ꓗꓳ-ꓪꓰꓼ ꓠꓬ ꓕꓲ ꓐꓱ ꓐꓱ ꓶ ꓬꓲꓸ ꓜꓲꓹ ꓠꓻ ꓧꓶ ꓤꓹ ꓤꓼ ꓕꓲ ꓟ ꓡꓰ ꓐꓰ ꓗꓹ ꓢꓲ ꓕꓲ ꓐꓱ ꓠꓬ ꓢꓯꓼ ꓟꓬ ꓟꓶꓽ ꓬꓰ ꓖꓴꓳ꓿
ꓕꓲ ꓧꓪꓹ ꓧꓪꓹ ꓢꓪꓼ ꓠꓬ ꓮ ꓘꓶꓸ ꓙꓳꓺ ꓟꓽ ꓛꓲ ꓟ ꓡꓰ ꓐꓰ ꓔꓸ꓿ ꓝꓮꓲ ꓕꓲ ꓧꓪꓹ ꓠꓬ ꓮ ꓘꓶꓸ ꓙꓳ ꓛꓲ ꓟ ꓡꓰ ꓐꓰˍ ꓟꓲ ꓔꓸ ꓟ ꓠꓻ ꓫꓵꓽ ꓠꓻ ꓓꓱꓽ ꓥ ꓡꓳ꓿
ꓮ ꓡꓲ ꓟꓲ ꓜꓲ ꓜꓲ ꓟꓴ ꓟꓴ ꓓꓵꓽ ꓙ ꓟꓽ ꓗꓴ꓾ ꓐꓯ ꓞꓷꓸ ꓫꓸ ꓟ ꓠꓻ ꓓꓱ꓿ ꓕꓱ ꓟ ꓔꓯ ꓠꓯ ꓞꓲꓼ ꓧꓪ ꓟꓰꓹ ꓢꓴ ꓐꓴ ꓮ ꓡꓲ ꓐꓯ ꓔꓬ ꓡ? ꓮ ꓟꓶ ꓮ ꓡꓲ ꓒꓬꓱꓼ ꓡ ꓔꓬ ꓡ?
ꓕꓲ ꓟꓲ ꓠꓯ ꓚꓳ ꓔꓬ ꓟ꓾ ꓞꓳ ꓢꓰꓼ ꓪ ꓢꓰꓼ ꓔꓬ ꓟ ꓚꓳ-ꓪꓰꓼ ꓠꓻ ꓐꓶ ꓓꓰ ꓠꓬ 1 ꓫꓵꓽ ꓡꓰꓽ ꓟ ꓥꓻꓳ ꓐꓰ ꓪꓧꓳ ꓡꓰ 2021 ꓘꓳꓼ 11 ꓦ 25 ꓠꓬꓲ ꓕꓯꓽ ꓢꓷ ꓙ ꓟꓴ ꓙ ꓩꓴ ꓡ ꓡꓳ꓿
ꓬꓲꓸ ꓠꓬ ꓬꓲꓸ ꓐꓶꓹ ꓬꓲꓸ ꓐꓶꓹ ꓬꓲꓸ ꓫꓵꓽ ꓟꓽ ꓗꓹ ꓪꓴꓽ ꓟꓬꓽ ꓡ ꓢꓲ꓾ ꓢꓯꓼ ꓙꓳ ꓡ ꓔꓬ ꓡꓳ ꓐꓰ ꓪꓧꓳ (ꓟꓲ ꓠꓯ ꓗꓴꓷꓼ ꓜꓴ ꓖꓳ ꓓꓱꓽ ꓔꓬ ꓢ ꓜꓴ) ꓡꓰ ꓐꓯ ꓩꓴ ꓡ ꓟ ꓥ ꓡꓳ꓿
