“ꓤ ꓑꓸ ꓤꓼꓳ ꓔꓶ ꓮ ꓫꓵꓽ ꓑꓶꓸ ꓓꓴ ꓦꓲ ꓢꓲ ꓟ ꓕꓲ ꓣꓳ ꓓꓰꓼ ꓣꓴ ꓗꓹ ꓔꓸ ꓡꓲꓸ ꓥꓪ ꓚꓹ ꓟꓽ ꓗꓴꓸ” ꓐꓰ 4 ꓟꓶꓽ ꓒꓽ ꓐꓲ-ꓡ-ꓓꓲ ꓓꓶꓼ ꓚꓽ ꓡꓳ= “ꓠꓴ ꓦꓲ ꓢꓲ ꓟ 4 ꓣꓳ ꓣꓴ ꓔꓸ ꓐꓯ ꓠꓽ ꓠꓴ ꓠꓽ ꓟꓯꓸ ꓡꓯꓸ ꓟ ꓡꓰ ꓐꓰ ꓔꓬ ꓪ ꓥꓳ ꓟꓽ” ꓐꓰ ꓪ ꓢꓯ ꓡꓲꓹ ꓥꓳꓽ ꓕꓱ ꓡꓳ=
ꓖꓳ ꓡꓱ ꓥ ꓟꓲ ꓐꓲ-ꓡ-ꓓꓲ ꓠꓬ ꓬꓰ-ꓟꓲ ꓗꓴꓷꓼ ꓡ ꓞꓳ ꓥ ꓟ꓾ ꓬꓲꓸ ꓐꓹ ꓐ ꓟꓴ-ꓧ-ꓟꓯꓼ ꓐꓲ-ꓡ-ꓓꓲ ꓕꓲ ꓣꓳ ꓲ-ꓢꓲ-ꓡ ꓛꓳ ꓚꓱꓹ ꓡꓳ ꓚ ꓦꓲ ꓢꓲ ꓟ 4 ꓟꓶꓽ ꓧꓪ ꓟ ꓔꓯ ꓟꓽ ꓘꓳ ꓣꓴ= ꓬꓲꓸ ꓠꓬ 1957 ꓘꓳꓼ ꓕꓯ ꓦꓵ ꓡ ꓟ꓾ ꓬꓲꓸ ꓐꓹ ꓐ ꓤ ꓠꓱ 45 ꓣꓳ ꓗꓪ ꓐꓰ ꓕꓲ ꓣꓳ ꓥ ꓢꓲ꓾ ꓬꓲꓸ ꓟꓹ ꓟ ꓠꓬ ꓮ-ꓡꓲ-ꓬ ꓖ-ꓠꓯ (Allia Ghanem) ꓥ ꓡꓳ= ꓬꓲꓸ ꓟꓹ ꓟ ꓠꓬ ꓬꓲꓸ ꓐꓹ ꓐ ꓕꓯ ꓢꓲ 20 ꓘꓳꓼ ꓟꓽ ꓞꓲ ꓣꓳ ꓢꓴ꓾ ꓬꓲꓸ ꓐꓹ ꓐ ꓔꓯ ꓡꓯ ꓒꓯꓹ ꓝꓸ ꓕꓯ 15 ꓘꓳꓼ ꓓꓰꓼ ꓡꓳꓼ ꓢꓲꓽ ꓢꓴ ꓤ ꓕꓲ ꓣꓳ ꓥ ꓡꓳ= ꓬꓲꓸ ꓐꓹ ꓐ ꓕꓲ ꓤꓶ ꓗꓪ ꓦꓲ ꓢꓲ ꓟ ꓕꓲ ꓣꓳ ꓑꓶꓸ ꓝꓸ ꓕꓲ ꓣꓳ ꓣꓴ ꓠꓬꓲ꓾ ꓧꓹ ꓩꓴ ꓗꓷ ꓠꓬꓲ ꓬꓰ ꓗꓷ ꓟ ꓮ ꓙꓵꓽ ꓠꓬ 20 ꓣꓳ ꓛꓲ ꓙꓳ ꓡꓳ= ꓐꓲ-ꓡ-ꓓꓲ 3 ꓘꓳꓼ ꓙꓳ ꓕꓯ ꓬꓲꓸ ꓟꓹ ꓟ ꓐꓰ ꓬꓲꓸ ꓔꓯ ꓬꓲꓸ ꓒꓽ ꓟꓴ-ꓧ-ꓟꓯꓼ ꓐꓲ-ꓡ-ꓓꓲ ꓡꓰ ꓧꓹ ꓡꓳꓺ ꓩꓴ ꓡ ꓡꓳ= ” ꓮ ꓟ ꓔꓯ ꓠꓽ ꓮ ꓐ ꓠꓰ ꓗꓳ-ꓣ ꓢꓲꓽ ꓫꓬ ꓕꓳ ꓶ ꓡꓳ ꓚ ꓣꓴ ꓔꓸ ꓟ ꓦꓲ ꓢꓲ ꓟ ꓟꓽ ꓥ꓾ ꓮ ꓔꓳ ꓔꓳ ꓣꓴ ꓔꓸ ꓟ ꓠꓯꓸ” ꓐꓰ꓾ ꓐꓲ-ꓡ-ꓓꓲ ꓡꓰ ꓬꓲꓸ ꓟꓹ ꓟ ꓟꓸ ꓙ ꓖꓴ ꓔꓯ ꓕꓱ ꓓꓳ ꓡ ꓡꓳ=
ꓦꓲ ꓢꓲ ꓟ ꓮ ꓟꓬꓹ ꓣꓳ ꓣꓴ ꓟ ꓔꓯ ꓠꓲꓹ ꓟ ꓟꓽ ꓡꓶꓸ ꓟ ꓕꓯ ꓢꓲ꓾ ꓐꓲ-ꓡ-ꓓꓲ ꓓꓵꓽ ꓙ ꓚꓱꓹ ꓗꓪ ꓬꓲꓸ ꓐꓹ ꓐꓽ ꓠꓬ ꓲ-ꓢꓲ-ꓡ ꓦ ꓡꓱ ꓞꓳ ꓙꓳ ꓚꓱꓹ ꓙꓵꓽ ꓗ ꓔꓯ ꓟꓽ ꓜꓳ ꓠ ꓬꓰ ꓗꓷ ꓢꓴ ꓥꓳ ꓐꓰ ꓘꓳ ꓣꓴ ꓔꓸ ꓡꓳ=
