ꓟꓬ-ꓟ ꓗꓴꓷꓼ ꓚꓺ ꓟꓲꓽ ꓗꓪ ꓠꓬꓲꓸ ꓠꓬꓲ 2022 ꓘꓳꓼ 3 ꓦ 2 ꓠꓬꓲ ꓠꓬ ꓦ ꓟꓲ ꓬꓰ ꓢꓴ ꓦꓬꓼ ꓠꓬꓲ (Peasant’s Day) ꓥ ꓡꓳ=
ꓦ ꓟꓲ ꓬꓰ ꓢꓴ ꓦꓬꓼ ꓠꓬꓲ ꓔꓯ 1963 ꓘꓳꓼ 1 ꓦ 1 ꓠꓬꓲ ꓕꓯꓽ ꓪꓴꓸ ꓔꓴ ꓢꓲꓸ ꓬꓰ ꓩꓴ ꓡ ꓡꓳ= ꓮ ꓫꓵꓽ ꓑꓶꓸ ꓓꓴ ꓐꓯ_ ꓠꓬ “ꓟꓬ-ꓟ ꓗꓴꓷꓼ ꓪꓴꓽ ꓟꓴ ꓡ ꓚꓱꓹ ꓗꓪ ꓦ ꓟꓲ ꓬꓰ ꓢꓴ ꓐꓴ ꓠꓬ ꓮ ꓘꓶꓸ ꓞꓳ ꓒꓵꓽ ꓠꓲꓹ ꓠꓵ ꓠꓯ_ ꓟ ꓡ ꓞꓳ ꓐꓴ ꓥꓳ” ꓐꓯ ꓢꓲꓸ ꓬꓰ ꓪꓴꓸ ꓔꓴ ꓩꓴ ꓡ ꓟ ꓥ ꓡꓳ= ꓖꓳ ꓕꓲ ꓠꓬꓲ ꓗꓪ ꓦ ꓟꓲ ꓬꓰ ꓢꓴ ꓐꓴ ꓗꓴꓷꓼ ꓐꓱ ꓶ ꓮ ꓡꓲ ꓟꓬꓱꓽ ꓬꓰ ꓔꓬ ꓟ ꓟꓸ ꓟꓲꓽ ꓢꓳ ꓣꓴ_ ꓟ꓾ ꓔꓶ ꓜꓽ ꓔꓶ ꓜꓳ ꓚꓱꓹ ꓢꓳ ꓣꓴ ꓟ꓾ ꓦ ꓟꓲ ꓬꓰ ꓢꓴ ꓐꓴ ꓔꓯ ꓞꓳ ꓒꓵꓽ ꓫꓱꓸ ꓖꓶ_ ꓟ ꓬꓰ ꓡꓳ=
1965 ꓘꓳꓼ ꓗꓪ ꓛꓲ ꓡ ꓠꓬ꓾ ꓦ ꓟꓲ ꓬꓰ ꓢꓴ ꓦꓬꓼ ꓠꓬꓲ ꓔꓯ ꓕꓲ ꓘꓳꓼ ꓡꓲꓸ ꓕꓲ ꓘꓳꓼ 1 ꓦ 1 ꓠꓬꓲ ꓬꓲꓸ ꓛꓲ 3 ꓦ 2 ꓠꓬꓲ ꓗꓪ ꓡꓶꓸ ꓩꓴ ꓗꓷ ꓡꓳ=
ꓙ ꓘꓶꓽ ꓢꓴ ꓐꓴ ꓡꓰ ꓐꓯ_ ꓠꓬ 1 ꓦ 1 ꓠꓬꓲ ꓠꓬ ꓐꓶꓽ ꓗꓴꓷꓼ ꓡ ꓞꓳ ꓐꓴ ꓘꓳꓼ ꓫꓵꓼ ꓦꓬꓼ ꓠꓬꓲ ꓥ ꓢꓲ꓾ 3 ꓦ 2 ꓠꓬꓲ ꓠꓬ ꓟꓯꓼ ꓜꓲꓽ ꓠꓯ-ꓪꓰꓸ ꓡꓰ ꓗꓴꓷꓼ ꓙꓵꓽ ꓪ ꓦꓴꓻ ꓣꓴ ꓙꓰ_ ꓟ ꓚꓲꓸ ꓟꓶ ꓓꓴ ꓦꓬꓼ ꓠꓬꓲ ꓥ ꓡꓳ꓾ ꓐꓯ ꓡꓳ= 1 ꓦ 1 ꓠꓬꓲ ꓠꓬ ꓘꓳꓼ ꓫꓵꓼ ꓦꓬꓼ ꓠꓬꓲ ꓥ ꓠꓬꓲ꓾ ꓖꓳ ꓕꓲ ꓠꓬꓲ ꓗꓪ ꓐꓰ ꓖꓳ ꓑꓳꓸ ꓚꓲꓸ ꓗꓷ ꓥ ꓟꓲ꓾ 3 ꓦ 2 ꓠꓬꓲ ꓠꓬ ꓟꓯꓼ ꓡꓰ ꓗꓴꓷꓼ ꓙꓵꓽ ꓪ ꓣꓴ ꓙꓰ_ ꓟ ꓔꓯ ꓡ ꓞꓳ ꓐꓴ ꓓꓵꓽ ꓙ ꓛꓲ ꓡ ꓓꓴ ꓟꓽ ꓗꓷ ꓡꓰ ꓠꓹ ꓟ ꓚ ꓟꓲꓽ ꓔꓯ ꓑꓲꓸ ꓩꓴ ꓠꓹ ꓟ ꓢꓯꓼ ꓕꓵꓼ ꓔꓸ ꓟ ꓥꓳ ꓐꓰ ꓚꓲꓸ ꓚ ꓓꓳ ꓡ ꓡꓳ=
ꓟꓬ-ꓟ ꓗꓴꓷꓼ ꓗꓪ ꓠꓬ ꓮ ꓡꓲ ꓐꓯ ꓡꓲꓸ ꓐꓯ ꓦ ꓟꓲ ꓬꓰ ꓢꓴ ꓐꓴ ꓠꓬ ꓫꓸ ꓢꓴ ꓟꓬꓽ ꓡꓳ= ꓬꓲꓸ ꓪ ꓔꓯ ꓠꓽ ꓞꓳ ꓒꓵꓽ ꓠ ꓗꓹ ꓥ ꓟꓲ꓾ ꓶ ꓡꓯꓼ ꓟꓴ ꓢꓴ ꓐꓴ ꓡꓰ ꓠꓬꓲꓸ ꓤꓲ ꓟꓶ ꓔꓬ ꓢꓰꓽ ꓡꓳ= ꓢꓴ ꓟꓵꓽ ꓢꓴ ꓡꓳ ꓗꓪ ꓦ ꓟꓲ ꓬꓰ ꓢꓴ ꓠꓬ ꓜꓽ ꓖꓴ ꓟꓽ ꓓ꓾ ꓓꓳ ꓖꓴ ꓟꓽ ꓓ ꓙꓳ_ ꓥ ꓟꓲ ꓟꓬ-ꓟ ꓗꓴꓷꓼ ꓗꓪ ꓠꓬ ꓫꓸ ꓢꓴ ꓕꓲ ꓙꓶ ꓗꓪ ꓔꓬ ꓠ ꓗꓷ ꓡꓰ ꓔꓬ ꓡꓳ= ꓦ ꓟꓲ ꓬꓰ ꓢꓲꓸ ꓜꓽ ꓪ ꓟꓽ ꓓ꓾ ꓐꓳ ꓡ ꓟꓽ ꓓ ꓐꓰ ꓓꓵꓽ ꓙ ꓗꓪ ꓛꓲ ꓒꓬꓱꓼ ꓔꓬ ꓡꓳ=
ꓧꓶꓸ ꓕꓯ ꓮꓸ ꓠꓬꓲꓽ ꓮ ꓡꓴꓽ ꓣꓱꓽ ꓢꓲꓸ ꓬꓰ_ ꓟ ꓗꓪ ꓐꓰ꓾ ꓮ ꓟꓶ ꓠꓬ ꓙꓼ ꓗꓪ ꓐꓰ ꓦ ꓟꓲ ꓬꓰ ꓪꓴꓸ ꓔꓴ ꓡ ꓟ ꓦꓬꓼ ꓠꓬꓲ ꓥ ꓡꓳ= ꓖꓳ ꓡꓱ ꓥ ꓟꓲ ꓙꓼ ꓞꓶ ꓒꓵꓽ ꓮ ꓘꓶꓸ ꓠꓯꓸ ꓡ ꓔꓬ ꓠꓬꓲ ꓦ ꓟꓲ ꓬꓰ ꓢꓴ ꓐꓴ ꓓꓵꓽ ꓙ ꓪꓴꓽ ꓧꓶ ꓓꓴ ꓒꓬꓱꓼ ꓡ ꓔꓬ ꓡꓳ= ꓔꓶ ꓜ ꓔꓶ ꓓꓳ ꓟꓬꓱꓽ ꓬꓰ ꓢꓴ ꓐꓴ ꓔꓯ ꓢꓯꓼ ꓖꓶ_ ꓟ ꓙꓵꓽ ꓚꓱꓹ ꓗꓪꓼ ꓚꓱꓹ ꓙꓳ ꓡ꓾ ꓦ ꓟꓲ ꓬꓰ ꓢꓴ ꓔꓯ ꓔꓳꓹ ꓙ ꓚꓱꓹ ꓙꓳ ꓡ ꓕꓯꓽ ꓢꓲꓸ ꓦ ꓟꓲ ꓬꓰ ꓢꓴ ꓐꓴ ꓤꓶ ꓪꓴꓽ ꓟꓴ ꓡ ꓥꓳ ꓐꓰ ꓥꓳ ꓡꓳꓸ ꓡꓳ=
ꓦ ꓟꓲ ꓬꓰ ꓢꓴ ꓐꓴ ꓔꓯ ꓞꓳ ꓒꓵꓽ_ ꓟ꓾ ꓟꓬꓱ ꓓꓳ ꓖꓶ_ ꓟ ꓦꓬꓼ ꓠꓬꓲ ꓬꓲꓸ ꓚꓵꓺ ꓒꓬꓱꓼ ꓡ ꓝꓲ ꓐꓰ ꓥꓳ ꓡꓳꓸ ꓩꓴ ꓡ ꓥꓳ=
