=======
“ꓠꓴ ꓔꓯ ꓬꓰ ꓐꓯ ꓦꓹ ꓓꓴ ꓟ ꓟꓽ ꓬꓰ ꓓꓳ_ ꓢꓰꓽ ꓥꓻꓰ”
“ꓟꓽ ꓦꓽ ꓦꓽ ꓔꓲꓸ ꓬꓰ ꓠꓬꓹ ꓥꓳ ꓟꓽ ꓡꓳ ꓑꓺꓳ꓾ ꓖꓽ ꓖꓶ ꓡꓯ”
“ꓠꓴ ꓥ ꓔꓯ ꓕꓲꓽ ꓘꓶꓽ ꓡꓲꓸ ꓕꓽ ꓐꓯ ꓡꓽ ꓥꓻꓰ?= ꓟꓬꓱꓽ ꓬꓰ ꓐꓴ ꓥꓳ ꓐꓯ ꓠꓴ ꓟꓬꓱꓽ ꓟ ꓠꓽ ꓩꓴ ꓓꓴ ꓥ= ꓬꓰ ꓐꓯ ꓦꓹ ꓓꓴ ꓟ ꓠꓲꓹ ꓞ ꓬꓰ= ꓜꓻ ꓕꓽ ꓜꓽ ꓢꓲꓽ꓾ ꓖꓳ ꓗꓪ ꓪꓰ ꓤꓼ ꓛꓲ ꓡꓻꓳ= ꓢꓲꓹ ꓗꓶꓸ ꓡꓳ ꓗꓶꓸ ꓟ ꓠꓲꓹ ꓞ ꓞꓲꓽ”
ꓜꓻ ꓜꓽ ꓙꓲ ꓔꓲ ꓗꓪ ꓮ-ꓓꓴ ꓕꓲ ꓣꓳ ꓮ ꓡꓴꓽ ꓮ ꓗꓶꓸ ꓞꓲꓽ ꓗꓹ ꓓꓴ ꓟ ꓡꓯ ꓒꓯꓹ ꓡꓲꓸ ꓒꓴ ꓠꓬꓼ ꓠꓬꓼ ꓔꓴꓸ ꓡꓴꓼ ꓡꓰ ꓖꓴꓳ= ꓡꓯ ꓒꓯꓹ ꓡꓱ ꓬꓰ ꓚꓰꓼ ꓥꓳ ꓐꓯ ꓠꓽ ꓡꓱ ꓬꓰ ꓗꓪ ꓛꓲ ꓥꓳ= ꓛꓲ ꓒꓯꓹ ꓖꓶ ꓡꓵ ꓟꓽ ꓠꓻ ꓠ ꓗꓷ ꓡꓰꓳ= ꓛꓲ ꓒꓯꓹ ꓓꓴꓸ ꓡꓰ ꓚꓰꓼ ꓥꓳ ꓐꓯ ꓠꓽ ꓓꓴꓸ ꓡꓰ ꓗꓪ ꓛꓲ ꓥꓳ= ꓡꓳ ꓑ ꓟ ꓟ ꓙꓲ ꓔꓲ ꓦꓲ ꓗꓪ ꓡꓳꓸ ꓛꓲ ꓡ ꓕꓽ ꓜ ꓜꓽ ꓠꓬꓹ ꓟꓽ ꓙꓲ ꓠꓰ ꓠꓲꓹ ꓞ ꓠꓲꓹ ꓧꓳꓽ ꓟꓬꓱꓽ ꓕꓲ ꓟ ꓑꓶꓸ ꓝꓸ ꓕꓲ ꓟ ꓠꓬꓹ ꓟꓽ ꓙ ꓟꓬꓱꓽ ꓬꓰ ꓠꓬꓹ ꓥ= ꓮ ꓐ ꓦꓲ ꓗꓪ ꓟꓬꓱꓽ ꓟꓽ ꓬꓰ ꓢꓴ ꓟ꓾ ꓮ ꓟ ꓦꓲ ꓗꓪ ꓐꓯ ꓞꓲꓽ ꓟꓽ ꓞꓲꓽ ꓢꓴ ꓟ ꓢꓴ ꓟꓵꓽ ꓢꓴ ꓡꓳ ꓗꓪ ꓜꓽ ꓓꓴ ꓜꓽ ꓙꓵꓹ ꓟꓽ ꓙꓳ ꓟꓬꓱꓽ ꓬꓰ ꓠ ꓗ ꓬꓰꓳ= ꓐꓶꓽ ꓒꓽ ꓟꓵꓽ ꓟ ꓗꓪ ꓦ ꓐ ꓪꓽ ꓒꓵꓽ ꓐꓱ ꓶ ꓚꓳ ꓑꓸ ꓗꓸ ꓠꓬꓹ ꓠ ꓗ ꓬꓰꓳ= ꓡꓽ ꓡꓲꓸ ꓦꓲ ꓗꓪ ꓥꓳ ꓡꓳꓸ ꓓꓴ ꓟꓽ ꓙꓳ꓾ ꓖꓰ ꓡꓲꓸ ꓖꓳ ꓑꓳꓸ ꓖꓰ ꓕꓳ ꓚꓱꓹ ꓧꓪ ꓟꓽ ꓟꓳ= ꓐꓶꓽ ꓟꓵꓽ ꓟꓶ-ꓡꓯ-ꓫ ꓟ ꓗꓪ꓾ ꓪꓽ ꓤ ꓬꓰ ꓢꓲꓸ ꓚꓳ ꓑꓸ ꓗꓸ꓾ ꓢꓴ ꓬꓰ ꓠꓲꓹ ꓟꓽ ꓫꓵ ꓟ ꓟꓬꓱꓽ ꓬꓰ ꓠꓬꓹ= ꓕꓲ ꓞꓲꓼ ꓕꓱ ꓗꓪ ꓟꓳꓻ ꓬꓰ ꓡ ꓥ ꓢꓶ? ꓕꓲ ꓤꓶ ꓕꓱ ꓗꓪ ꓡꓳꓹ ꓬꓰ ꓡ ꓥ ꓢꓶ?
