ꓡ ꓠꓹ ꓟ 2022 ꓘꓳꓼ 6 ꓦ 1 ꓠꓬꓲ ꓗꓪ ꓐꓰ ꓪꓴꓸ ꓔꓴ ꓢꓲꓸ ꓕꓮꓲꓹ ꓗꓴꓷꓼ ꓗꓪ ꓬꓰ ꓟꓽ ꓓ ꓟ ꓙꓵꓽ ꓗ ꓫꓵꓼ (4) ꓫꓵꓽ ꓓꓳ ꓡ ꓡꓳ=
ꓙꓵꓽ ꓗ ꓕꓱ ꓟ ꓔꓯ Thailand’s Personal Data Protection Act (PDPA) ꓥ ꓢꓲ꓾ ꓡ ꓞꓳ ꓕꓲ ꓣꓳ ꓣꓳ ꓟꓸ ꓟꓲꓽ꓾ ꓐꓬꓱꓽ ꓐꓰ꓾ ꓢꓷꓸ ꓡꓰ ꓓꓴ ꓚꓺ ꓟꓲꓽ ꓔꓯ ꓠꓱꓸ ꓐꓯꓼ ꓢꓴ ꓢꓷꓸ ꓙꓵꓽ ꓪ ꓟꓽ ꓙꓳ ꓠꓹ ꓟ ꓗꓽ ꓙ ꓓꓴ ꓙꓵꓽ ꓗ ꓥ ꓡꓳ= ꓙꓵꓽ ꓗ ꓗꓪ ꓬꓲꓸ ꓓꓽ ꓟ (4) ꓝꓲꓸ ꓠꓬ꓾
- (1) ꓐꓬꓱꓽ ꓔꓳꓹ ꓓꓱꓽ ꓕ ꓑꓳꓸ ꓠꓱꓸ ꓐꓯꓼ ꓢꓴ ꓐꓬꓱꓽ ꓐ ꓟꓽ ꓓ= ꓠꓱꓸ ꓐꓯꓼ ꓢꓴ ꓐꓬꓱꓽ ꓓꓱꓽ ꓐ ꓡ ꓠ ꓔꓸ ꓠꓬ꓾ ꓬꓲꓸ ꓪ ꓗꓪ ꓐꓰ facebook, Titok ꓗꓪ ꓣꓱꓽ ꓓ_ ꓡꓳ꓾ ꓐꓯ_ ꓟ ꓝꓲꓺ ꓘꓶꓽ ꓙꓳ ꓠꓯ ꓡꓳ= ꓐꓬꓱꓽ ꓗꓪ ꓚꓬꓼ ꓞꓹ ꓢꓴ ꓠꓲꓹ ꓟ ꓪꓽ ꓢꓲꓸ facebook, Titok ꓗꓪ ꓗꓶꓺ ꓩꓴ ꓗꓸ ꓠꓯꓸ ꓬꓲꓸ ꓠꓲꓹ ꓟ ꓡꓶꓸ ꓙꓰ ꓢꓲꓸ ꓖꓳ ꓗꓪ ꓐꓰ ꓣꓴ ꓞꓰ ꓩꓴ ꓙ ꓡꓯ ꓓꓰꓽ ꓡ ꓠꓬ ꓣꓴ ꓞꓰ ꓠ ꓔꓸ ꓡꓳ= ꓟꓽ ꓥ ꓠꓬ ꓠꓴ ꓐꓬꓱꓽ ꓗꓪ ꓔꓺ ꓔꓬ ꓢꓴ ꓐꓴ ꓡꓰ ꓫꓵꓽ ꓪꓴ ꓬꓰ ꓡ ꓢꓲꓸ ꓠꓴ ꓠꓬ ꓕꓳ ꓦꓲ ꓗꓪ ꓓꓵꓽ ꓙꓰ ꓡ ꓥꓳ=
- (2) ꓡꓲꓦꓰ ꓬꓰ_ ꓕꓯꓽ ꓢꓴ ꓒꓬꓱꓽ ꓢꓴ ꓐꓬꓱꓽ ꓐ ꓝꓲ ꓟꓽ ꓓ= ꓕꓯꓽ ꓢꓲ ꓗꓪ ꓟ ꓡꓰ ꓐꓰ ꓢꓴ ꓡꓰ ꓬꓰ ꓝꓲ ꓡ ꓟ ꓕꓵꓼ ꓪ ꓙꓳ ꓠ ꓔꓸ ꓡꓳ= ꓝꓮꓲ ꓬꓲꓸ ꓟꓽ ꓠꓲꓹ ꓫꓵ_ ꓠꓬ upload ꓬꓰ ꓓꓳ ꓔꓸ ꓟ ꓮ ꓙꓵꓽ ꓢꓲꓹ ꓖꓶꓽ ꓠ ꓔꓸ ꓡꓳ= ꓖꓳ ꓡꓱ ꓟꓽ ꓬꓰ ꓠꓬ ꓕꓳ ꓦꓲ ꓗꓪ ꓓꓵꓽ ꓙꓰ ꓪ ꓥꓳ=
