ꓕꓮꓲꓹ ꓟꓵꓽ ꓗꓪ ꓬꓯꓻ ꓜꓲꓽ ꓕꓲꓽ ꓫꓵꓽ (cannabis or marijuana) ꓔꓯ ꓠꓯ ꓞꓲꓼ ꓐꓱ ꓶ ꓔꓶ ꓜꓽ ꓔꓶ ꓓꓳ ꓓˍ ꓟ ꓙꓵꓽ ꓗ ꓫꓵꓼ ꓕꓲꓽ ꓟ 2022 ꓘꓳꓼ 6 ꓦ 9 ꓠꓬꓲ ꓗꓪ ꓐꓰ ꓪꓴꓸ ꓔꓴ ꓗꓷꓳ꓿
ꓧꓶꓸ ꓕꓯꓽ ꓠꓬ ꓬꓯꓻ ꓜꓲꓽ ꓛꓬꓽ ꓖꓳ ꓕꓲ ꓫꓵꓽ ꓔꓯ ꓬꓲꓼ ꓡ ꓟ ꓜꓽ ꓫꓵꓽ ꓗꓪ ꓗꓶꓺ ꓔꓸ ꓢꓲꓸ ꓙꓵꓽ ꓗ ꓗꓪ ꓐꓰ ꓑꓲꓸ ꓔꓸ ꓟ꓾ ꓡꓲꓽ ꓟꓴꓽ ꓔꓬ ꓟ ꓥ ꓡꓳ꓿
ꓖꓳ ꓡꓱ ꓥ ꓟꓲ ꓮ ꓟꓶ ꓠꓬ ꓗꓴꓷꓼ ꓙꓵꓽ ꓜꓴ ꓡꓰ ꓑ ꓫꓬ ꓐꓴ ꓔꓯ ꓕꓱ 6 ꓦ ꓟ ꓘꓴꓽ ꓗꓪ ꓬꓯꓻ ꓜꓲꓽ ꓜꓲꓻ 10 ꓢꓯꓹ ꓬꓲꓸ ꓒꓵꓽ ꓟꓽ ꓣꓴ ꓣꓴ ꓐꓹ ꓖꓶꓽ ꓓꓴ ꓥꓳ꓾ ꓐꓯ ꓡꓳ꓿
ꓙꓵꓽ ꓗ ꓫꓵꓼ ꓗꓪ ꓞꓳ ꓦꓲ ꓕꓲ ꓦꓲ ꓠꓬ 6 ꓜꓲꓻ ꓔꓶ ꓓ ꓢꓲ꓾ ꓬꓯꓻ ꓜꓲꓽ ꓟꓲ ꓶ ꓡꓯꓼ ꓜꓴ ꓗꓳ-ꓑꓶ-ꓠꓰ ꓥ ꓟꓲ ꓕꓵꓼ ꓪ ꓓꓰꓽ ꓢꓲꓸ ꓬꓲꓸ ꓡꓲꓽ ꓡꓳ ꓚ ꓬꓯꓻ ꓜꓲꓽ ꓦ ꓟꓲ ꓓꓽ ꓟ ꓬꓰ ꓓˍ ꓡꓳ꓾ ꓐꓯ ꓔꓸ ꓡꓳ꓿
ꓬꓯꓻ ꓜꓲꓽ ꓕꓱ ꓟ ꓔꓯ ꓠꓸ ꓒꓵꓼ ꓬꓲ ꓫꓵ ꓬꓲ ꓙꓰ ꓗꓪ꓾ ꓧꓪꓽ ꓚꓸ ꓜꓽ ꓟ ꓗꓪ꓾ ꓝꓮꓲꓹ ꓬꓯꓻ ꓡꓰ ꓐꓰ ꓟꓴꓽ ꓘꓴꓽ ꓛꓵꓼ ꓟ ꓗꓪ ꓣꓱꓽ ꓡꓳ꓿ ꓕꓱ ꓟ ꓠꓬ ꓡ ꓞꓳ ꓠꓲꓹ ꓟ ꓔꓯ ꓢꓲ ꓡꓲꓹ ꓬꓰ ꓝꓲ ꓟ ꓐꓰ꓾ ꓗꓲ-ꓢ ꓠꓻ ꓫꓵꓽ ꓔꓯ ꓧꓪꓸ ꓐ ꓡ ꓟ ꓢꓯꓼ ꓙꓳˍ ꓡꓳ꓾ ꓐꓰ ꓠꓯ ꓞꓲꓼ ꓢꓷꓸ ꓢꓴ ꓐꓴ ꓡꓰ ꓐꓯ ꓡꓳ꓿
ꓖꓳ ꓡꓱ ꓥ ꓟꓲ ꓬꓯꓻ ꓜꓲꓽ ꓕꓱ ꓟ ꓠꓬ ꓡꓲ-ꓢꓴ ꓐꓴ ꓖꓪꓽ ꓓꓴ ꓐꓵ ꓞꓲꓽ ꓣꓱꓽ ꓬꓰˍ ꓟ ꓜꓲꓽ ꓟꓽ ꓥ꓿ ꓜꓲꓽ ꓬꓲꓸ ꓫꓵꓽ ꓠꓬ ꓥ ꓢꓲꓸ ꓠꓱꓸ ꓐꓯꓼ ꓕꓲ ꓫꓵꓽ ꓥ ꓡꓳ꓿
ꓙꓵꓽ ꓗ ꓕꓱ ꓟ ꓪꓴꓸ ꓔꓴˍ 2022 ꓘꓳꓼ 6 ꓦ 9 ꓠꓬꓲ ꓕꓯꓽ ꓧꓶꓸ ꓕꓯꓽ ꓬꓯꓻ ꓜꓲꓽ ꓣꓱꓽ ꓟ ꓑꓶꓸ ꓓꓴ ꓐꓱ ꓓꓴꓽ ꓗꓪ ꓡꓴꓽ ꓔꓸ ꓢꓴ 4200 ꓣꓳ ꓔꓯ ꓥ ꓟꓲ ꓡꓲꓹ ꓖꓶ ꓩꓴ ꓡꓳ꓿
ꓬꓲꓸ ꓚꓰ꓾ BBC, Bangkok Post