ꓮ ꓟꓶ ꓬꓲꓸ ꓟꓶꓽ ꓬꓲꓸ ꓫꓵꓼ ꓕꓲ ꓫꓵꓽ ꓧꓪ ꓟꓳ ꓟ ꓗꓳ-ꓪꓰꓼ ꓐꓶ ꓓꓲ ꓬꓲꓸ ꓟꓬꓱꓺ ꓠꓬ ꓐ 1.1.529 ꓥ ꓡꓳ ꓐꓯ ꓡꓳ꓿ ꓖꓳ ꓟ ꓔꓯ ꓡꓳ ꓟꓶꓸ ꓮ-ꓩ-ꓣꓲ-ꓗ ꓗꓪ ꓧꓪ ꓟꓳˍ ꓟ ꓥ ꓡꓳ꓿ ꓖꓳ ꓟ ꓠꓬ ꓮ ꓟꓶ ꓧꓳ-ꓗꓳ ꓡꓳ ꓒꓱ ꓗꓪ ꓥ ꓟꓲ 2 ꓣꓳ ꓚꓹ ꓟꓶꓳ ꓐꓯ ꓡꓳ꓿ ꓬꓰ-ꓢꓷ-ꓡꓰ ꓟꓵꓽ ꓗꓪˍ ꓟꓲ ꓚꓲꓸ ꓚ ꓟꓶ ꓔꓬꓳ꓿ ꓟꓲ ꓠꓯ ꓗꓪ ꓓꓵꓽ ꓓꓳ ꓢꓴ ꓐꓴ ꓗꓪ ꓐꓰ꓾ ꓝꓮꓲ ꓶ ꓤ ꓶ ꓟꓲ ꓗꓪ ꓐꓰ ꓖꓳ ꓑꓳꓸ ꓕ ꓑꓳꓸ ꓕꓲ ꓟꓵꓽ ꓕꓲ ꓟꓵꓽ ꓛꓱ ꓙꓰ ꓔꓬ ꓟ ꓥ ꓡꓳ꓿ ꓖꓳ ꓟ ꓑꓶꓸ ꓓꓴ ꓗꓴꓷꓼ ꓮ ꓟꓬꓹ ꓠꓬ ꓮ-ꓩ-ꓣꓲ-ꓗ ꓗꓪ ꓓꓵꓽ ꓓꓳ ꓚꓱꓹ ꓔꓯ ꓑꓲꓸ ꓪꓴꓸ ꓔꓴ ꓔꓬꓳ꓿
ꓗꓳ-ꓪꓰꓼ ꓠ ꓐꓶ ꓓꓲ ꓫꓵꓼ ꓕꓱ ꓟ ꓔꓯ ꓟꓳꓸ ꓕꓲ ꓟꓲ ꓠꓯ ꓗꓪ ꓟ ꓟꓬꓱ ꓓꓳ ꓙꓳ ꓟ ꓓꓳꓽ ꓐꓳ ꓜꓴ ꓐꓴ ꓮ ꓟꓬꓹ ꓠꓬ ꓠꓲꓹ ꓞ ꓠꓲꓹ ꓧꓳꓽ ꓓꓳꓽ ꓐꓳ ꓢꓲꓸ ꓟꓲ ꓠꓯ ꓡ ꓞꓳ ꓐꓴ ꓔꓯ ꓢꓷꓸ ꓙꓲꓽ ꓙꓳ ꓟ ꓢꓷ ꓡꓰ ꓝꓲ ꓔꓬ ꓡꓳ꓿ (ꓐꓬꓱꓽ ꓗꓪ ꓡꓳꓸ)
ꓗꓳ-ꓪꓰꓼ ꓠꓻ ꓐꓶ ꓓꓲ ꓫꓵꓼ ꓔꓯ ꓟꓳꓸ ꓐꓳ ꓔꓬ ꓟ
ꓗꓳ-ꓪꓰꓼ ꓠꓻ ꓐꓶꓽ ꓓꓲ ꓐ 1.1.529 ꓠꓬ ꓮ ꓟꓶ ꓟꓲ ꓠꓯ ꓗꓴꓷꓽ ꓮ ꓟꓬꓹ ꓙꓳꓺ ꓛꓱꓽ ꓔꓬ ꓟ delta ꓕꓲ ꓩꓴꓸ ꓟ ꓕꓯꓽ ꓢꓲ ꓪꓽ ꓠꓬꓲˍ ꓡꓳ ꓐꓰ ꓢꓪꓼ ꓓꓳ ꓔ ꓡꓳ꓿ ꓬꓲꓸ ꓟꓬꓱꓻ ꓔꓯ ꓳ-ꓟꓲ-ꓘ-ꓣꓳ (ꓳꓟꓲꓚꓣꓳꓠ) ꓐꓰ ꓖꓶ ꓔ ꓢꓲ꓾ ꓬꓲꓸ ꓟꓸ ꓟꓲꓽ ꓔꓯ ꓧꓪ ꓟꓰꓹ ꓠꓬꓲ ꓔꓬ ꓡꓳ꓿