- (3) ꓝꓮꓲ ꓠꓱꓸ ꓐꓯꓼ ꓢꓴ ꓐꓬꓱꓽ꓾ ꓚ ꓟꓲꓽ꓾ Identity Card ꓕꓱ ꓡꓱꓳ ꓕꓲ ꓫꓵꓽ ꓫꓵꓽ ꓔꓯ Social Media ꓗꓪ ꓟꓳꓸ ꓖꓶꓽ ꓟꓽ ꓓ=
- (4) ꓣꓳ ꓦꓲ꓾ ꓙꓲꓺ ꓔꓲ꓾ ꓣꓳ ꓔꓬ ꓖꓴ ꓗꓪ ꓚꓚꓔꓦ ꓔꓶꓺ ꓔꓸ ꓠꓬ “ꓕꓱ ꓗꓪ ꓚꓚꓔꓦ ꓔꓶꓺ ꓔꓸ ꓡꓳ” ꓐꓰ ꓐꓯ ꓢꓲꓸ ꓢꓷꓸ ꓡꓰ ꓓꓴ ꓟꓳꓸ ꓖꓶ ꓔꓸ ꓠ ꓗ ꓡꓳ= ꓘꓴꓽ ꓘꓴꓽ ꓠꓯ ꓠꓯ ꓬꓰ ꓔꓸ ꓟ ꓡꓰ ꓐꓰ ꓬꓰ ꓟꓽ ꓓ= ꓖꓳ ꓡꓱ ꓟꓳꓸ ꓖꓶ ꓔꓸ ꓠꓬ ꓬꓲꓸ ꓐꓬꓱꓽ ꓓꓱꓽ ꓪ ꓡꓰ ꓝꓲ ꓠꓲꓹ ꓟꓽ ꓫꓵ ꓢꓴ ꓐꓴ ꓠꓬ ꓖꓳ ꓗꓪ ꓙꓰ ꓟꓽ ꓓ꓾ ꓐꓰ ꓢꓷꓸ ꓡꓰꓳ=
Facebook, YouTube, Titok ꓡꓲꓳ ꓫꓵꓽ ꓗꓪ ꓟꓬꓱꓽ ꓬꓰ ꓢꓴ ꓐꓴ ꓠꓬ ꓙꓵꓽ ꓗ ꓕꓱ ꓟ ꓑꓶꓸ ꓓꓴ ꓟꓬꓱꓽ ꓬꓰ ꓫꓸ ꓓꓴ ꓒꓬꓱꓼ ꓡ ꓥꓳ= ꓬꓲꓸ ꓐꓬꓱꓽ ꓐ_ ꓢꓴ ꓮ ꓙꓵꓽ ꓠꓲꓹ ꓟ ꓪꓽ ꓠꓹ ꓟ (consent)꓾ ꓝꓮꓲ ꓬꓲꓸ ꓪ ꓠꓲꓹ ꓟ ꓟꓽ ꓒꓳꓹ ꓡꓰ ꓠꓹ ꓟ ꓬꓰ ꓫꓸ ꓓꓴ ꓒꓬꓱꓼ ꓡ ꓥꓳ=
ꓮ ꓟꓶ ꓕꓮꓲꓹ ꓟꓵꓽ ꓗꓪ ꓓꓳ ꓡ_ ꓟ ꓙꓵꓽ ꓗ ꓕꓱ ꓟ ꓠꓬ 2019 ꓘꓳꓼ ꓗꓪ ꓐꓰ ꓪꓴꓸ ꓔꓴ ꓢꓲꓸ ꓕꓮꓲꓹ ꓙꓵꓽ ꓗ ꓫꓬꓹ ꓜꓴ ꓗꓪ ꓖꓪ ꓙꓱ ꓖꓪ ꓟꓴ ꓪꓴꓸ ꓔꓴ ꓩꓴ ꓡ ꓟ ꓥ ꓢꓲ꓾ 2020 ꓘꓳꓼ ꓗꓪ ꓙꓵꓽ ꓗ ꓒꓬꓱꓼ ꓡ ꓗꓸ ꓠꓯꓸ 2022 ꓘꓳꓼ 6 ꓦ ꓗꓪ ꓐꓰ ꓙꓵꓽ ꓗ ꓣꓱꓽ ꓙꓰ ꓓꓴ ꓒꓬꓱꓼ ꓡ ꓟ ꓥ ꓡꓳ=
ꓢꓴ ꓚ ꓟꓲꓽ꓾ ꓐꓬꓱꓽ ꓐꓰ꓾ ꓢꓷꓸ ꓠꓲꓹ ꓬꓲꓸ ꓫꓵꓽ ꓬꓲꓸ ꓙꓰꓽ ꓔꓯ ꓡꓳꓸ ꓙ ꓗꓽ ꓙ_ ꓟ ꓙꓵꓽ ꓗ ꓕꓱ ꓟ ꓠꓬ ꓕꓮꓲꓹ ꓗꓴꓷꓼ ꓗꓪ ꓬꓲꓸ ꓪꓴꓸ ꓕꓲ ꓧꓪꓹ ꓓꓳ ꓡ ꓟ ꓥ ꓢꓲ꓾ ꓬꓴ-ꓣꓳ ꓟꓵꓽ ꓗꓪ ꓟ ꓡꓲꓽ ꓒꓰꓼ ꓙꓵꓽ ꓗ European General Data Protection Regulation (GDRP) ꓔꓯ_ ꓟꓲ ꓖꓼ ꓕꓲ_ ꓡꓳ꓾ ꓐꓯ ꓡꓳ=