ꓖꓳ ꓐꓯ ꓡꓲꓸ ꓢꓴ ꓟꓵꓽ ꓢꓴ ꓞꓳ ꓤ ꓡꓰ ꓐꓰ ꓪꓽ ꓒꓵꓽ ꓟꓽ ꓪ= ꓬꓲꓸ ꓙꓵꓹ ꓡꓲꓸ ꓕꓲ ꓫꓵꓽ꓾ ꓢꓯꓼ ꓕꓵꓼ ꓓꓴ ꓟ ꓕꓲ ꓡꓰꓹꓼ ꓥ ꓐꓯ ꓡꓲꓸ ꓪꓽ ꓒꓵꓽ ꓟ ꓟꓽ ꓪꓽ= ꓠꓯꓼ ꓠꓯꓼ ꓜꓽ ꓓꓴ ꓟꓽ ꓜꓽ ꓜꓽ ꓟꓶ ꓘꓶꓼ 2 ꓙꓵꓹ ꓗꓪ ꓟꓬꓱꓽ ꓬꓰ ꓔꓬ ꓟ ꓮ-ꓓꓴꓸ ꓕꓲ ꓣꓳ ꓠꓲꓹ ꓟ ꓠꓻ ꓞꓲꓼ ꓡꓳꓼ ꓬꓰꓳ= ꓟꓶ ꓘꓶꓼ 3 ꓙꓵꓹ ꓕꓽ ꓢꓲꓸ ꓠꓯꓼ ꓠꓯꓼ ꓜꓻ ꓜꓽ ꓔꓳꓼ ꓬꓰ ꓕꓯꓽ꓾ “ꓗ-ꓡꓲꓸ ꓗ-ꓡꓲꓸ ꓗ-ꓡꓲꓸ” ꓩꓴꓸ ꓢꓯꓼ ꓟꓶ ꓡꓻꓳ= ꓦꓲ ꓗꓪ ꓙꓳꓸ ꓮ ꓟ ꓠꓰ ꓘꓴ ꓡ ꓐꓶ=
“ꓮ ꓟ ꓥꓻꓰ? ꓠꓴ ꓪ ꓮ ꓡꓲ ꓥꓻꓰ?” ꓟꓬꓱꓽ ꓬꓰ ꓖꓴ ꓗꓪ ꓪꓴꓽ ꓧꓶ ꓓꓴ꓾ ꓠꓲꓹ ꓫꓸ ꓓꓴ ꓮ ꓙꓵꓽ ꓔꓯ ꓑꓲꓸ ꓔꓸ ꓢꓲ꓾ ꓗꓹ ꓛꓲ ꓢꓯꓼ ꓠꓰ ꓮ ꓟ ꓔꓯ ꓕꓱ ꓗꓷꓳ=
“ꓮ-ꓓꓴꓸꓳ꓾ ꓠꓴ ꓠꓽ ꓮ ꓐ ꓮ ꓟ ꓔꓯ ꓖꓶ ꓟꓲ ꓬꓰ ꓛꓶꓹꓳ= ꓩꓴꓸ ꓕꓲ ꓘꓶꓽ ꓖꓶ ꓟꓽ ꓕꓱ ꓡ= ꓕꓱ ꓗꓪ ꓠꓴ ꓒꓽ ꓠꓻ ꓠꓬꓹ ꓓꓴ ꓟ ꓠꓯ ꓞꓲꓼ ꓪꓴꓻ ꓒꓵꓽ ꓖꓶ ꓟꓽ ꓙꓳ ꓬꓰꓳ= ꓠꓲꓹ ꓞ ꓒꓴ ꓦ ꓩꓴ ꓡꓯ ꓟꓽ”
“ꓥ ꓡꓯ ꓮ ꓟꓻꓰ= ꓮ ꓠꓬ ꓦ ꓩꓴ ꓡꓯ ꓐꓯ”
“5 ꓢꓯꓹ ꓛꓲ ꓠꓲꓹ ꓞ ꓦ ꓩꓴ ꓡꓯ= ꓢꓴ ꓔꓯ ꓝꓱꓹ ꓠ ꓔꓸꓳ ꓫꓵꓽ ꓖꓶ ꓙꓳꓹ ꓥ=”
“ꓥ ꓡꓯ ꓮ ꓟꓻꓰ= ꓦ ꓐ ꓞꓰꓹ ꓬꓰ꓾ ꓪꓽ ꓒꓵꓽ ꓕꓵꓼ ꓪ ꓕꓽ ꓠꓲꓹ ꓞ ꓦ ꓩꓴ ꓡ ꓠꓰ= ꓧꓪꓸ ꓧꓪꓸꓼ” ꓸꓸꓸꓸ