ꓜꓲ ꓜꓲ ꓑꓰꓹ ꓑꓰꓹ ꓙꓳꓺ ꓦꓰꓸ ꓡꓰ ꓓꓴ ꓟꓬꓱꓽ ꓬꓰ ꓒꓽ ꓐꓲ-ꓡ-ꓓꓲ ꓠꓬ꓾ ꓑ-ꓗꓲ-ꓢ-ꓔ ꓗꓴꓷꓼ ꓗꓪ ꓞꓳ ꓤ ꓟꓽ ꓢꓷꓸ ꓡꓰ ꓠ ꓚꓵꓺ ꓔꓸ ꓟ ꓦꓲ ꓕꓲ ꓟ ꓗꓪ ꓬꓲꓸ ꓦꓲ ꓢꓲ ꓟ 4 ꓣꓳ ꓐꓰ ꓕꓲ ꓪ ꓛꓰꓹ ꓑꓬ ꓔꓬ ꓥ ꓟꓲ꓾ ꓬꓲꓸ ꓔꓯ ꓡꓳꓸ ꓙ ꓖꓶꓽ ꓢꓴ ꓟꓯꓼ ꓕꓲ ꓣꓳ ꓔꓯ ꓛꓽ ꓒꓽ ꓐꓴ ꓡꓰ ꓛꓽ ꓟꓶ ꓡꓰ ꓟ ꓗꓪ ꓐꓰ ꓬꓲꓸ ꓑꓬ ꓔꓬ ꓟ ꓦꓲ ꓔꓯ ꓛꓽ ꓢꓴ ꓐꓴ ꓢꓷꓸ ꓡꓰ ꓟ ꓥ ꓡꓳ=
“ꓟꓴ-ꓢꓲ-ꓡꓲ ꓚꓵ ꓚꓵ ꓕꓲ ꓣꓳ ꓠꓬ꓾ ꓦ ꓡꓱ ꓚꓱꓹ ꓕꓳ ꓶ ꓗꓪ ꓐꓯ ꓟ ꓡꓰ ꓐꓰ ꓦꓲ ꓢꓲ ꓟ 4 ꓣꓳˍ ꓡꓰ ꓧꓪ ꓠ ꓔꓸ ꓡꓳ= ꓖꓳ ꓡꓱ ꓢꓲ ꓕꓲ ꓣꓳ ꓡꓲꓸ ꓕꓲ ꓣꓳ ꓔꓯ ꓒꓬꓱꓽ ꓢꓲ ꓟꓽ ꓓ” ꓐꓰ ꓐꓲ-ꓡ-ꓓꓲ ꓡꓰ ꓐꓯ ꓡꓳ= ꓬꓲꓸ ꓕꓱ ꓡꓱ ꓘꓳ ꓣꓴ ꓫꓸ ꓕꓱ ꓟ ꓙ ꓖꓴ ꓔꓯ꓾ 2021 ꓘꓳꓼ 7 ꓦ 27 ꓠꓬꓲ ꓕꓯ ꓓꓳ ꓡ ꓟ꓾ ꓢꓲ-ꓟꓳ ꓐꓰ ꓛ-ꓢꓲ-ꓔ ꓡꓰ ꓐꓳ ꓔꓸ ꓟ ꓕꓳ ꓶ “ꓐꓲ-ꓡ-ꓓꓲ ꓤ ꓘꓹ ꓤ ꓜꓲꓽ ꓒꓬꓱꓼ ꓡ ꓟ ꓐꓰ꓾ ꓞꓰ ꓬꓯꓼ ꓡꓰ ꓟ” “The Rise and Fall of Osama bin Laden” (Simon & Schuster) ꓗꓪ ꓐꓳ ꓔ ꓡꓳ=
ꓖꓳ ꓟ ꓑꓶꓸ ꓓꓴ ꓬꓲꓸ ꓠꓬ ꓦꓲ ꓢꓲ ꓟ ꓕꓲ ꓑꓹ ꓕꓲ ꓣꓳ ꓣꓴ ꓗꓹ ꓧꓹ ꓩꓴ ꓗꓹꓦꓬꓰ ꓢꓴ ꓬꓲꓸ ꓐꓹ ꓐꓽ ꓕꓯ ꓢꓲ ꓜꓳ ꓡꓳ ꓐꓰ ꓢꓪꓼ ꓪ ꓓ ꓡꓳ=
ꓧꓪ ꓒꓴ ꓟꓵꓽ ꓴꓢꓮ꓾ ꓠꓲ-ꓬꓴ-ꓬꓳꓼ ꓗꓪ 9 ꓦ 11 ꓠꓬꓲ ꓐꓬꓱ ꓦꓲ ꓡꓰ ꓦꓲ ꓓꓽ ꓟ ꓕꓲ ꓜꓱ ꓔꓯ ꓙꓲꓽ ꓑꓳ ꓢꓰꓸ ꓩꓴ ꓡ ꓕꓯ ꓐꓲ-ꓡ-ꓓꓲ ꓠꓬ ꓮ-ꓩ-ꓖ-ꓠꓯ-ꓢꓲ-ꓔ ꓗꓴꓷꓼ ꓗꓪ ꓬꓲꓸ ꓦꓲ ꓢꓲ ꓟ 3 ꓣꓳ ꓐꓰ ꓕꓲ ꓪ ꓔꓬ ꓡꓳ= ꓖꓳ ꓕꓯ ꓬꓲꓸ ꓠꓬ 44 ꓘꓳꓼ ꓙꓳ ꓡꓳ= ꓬꓲꓸ ꓟꓶꓽ ꓪꓴꓽ ꓠꓬꓲꓽ ꓣꓳ ꓠꓬ꓾ 52 ꓘꓳꓼ ꓙꓳ ꓟ ꓘ-ꓣꓲ-ꓬ ꓢ-ꓐ (Khairiah Sabar, 52)꓾ ꓤ ꓠꓱ ꓓꓵ ꓙ ꓚꓱꓹ ꓢꓷꓸ ꓠꓲꓹ ꓧꓪ ꓟꓰꓹ ꓢꓴ ꓥ ꓢꓲꓸ ꓐꓲ-ꓡ-ꓓꓲ ꓔꓯ ꓡꓯ ꓒꓯꓹ ꓝꓸ ꓠꓹ ꓟ ꓬꓲꓸ ꓟꓬꓱꓽ ꓔꓯ ꓠꓽ ꓩꓴ ꓢꓴ ꓕꓲ ꓣꓳ ꓥ ꓡꓳ= ꓝꓮꓲ ꓕꓲ ꓣꓳ ꓠꓬ 44 ꓘꓳꓼ ꓙꓳ ꓟ ꓘꓶꓽ ꓪꓰ ꓥꓳ ꓙꓱ ꓐꓳ ꓟ ꓐꓰ꓾ ꓗꓳ-ꓣ ꓢꓲꓽ ꓫꓬ ꓕꓳ ꓶ ꓐꓳ ꓚꓱꓹ ꓐꓳ ꓡꓲꓽ ꓢꓷꓸ ꓢꓴ ꓟꓴ ꓡꓳꓹ ꓬꓰ ꓟ ꓙꓵꓽ ꓪꓴꓸ ꓛꓴꓽ ꓑꓧꓸꓓ ꓣꓴ ꓔꓸ ꓢꓴ ꓢꓲ-ꓧ ꓮ-ꓫ-ꓬꓰ (Siham al-Sharif, 44) ꓥ ꓢꓲ꓾ ꓙꓰ-ꓧꓼ ꓐꓯ ꓟ ꓲ-ꓢꓲ-ꓡ ꓦ ꓡꓱ ꓚꓱꓹ ꓡꓳ ꓚ ꓕꓲ ꓟꓲ ꓠꓯ ꓗꓪ ꓟꓯꓼ ꓓꓶꓽ ꓡꓯ ꓘꓳ ꓓꓴ ꓐꓱ ꓶ ꓢꓯꓼ ꓖꓶ ꓢꓴ꓾ ꓐꓲ-ꓡ-ꓓꓲ ꓫꓸ ꓕꓱ ꓠꓹ ꓟ ꓫꓸ ꓪ ꓚꓱꓹ ꓐꓳ ꓖꓶ ꓢꓴ ꓥ ꓡꓳ=
ꓐꓲ-ꓡ-ꓓꓲ ꓦꓲ ꓢꓲ ꓟ 3 ꓣꓳ ꓕꓲ ꓣꓳ ꓠꓬ ꓮ-ꓟꓯ ꓯ-ꓢ-ꓓ ꓥ ꓢꓲ꓾ ꓦꓲ ꓗꓪ ꓐꓰ ꓬꓲꓸ ꓐꓽ ꓢꓲ ꓗꓪ ꓓꓳ ꓚꓳ ꓟ ꓟꓽ ꓙꓳ= ꓤ ꓠꓱ ꓦꓵ ꓠꓹ ꓟ ꓐꓱ ꓶ ꓟꓬꓱꓺ ꓬꓲꓸ ꓚꓬꓼ ꓣꓱꓽ ꓢꓲ ꓠꓯ ꓞꓲꓼ ꓦꓲ ꓗꓪ 2 ꓧꓪꓹ ꓡꓰ ꓓꓳ ꓡ ꓠꓬꓲ ꓡꓳ= ꓬꓲꓸ ꓠꓬ ꓬꓰ-ꓟꓯ ꓗꓴꓷꓼ ꓪ ꓚꓲ ꓪꓽ ꓐꓽ ꓗꓪ ꓐꓰ ꓡ ꓢꓴ ꓦ ꓦꓹ ꓤꓼ ꓞꓲꓼ ꓣꓳ ꓟ 17 ꓘꓳꓼ ꓡꓰꓽ ꓙꓳ ꓢꓴ ꓥ ꓢꓲ꓾ ꓐꓲ-ꓡ-ꓓꓲ ꓮ ꓘꓶꓸ ꓠꓲꓹ ꓠꓵ ꓢꓴ ꓥ ꓡꓳ=
ꓐꓲ-ꓡ-ꓓꓲ ꓠꓬ꓾ ꓮ-ꓛꓬ ꓢꓶꓽ ꓜꓽ꓾ ꓢꓲꓹ ꓜꓲ ꓡꓰ ꓑꓵꓸ ꓔꓸ ꓟ ꓬꓲꓸ ꓬꓲꓻ ꓕꓲ ꓫꓵꓽ ꓓꓳ ꓡꓳ= ꓝꓮꓲ ꓬꓲꓸ ꓟꓶꓽ ꓝꓲ ꓔꓯ ꓥ ꓟꓲ ꓜꓸ ꓗꓴꓸ ꓡꓳ ꓐꓰ꓾ ꓐꓲ-ꓡ-ꓓꓲ ꓟꓸ ꓟꓲꓽ ꓔꓯ ꓕꓳ ꓶ ꓐꓳ ꓒꓽ ꓐ-ꓖꓯ (Bergen) ꓡꓰ ꓐꓳ ꓡꓳ=
ꓞꓳ ꓤ 2977 ꓣꓳ ꓢꓰꓼ ꓟꓶꓽ ꓡꓰ ꓟ 9 ꓦ 11 ꓠꓬꓲ ꓜꓲ ꓜꓲ ꓑꓰꓹ ꓑꓰꓹ ꓙꓳ ꓦꓰꓸ ꓡꓰ ꓢꓴ ꓬꓰ ꓗꓷ ꓗꓸ ꓠꓯꓸ ꓐꓲ-ꓡ-ꓓꓲ ꓐꓴ ꓕꓲ ꓦꓲ ꓢꓴ ꓠꓬ ꓕꓲ ꓖ ꓕꓲ ꓣꓳ ꓛꓰꓹ ꓑꓬ ꓔꓬ ꓙꓰ ꓠ ꓗꓷ ꓡꓰꓳ= ꓐꓶꓽ ꓓꓵꓽ ꓟꓵꓽ ꓕꓲ ꓒꓳꓹ ꓗꓪ ꓔꓬ ꓢꓴ ꓐꓴ ꓔꓯ ꓙꓰ-ꓧꓼ ꓟꓯꓼ ꓢꓰꓼ ꓡꓯ ꓘꓳ ꓠꓹ ꓟ ꓮ-ꓡꓲ-ꓗ-ꓓ ꓜꓴ (al Qaeda) ꓔꓯ ꓒꓴ ꓢꓲꓸ ꓧꓳꓽ ꓪꓴꓸ ꓟꓴ ꓢꓴ ꓐꓲ-ꓡ-ꓓꓲ ꓠꓬ ꓮ-ꓩ-ꓖ ꓪ ꓚꓲ ꓪ ꓐꓽ ꓗꓪ ꓛꓰꓹ ꓑꓬ ꓔꓬ ꓠ ꓗꓷ ꓡꓰꓳ= 2004 ꓘꓳꓼ ꓗꓪ ꓴꓢꓮ ꓟꓯꓼ ꓐꓴ ꓮ-ꓩ-ꓖ-ꓠꓯ-ꓢꓲ-ꓔ ꓐꓰ꓾ ꓲ-ꓣꓼ ꓗꓷꓼ ꓗꓪ ꓓꓵꓽ ꓡ ꓟ ꓗꓪ ꓐꓰ ꓐꓲ-ꓡ-ꓓꓲ ꓠꓬ ꓛꓰꓹ ꓑꓬ ꓖꓴ ꓮ ꓘꓶꓸ ꓟꓽ ꓢ ꓡꓰꓳ=
ꓖꓳ ꓟ ꓑꓶꓸ ꓓꓴ ꓬꓲꓸ ꓔꓯ ꓡꓳꓸ ꓙ ꓢꓴ ꓮ-ꓐ-ꓡ-ꓦꓰ ꓢ-ꓬꓲꓼ ꓮ-ꓟꓯꓸ ꓮ-ꓐ ꓮ-ꓧ-ꓟꓲꓼ (Ibrahim Saeed Ahmed abd al-Hamid) ꓔꓯ ꓝꓲ ꓩꓴ ꓗꓷ ꓢꓲ꓾ ꓑ-ꓗꓲ-ꓢꓲ-ꓔ ꓟꓵꓽ꓾ ꓮ-ꓐꓳ-ꓔ-ꓐꓼ ꓗꓪ ꓟꓵꓽ ꓪꓴ ꓢꓲꓸ ꓛꓰꓹ ꓑꓬ ꓔꓶꓸ ꓫꓬꓹ ꓠꓹ ꓟ ꓝꓲ ꓩꓴ ꓗꓷ ꓡꓳ=
ꓮ-ꓐ-ꓡ-ꓦꓰ ꓠꓬ ꓟꓵꓽ ꓕꓲ ꓘꓴꓸ ꓔꓯ ꓬꓲꓸ ꓟꓬꓱꓺ ꓗꓪ ꓐꓰ ꓓꓳ-ꓡ 50000 ꓖꓶ ꓢꓲꓸ ꓪꓴ ꓓꓳ ꓡꓰ ꓠꓬ꓾ ꓬꓲꓸ ꓡꓳ ꓑ ꓐꓲ-ꓡ-ꓓꓲ ꓡꓰ ꓫꓬꓹ ꓝꓲ ꓡ ꓟ ꓡꓰ ꓐꓰ ꓦꓲ ꓕꓲ ꓟ ꓫꓬ ꓗꓷꓳ= ꓦꓲ ꓠꓬ 3 ꓝꓸ ꓦꓲ ꓕꓲ ꓟ ꓥ ꓢꓲ꓾ ꓕꓲ ꓝꓸ ꓡꓲꓸ ꓕꓲ ꓝꓸ ꓗꓪ ꓬꓲꓼ ꓔꓸ ꓗꓳꓹ 4 ꓗꓳꓹ ꓙꓳ ꓢꓲ꓾ ꓬꓲꓼ ꓔꓸ ꓗꓳꓹ ꓮ ꓙꓵꓽ ꓗꓪ ꓬꓲ ꓙꓬ ꓞꓲꓽ ꓗꓳꓹ ꓥ ꓟꓲ ꓙꓳ ꓡꓳ= ꓮ ꓟꓴꓹ ꓟꓴ ꓕꓲ ꓝꓸ ꓗꓪ ꓠꓬ ꓬꓲꓼ ꓔꓸ ꓖꓴ꓾ ꓖꓳ ꓓꓱꓽ ꓞꓲꓽ ꓖꓴ꓾ ꓐꓰ ꓡ ꓙꓳ ꓓꓰꓺ ꓡꓰ ꓐꓰ ꓗꓹ ꓟ ꓕꓲ ꓔꓶꓸ ꓫꓬꓹ ꓔꓸ ꓡꓳ= 2005 ꓘꓳꓼ ꓗꓪ ꓐꓰ ꓪꓴꓸ ꓔꓴ ꓢꓲ ꓐꓲ-ꓡ-ꓓꓲ ꓐꓴ ꓕꓲ ꓦꓲ ꓖꓳ ꓦꓲ ꓫꓵꓼ ꓗꓪ ꓮ ꓤ ꓤ ꓚꓵꓸ ꓓꓵꓽ ꓡ ꓡꓳ=
ꓐꓱ ꓐꓰ ꓦꓲ ꓢꓲꓺ ꓒꓽ ꓥ ꓡꓳ ꓐꓰ ꓕꓳ ꓶ ꓗꓪ ꓟꓳꓸ ꓖꓶ ꓔꓸ ꓟ ꓮ-ꓐ-ꓡ-ꓦꓰ ꓐꓰ꓾ ꓬꓲꓸ ꓠꓬꓲ ꓤ ꓮ-ꓣ ꓐꓰ꓾ ꓬꓲꓸ ꓪ ꓦꓲ ꓢꓲ ꓟ ꓐꓴ꓾ ꓤ ꓠꓱ ꓐꓴ ꓠꓬ ꓖꓳ ꓗꓪ ꓮ ꓕꓯ ꓕꓯ ꓓꓵꓽ ꓓꓵꓽ ꓓꓳ ꓓꓳ ꓬꓰ ꓔꓬ ꓡꓳ=
ꓬꓲꓸ ꓪ ꓮ ꓙꓵꓽ ꓠꓬ ꓛꓽ ꓒꓽ ꓡꓰ ꓟꓽ ꓢꓷꓸ ꓡꓰ ꓠꓹ ꓟ ꓮ ꓫꓵꓽ ꓡꓲꓸ ꓪꓴꓽˍ ꓟ ꓟꓬꓱꓽ ꓬꓰ ꓢꓴ ꓟꓽ ꓥ ꓪ ꓡꓰ ꓗꓶꓸ ꓢꓲꓸ ꓟꓽ ꓪꓳꓹ ꓔꓬ ꓡꓳ= ꓕꓲ ꓖ ꓖ ꓗꓪ ꓙ ꓡꓯ ꓘꓳ ꓠꓲꓹ ꓫꓵ ꓠꓬ꓾ ꓡꓳ ꓒꓱ ꓗꓪ ꓙꓰ ꓢꓲ ꓙꓸ ꓠꓸ ꓕꓱ ꓡꓳ= ꓦꓲ ꓗꓪ ꓡ ꓡ ꓠꓬ ꓙ ꓠꓸ ꓫꓸ ꓕꓱ ꓓꓴ (ꓑꓧꓳꓠꓰ) ꓗꓪ ꓐꓰ ꓮ ꓔꓳꓸ ꓜ ꓐꓮꓔꓔꓰꓣꓬ ꓮ ꓙꓵꓽ ꓕꓲ ꓖ ꓕꓲ ꓟ ꓣꓴ ꓢꓰꓸ ꓦ ꓔꓸ ꓡꓳ= ꓮ ꓡꓲꓳ ꓐꓯ ꓠꓬ ꓑꓧꓳꓠꓰ ꓖꓳ ꓟ ꓗꓪ ꓐꓰ ꓬꓲꓸ ꓪ ꓮ ꓗꓪ ꓔꓬ ꓟ ꓛꓽ ꓟꓳ ꓟꓽ ꓓ ꓠꓹ ꓟ ꓥ ꓡꓳ=
ꓐꓲ-ꓡ-ꓓꓲ ꓠꓬ ꓐꓱ ꓖꓳ ꓟ ꓗꓪ ꓐꓰ ꓬꓲꓸ ꓐꓽ ꓢꓲ ꓗꓪ ꓮ ꓕꓯ ꓟꓲ ꓟꓽ ꓓꓳ ꓡ= ꓬꓲꓸ ꓦꓲ ꓢꓲ ꓟ ꓮ-ꓟꓯ ꓢꓲꓸ ꓤ ꓠꓱ ꓦꓵ ꓠꓹ ꓟ 2 ꓧꓪꓹ ꓡꓰ ꓐꓱ ꓐꓽ ꓢꓲ ꓗꓪ ꓓꓳ ꓡ ꓠꓬꓲ ꓡꓳ= ꓠꓯ ꓞꓲꓼ ꓦꓲ ꓗꓪ ꓥ ꓟꓲ ꓟꓬꓱꓺ ꓬꓲꓸ ꓚꓬꓼ ꓣꓱ ꓡꓳ= ꓝꓮꓲ ꓫꓸ ꓕꓱ ꓟꓽ ꓗꓴꓸ ꓠꓸ ꓐꓳꓽ ꓡꓰ ꓐꓰ ꓗꓶꓸ ꓔꓸ ꓡꓳ=
ꓐꓯ ꓞꓲꓽ (ꓐꓵ ꓞꓲꓽ) ꓡꓱꓸ ꓔꓸ ꓟ ꓔꓯ ꓡꓳꓸ ꓢꓲꓸ ꓐꓲ-ꓡ-ꓓꓲ ꓮ ꓗꓪ ꓔꓬ ꓟ ꓚꓹ ꓟꓶ ꓡꓰ ꓢꓴ ꓠꓬ꓾ ꓚꓲꓮ ꓟꓬꓱꓽ ꓧꓳꓽ ꓢꓴ ꓡꓲ-ꓬꓳ ꓑ-ꓠꓯ-ꓔ (CIA Director Leon Panetta) ꓥ ꓡꓳ=
ꓐꓲ-ꓡ-ꓓꓲ ꓠꓬ ꓦꓲ ꓘꓴꓽ ꓗꓪ ꓡꓴꓽ ꓔꓬ ꓢꓲ꓾ ꓓꓦꓓ ꓛꓳꓽ ꓡꓳ= ꓖꓳ ꓡꓱ ꓥ ꓟꓲ ꓲꓠꓔꓰꓣꓠꓰꓔ ꓐꓰ ꓑꓧꓳꓠꓰ ꓠꓬ ꓟꓽ ꓣꓱꓽ=
ꓟꓽ ꓪꓳꓹ ꓛꓰꓹ ꓑꓬ ꓔꓬ ꓟ ꓐꓲ-ꓡ-ꓓꓲ
