ꓕꓱ ꓕꓲ ꓤꓶ ꓗꓪ ꓢꓴ ꓔꓯ ꓠꓴ ꓮ ꓫꓵꓽ ꓙꓲ ꓟ ꓡꓯꓼ ꓫꓴ ꓖꓶꓽ ꓐ ꓡ ꓡ? ꓠꓴ ꓒꓴ ꓫꓵ ꓟꓽ ꓙꓳ ꓟꓲ ꓓꓵꓽ ꓙ ꓫꓸ ꓟꓽ ꓛꓲ= ꓠꓴ ꓔꓯ ꓙꓳ ꓟ ꓢꓷꓸ ꓠꓲꓹ ꓬꓲ ꓫꓵ ꓬꓲ ꓙꓰ ꓢꓴ ꓔꓯ ꓖꓶꓽ ꓠꓲꓹ ꓒꓴ ꓠꓬ ꓖꓶꓽ ꓐ ꓡ ꓟ ꓚꓱꓹ ꓙꓳ ꓡꓳ= ꓕꓱ ꓗꓪ ꓮ ꓔꓲꓸ ꓐꓯ ꓟꓳꓸ ꓖꓶ ꓓꓴ ꓥꓳ=
ꓗꓳꓸ ꓗꓷ ꓟ 2500 ꓘꓳꓼ ꓖꓼ ꓡꓯꓼ ꓖꓼ ꓙꓲ ꓗꓪ ꓞꓳ ꓤ ꓐꓴ ꓠꓬ ꓮ ꓟꓶ ꓡꓰ ꓐꓰ ꓕꓳ ꓶ ꓐꓳ ꓟꓽ ꓗꓴꓸ= ꓬꓲꓸ ꓪ ꓠꓬ ꓮ ꓫꓵꓽ ꓢꓷꓸ ꓠꓲꓹ ꓔꓯ ꓥ ꓟꓲ ꓟꓷ ꓠꓷꓹ ꓗꓪ ꓐꓰ ꓫꓸ ꓕꓱ ꓢꓲꓸ ꓪꓴꓸ ꓠꓷꓸ ꓐꓰ ꓠꓲꓹ ꓟ ꓗꓪ ꓟꓯꓻ ꓔꓸ ꓡꓳ= ꓖꓳ ꓡꓱ ꓠꓲꓹ ꓟ ꓗꓪ ꓟꓯꓻ ꓢ ꓠꓹ ꓟ ꓥꓳ ꓜꓱ ꓐꓰ ꓐꓯ ꓫꓵꓽ ꓣꓱꓽ ꓚꓰꓼ= ꓖꓳ ꓟ ꓕꓯ ꓢꓲꓸ ꓬꓲꓸ ꓢꓯꓼ ꓗꓶ ꓢꓲꓸ ꓥꓳ ꓙꓱ ꓐꓯ ꓘꓶꓽ ꓐꓯ ꓗꓹ ꓕꓯ ꓬꓳꓹ ꓬꓲꓽ ꓐꓰ ꓟꓴꓽ ꓖꓪ ꓒꓬꓱꓼ ꓡ ꓡꓳ= ꓝꓮꓲ ꓬꓲꓸ ꓐꓬꓱꓽ ꓐꓳ ꓗꓴꓸ ꓢꓴ ꓠꓬ ꓬꓲꓸ ꓐꓬꓱꓽ ꓐꓳ ꓢꓲꓸ ꓢꓷꓸ ꓡꓰ ꓓꓴ ꓕꓲ ꓫꓵꓽ ꓫꓵꓽ ꓬꓰ ꓗꓴꓸ ꓡ ꓡꓳ= ꓖꓳ ꓡꓱ ꓐꓰ ꓥꓳꓽ ꓙꓱ꓾ ꓟꓴ ꓖꓪ ꓐꓰ ꓬꓲꓸ ꓐꓬꓱꓽ ꓐꓳ ꓟ ꓢꓷꓸ ꓠꓲꓹ ꓪꓴꓽ ꓟꓴ ꓡ ꓡꓳ= ꓕꓱ ꓡꓱꓳ ꓫꓵꓽ ꓗꓪ ꓐꓰ ꓕꓲ ꓣꓳ ꓓꓵ ꓙ ꓟ ꓐꓰ ꓢꓷꓸ ꓟ ꓔꓯ ꓝꓮꓲ ꓕꓲ ꓣꓳ ꓪꓴꓸ ꓠꓷꓸ ꓠꓲꓹ ꓟ ꓗꓪ ꓛꓲ ꓬꓰ ꓝꓲ ꓐ ꓡ ꓡꓳ= ꓠꓲꓹ ꓫꓸ ꓓꓴ꓾ ꓗꓹ ꓛꓲ ꓓꓴ ꓮ ꓙꓵꓽ ꓔꓯ ꓖꓳ ꓑꓳꓸ ꓕ ꓑꓳꓸ ꓐꓹ ꓡꓯ ꓘꓳ ꓐ ꓡ ꓡꓳ= ꓢꓷꓸ ꓗꓴꓸ ꓟ ꓢꓷꓸ ꓠꓲꓹ ꓐꓰ ꓬꓰ ꓗꓴꓸ ꓟ ꓡꓯꓼ ꓟꓬꓱꓽ ꓮ ꓙꓵꓽ ꓕꓲ ꓤꓶ ꓗꓸ ꓠꓯꓸ ꓕꓲ ꓤꓶ ꓪꓴꓽ ꓟꓴ ꓡ ꓡꓳ= ꓥꓳ ꓙꓱ ꓟꓽ ꓙꓳ꓾ ꓟꓴꓽ ꓖꓪ ꓟꓽ ꓙꓳ꓾ ꓐꓬꓱꓽ ꓐꓳ ꓟꓽ ꓗꓴꓸ꓾ ꓕꓳ ꓶ ꓟꓽ ꓙꓳ ꓟ ꓞꓳ ꓫꓵꓽ ꓠꓬ ꓢꓷꓸ ꓠꓲꓹ ꓪꓴꓽ ꓟꓴ ꓡ ꓟꓽ ꓓꓻꓳ=
ꓕꓱ ꓡꓱꓳ ꓫꓵꓽ ꓙ ꓡꓯ ꓘꓳ ꓢꓷꓸ ꓠꓲꓹ ꓗꓪ ꓐꓰ ꓡ ꓞꓳ ꓠꓬ ꓕꓲ ꓣꓳ ꓗꓪ ꓐꓰ ꓕꓲ ꓣꓳ ꓢꓳ ꓣꓴ ꓡꓯ ꓘꓳ ꓢꓲ ꓪꓴ ꓟꓴ ꓡ ꓚꓰꓼ= ꓗ ꓟꓲꓽ ꓡꓲ ꓒꓰꓼ ꓕꓶ ꓡꓰ ꓚꓰꓼ= ꓚ ꓟꓲꓽ ꓕꓶ ꓕꓶ ꓙꓳ ꓡ ꓚꓰꓼ= ꓡ ꓞꓳ ꓐꓴ ꓔꓯ ꓬꓲꓸ ꓗꓳꓸ ꓬꓲꓸ ꓝꓲꓹ ꓥꓼ ꓗꓪ ꓐꓰ ꓢꓷꓸ ꓢꓴ ꓙ ꓣꓳꓽ ꓢꓴ ꓒꓬꓱꓼ ꓡ ꓝꓲ ꓐ ꓡ ꓡꓳ= ꓞꓳ ꓡꓲꓽ ꓪ ꓡꓲꓽ ꓢꓷꓸ ꓢꓴ ꓒꓬꓱꓼ ꓡ ꓝꓲ ꓡꓳ= ꓢꓯꓼ ꓕꓵꓼ ꓠꓲꓹ ꓙꓳ ꓢꓴ꓾ ꓪꓴꓸ ꓠꓷꓸ ꓙꓲ ꓢꓴ ꓒꓬꓱꓼ ꓡ ꓝꓲ ꓡꓳ= ꓖꓳ ꓟ ꓑꓶꓸ ꓓꓴ ꓕꓳ ꓶ ꓥꓳ ꓙꓱ꓾ ꓟꓴ ꓖꓪꓽ꓾ ꓐꓬꓱꓽ ꓐꓳ ꓟꓬꓱꓽ ꓐꓴ ꓠꓬ ꓡ ꓞꓳ ꓮ ꓙꓵꓽ ꓢꓴ ꓐꓱ ꓶ ꓙꓲ ꓖꓴ ꓙꓳ ꓡꓳ=
ꓕꓳ ꓶ ꓵꓺ ꓢꓴ ꓠꓬ ꓤꓶ ꓦꓬꓼ ꓠꓬꓲ ꓮ ꓒꓳ ꓒꓳ ꓗꓪ ꓙ ꓖꓶ ꓖꓴ ꓡꓰ ꓢꓴ ꓒꓬꓱꓼ ꓡ ꓝꓲ ꓡꓳ= ꓕꓳ ꓶ ꓐꓳ ꓢꓴ ꓠꓬ ꓤꓶ ꓦꓬꓼ ꓠꓬꓲ ꓗꓪ ꓐꓰ ꓢꓳ ꓣꓴ ꓙꓲ ꓟ ꓮ ꓙꓵꓽ ꓢꓴ ꓔꓯ ꓟꓽ ꓞꓲꓽ ꓞꓲꓽ ꓖꓶꓽ ꓢꓴ ꓒꓬꓱꓼ ꓡ ꓡꓳ= ꓒꓴ ꓫꓵꓺ ꓖꓶꓽ ꓟꓽ ꓐ ꓡ ꓥ ꓟꓲ꓾ ꓕꓳ ꓶ ꓗꓪ ꓐꓰ꓾ ꓟꓴ ꓖꓪ ꓗꓪ ꓐꓰ꓾ ꓥꓳ ꓙꓱ ꓗꓪ ꓐꓰ꓾ ꓐꓳ ꓐꓬꓱꓽ ꓗꓪ ꓐꓰ ꓞꓳ ꓫꓵꓽ ꓐꓱ ꓶ ꓐꓰ ꓗꓴꓷꓼ ꓐꓱ ꓶ ꓙꓲ ꓟ ꓡꓯꓼ ꓫꓴ ꓖꓶꓽ ꓒꓰꓹ ꓡꓯ= ꓫꓸ ꓟꓳ ꓪ=