ꓮ ꓐꓽ ꓠꓻꓳ ꓫꓵꓽ ꓠꓰ ꓬꓰ ꓙ ꓠ ꓔꓸ ꓠꓯꓸ ꓐꓯ ꓢꓲꓸ ꓠꓲꓹ ꓟ ꓫꓸ ꓫꓸ ꓤꓼ ꓗꓷ ꓡꓰꓳ= ꓜ ꓡꓲꓸ ꓜꓽ ꓟꓽ ꓟꓲ ꓡꓰꓳ= ꓖꓳ ꓓꓱꓽ ꓡꓲꓸ ꓳꓽ ꓧꓶ꓾ ꓠꓲꓹ ꓟ ꓡꓲꓸ ꓳꓽ ꓧꓶ=
=======
ꓗ-ꓡꓲꓸ ꓗ-ꓡꓲꓸ ꓗ-ꓡꓲꓸ ꓸꓸꓸꓸꓸꓸꓸ
“ꓠꓴ ꓠꓬꓲ ꓤꓽ ꓟ ꓢ-ꓗꓯ ꓕꓲ ꓗꓸ ꓪꓴꓻ ꓖꓴꓼ ꓡꓯ ꓙꓳꓽ= ꓒꓴ ꓟ ꓠꓲꓹ ꓞ ꓮ ꓔꓲꓸ ꓦ ꓩꓴ ꓡꓯ=”
=======
ꓗ-ꓡꓲꓸ ꓗ-ꓡꓲꓸ ꓗ-ꓡꓲꓸ ꓸꓸꓸꓸꓸꓸꓸ
“ꓠꓴ ꓠꓬꓲ ꓤꓽ ꓟ ꓬꓯ ꓕꓴꓸ ꓓꓴ ꓢ-ꓗꓯ ꓟ ꓑꓳꓺ ꓦ ꓐꓶ= ꓳꓸ ꓟ ꓫꓵꓸ ꓒꓵꓽ ꓠꓲꓹ ꓞ ꓦ ꓩꓴ ꓡꓯ’
=======
ꓗ-ꓡꓲꓸ ꓗ-ꓡꓲꓸ ꓗ-ꓡꓲꓸ ꓸꓸꓸꓸꓸꓸꓸ
“ꓠ ꓙꓲꓸ ꓟ ꓬꓲꓸ ꓦꓲ ꓢꓲ ꓒꓽ ꓔꓯ ꓧꓹ ꓧꓳ ꓢꓲꓸ ꓦꓲ ꓗꓪ ꓡꓽ ꓡꓻꓳ= ꓬꓲꓸ ꓤ ꓠꓱ ꓟ 4 ꓣꓳ ꓖꓶ ꓧꓳꓽ ꓛꓲ ꓡꓻꓳ= ꓮ ꓡꓲ ꓟ ꓬꓰ ꓜꓽ ꓒꓵꓽ ꓓꓳ ꓒꓵꓽ ꓟ ꓦ ꓡꓯ ꓟꓽ”
=======
ꓗ-ꓡꓲꓸ ꓗ-ꓡꓲꓸ ꓗ-ꓡꓲꓸ ꓸꓸꓸꓸꓸꓸꓸ
“ꓠꓴ ꓠꓬꓲ ꓤꓽ ꓟ ꓡꓯ ꓒꓯꓹ ꓝꓸ ꓕꓽ ꓢꓲꓸ ꓞꓳ ꓙꓲ ꓛꓱꓼ ꓡ ꓡꓲꓸ ꓟꓽ ꓢꓷꓸ= ꓕꓳ ꓶ ꓩꓴ ꓓꓴ ꓥꓳ= ꓠꓴ ꓮ ꓔꓲꓸ ꓔꓲꓸ ꓠꓸ ꓦꓹ ꓓꓴ ꓟ ꓠꓲꓹ ꓞ ꓡꓯ ꓘꓪ ꓩꓴ ꓡꓯ”
=======
ꓗ-ꓡꓲꓸ ꓗ-ꓡꓲꓸ ꓗ-ꓡꓲꓸ ꓸꓸꓸꓸꓸꓸꓸ
“ꓦꓲ ꓟ ꓡꓯꓹ ꓒꓲꓽ ꓪꓴ ꓓꓴ ꓬꓰ ꓠꓬꓹ ꓥ= ꓡꓯ ꓒꓲꓽ ꓪꓴ ꓓꓴ ꓠꓴ ꓠꓸ ꓦ ꓓꓴ ꓟ ꓠꓲꓹ ꓞ ꓡꓯ ꓘꓪ ꓡꓯ ꓟꓽ”
=======