ꓖꓳ ꓡꓱ ꓥ ꓟꓲ 2010 ꓘꓳꓼ ꓗꓪ ꓠꓬ ꓚꓲꓮ ꓠꓬ ꓓꓳꓽ ꓕꓲ ꓟ ꓬꓲꓸ ꓚ ꓚꓲꓹ ꓪ ꓡꓰ ꓡꓳ= ꓐꓲ-ꓡ-ꓓꓲ ꓔꓯ ꓡꓳꓸ ꓙ ꓢꓴ ꓮ-ꓐ-ꓡ-ꓦꓰ ꓔꓯ ꓞꓳ ꓜꓴ ꓞꓳ ꓟꓯꓼ ꓐꓯ ꓖꓴ ꓟꓽ ꓓ ꓔꓬ ꓟ ꓑꓯ-ꓫꓲ-ꓪ ꓡꓳ ꓒꓱ ꓗꓪ ꓑ-ꓗꓲ-ꓢꓲ-ꓔ ꓛꓽ ꓒꓽ ꓕꓲ ꓣꓳ ꓡꓰ ꓛꓽ ꓟꓳ ꓡꓰꓳ=
ꓖꓳ ꓗꓪ ꓐꓰ ꓕꓲ ꓝꓸ ꓮ-ꓐ-ꓡ-ꓦꓰ ꓙꓲꓼ ꓟꓳ ꓓꓳ ꓒꓴ ꓒꓴ ꓠꓬ ꓮ ꓢꓳꓸ ꓐꓲ-ꓡ-ꓓꓲ ꓛꓰꓹ ꓑꓬ ꓔꓬ ꓖꓴ ꓗꓪ ꓓꓵꓽ ꓙꓰ ꓓꓳ ꓙꓰ ꓬꓰ ꓔꓬ ꓟ ꓔꓯ ꓚꓲꓮ ꓛꓽ ꓟꓶ ꓡꓰꓳ= ꓖꓳ ꓐꓱ ꓘꓴꓽ ꓐꓰ 3 ꓝꓸ ꓦꓲ ꓟ ꓗꓪ ꓐꓲ-ꓡ-ꓓꓲ꓾ ꓬꓲꓸ ꓦꓲ ꓢꓲ ꓟ 3 ꓣꓳ꓾ ꓬꓲꓸ ꓤ ꓠꓱ ꓣꓳ ꓣꓳ ꓤꓼ ꓟ 8 ꓣꓳ ꓐꓰ꓾ ꓬꓲꓸ 2-3 ꓘꓳꓼ ꓙꓳ ꓟ ꓤ ꓠꓱ ꓐꓴ ꓥ ꓟ ꓬꓲꓸ ꓡꓲꓸ ꓑꓸ ꓡꓲꓸ ꓟ 4 ꓣꓳ ꓔꓬ ꓡꓳ=
ꓖꓳ ꓐꓱ ꓘꓴꓽ ꓐꓰ ꓦꓲ ꓠꓬ ꓬꓲꓸ ꓔꓱꓹ ꓬꓲꓸ ꓕꓲ ꓫꓵꓽ ꓗ ꓔꓬ ꓟ ꓔꓯ ꓚꓲꓮ ꓡꓰ ꓚꓲꓸ ꓚ ꓟꓶ ꓡꓳ= ꓖꓳ ꓕꓲ ꓦꓲ ꓗꓪ ꓑꓧꓳꓠꓰ ꓚꓲ ꓚ ꓖꓶ ꓟꓽ ꓙꓳ꓾ ꓲꓠꓔꓰꓣꓠꓰꓔ ꓖꓶ ꓟꓽ ꓙꓳ= ꓖꓳ ꓡꓱꓳ ꓫꓵꓽ ꓦꓲ ꓒꓽ ꓓꓽ ꓟ ꓫꓬꓹ ꓐ ꓡ ꓢꓴ ꓠꓬ ꓑꓧꓳꓠꓰ ꓐꓰ ꓲꓠꓔꓰꓣꓠꓰꓔ ꓙꓳ ꓠ ꓔꓸ ꓥ ꓟꓲ꓾ ꓟꓽ ꓙꓳ ꓟ ꓑꓶꓸ ꓓꓴ ꓬꓲꓸ ꓔꓱꓹ ꓬꓲꓸ ꓕꓲ ꓫꓵꓽ ꓚꓵ ꓘꓶꓽ ꓒꓬꓱꓼ ꓡ ꓡꓳ= ꓦꓲ ꓠꓬ ꓠꓬꓲ ꓟꓳ ꓒꓰꓼ ꓮ ꓔꓲꓸ ꓤꓼ ꓡꓰꓽ ꓙꓳ ꓡꓳ= ꓦꓲ ꓕꓯ ꓢꓲ ꓕꓲ ꓝꓸ ꓗꓪ ꓠꓬ ꓡꓯꓽ ꓡꓯꓽ ꓗꓹ ꓟ ꓡ ꓙꓳ ꓓꓰ ꓙꓳ ꓥ ꓟꓲ꓾ ꓚꓳ ꓡꓳ ꓡꓳ ꓗꓪ ꓚꓬꓹ ꓓꓽ ꓟ ꓕꓴꓽ ꓡꓴꓸ ꓔ ꓡꓳ=
“ꓦꓲ ꓕꓯ ꓢꓲ ꓕꓲ ꓝꓸ ꓗꓪ ꓟ ꓚꓬꓹ ꓓꓽ ꓟ ꓖꓳ ꓟ ꓠꓬ ꓮ ꓫꓵꓽ ꓑꓶꓸ ꓓꓴ ꓕꓴꓽ ꓔꓸ ꓡ?” ꓚꓲꓮ ꓛꓽ ꓒꓽ ꓜꓴ ꓧꓳꓽ ꓢꓴ ꓡꓰ-ꓬꓳ ꓑ-ꓠꓯ-ꓔ ꓡꓰ ꓬꓲꓸ ꓟꓬꓱꓽ ꓬꓰ ꓢꓴ ꓐꓴ ꓔꓯ ꓠꓻ ꓠꓬꓲ ꓡ=