ꓬꓲꓸ ꓪꓴꓸ ꓓꓳ ꓡ ꓟ ꓗꓳ-ꓪꓰꓼ ꓠꓻ ꓐꓶ ꓓꓲ ꓠꓬ delta ꓐꓶ ꓓꓲ ꓒꓬꓱꓼ ꓡ ꓗꓪ ꓛꓲ 10 ꓧꓪꓹ ꓡꓶꓸ ꓑ ꓡ ꓟ ꓥ ꓡꓳ꓿ ꓔꓯꓺ ꓥꓳꓽ ꓗꓪ ꓐꓰ ꓐꓯ ꓠꓬ ꓥꓪꓸ ꓛꓱꓸ ꓡꓱꓸꓼ ꓤꓹ ꓤꓼ ꓗꓪ ꓐꓰ ꓥꓪꓸ ꓠꓲꓽ ꓩꓴꓽ ꓒꓽ ꓡꓰ ꓐꓰ ꓢꓯꓼ ꓙꓳ ꓪ ꓠꓬꓲ ꓡ ꓟ ꓥ ꓡꓳ꓿
ꓥꓪꓸ ꓛꓱꓸ ꓡꓱꓸꓼ ꓔꓯ ꓢꓰꓼ ꓓꓴ ꓙ ꓖꓶ ꓔꓸ ꓟ ꓶ ꓤꓼ (ꓗꓳ-ꓪꓰꓼ ꓗꓽ ꓠꓯ ꓞꓲꓼ) ꓠꓬ ꓥꓪꓸ ꓠꓲꓽ ꓩꓴ ꓔꓯ ꓮ ꓡꓲ ꓡꓲꓸ ꓗꓹ ꓧꓪꓽ ꓟꓽ ꓙꓳ ꓡꓰꓳ꓿ ꓖꓳ ꓟ ꓑꓶꓸ ꓓꓴ ꓗꓽ ꓠꓯ ꓞꓲꓼ ꓬꓲꓸ ꓐꓶꓹ ꓢꓯꓼ ꓙꓳ ꓡ ꓠꓹ ꓟ ꓠꓯ ꓞꓲꓼ ꓗꓸ ꓔꓺ ꓛꓲ ꓡꓳ꓿ ꓧꓪ ꓒꓴ ꓥꓳꓽ ꓗꓪ ꓐꓳꓳꓢꓔꓰꓣ ꓢꓧꓳꓔ ꓐꓯ ꓡꓳ꓿
ꓮ ꓟꓶꓸ ꓬꓲꓸ ꓟꓶꓽ ꓗꓪ ꓧꓪ ꓟꓶˍ ꓟ ꓗꓳ-ꓪꓰꓼ ꓐꓶ ꓓꓲ ꓐ 1.1.529 ꓠꓬ ꓬꓲꓸ ꓪꓴꓸ ꓟ ꓠꓻ ꓐꓶ ꓓꓲ ꓗꓪ ꓐꓰ 32 ꓧꓪꓹ ꓡꓶꓸ ꓑ ꓔꓸ ꓟ ꓥꓳ ꓐꓰ ꓢꓷ ꓠꓲꓹ ꓙꓳ ꓒꓽ ꓐꓴ ꓠꓰ ꓚꓹ ꓓꓳ ꓔ ꓡꓳ꓿ ꓔꓯ ꓥꓳꓽ ꓐꓯ ꓠꓬ꓾ ꓥꓪꓸ ꓛꓱꓸ ꓡꓱꓸꓼ ꓗꓪ ꓐꓰ ꓥꓪꓸ ꓖ ꓡ ꓓꓽ ꓟ ꓡꓰ ꓐꓰ ꓢꓯꓼ ꓙꓳ ꓪ ꓠꓬꓲ ꓡ ꓟ ꓥ ꓡꓳ꓿