ꓗ-ꓡꓲꓸ ꓗ-ꓡꓲꓸ ꓗ-ꓡꓲꓸ ꓸꓸꓸꓸꓸꓸꓸ
“ꓠꓴ ꓠꓬꓲ ꓤꓽ ꓟ ꓠꓰ ꓠꓴ ꓟ ꓡꓽ ꓔꓯ ꓔꓲꓸ ꓗꓷ ꓢꓲꓸ ꓠꓴ ꓟ ꓡꓽ ꓠꓽ ꓬꓲꓸ ꓒꓽ ꓦꓲ ꓗꓪ ꓡꓽ ꓬꓰꓳ ꓟꓽ= ꓖꓶ ꓬꓲꓽ ꓓꓴ ꓒꓴ ꓟ ꓜꓱ ꓜꓯꓼ ꓠꓬꓹ ꓟꓽ”
=======
ꓡꓲ-ꓢꓴ ꓐꓴ ꓢꓴ ꓟꓵꓽ ꓢꓴ ꓡꓳ ꓗꓪ ꓒꓴ ꓧꓪ ꓙꓰ ꓗꓴꓸ ꓡ ꓟ 20 ꓘꓳꓼ ꓖ ꓡꓯꓼ ꓖ ꓙꓲ ꓡꓰ ꓙꓳ ꓢꓰꓽ ꓡꓳ= ꓧꓶꓸ ꓕꓯ ꓡꓲ-ꓢꓴ ꓠꓬ ꓮ ꓖ ꓢꓲꓹ ꓠꓯ ꓡꓲ ꓗꓪ ꓒꓴ ꓧꓪ ꓥ= ꓫꓵ ꓚꓴꓸ ꓟꓵꓽ ꓘꓳꓽ ꓓꓳ ꓗꓪ ꓓꓶ꓾ ꓡ ꓢꓰꓼ ꓐꓶ-ꓠꓲ-ꓗꓳ ꓗꓪ ꓓꓶꓽ ꓐꓯ ꓚꓰꓼ ꓥ= ꓖꓳ ꓗꓸ ꓠꓯꓸ ꓥꓳꓽ ꓫꓵꓽ ꓢꓷꓸ ꓢꓴ꓾ ꓙꓰ ꓑꓶꓸ ꓢꓴ ꓞꓳ ꓡꓱ ꓤ ꓐꓴ ꓕꓮꓲ ꓗꓴꓷꓼ꓾ ꓟꓶ-ꓡꓯ-ꓫ ꓗꓴꓷꓼ꓾ ꓢꓰ-ꓖ-ꓑꓴ ꓗꓴꓷꓼ꓾ ꓧꓶꓽ ꓒꓽ ꓗꓴꓷꓼ ꓗꓪ ꓛꓲ ꓬꓰ ꓡꓳ= ꓦ ꓐ ꓪꓽ ꓗꓸ ꓙꓰ ꓟ ꓥꓳ= ꓬꓲꓸ ꓪ ꓔꓯ ꓠꓬ ꓮ ꓘꓶꓸ ꓞꓳ ꓒꓵꓽ ꓠꓯ ꓟ ꓐꓰ꓾ ꓠꓲꓹ ꓠꓵ ꓠꓯ ꓟ ꓡ ꓞꓳ ꓐꓴ ꓥ ꓡꓳ=
ꓬꓲꓸ ꓪ ꓕꓱ ꓡꓱ ꓢꓯꓼ ꓕꓵꓼ ꓙꓰ ꓟ ꓔꓯ ꓣꓳ ꓟꓵꓽ ꓣꓳ ꓡꓳ꓾ ꓣꓳ ꓘꓹ ꓗꓪ ꓜꓰ ꓒꓰꓹ ꓢꓴ ꓐꓴ ꓐꓹ ꓐ ꓟꓹ ꓟ ꓐꓴ꓾ ꓫꓵꓽ ꓤ ꓪꓳꓼ ꓤ ꓐꓴ ꓮ ꓡꓲ ꓓꓵꓽ ꓙ ꓔꓬ ꓡ? ꓣꓳ ꓤꓽ ꓠꓽ꓾ ꓣꓳ ꓤ ꓟꓶꓼ ꓠꓽ ꓒꓴ ꓞꓳꓽ ꓦꓲ ꓔꓯ ꓝꓸ ꓪ ꓬꓰꓳ ꓙ ꓟꓶ ꓡ? ꓣꓳ ꓕꓲ ꓦꓲ ꓫꓸ ꓓꓴ ꓮ ꓙꓵꓽ ꓔꓯ ꓚꓬꓴꓹ ꓐ ꓡꓻꓳ ꓓꓵꓽ ꓙ ꓡ? ꓡꓲ-ꓢꓴ ꓒꓴ ꓧꓪ ꓤꓽ ꓐꓴ꓾ ꓒꓴ ꓧꓪ ꓟꓶꓼ ꓐꓴ ꓔꓯ ꓟꓳꓸ ꓣꓳ ꓓꓵꓽ ꓙ ꓚꓱꓹ ꓟ ꓮ ꓡꓲ ꓥ ꓡ? ꓬꓲꓸ ꓪ ꓔꓯ ꓣꓳ ꓫꓱꓸ ꓤꓼ ꓔꓬ ꓡ? ꓟꓬꓱ ꓓꓳꓽ ꓖꓶ ꓔꓬ ꓡ? ꓣꓳ ꓮ ꓡꓲ ꓐꓰ ꓬꓲꓸ ꓪ ꓶꓻ ꓡꓳꓻ ꓡꓰ ꓝꓲ ꓐ ꓡ ꓡ? ꓣꓳ ꓓꓵꓽ ꓙ ꓚꓱꓹ ꓮ ꓡꓲ ꓙꓳ ꓠꓯ ꓡ? ꓡꓯ ꓫꓵꓺ ꓵꓺ ꓠꓬꓲ ꓡꓯ=
ꓥꓪ ꓤꓽ ꓐꓰ ꓤ ꓟꓶꓼ ꓐꓴ ꓐꓶꓽ ꓟꓵꓽ ꓗꓪ ꓟꓬꓱꓽ ꓬꓰ ꓔꓬ ꓠꓬꓲ꓾ ꓥꓪ ꓠꓴ ꓠꓽ ꓮ ꓫꓵꓽ ꓡꓲꓸ ꓬꓰ ꓟꓽ ꓛꓲꓳ ꓐꓰ ꓓꓵꓽ ꓙ ꓢꓴ ꓙꓳ ꓡꓳ= ꓕꓱ ꓟ ꓠꓬ ꓪꓴꓽ ꓟꓴ ꓡ ꓚꓱꓹ ꓟꓽ ꓥ= ꓣꓳ ꓤ ꓠꓱ ꓔꓯ ꓶꓻ ꓡꓲꓽ ꓓꓽ ꓟ ꓑꓵꓸ ꓠꓹ ꓟ ꓓꓵꓽ ꓙ ꓚꓱꓹ ꓥ ꓡꓳ= ꓕꓲ ꓦꓲ ꓡ ꓞꓳ ꓗꓪ 1 ꓣꓳ ꓡꓰꓽ ꓟꓬꓱ ꓬꓰ ꓢꓲꓸ ꓮ ꓙꓵꓽ ꓢꓴ ꓮ ꓫꓵꓽ ꓟꓬꓱꓽ ꓟꓽ ꓬꓰ ꓜꓽ ꓔꓬ ꓟ ꓠꓬ ꓫꓸ ꓡꓰ ꓚꓱꓹ ꓥꓳ= ꓬꓰ ꓐ ꓡ ꓡ ꓟꓬꓱꓽ ꓮ ꓙꓵꓽ ꓬꓰ ꓙꓲꓽ ꓙꓳ ꓡꓳ= ꓟꓽ ꓥ ꓠꓬ ꓒꓴ ꓠꓸ ꓪ ꓓꓴ ꓟꓽ ꓙꓳ= ꓟꓬꓱꓽ ꓬꓰ ꓢꓴ ꓟ ꓬꓰ ꓟꓽ ꓘꓴ ꓡ ꓕꓽ ꓳꓸ ꓔꓲꓸ ꓠꓬꓲꓽ ꓗꓯ ꓞꓳꓸ ꓡꓰ ꓓꓴ ꓓꓵꓽ ꓙ ꓚꓱꓹ ꓥꓳ=
ꓐꓶꓽ ꓟꓵꓽ ꓗꓪ ꓛꓲ ꓢꓴ ꓥ ꓟꓲ꓾ ꓖꓳ ꓕꓲ ꓟꓵꓽ ꓗꓪ ꓪ_ ꓟ ꓦ ꓐ ꓪꓽ ꓒꓵꓽ ꓠꓬ ꓖꓳ ꓕꓲ ꓟꓵꓽ ꓗꓪ ꓔꓲꓸ ꓣꓱꓽ ꓗꓹ ꓕꓯꓽ ꓮ ꓘꓶꓸ ꓠꓸ ꓪ ꓓꓴ ꓟꓽ ꓙꓳ= ꓳꓸ ꓟ ꓕꓯ ꓢꓲ ꓮ ꓡꓲ ꓟ ꓠꓰ ꓖꓶ ꓬꓲꓸ ꓪ ꓔꓯ ꓓꓰꓽ꓾ ꓮ ꓡꓲ ꓟ ꓠꓰ ꓖꓶ ꓬꓲꓸ ꓪ ꓔꓯ ꓗꓱꓸ ꓠꓬ꓾ ꓬꓲꓸ ꓪ ꓥ ꓟꓲ ꓠꓲꓹ ꓟ ꓢꓲ ꓡꓲꓹ ꓓꓴ ꓟꓽ ꓙꓳ= ꓬꓰ ꓠꓽ ꓮ ꓙꓵꓽ ꓢꓴ ꓔꓯ ꓬꓰ ꓙ ꓠꓲꓹ ꓫꓵ ꓥꓳ= ꓑꓶꓸ ꓠꓽ ꓑꓶꓸ ꓒꓽ ꓥ ꓠꓰ ꓢꓴ ꓟꓵꓽ ꓢꓴ ꓡꓳ ꓗꓪ ꓛꓲ ꓬꓰ ꓢꓴ ꓥꓳ= ꓖꓳ ꓡꓱˍ ꓟꓲ꓾ ꓬꓰ ꓙ ꓥꓳ ꓐꓯ ꓢꓲꓸ ꓕꓲ ꓫꓵꓽ ꓕꓲ ꓦꓲ ꓮ ꓙꓵꓽ ꓔꓯ ꓮ ꓡꓲ ꓟ ꓡꓲꓸ ꓔꓳꓹ ꓙ ꓟꓽ ꓐ ꓡ= ꓫꓸ ꓢꓴ ꓮ ꓙꓵꓽ ꓔꓯ ꓢ ꓡꓰ ꓝꓲ ꓠꓹ ꓟ꓾ ꓢꓲꓽ ꓒꓽ ꓮ-ꓢꓴ-ꓬꓼ ꓐꓴ꓾ ꓗꓴꓷꓼ ꓙꓵꓽ ꓢꓴ ꓡꓲꓸ ꓬꓰ ꓙ ꓟꓽ ꓐ ꓡ=
ꓕꓲ ꓣꓳ ꓔꓯ ꓕꓲ ꓧꓪꓹ ꓬꓰ ꓙ ꓠꓬ꓾ ꓓꓰꓽ ꓢꓴ 10 ꓣꓳ ꓙꓳ ꓕꓯꓽ ꓖꓶ ꓢꓴ ꓠꓬ 10 ꓧꓪꓹ ꓖꓶ ꓠ ꓗ ꓬꓰꓳ= ꓦ ꓐ ꓕꓲ ꓟ ꓗꓪ ꓕꓲ ꓣꓳ ꓔꓯ ꓬꓰ ꓙ ꓠꓬ꓾ ꓦ ꓐ 10 ꓟ (ꓕꓲ ꓘꓳꓼ) ꓡꓱꓸ ꓚꓲꓸ ꓛꓬ ꓐꓱ ꓶ ꓟꓽ ꓠꓸ ꓪ ꓪ꓾ ꓢꓴ ꓔꓯ ꓬꓰ ꓙ ꓠ ꓗꓷ ꓡꓰ ꓡꓳ= ꓕꓱ ꓟ ꓔꓯ ꓢꓷꓸ ꓢꓲꓸ ꓐꓶꓽ ꓟꓵꓽ ꓗꓪ ꓟꓬꓱꓽ ꓬꓰ ꓢꓴ ꓡꓰ ꓕꓲ ꓒꓯꓼ ꓬꓰ ꓙ ꓡ ꓡꓲꓸ ꓫꓸ ꓟꓳ ꓠꓲꓹ ꓙꓳ ꓠ ꓔꓸ꓾ ꓞꓳ ꓒꓵꓽ ꓡꓯ ꓘꓳ ꓠ ꓔꓸ ꓡꓳ= ꓝꓮꓲ ꓖꓶꓽ ꓟꓽ ꓐ ꓡ ꓥ ꓟꓲ ꓠꓲꓹ ꓗꓶ ꓟꓬ ꓗꓶ ꓟꓽ ꓓ= ꓮ-ꓢꓴ-ꓬꓼ ꓡꓲꓸ ꓣꓳ ꓫꓸ ꓟ ꓮ ꓙꓵꓽ ꓗꓪ ꓮ ꓫꓵꓽ ꓬꓰ ꓖꓶ ꓟꓽ ꓐ ꓡ ꓟ ꓔꓯ ꓓꓵꓽ ꓙ ꓠꓬꓲ=
