꓫꓵ-ꓓꓰ ꓘꓹ ꓕꓲ ꓚꓳ ꓡꓳ ꓗꓪ ꓟ ꓐꓯ ꓟꓴ ꓘꓶꓽ ꓒꓽ ꓐꓰ꓾ ꓕꓳ ꓶ ꓵꓺ ꓖꓴ (Library) ꓙꓵꓽ ꓢꓴ ꓬꓰ ꓗꓷꓳ꓿
1990 ꓘꓳꓼ ꓗꓪ ꓠꓬ 6 ꓦ ꓢꓲꓽ ꓫꓬ ꓕꓳ ꓶ ꓙꓳꓥꓽ ꓢꓳ ꓢꓲ꓾ ꓘꓴ ꓜꓲꓼ ꓞꓳ ꓗꓪ ꓟꓬꓱꓽ ꓙ ꓢꓴ ꓬꓰ ꓢꓯꓼ ꓕꓵꓼ ꓡꓳ꓿
2000 ꓘꓳꓼ ꓗꓪ ꓛꓲ ꓡ ꓕꓯ ꓟꓶ-ꓡ-ꓫꓵ-ꓓꓰ ꓗꓪ ꓐꓰ ꓟꓶ-ꓚꓲ-ꓠ ꓣꓮꓟ-ꓑꓴ ꓘꓹ ꓗꓪ ꓚꓲꓸ ꓡ ꓡꓳ꓿
2021 ꓘꓳꓼ ꓗꓪ ꓠꓻ ꓒꓬꓽ ꓔꓳꓹ ꓜꓳ ꓡ ꓠꓬꓲ꓾ ꓬꓥ-ꓖꓳꓥ ꓟꓵꓽ ꓟꓳ-ꓐꓲ ꓗꓪ ꓡ ꓢꓲ꓾ ꓠꓻ ꓫꓬꓹ ꓔꓬ ꓕꓯ 2021 ꓘꓳꓼ 8 ꓦ 5 ꓠꓬꓲ ꓕꓯꓽ ꓢꓲꓺ ꓒ ꓠꓯꓸꓼ ꓗꓪ ꓬꓲꓼ ꓟꓶ ꓡꓰꓳ꓿
ꓬꓲꓸ ꓕꓲ ꓞꓲꓼ ꓗꓪ ꓤ ꓠꓱ 11 ꓣꓳ ꓫꓳ ꓪꓴꓽ ꓡ ꓟ꓾ ꓢꓷꓸ ꓠꓲꓹ ꓕꓳ ꓶ ꓟꓸ ꓖꓶ ꓢꓴ ꓬꓰ ꓗꓷ ꓟ꓾ ꓫꓵꓽ ꓪꓴ ꓐꓯ ꓟꓴ ꓫꓬꓹ ꓒꓽ ꓬꓰ ꓗꓷ ꓟ꓾ ꓕꓳ ꓶ ꓵꓺ ꓖꓴ ꓧꓳꓽ ꓪꓴꓸ ꓟꓴ ꓢꓴ ꓬꓰ ꓗꓷ ꓟ꓾ ꓦ ꓡꓱ ꓚꓱꓹ ꓗꓪ ꓘꓴ ꓞꓲꓼ ꓞꓳ ꓔꓯ ꓣꓱꓽ ꓙ ꓡꓳꓸ ꓙ ꓟꓬꓱꓽ ꓬꓰ ꓗꓷ ꓟ ꓠꓬ꓾ ꓬꓲ ꓤ ꓠꓱ ꓞꓲꓼ ꓤ ꓡꓯꓹ ꓤꓼ ꓐꓴ ꓐꓰ꓾ ꓬꓲ ꓔꓯ ꓢꓷꓸ ꓢꓴ ꓮ ꓙꓵꓽ ꓐꓱ ꓶ ꓞꓳ ꓒꓵꓽ ꓓꓴ ꓐꓰ꓾ ꓔꓯꓺ ꓢꓳ ꓓꓴ ꓙꓳ ꓟ ꓞꓳ ꓪꓴ ꓞꓳ ꓔꓲ ꓕꓲ ꓣꓳ ꓥ ꓡꓳ꓿
