ꓐ-ꓣꓲ-ꓔꓲ (Britain) ꓗꓴꓷꓼ ꓗꓪ ꓗꓳ-ꓑꓶ-ꓠꓰ ꓕꓲ ꓐꓱ ꓠꓬ ꓬꓲꓸ ꓪ ꓟꓬꓱꓽ ꓬꓰ ꓢꓴ ꓐꓴ ꓔꓯ ꓕꓲꓽ ꓫꓵꓽ ꓠꓽ ꓘꓴꓽ ꓗꓪ 4 ꓠꓬꓲ ꓟꓬꓱꓽ ꓬꓰ꓾ 3 ꓠꓬꓲ ꓠꓽ ꓙꓵꓹ ꓖꓶꓽ ꓠꓹ ꓟ ꓟꓬꓱꓽ ꓬꓰ ꓚꓱꓹ ꓬꓲꓸ ꓡꓲꓽ ꓬꓲꓸ ꓫꓵꓼ ꓕꓲꓽ ꓟ ꓤꓹ ꓠꓬꓲ ꓓꓴ ꓬꓰ ꓔꓬ ꓡꓳ꓿
ꓐꓲ-ꓣ ꓗꓳ-ꓑꓶ-ꓠꓰ Pressure Drop ꓐꓰ ꓠꓱꓸ ꓐꓯꓼ ꓗꓳ-ꓑꓶ-ꓠꓰ (60) ꓟ ꓛꓲ ꓠꓬ ꓕꓱ ꓕꓲꓽ ꓚꓱꓹ ꓔꓯ ꓤꓹ ꓠꓬꓲ ꓓꓴ ꓥꓳ ꓐꓯ ꓔꓸ ꓡꓳ꓿ ꓖꓳ ꓗꓪ ꓟꓬꓱꓽ ꓬꓰ ꓢꓴ 3000 ꓣꓳ ꓔꓯ ꓟꓲꓸ ꓕꓯꓽ ꓤꓹ ꓠꓬꓲ ꓝꓲ ꓠꓹ ꓟ ꓥ ꓡꓳ꓿
ꓟꓬꓱꓽ ꓬꓰ ꓢꓴ ꓐꓴ ꓔꓯ ꓧꓶꓸ ꓕꓯꓽ ꓪˍ ꓟ ꓪꓽ ꓒꓵꓽ ꓟꓽ ꓞꓰ ꓞꓰ ꓒ ꓐꓲ ꓖꓶꓽ ꓢꓲꓸ ꓕꓲꓽ ꓫꓵꓽ ꓠꓽ ꓗꓪ 4 ꓠꓬꓲˍ ꓡꓰꓽ ꓟꓬꓱꓽ ꓬꓰ ꓝꓲ ꓠꓹ ꓟ ꓓꓵꓽ ꓙ ꓚꓱꓹ ꓠꓬ꓾ꓟꓬꓱꓽ ꓬꓰ ꓢꓴ ꓐꓴ ꓠꓱꓸ ꓐꓯꓼ ꓢꓷꓸ ꓠꓲꓹ ꓢꓳ ꓚꓱꓹ꓾ ꓙ ꓡꓯ ꓘꓳ ꓚꓱꓹ ꓐꓰ꓾ ꓡ ꓞꓳ ꓔꓯ ꓫꓱꓸ ꓤꓼ ꓟꓬꓱꓽ ꓬꓰ ꓚꓱꓹ ꓗꓪ ꓬꓲꓸ ꓙꓵꓹ ꓖꓶꓽ ꓐ ꓡ ꓠꓹ ꓟ꓾ ꓟꓬꓱꓽ ꓬꓰ ꓔꓶꓸ ꓗꓪ ꓬꓲꓸ ꓐꓴ ꓬꓲꓸ ꓬꓲꓼ ꓟꓽ ꓗꓷ ꓡꓰ ꓠꓹ ꓥ ꓡꓳ꓾ ꓐꓯ ꓡꓳ꓿
ꓟꓬꓱꓽ ꓬꓰ ꓢꓴ ꓐꓴ ꓟꓬꓱꓽ ꓬꓰ ꓢꓯꓼ꓾ ꓖꓳ ꓓꓱꓽ ꓔꓬ ꓢ ꓚꓱꓹ ꓐꓰ꓾ ꓞꓳ ꓤ ꓙ ꓡꓯ ꓘꓳ ꓚꓱꓹ ꓗꓪ ꓪꓴꓽ ꓟꓴ ꓡ ꓠꓹ ꓟ ꓥꓳ ꓡꓳꓸ ꓔꓬ ꓡꓳ ꓐꓰ Pressure Drop ꓗꓳ-ꓑꓶ-ꓠꓰ ꓡꓰ ꓐꓯ ꓡꓳ꓿
ꓕꓱ ꓓꓵꓽ ꓙ ꓚꓱꓹ ꓡꓳ ꓚꓺ ꓢꓲ-ꓑꓲ- ꓮꓲꓼ-ꓢꓲ-ꓡ꓾ ꓴꓢꓮ꓾ ꓗ-ꓠꓯ-ꓓ꓾ ꓠꓰ-ꓬꓴ-ꓜꓲ-ꓡ꓾ ꓮꓳ-ꓢꓲ-ꓔꓯ-ꓡꓲ-ꓬ ꓗꓴꓷꓼ ꓐꓴ ꓥ ꓟꓲ ꓡ ꓠꓹ ꓟ 8 ꓦ ꓗꓪ ꓐꓰ ꓤꓹ ꓠꓬꓲ ꓪꓴꓸ ꓔꓴ ꓓꓴ ꓥꓳ꓾ ꓐꓯ ꓡꓳ꓿
ꓟꓬꓱꓽ ꓗꓪ ꓧꓶꓸ ꓕꓯꓽ ꓟ ꓛꓲ ꓬꓰ ꓐ ꓡ ꓢꓲꓸ ꓡ ꓞꓳ ꓐꓴ ꓗꓹ ꓛꓲ ꓡˍ ꓠꓬ ꓓꓵꓽ ꓙ ꓚꓱꓹ ꓕꓱ ꓟ ꓡꓳ ꓚ ꓕꓲ ꓟꓲ ꓠꓯ ꓡꓱꓸꓼ ꓗꓪ ꓟ ꓟꓬꓱꓽ ꓬꓰ ꓗꓳ-ꓑꓶ-ꓠꓰ ꓐꓴ ꓠꓬ ꓕꓲꓽ ꓠꓽ ꓗꓪ 4 ꓠꓬꓲ ꓟꓬꓱꓽ ꓬꓰ꓾ 3 ꓠꓬꓲ ꓠꓽ ꓚꓱꓹ ꓡꓶꓸ ꓑ ꓡ ꓐ ꓡ ꓥꓳ꓿
Ref: Nation World News & Hindustan