“ꓳꓸ ꓟ ꓔꓲꓸ ꓥꓳ” ꓐꓰ ꓢꓪꓼ ꓠꓬꓲ ꓒꓽ ꓕꓲ ꓣꓳ ꓡꓰ ꓐꓯ ꓡꓳ=
ꓚꓲꓮ ꓛꓽ ꓒꓽ ꓜꓴ ꓡꓰ ꓦꓲ ꓐꓰ ꓐꓱ ꓖꓳ ꓟ ꓒ ꓕꓲ ꓗꓪ ꓦꓲ ꓕꓲ ꓟ ꓥꓪꓸ ꓢꓲꓸ ꓦꓲ ꓖꓳ ꓟ ꓠꓯꓸꓼ ꓗꓪ ꓮ ꓡꓲꓳ ꓫꓵꓽ ꓡ ꓞꓳ ꓔꓬ ꓟ ꓔꓯ ꓶꓽ ꓤ ꓗꓪ ꓐꓰ ꓕꓲ ꓠꓬꓲ ꓡꓲꓸ ꓕꓲ ꓠꓬꓲ ꓛꓽ ꓠꓬꓲ ꓧꓪꓹ ꓟꓰꓹ ꓡꓳꓸ ꓠꓬꓲ ꓔꓬ ꓡꓳ= ꓠꓱꓸ ꓐꓯꓼ ꓦꓲ ꓗꓪ ꓐꓰ ꓠꓬ ꓦꓲ ꓗꓪ ꓐꓰ ꓓꓳ ꓡ ꓟ ꓑꓱꓸ ꓛꓵꓽ ꓑꓱꓸ ꓟꓲ ꓔꓯ ꓑꓱꓸ ꓛꓵꓽ ꓫꓺ ꓟꓳ ꓓꓳ ꓗꓪ ꓗꓶ ꓩꓴ ꓔꓬ ꓕꓯ꓾ ꓦꓲ ꓖꓳ ꓟ ꓗꓪ ꓐꓰ ꓓꓳ ꓡ ꓟ ꓑꓱꓸ ꓛꓵꓽ ꓔꓯ ꓠꓬ ꓐꓱꓽ ꓕꓲ ꓗꓴ ꓗꓪ ꓮ ꓔꓳꓸ ꓛꓴ ꓔꓬ ꓟ ꓡꓳꓸ ꓟꓳ ꓡꓳ=
ꓚꓬꓹ ꓓꓽ ꓟ ꓕꓴꓽ ꓚꓳꓸ ꓔꓸ ꓟ ꓐꓱ ꓘꓴꓽ ꓗꓪ ꓔꓶ ꓜꓽ ꓔꓶ ꓓꓳ ꓖꓴ ꓓꓰ ꓟꓲ ꓕꓲ ꓘꓴꓸ ꓥ ꓟꓲ ꓙꓳ ꓡꓳ= ꓖꓳ ꓗꓪ ꓮ-ꓑ ꓢꓲꓹ ꓢꓶꓽ꓾ ꓪꓳꓽ ꓒꓬ ꓬꓲ ꓫꓵ ꓬꓲ ꓙꓰ꓾ ꓛꓱꓼ ꓡꓱꓼ ꓢꓶꓽ ꓐꓰ꓾ ꓐꓬꓽ ꓬꓲ꓾ ꓝꓮꓲ ꓮ ꓭꓸ ꓐꓰ ꓮꓸ ꓠꓬꓲꓽ ꓥ ꓟꓲ ꓫꓳ ꓔꓸ ꓢꓲꓸ ꓖꓳ ꓗꓪ ꓐꓰ ꓓꓳ ꓡ ꓟ ꓮ ꓙꓵꓽ ꓦꓲ ꓗꓪ ꓔꓬ ꓢꓴ ꓜꓽ ꓓꓳ ꓡꓳ=
ꓖꓳ ꓡꓱ ꓛꓽ ꓔꓬ ꓕꓯ꓾ ꓬꓲꓸ ꓟꓶꓽ ꓗꓪ ꓦꓲ ꓖꓳ ꓟ ꓗꓪ ꓐꓲ-ꓡ-ꓓꓲ ꓔꓬ ꓟ ꓢꓷꓸ ꓡꓰ ꓓꓴ ꓕꓲ ꓫꓵꓽ ꓛꓽ ꓟꓶ ꓡꓰ ꓟ ꓠꓬ꓾ ꓦꓲ ꓬꓲꓸ ꓐꓽ ꓢꓲ ꓐꓱ ꓘꓴꓽ ꓗꓪ ꓤ ꓟꓶꓼ ꓤꓼ ꓖꓪ ꓓꓴ ꓐꓰ꓾ ꓤꓽ ꓖꓪ ꓓꓴ ꓐꓵ ꓞꓲꓽ ꓡꓱꓸ ꓡ ꓟ ꓗꓪ ꓐꓰ ꓥ ꓡꓳ= ꓟꓯꓼ ꓡꓳꓸ ꓢꓴ 11 ꓣꓳ ꓕꓯ ꓢꓲ ꓟꓬꓽ ꓟ ꓐꓵ ꓞꓲꓽ ꓡꓱꓸ ꓡ ꓡꓳ=
ꓦꓲ ꓬꓲꓸ ꓐꓽ ꓢꓲ ꓗꓪ ꓟꓽ ꓓꓳ ꓡ ꓡ꓾ ꓦꓲ ꓘꓴꓽ ꓗꓪ ꓡꓴꓽ ꓔꓬ ꓟ ꓡ ꓞꓳ ꓙꓳ ꓟ ꓢꓷꓸ ꓡꓰ ꓓꓴ ꓠꓬ꓾ ꓦꓲ ꓐꓽ ꓢꓲ ꓗꓪ ꓡꓱꓸ ꓓꓳ ꓡ ꓟ ꓐꓵ ꓞꓲꓽ ꓐꓴ ꓗꓪ ꓐꓰ ꓢꓪꓼ ꓪ ꓡꓰ ꓟ ꓥ ꓡꓳ= ꓐꓵ ꓞꓲꓽ ꓡꓱꓸ ꓡ ꓟ ꓡꓳ ꓚ ꓢꓪꓼ ꓠꓬꓲ ꓠꓬ꓾ ꓤ ꓟꓶ ꓤ ꓮ ꓟꓬꓹ ꓣꓳ꓾ ꓤ ꓞꓳ ꓟꓳꓽ ꓕꓲ ꓣꓳ꓾ ꓐꓰ ꓤ ꓠꓱ ꓐꓴ ꓖꓳ ꓕꓲ ꓦꓲ ꓗꓪ ꓔꓬ ꓟ ꓢꓷꓸ ꓡꓰꓳ= ꓕꓱ ꓟ ꓠꓬ ꓚꓲꓮ ꓧꓪ ꓔꓬ ꓟ ꓐꓲ-ꓡ-ꓓꓲ ꓐꓴ ꓕꓲ ꓦꓲ ꓥ ꓟ ꓮ ꓟꓬꓹ ꓚꓽ ꓡꓰꓳ=