ꓢꓴ ꓟꓵꓽ ꓗꓪ ꓟꓬꓱꓽ ꓬꓰ ꓔꓬ ꓢꓴ ꓐꓴ ꓐꓰ ꓗꓳꓸ ꓙꓲꓽ ꓙꓳ ꓢꓲ꓾ ꓠꓲꓹ ꓟ ꓫꓸ ꓓꓴ ꓝꓮꓲ ꓕꓲ ꓫꓵꓽ ꓠꓬ꓾ ꓦꓲ ꓗꓪ ꓟ ꓫꓵꓽ ꓪꓴ ꓮ ꓙꓵꓽ꓾ ꓫꓸ ꓓꓳꓽ ꓮ ꓙꓵꓽ ꓬꓲꓸ ꓔꓯ ꓐꓯ ꓖꓶ_ ꓟ ꓥ ꓐꓶ= ꓟꓬꓱꓽ ꓗꓪ ꓡꓲꓸ ꓠꓲꓹ ꓟ ꓫꓸ ꓠꓰ ꓟꓽ ꓓ꓾ ꓓꓵꓽ ꓙ ꓪꓴꓽ ꓧꓶ ꓠꓰ ꓟꓽ ꓓ ꓟ ꓗꓪ꓾ ꓦꓲ ꓗꓪ ꓐꓰ ꓩꓴꓸ ꓕꓱ ꓡ ꓕ ꓑꓳꓸ ꓠꓲꓹ ꓟ ꓫꓸ ꓓꓳꓽ ꓙꓳꓸ ꓙꓳꓽ ꓕꓱ ꓪ ꓡꓰ ꓟ ꓥ ꓐꓶ= ꓒꓴ ꓧꓪ ꓤꓽ ꓐꓴ꓾ ꓒꓴ ꓧꓪ ꓟꓶꓼ ꓐꓴ ꓔꓯ ꓢꓯꓼ ꓐꓽ ꓡꓰ ꓝꓲ ꓟ ꓚꓱꓹ ꓥ ꓐꓶ= ꓠꓲꓹ ꓫꓸ ꓡꓰ ꓝꓲ ꓟ ꓫꓶꓹ ꓥ ꓐꓶ= ꓫꓸ ꓓꓴ ꓮ ꓔꓲꓸ ꓔꓲꓸ ꓤꓼ ꓠꓽ ꓐꓯ ꓖꓶ ꓟꓽ ꓛꓲ= ꓐꓹ ꓐ ꓟꓹ ꓟ ꓐꓴ꓾ ꓕꓲ ꓫꓵꓽ ꓕꓲ ꓪꓳꓼ ꓐꓴ ꓗꓹ ꓛꓲ ꓛꓲ ꓔꓬ ꓟ ꓓꓳꓽ ꓠꓬ ꓬꓲꓸ ꓪ ꓐꓱ ꓶ ꓢꓯꓼ ꓪ ꓥ ꓡꓳ=
ꓕꓱ ꓟ ꓠꓬ ꓣꓳ ꓠꓬꓲꓽ ꓒꓳꓹ ꓠꓬꓲꓽ ꓙ ꓓꓵꓽ ꓙ ꓙ ꓠ ꓗꓹ ꓟ ꓥ ꓐꓶ= ꓪꓴꓽ ꓧꓶ ꓔꓬ ꓢꓴ ꓔꓯ ꓟꓬꓽ ꓠꓬꓲ ꓶꓻ ꓡꓲꓽ ꓓꓽ ꓟ ꓑꓵꓸ ꓟꓽ ꓓ= ꓗꓹ ꓛꓲ ꓟ ꓓꓳꓽ꓾ ꓟꓬꓱ ꓓꓳ ꓖꓶ ꓟ ꓫꓸ ꓪ꓾ ꓠꓲꓹ ꓠꓵ ꓙ ꓗꓳ ꓟ ꓐꓯ ꓘꓶꓽ ꓠꓬ ꓢꓴ ꓟꓵꓽ ꓗꓪ ꓪꓴꓽ ꓧꓶ ꓔꓬ ꓢꓴ ꓐꓱ ꓶ ꓠꓯ ꓞꓲꓼ ꓓꓽ ꓟ ꓥ ꓡꓳ= ꓠꓲꓹ ꓟ ꓜꓲꓽ ꓓ ꓡꓰ ꓓꓴ꓾ ꓟꓬꓱ ꓬꓰ ꓢꓯꓼ ꓙꓳ ꓓꓴ ꓠꓯ ꓞꓲꓼ ꓥ ꓡꓳ=
ꓣꓳ ꓡꓲ-ꓢꓴ ꓤꓽ ꓐꓴ ꓢꓴ ꓟꓵꓽ ꓗꓪ ꓟꓬꓱꓽ ꓬꓰ ꓔꓬ ꓢꓴ ꓐꓴ ꓐꓰ꓾ ꓦ ꓗꓪ ꓔꓬ ꓒꓰꓹ ꓢꓴ ꓐꓴ ꓠꓬꓲꓽ ꓗꓴꓸ ꓚꓸ ꓗꓪ ꓕꓱ ꓡꓱꓳ ꓫꓵꓽ ꓓꓵꓽ ꓙ ꓚꓱꓹ ꓐꓰ꓾ ꓢꓷꓸ ꓠꓲꓹ ꓮ ꓘꓶꓸ ꓣꓱꓽ ꓬꓯꓼ ꓔꓬ ꓡꓳ= ꓪꓴꓽ ꓧꓶ ꓔꓬ ꓢꓴ ꓔꓯ ꓶꓻ ꓡꓲꓽ ꓓꓽ ꓟ ꓟꓽ ꓑꓵꓸ ꓪ ꓡꓰ ꓠꓹ ꓟ꓾ ꓠꓲꓹ ꓫꓸ ꓔꓬ ꓢꓴ ꓔꓯ ꓬꓲꓸ ꓐꓶꓹ ꓠꓲꓹ ꓫꓸ ꓟꓬ ꓫꓸ ꓓꓴ ꓟꓽ ꓒꓬꓱꓼ ꓡꓰ ꓠꓹ ꓟ ꓢꓳ ꓣꓴ ꓙꓰ ꓡꓯ=