ꓕꓱ ꓟ ꓑꓶꓸ ꓓꓴ ꓥꓪꓸ ꓠꓲꓽ ꓩꓴ ꓐꓱ ꓶ ꓚꓰꓼ ꓔꓸ ꓟ ꓠꓻ ꓗꓽ ꓠꓯ ꓞꓲꓼ ꓠꓬ ꓥꓪꓸ ꓖ ꓡ ꓓꓽ ꓟ ꓔꓯ ꓔꓳꓹ ꓡꓯ ꓘꓳ ꓐ ꓡ ꓡ?/ ꓟꓽ ꓐ ꓡ ꓡ? ꓢꓷꓸ ꓪ ꓠꓹ ꓟ ꓠꓯ ꓞꓲꓼ ꓚꓰꓼ ꓢꓴ ꓐꓴ ꓠꓲꓹ ꓞ ꓠꓲꓹ ꓧꓳꓽ ꓟꓬꓱꓽ ꓬꓰ ꓔꓬ ꓡꓳ꓿
ꓮ ꓡꓲ ꓐꓯ ꓡꓲꓸ ꓐꓯ ꓗꓳ-ꓪꓰꓼ ꓠꓬ 1 ꓫꓵꓽ ꓡꓰ ꓟꓽ ꓥ꓾ ꓠꓯ ꓞꓲꓼ ꓗꓸ ꓓꓳ ꓢꓴˍ ꓟꓲ ꓦ ꓐ 8 ꓟ ꓖꓳ ꓑꓳꓸ ꓠꓬ ꓠꓯ ꓞꓲꓼ ꓢꓯꓼ ꓙꓬꓽ ꓬꓰ ꓡ ꓟ ꓔꓯ ꓬꓲꓼ ꓠꓬꓲꓸ ꓖꓶ ꓔꓬꓳ꓿
ꓤ ꓟꓳ ꓙꓲꓽ ꓙꓳ ꓟ ꓔꓯ ꓐ ꓡ ꓟꓬ ꓛꓲ ꓤ ꓟꓳ ꓠꓹ ꓟ꓾ ꓢꓯꓼ ꓙꓳ ꓟ ꓜꓽ ꓫꓵꓽ ꓓꓳ ꓫꓵꓽ ꓒ ꓛꓲ ꓒ ꓡꓳꓼ ꓜꓽ ꓠꓹ ꓟ꓾ ꓖꓳ ꓓꓱ ꓢꓯꓼ ꓠꓵꓹ ꓠꓹ ꓟ ꓣꓱꓽ ꓬꓯꓼ ꓡꓳ ꓐꓰ ꓢꓷ ꓠꓯ ꓡꓳ꓿
ꓗꓳ-ꓪꓰꓼ ꓠꓻ ꓐꓶꓽ ꓓꓲ ꓐ 1.1.529 (ꓳ-ꓟꓲ-ꓘ-ꓣꓳ) ꓔꓯ ꓢꓷ ꓠꓲꓹ ꓙꓳ ꓢꓴ ꓐꓴ ꓡꓰ ꓮ ꓟꓶ ꓧꓪ ꓟꓰꓹ ꓠꓬꓲ ꓔꓬ ꓢꓲ꓾ ꓗꓴꓷꓼ ꓮ ꓟꓬꓹ ꓥ ꓟꓲ ꓗꓺ ꓘꓶꓽ ꓑꓲꓸ ꓩꓴ ꓠꓹ ꓟ ꓕꓲ ꓧꓪꓹ ꓙꓽ ꓖꓶ ꓔꓬ ꓡꓳ꓿ ꓟꓲꓸ ꓕꓯ ꓗꓪ ꓮ ꓡꓲ ꓒꓬꓱꓼ ꓡ ꓟꓽ ꓢꓷꓸꓳ꓿
ꓳ-ꓟꓲ-ꓘ-ꓣꓳ ꓗꓳ-ꓪꓰꓼ ꓠꓻ ꓓꓱꓷ ꓗꓪ ꓐꓰ ꓡꓲꓹ ꓙꓰ ꓟꓶ ꓝꓲ꓿
