ꓑꓴ-ꓔ-ꓳ ꓗꓪ ꓐꓰ ꓓꓴ-ꓐꓮꓲꓹ ꓗꓪ ꓟꓬꓱꓽ ꓬꓰ ꓙꓰ ꓢꓲꓸ ꓟꓶꓽ ꓬꓰꓳ ꓐꓯ ꓔꓬ ꓢꓴ ꓖꓳ-ꓖꓯꓸ ꓠꓰ-ꓢ ꓠꓬ ꓦꓲ ꓘꓴ ꓗꓪ ꓙ ꓡꓯ ꓘꓳ ꓪ ꓡꓰ ꓢꓲ꓾ ꓕꓱ ꓕꓲ ꓦ 21 ꓠꓬꓲ ꓕꓯꓽ ꓙꓱ ꓦꓲ ꓜꓶꓽ ꓢꓲꓸ ꓡꓽ ꓡ ꓓꓴ ꓥꓳ꓾ ꓐꓰ ꓓꓳꓽ ꓜꓳ ꓡ ꓡꓳ꓿
ꓬꓲꓸ ꓠꓬ ꓓꓴ-ꓐꓮꓲꓹ ꓗꓪ ꓙꓰ ꓛꓲ ꓢꓲꓸ ꓟꓬꓱꓽ ꓬꓰˍ ꓟ ꓗꓪ ꓫꓸ ꓓꓴ ꓔꓳꓹ ꓜꓳꓽ ꓢꓲꓸ ꓡꓽ ꓡ ꓓꓴ ꓟꓬꓱꓽ ꓝꓸ ꓙ ꓢꓴ (Agent) ꓐꓴ ꓖꓼ ꓙꓬ ꓗꓪ ꓙꓰˍ ꓠꓬ꓾ ꓟꓽ ꓡꓽ ꓡ ꓝꓲ꓾ ꓟꓬꓱꓽ ꓗꓪ ꓔꓲꓸ ꓧꓳꓽ ꓡꓲꓸ ꓩꓴ ꓡ ꓢꓲ꓾ ꓖꓳ ꓕꓲꓽ ꓠꓬꓲ ꓗꓪ ꓐꓰ ꓬꓲꓸ ꓔꓯ ꓦꓲ ꓗꓪ ꓐꓰ ꓙ ꓡꓯ ꓘꓳ ꓚꓱꓹ ꓟꓽ ꓙꓳ ꓡꓰˍ ꓟ ꓥ ꓡꓳ꓿
ꓖꓳ ꓟ ꓑꓶꓸ ꓓꓴ ꓟꓶꓽ ꓬꓰꓳ ꓓꓵꓽ ꓙ ꓢꓲꓸ ꓬꓲꓸ ꓐꓱ ꓶ ꓦꓲ ꓘꓴꓽ ꓢꓴ ꓙ ꓫꓸ ꓢꓲ꓾ ꓓꓳꓽ ꓐꓯ ꓒꓬꓱꓻ ꓔꓶꓸ ꓗꓪ ꓐꓰ꓾ ꓝꓮꓲ ꓠꓱꓸ ꓐꓯꓼ ꓙ ꓡꓯ ꓘꓳ ꓮ ꓟꓬꓹ ꓗꓪ ꓐꓰ ꓬꓰ ꓙ ꓐ ꓡ ꓢꓴ ꓡꓰ ꓧꓪ ꓙ꓾ ꓬꓰ ꓙ ꓡ ꓠꓹ ꓟ ꓓꓰꓽ ꓩꓴˍ ꓡꓳ꓿
ꓟꓲꓸ ꓟꓲ 2022 ꓘꓳꓼ 10 ꓦ 11 ꓠꓬꓲ ꓗꓪ ꓠꓬ ꓬꓲꓸ ꓬꓰ ꓙ ꓢꓴ ꓐꓴ ꓡꓰ ꓬꓲꓸ ꓔꓬ ꓖꓴ ꓧꓪ ꓟꓳꓻ ꓡꓰ ꓢꓲ꓾ ꓓꓴ-ꓐꓮꓲꓹ ꓗꓪ ꓐꓰ ꓟꓬ-ꓟ ꓗꓴꓷꓼ ꓗꓪ 10 ꓦ 21 ꓠꓬꓲ ꓙꓱ ꓦꓲ ꓗꓪ ꓐꓰ ꓡꓽ ꓡ ꓝꓲ ꓓꓴ ꓥꓳ꓾ ꓐꓯ ꓩꓴ ꓡ ꓡꓳ꓿
“ꓕꓲ ꓠꓲꓹ ꓕꓲ ꓪ ꓢꓯꓼ ꓕꓵꓼ ꓠꓬ ꓮ ꓫꓵꓽ ꓥ ꓟꓲ ꓬꓰ ꓐ ꓡ ꓡꓳ꓾ ꓐꓯˍ ꓟ ꓗꓸ ꓚꓵ ꓕꓲꓽ ꓟ ꓥꓳ꓿ ꓐꓶꓽ ꓟꓵꓽ ꓗꓪ ꓟꓬꓱꓽ ꓬꓰ ꓠꓲꓹ ꓫꓵ ꓢꓴ ꓐꓴ꓾ ꓦ ꓡꓱ ꓐꓳˍ ꓟ ꓟꓬꓱꓽ ꓧꓪ ꓙ ꓜꓴ꓾ ꓝꓸ ꓙ ꓢꓴ ꓙꓳˍ ꓕꓯꓽ ꓢꓲꓸ ꓙꓰ ꓠꓹ ꓟ ꓢꓯꓼ ꓖꓶ ꓠꓲꓹ ꓫꓵ ꓡꓳ꓾” ꓐꓰ ꓒꓯꓽ-ꓠꓹꓳ-ꓮꓳꓽ ꓡꓰ ꓚꓴ ꓬꓲꓹ ꓖꓶꓽ ꓔꓸ ꓡꓳ꓿
ꓟꓬ-ꓟ ꓗꓴꓷꓼ ꓗꓪ ꓐꓰ ꓞꓲꓼ ꓣꓳ ꓢꓴ ꓐꓴ ꓮ ꓟꓬꓹ ꓐꓶꓽ ꓗꓴꓷꓼ ꓗꓪ ꓒꓵꓽ ꓧꓪ ꓙꓰ ꓔꓬ ꓟ ꓦꓬꓼ ꓠꓬꓲ ꓥ ꓢꓲ꓾ ꓟꓬ-ꓟ ꓗꓴꓷꓼ ꓝꓲ ꓓꓴ ꓟꓽ ꓙꓳˍ ꓟ ꓗꓴꓷꓼ ꓐꓴ ꓗꓪ ꓟꓬꓱꓽ ꓬꓰ ꓙꓰ ꓔꓬ ꓢꓴ ꓐꓴ ꓠꓬ꓾ ꓕꓲ ꓫꓵꓽ ꓫꓵ ꓫꓸ ꓓꓴ ꓔꓳꓹ ꓜꓳꓽ ꓡ ꓕꓯꓽ ꓬꓰ ꓙ ꓢꓴ ꓧꓪ ꓫꓸ ꓟ ꓔꓳꓹ ꓜꓳꓽ ꓔꓬ ꓡꓳ꓿