ꓣꓳ ꓗꓴꓷꓼ ꓣꓳ ꓟꓵꓽ ꓫꓸ ꓠꓰ꓾ ꓢꓴ ꓟꓵꓽ ꓢꓴ ꓗꓴꓷꓼ ꓗꓪ ꓪꓽ ꓗꓸ ꓚꓳ ꓠ ꓗꓷ ꓡꓰ_ ꓟꓲ꓾ ꓕꓲ ꓠꓬꓲ ꓦꓲ ꓗꓪ ꓡꓽ ꓡ ꓢꓲ꓾ ꓕꓲ ꓠꓬꓲ ꓢꓷꓸ ꓠꓲꓹ ꓢꓳ ꓟꓶ ꓢꓲ꓾ ꓙꓲ ꓟ ꓬꓰ ꓐ ꓡ ꓠꓹ ꓟ ꓒꓴ ꓠꓸ ꓙ ꓓꓴ ꓬꓰ ꓡꓯ= 5-10 ꓘꓳꓼ ꓪꓽ ꓗꓸ ꓢꓲꓸ ꓦꓲ ꓗꓪ ꓒꓴ ꓕꓲ ꓒꓯꓼ ꓟꓽ ꓠꓸ ꓪ ꓡꓰ ꓢꓴ꓾ ꓮ ꓘꓶꓸ ꓙꓳ ꓡꓳ= ꓦꓲ ꓗꓪ ꓔꓬ ꓢꓴ ꓐꓴ ꓓꓵꓽ ꓙ ꓚꓱꓹ ꓥꓳꓽ ꓡꓰ ꓟ ꓑꓶꓸ ꓓꓴ꓾ ꓦ ꓩꓴ ꓡ ꓟ ꓒꓴ ꓮ ꓙꓵꓽ ꓜꓱꓽ ꓗꓷꓳ= ꓬꓲꓸ ꓐꓶꓹ ꓕꓲ ꓫꓵꓽ ꓢꓯꓼ ꓕꓵꓼ ꓓꓴ ꓟꓽ ꓬꓰ ꓐ ꓡ ꓢꓴ ꓟꓬꓽ ꓡꓳ= ꓒꓴ ꓧꓪ ꓤꓽ ꓐꓴ ꓐꓰ ꓟꓶꓼ ꓐꓴ ꓪꓴꓽ ꓧꓶ ꓡ ꓢꓲꓸ ꓦꓲ ꓗꓪ ꓡꓽ ꓛꓲ ꓡ ꓠꓬ꓾ ꓮ ꓫꓵꓽ ꓕꓲ ꓒꓯꓼ ꓟꓽ ꓥꓳꓸ ꓔꓸꓳ= ꓮ ꓟꓬ ꓛꓲ ꓫꓸ ꓠꓬꓲ ꓤꓼ ꓓꓴ ꓙꓳ ꓡ? ꓓꓵꓽ ꓙ ꓠꓬꓲ ꓡꓯ=
ꓣꓳ ꓡꓲ-ꓢꓴ ꓐꓴ ꓢꓴ ꓟꓵꓽ ꓗꓪ ꓒꓴ ꓧꓪ ꓫꓵ ꓧꓪ ꓙꓰ ꓟ 20 ꓘꓳꓼ ꓖꓼ ꓡꓯꓼ ꓖꓼ ꓙꓲ ꓟ ꓗꓪ ꓣꓳ ꓟꓵꓽ ꓣꓳ ꓘꓹ ꓗꓪ ꓐꓰ ꓓꓳ ꓙꓰ ꓢꓴ ꓐꓰ ꓠꓬꓹ ꓒꓰꓹ ꓢꓴ ꓐꓴ ꓠꓬꓲꓽ ꓗꓴꓸ ꓚꓸ ꓗꓪ ꓢꓷꓸ ꓙꓲꓽ ꓙꓳˍ ꓟ ꓢꓷꓸ ꓢꓲꓸ ꓠꓵ ꓠꓲꓹ ꓪꓴꓽ ꓡ ꓠꓹ ꓟ ꓥꓳ ꓡꓳꓸ ꓢꓲ꓾
=======
