1912 ꓘꓳꓼ ꓕꓯꓽ ꓬꓲꓻ ꓡꓴꓽ ꓐꓱ ꓗꓪ ꓔꓵꓸ ꓬꓰ ꓟ ꓔꓮꓲ-ꓔ-ꓠꓲꓼb(Titanic) ꓞꓽ ꓒꓳꓽ ꓓꓽ ꓟ ꓔꓯ ꓖꓼ ꓛꓳꓽ ꓠꓹ ꓟ ꓔꓮꓲ-ꓔ (Titan) ꓐꓯˍ ꓟ ꓮ ꓙꓬ ꓡꓱꓼ ꓡꓲꓺ ꓕꓲꓽ ꓟ ꓜꓶꓽ ꓢꓲꓸ ꓙꓰ ꓢꓴ (5) ꓣꓳ ꓕꓲ ꓡꓰ ꓫꓵꓻꓳ ꓐꓰ ꓴꓢꓮ ꓬꓲ ꓙꓬ ꓟꓯꓼ ꓜꓲꓽ Mauger ꓠꓰ ꓢꓷ ꓙ ꓟꓴ ꓙ ꓩꓴ ꓡ ꓡꓳ꓿
“ꓔꓮꓲ-ꓔ-ꓠꓲꓼ ꓞꓽ ꓒꓳꓽ ꓓꓽ ꓟ ꓒ ꓕꓲ 1600 ꓑꓯꓸ ꓛꓲ ꓗꓪ ꓔꓮꓲ-ꓔ ꓮ ꓙꓬ ꓡꓱꓼ ꓡꓲꓺ ꓬꓲꓸ ꓧꓶꓽ ꓬꓲꓸ ꓘꓰꓸ 5 ꓟ ꓧꓪ ꓟꓶꓳ꓿ ꓟꓳꓦ ꓛꓽ ꓓꓴ ꓙꓼ ꓗꓪ ꓐꓰ ꓕꓲꓽ ꓝꓸ ꓧꓪ ꓟꓳˍ ꓟ ꓥꓳ꓿ ꓖꓳ ꓟ ꓑꓶꓸ ꓓꓴ ꓜꓶꓽ ꓬꓰ ꓢꓴ (5) ꓣꓳ ꓡꓱꓸꓼ ꓫꓵꓻꓳ꓿ ꓬꓲꓸ ꓪ ꓫꓵꓻ ꓟꓳꓻ ꓔꓯ ꓣꓴ ꓪ ꓠꓹ ꓟ ꓠꓬ ꓟꓽ ꓢ=” ꓐꓰ ꓢꓷ ꓙ ꓟꓴ ꓙ ꓡꓳ꓿
ꓮꓸ ꓙꓬ ꓠꓯꓸ ꓠꓬꓽ ꓜꓲ ꓠꓰ꓾ ꓬꓲꓸ ꓥꓰꓸ ꓢꓯꓼ ꓑꓶꓸ ꓓꓴ ꓔꓮꓲ-ꓔ ꓮ ꓙꓬ ꓡꓱꓼ ꓡꓲꓺ ꓤꓹ ꓤꓼ ꓠꓬ ꓐꓶꓽ ꓢꓰꓸ ꓬꓰ ꓟ ꓥ ꓡꓳ꓾ ꓐꓯ ꓡꓳ꓿
ꓔꓮꓲ-ꓔ ꓡꓲꓺ ꓤꓹ ꓤꓼ ꓜꓶꓽ ꓬꓰ ꓢꓴ (5) ꓣꓳ ꓗꓪ ꓞꓳ ꓐꓳ ꓒꓽ ꓬꓲꓸ ꓒꓽ ꓬꓲꓸ ꓤꓽ ꓠꓬꓲ ꓣꓳ ꓐˍ ꓡꓳ꓿ ꓬꓲꓸ ꓪ ꓠꓬ (8) ꓠꓬꓲ ꓪꓽ ꓐꓶˍ ꓟ ꓙ ꓖꓴ ꓕꓱ ꓟ ꓐꓱ ꓶ ꓕꓲ ꓣꓳ ꓓꓳ ꓡ 25 ꓢꓯꓹ ꓐꓶ ꓔꓸ ꓟ ꓥ ꓡꓳ꓿
ꓬꓲꓸ ꓪ (5) ꓣꓳ ꓕꓲ ꓜꓴ ꓠꓬ 6 ꓦ 18 ꓠꓬꓲ (ꓢꓲ ꓒ ꓦꓬꓼ ꓠꓬꓲ) ꓕꓯꓽ ꓔꓮꓲ-ꓔꓮꓠ ꓮ ꓙꓬ ꓡꓱꓼ ꓡꓲꓺ ꓤꓹ ꓤꓼ ꓜꓶꓽ ꓙꓰ ꓟ ꓥ ꓢꓲ꓾ ꓠ ꓡꓲ 1 ꓙꓵꓹ 45 ꓧꓶꓺ ꓛꓲ ꓡꓳꓼ ꓗꓪ ꓚꓳꓸ ꓬꓲꓸ ꓓꓳꓽ ꓬꓲꓸ ꓢꓯꓼ ꓟꓽ ꓜꓳ ꓡ꓾ ꓓꓴꓽ ꓟꓶꓽ ꓬꓰˍ ꓟ ꓥ ꓡꓳ꓿