ꓕꓲ ꓘꓳꓼ ꓟꓽ ꓞꓲ ꓛꓰꓹ ꓑꓬ ꓔꓬ ꓟ ꓗꓪ꓾ ꓐꓵ ꓞꓲꓽ ꓡꓱꓸ ꓓꓳ ꓡ ꓟ ꓗꓪ ꓐꓰ ꓐꓲ-ꓡ-ꓓꓲ ꓔꓯ ꓧꓪ ꓟꓶ ꓡꓰꓳ=
ꓛꓽ ꓒꓽ ꓪꓴꓸ ꓓꓵ ꓣꓱꓽ ꓢꓴ ꓑ-ꓠꓯ-ꓔ ꓐꓱ ꓶ ꓖꓳ ꓟꓬ ꓟ ꓢꓸ ꓢꓯ ꓠꓬ ꓡꓳꓼ ꓬꓰꓳ= ꓖꓳ ꓟ ꓑꓶꓸ ꓓꓴ 2010 ꓘꓳꓼ 12 ꓦ 14 ꓠꓬꓲ ꓕꓯ ꓚꓲꓮ ꓡꓰ ꓛꓽ ꓟꓶ ꓔꓸ ꓟ ꓢꓸ ꓢꓯ ꓐꓴ ꓔꓯ ꓖꓳ ꓕꓯ ꓟ ꓴꓢꓮ ꓪ ꓔꓲꓸ ꓐ-ꓣꓼ ꓳ-ꓐ-ꓟ ꓔꓯ ꓐꓯ ꓟꓳꓸ ꓖꓶ ꓗꓷꓳ=
ꓛꓽ ꓢꓴ ꓐꓴ ꓠꓬ ꓐꓲ-ꓡ-ꓓꓲ ꓐꓬꓱꓽ ꓕꓲ ꓟ ꓡꓲꓸ ꓟꓽ ꓔꓳꓹ ꓠꓷꓼ ꓪ= ꓖꓳ ꓡꓱ ꓥ ꓟꓲ꓾ ꓐꓲ-ꓡ-ꓓꓲ ꓖꓳ ꓗꓪ ꓑꓬ ꓔꓬ ꓟ ꓔꓯ ꓠꓬ ꓬꓲꓸ ꓪ ꓢꓪꓼ ꓓꓳ ꓡ ꓡꓳ=
ꓪ ꓔꓲꓸ ꓳ-ꓐ-ꓟ ꓘꓳ ꓣꓴ ꓡꓰꓳ= ꓴꓢ ꓠꓯ-ꓪꓰ ꓔꓯ ꓟꓬꓱꓽ ꓑꓶꓸ ꓕꓱ ꓟ ꓐꓱ ꓶ ꓙꓽ ꓖꓶ ꓠꓹ ꓟ ꓕꓵꓼ ꓪ ꓖꓶ ꓗꓷꓳ= 2011 ꓘꓳꓼ 5 ꓦ 1 ꓠꓬꓲ ꓗꓪ ꓠꓬ ꓜꓲ ꓜꓲ ꓑꓰꓹ ꓑꓰꓹ ꓙꓳ ꓦꓰꓸ ꓡꓰ ꓟ ꓥꓶꓸ ꓟ ꓟꓬꓱꓽ ꓬꓰ ꓢꓴ꓾ 54 ꓘꓳꓼ ꓙꓳ ꓟ ꓐꓲ-ꓡ-ꓓꓲ ꓔꓯ ꓢꓰꓼ ꓪ ꓡꓰꓳ= ꓮ ꓧꓪꓹ꓾ ꓐꓲ-ꓡ-ꓓꓲ ꓡꓰ ꓬꓲꓸ ꓦꓲ ꓢꓲ ꓟ ꓐꓴ ꓔꓯ ꓖꓪ ꓓꓴ ꓐꓵ ꓞꓲꓽ ꓡꓱꓸ ꓙꓼ ꓕꓲ ꓟ ꓪꓴ ꓖꓶꓽ ꓔꓸ ꓚꓰꓼ ꓥꓳ ꓐꓯ ꓠꓽ ꓬꓲꓸ ꓔꓯ ꓟꓽ ꓢꓰꓼ ꓪ ꓡꓲꓸ ꓟꓽ ꓢꓷ!
ꓢꓷꓸ ꓡꓰ ꓓꓴ꓾ New York Post ꓗꓪ Mary Kay Linge ꓡꓰ ꓐꓳ ꓔꓸ ꓟ “Osama bin Laden was found because his family hung their clothes out to dry” ꓔꓯ ꓡꓲ-ꓢꓴ ꓥꓳꓽ ꓗꓪ ꓡꓶꓸ ꓐꓳ ꓔꓸ ꓟ ꓥ ꓡꓳ=
