ꓙ-ꓑ ꓪ ꓔꓲꓸ ꓮ-ꓗꓲ-ꓦꓲ-ꓔꓳ (Akihito) ꓤꓼ ꓟꓶꓼ ꓟ-ꓗꓳ (Mako- 29 years) ꓠꓬ ꓪ ꓔꓲꓸ ꓤꓼ ꓟꓶꓼ ꓕꓲ ꓣꓳ ꓪ ꓙꓲꓽ ꓙꓳ ꓟ ꓶꓽ ꓮ ꓙꓵꓽ ꓡꓳ ꓩꓴ ꓢꓲ꓾ ꓙ-ꓑ ꓑ ꓫꓬ ꓕꓲ ꓣꓳ ꓥ ꓟ ꓬꓲ ꓠꓲꓹ ꓙꓽ ꓗꓳ-ꓟꓴ-ꓣꓳ (Komuro) ꓔꓯ ꓡꓯ ꓒꓯꓹ ꓝꓸ ꓓꓴ ꓢꓷ ꓙ ꓟꓴ ꓙ ꓩꓴ ꓡ ꓡꓳ꓿
2012 ꓘꓳꓼ ꓕꓯꓽ꓾ ꓬꓲ ꓪ ꓠꓬꓲꓽ ꓫꓵꓸ ꓢꓴ ꓠꓬ ꓔꓳ-ꓚꓳ ꓡꓳ ꓒꓱ ꓗꓪ ꓒꓴ ꓔꓸ ꓟ ꓟꓵ ꓗꓳ ꓓꓵ ꓓꓵ ꓙꓲ-ꓢꓴ ꓢꓲꓻ ꓤ ꓢꓷ ꓠꓲꓹ ꓢꓳ ꓦꓲ (International Christian University) ꓗꓪ ꓠꓲꓹ ꓠꓵ ꓡꓯ ꓘꓳ ꓟ ꓢꓷ ꓠꓲꓹ ꓢꓳ ꓛꓳ ꓒꓯꓹ ꓥ ꓡꓳ꓿
2017 ꓘꓳꓼ ꓗꓪ ꓠꓬ ꓡꓯ ꓒꓯꓹ ꓝꓸ ꓠꓹ ꓟ ꓪꓵꓼ ꓑꓮꓲ ꓬꓰ ꓡꓳ꓿ ꓖꓳ ꓟ ꓗꓪ ꓐꓰ ꓪ ꓔꓲꓸ ꓦꓲ ꓗꓪ ꓥ ꓟꓲ꓾ ꓑ ꓫꓬ ꓐꓴ ꓗꓳ ꓡꓳ ꓗꓪ ꓥ ꓟꓲ ꓢꓰꓸ ꓮ ꓢꓸ ꓓꓴ ꓓꓳꓽ ꓕꓲ ꓟ ꓒꓬꓱꓼ ꓡ ꓟ ꓥ ꓡꓳ꓿
ꓬꓲꓸ ꓪ ꓠꓬꓲꓽ ꓫꓵꓸ ꓠꓬ 2021 ꓘꓳꓼ 10 ꓦ 26 ꓠꓬꓲ ꓗꓪ ꓡꓯ ꓒꓯꓹ ꓝꓸ ꓓꓴ ꓥꓳ ꓐꓰ ꓢꓷ ꓙ ꓟꓴ ꓙ ꓩꓴ ꓡ ꓟ ꓥ ꓡꓳ꓿
ꓬꓲꓸ ꓪ ꓡꓯ ꓒꓯꓹ ꓝꓸ ꓓꓳ ꓡꓰ ꓠꓬ ꓗꓴ-ꓟꓴ-ꓣꓳ ꓕꓲ ꓣꓳ ꓐꓯ ꓟꓴ ꓜꓲꓽ ꓟꓴꓽ ꓟꓬꓱꓽ (lawyer) ꓬꓰ ꓔꓬ ꓟ ꓴꓢꓮ ꓠꓰ-ꓬꓴ-ꓬꓳꓼ ꓡꓳ ꓒꓱ ꓗꓪ ꓚꓲꓸ ꓙꓰ ꓢꓲ ꓑ ꓫꓬ ꓡꓰ ꓐꓰ ꓔꓬ ꓙꓰ ꓓꓴ ꓥ ꓡꓳ꓿
ꓙ-ꓑ ꓪ ꓔꓲ ꓤ ꓟꓶꓼ ꓐꓴ ꓪ ꓔꓲꓸ ꓫꓵꓽ ꓤ ꓪꓳꓼ ꓤ ꓔꓯ ꓟꓽ ꓬꓲꓼ ꓖꓰ ꓐꓭˍ ꓠꓬ꓾ ꓪ ꓔꓲꓸ ꓤ ꓟꓶꓼ ꓐꓴ ꓟꓶˍ ꓟ ꓙꓵꓽ ꓪ꓾ ꓟꓬꓱꓽ ꓓꓳ ꓞꓼ ꓓꓳ ꓐꓰ ꓪ ꓙꓲꓽ ꓙꓳ ꓟ ꓶꓽ ꓮ ꓙꓵꓽ ꓡꓳ ꓩꓴ ꓠ ꓗ ꓡꓳ꓿
ꓪ ꓔꓲꓸ ꓫꓵꓽ ꓪꓳꓼ ꓗꓪ ꓐꓰ ꓓꓳ ꓙꓰ ꓕꓯ ꓬꓲꓸ ꓔꓯ ꓪ ꓔꓲꓸ ꓦꓲ ꓗꓪ ꓐꓰ ꓴꓢꓮ $ 1 ꓪꓹ ꓬꓰ ꓙ ꓩꓴ ꓓꓴ ꓥꓳ ꓐꓯ ꓔꓸ ꓡꓳ꓿
